Category: اہم خبریں

فیلڈ مارشل سید عاصم منیر نے صدر ہاؤس میں صحافیوں سے غیر رسمی گفتگو کرتے ہوئے کہا کہ معرکہ حق میں فتح ہماری نہیں بلکہ اللہ تعالی کی طرف سے ہمیں تحفہ ہے۔پاکستان امن پسند ملک ہے لیکن اگر ہم پر جنگ مسلط کی گئی تو ہمارا جواب وہی ہو گا جو مئی میں تھا۔اللہ کے حکم اور اس کے فرمان کے مطابق اپنے فرائض کی انجام دہی کرتا ہوں،

اسلام آباد میں منعقدہ ایک پروقار تقریب میں اردن کے بادشاہ عبداللہ دوم کو ایوانِ صدر میں اعزاز سے نوازا گیا، اس موقع پر تقریب میں شریک فیلڈ مارشل سید عاصم منیر کو بھی خصوصی پذیرائی حاصل ہوئی۔تقریب کے بعد فیلڈ مارشل عاصم منیر نے صحافیوں سے غیر رسمی گفتگو کی، جس میں انہوں نے بھارت کے ساتھ جنگ کے دوران حاصل ہونے والی کامیابی کا ذکر کرتے ہوئے کہا کہ بھارت کے خلاف جنگ میں فتح ہماری نہیں، اللہ کی طرف سے ملی،انہوں نے اس موقع پر ایک قرآنی آیت کا حوالہ بھی دیا۔فیلڈ مارشل سید عاصم منیر نے کہا کہ
اللہ کی مدد شامل ہو تب ہی فتح و کامیابی ممکن ہوتی ہے،مسلمان کا جزبہ ایمانی اس کی سب سے بڑی قوت ہے،بھارت کے خلاف جنگ میں اللہ نے پاکستان کو سر بلند کیا اللہ کا خاص کرم ہے کہ پاکستان نے اپنے دشمن کو دھول چٹائی،تاریخ گواہ ہے کہ مسلمان سپاہی جب جنگوں میں دشمن پر ریت بھی پھینکتے تھے تو اللہ کی مدد شاملِ حال ہوتی تھی، پاکستان کو بھی جنگ میں ملنے والی نصرت اللہ ہی کی جانب سے تھی، اور یہی جذبہ ہماری اصل قوت ہے، پاکستان کی کامیابیاں محض عسکری حکمتِ عملی کا نتیجہ نہیں بلکہ ایمان، یقین اور اللہ کی مدد کا حصہ بھی ہیں

قلات ٹول پلازہ کے قریب سیکیورٹی فورسز نے ایک آپریشن کے دوران ایک دہشت گرد کو ہلاک جبکہ دو کو شدید زخمی کردیا۔ کارروائی اس وقت عمل میں آئی جب فورسز نے پہاڑی علاقے میں سرچ آپریشن کے دوران مسلح افراد کی فائرنگ کا جواب دیا۔موقع سے تین موٹر سائیکلیں، سب مشین گن کا میگزین، 500 گرام بارودی مواد اور راشن برآمد ہوا۔ ذرائع کا کہنا ہے کہ یہ دہشت گرد مسافروں کو لوٹنے اور علاقے میں خوف و ہراس پھیلانے کی منصوبہ بندی کر رہے تھے۔

بلوچ لبریشن آرمی (بی ایل اے) نے ضلع کیچ کے علاقوں رہی ناگور اور سمی کلاغ میں فوجی چوکیوں پر حملوں کی ذمہ داری قبول کر لی ہے۔ابتدائی اطلاعات کے مطابق دونوں چوکیوں پر بھاری اسلحہ استعمال ہوا، تاہم ہلاکتوں اور نقصان کی حتمی تفصیلات سامنے نہیں آئیں۔ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ علاقے میں سیکیورٹی مزید سخت کر دی گئی ہے۔

پنجگور میں انٹیلیجنس کی بنیاد پر کیے گئے آپریشن میں سیکیورٹی فورسز نے ’’فتنۂ ہندوستان‘‘ نامی گروہ کے چار دہشت گردوں کو ہلاک کر دیا۔آپریشن خفیہ اطلاعات ملنے کے بعد کیا گیا جس کے دوران دہشت گردوں نے مزاحمت کی، تاہم فورسز نے انہیں کامیابی سے ناکارہ بنا دیا۔ علاقے میں سرچ اینڈ کلیئرنس آپریشن جاری ہے۔

میری خیل اڈہ کے علاقے میں سیکیورٹی فورسز نے کارروائی کرتے ہوئے اہم مطلوب دہشت گرد رہنما ابوزر تشکیل کو نشانہ بنایا۔ کارروائی میں چار دہشت گرد مارے گئے جبکہ متعدد زخمی ہونے کی اطلاع ہے۔حکام کے مطابق کارروائی مصدقہ انٹیلیجنس اطلاعات پر کی گئی تھی، اور اس سے علاقے میں موجود شدت پسند نیٹ ورک کو بڑا دھچکا لگا ہے۔

تحریک طالبان پاکستان (ٹی ٹی پی) کے دہشت گردوں نے معصوم آباد کے قریب پل کے نیچے بارودی مواد نصب کرکے اہم پل تباہ کر دیا۔ دھماکے کے باعث پل کو شدید نقصان پہنچا لیکن خوش قسمتی سے کوئی جانی نقصان نہیں ہوا۔
سیکیورٹی فورسز اور پولیس نے علاقے کو گھیرے میں لیکر شواہد اکٹھے کیے جبکہ بم ڈسپوزل اسکواڈ نے دھماکے میں استعمال ہونے والے مواد کا جائزہ لیا۔ علاقے کے عوام نے حملے کی شدید مذمت کرتے ہوئے حکومت سے سیکیورٹی بڑھانے کا مطالبہ کیا۔

مقامی پولیس اور عوام کے مشترکہ آپریشن میں متعدد دہشت گرد ہلاک کر دیے گئے جبکہ تین کو گرفتار کر لیا گیا۔ حکام کے مطابق سات دہشت گردوں کی لاشیں سیکیورٹی اداروں کے قبضے میں ہیں۔یہ کارروائی علاقے میں دہشت گردوں کی بڑھتی ہوئی نقل و حرکت کو روکنے کے لیے کی گئی تھی۔ سیکیورٹی فورسز اور مقامی رضاکار مزید علاقوں کی صفائی کا عمل جاری رکھے ہوئے ہیں۔

شورکی کے علاقے میں سیکیورٹی فورسز نے اپنے قافلے پر ہونے والے حملے کو پسپا کرتے ہوئے ایک انتہائی مطلوب دہشت گرد ستار حسین کو گرفتار کر لیا۔حکام کے مطابق حملہ کالعدم زینبیون گروپ کے دہشت گردوں نے کیا تھا۔ علاقہ بدستور سیکیورٹی کے محاصرے میں ہے اور مزید ممکنہ سہولت کاروں کی تلاش جاری ہے۔

سیکیورٹی فورسز نے انٹیلیجنس معلومات کی بنیاد پر کارروائی کرتے ہوئے تین دہشت گرد ہلاک کر دیے، جن میں کالعدم ٹی ٹی پی کا اہم کمانڈر آریا بھی شامل ہے۔ذرائع کا کہنا ہے کہ کمانڈر آریا دو ماہ قبل بنوں کینٹ سے 100 سے زائد مویشیوں کی چوری میں بھی ملوث تھا۔ اس کی ہلاکت سے علاقے میں دہشت گرد نیٹ ورک کو بڑا نقصان پہنچا ہے۔علاقے میں سرچ آپریشن جاری ہے تاکہ کوئی بھی دہشت گرد فرار نہ ہو سکے۔

وزیراعظم محمد شہبازشریف نے آج شام وزیراعظم ہاؤس میں اردن کے شاہ عبداللہ (دوئم) ابن الحسین کا استقبال کیا۔

دونوں رہنماؤں میں ملاقات کے دوران بات چیت میں دوطرفہ تعلقات کو مزید گہرا کرنے کے ساتھ ساتھ اقتصادی، تجارت، سرمایہ کاری، صحت، سائنس و ٹیکنالوجی، تعلیم کے ساتھ ساتھ دفاعی شعبوں میں تعاون بڑھانے کے مواقع تلاش کرنے کی ضرورت پر زور دیا۔دونوں رہنماؤں نے پاکستان اور اردن کے درمیان اسٹریٹجک اور اقتصادی تعلقات کو بڑھانے, علاقائی اور بین الاقوامی فورمز پر باہمی فائدہ مند تعاون کو وسعت دینے کے عزم کا اعادہ کیا۔ وزیراعظم نے شاہ عبداللہ دوئم ابن الحسین کے دورہ پاکستان کا خیرمقدم کرتے ہوئے اسے پاکستان اور اردن کے درمیان پائیدار دوستی کے ثبوت کے طور پر اجاگر کیا۔

عزت مآب شاہ عبداللہ دوئم نے غزہ تنازعہ کے ساتھ ساتھ جنگ کے بعد غزہ میں استحکام اور انسانی ہمدردی کی کوششوں میں اردن کے کردار کے لیے پاکستان کی مسلسل حمایت کی تعریف کی۔ ملاقات میں علاقائی سلامتی، امن کے اقدامات پر بھی تفصیلی تبادلہء خیال کیا گیا۔فلسطین کے معاملے پر دونوں رہنماؤں نے جنگ کے بعد غزہ کے حوالے سے پاکستان اور اردن کے اصولی مؤقف بشمول غزہ سے فلسطینیوں کی کسی بھی نقل مکانی کے حوالے سے کسی بھی سمجھوتے سے گریز کو تسلیم کیا۔ دونوں رہنماؤں نے شرم الشیخ میں دستخط ہوئے غزہ امن معاہدے کے حوالے سے آٹھ عرب اسلامی ممالک، جو امریکہ کے ساتھ مل کر غزہ میں جنگ بندی پر کام کر رہے ہیں ،کے درمیان روابط مزید بڑھانے پر اتفاق کیا۔

وزیراعظم نے اردن کے شاہ عبداللہ دوئم کو پاکستان کے پڑوس بالخصوص افغانستان اور بھارت میں ہونے والی حالیہ پیش رفت سے بھی آگاہ کیا۔ اردن کے شاہ عبداللہ دوئم نے خطے میں امن و استحکام کو برقرار رکھنے میں پاکستان کے کلیدی کردار کا اعتراف کیا۔ محترم شاہ عبداللہ دوئم نے اپنے دورہء پاکستان کے دوران گرمجوشی سے مہمان نوازی پر پاکستانی عوام اور حکومت کا شکریہ ادا کیا۔

دونوں ممالک کے درمیان مختلف شعبوں میں تعاون بڑھانے کے حوالے سے مفاہمتی یادداشتوں کے تبادلے کی تقریب بھی منعقد ہوئی۔ تقریب میں دونوں رہنماؤں نے شرکت کی۔ میڈیا، ثقافت اور تعلیم کے شعبوں میں مفاہمت کی یادداشتوں کا تبادلہ ہوا۔ وزیر اعظم نے شاہ عبداللہ اور ان کے ساتھ آنے والے وفد کے اعزاز میں عشائیے کا بھی اہتمام کیا۔نائب وزیر اعظم اور وزیر خارجہ محمد اسحاق ڈار، چیف آف آرمی سٹاف فیلڈ مارشل سید عاصم منیر،وفاقی وزیر اطلاعات و نشریات عطاء اللہ تارڑ، وفاقی وزیر برائے موسمیاتی تبدیلی مصدق ملک اور اعلیٰ سرکاری افسران بھی ملاقات میں موجود تھے۔

سینئر صحافی و اینکر پرسن،سی ای او باغی ٹی وی مبشر لقمان کو ان کی صحافتی خدمات کے اعتراف میں لائف اچیومنٹ ایوارڈ سے نواز دیا گیا۔

ایوارڈ کی یہ پروقار تقریب لاہور کے ایک مقامی ہوٹل میں منعقد ہوئی، جس میں صحافی برادری، کاروباری شخصیات، دانشوروں اور شہریوں نے بڑی تعداد میں شرکت کی۔ایوارڈ سی ای او ایونٹس میڈیا سید نسیم نقوی اور صدر ویلنیس کلب آف پاکستان ڈاکٹر اظہار خان نے مبشر لقمان کو پیش کیا۔ اس موقع پر شرکاء نے ان کی قومی سطح پر خدمات، تحقیقاتی صحافت اور بے باک اندازِ گفتگو کو خراجِ تحسین پیش کیا۔نسیم نقوی اور ڈاکٹر اظہار خان نے اپنی گفتگو میں مبشر لقمان کی صحافتی خدمات پر انہیں سراہا،تقریب میں اسٹیج سیکرٹری کے فرائض اینکر پرسن ٹی وی ٹوڈے عابد نصیر نے سرانجام دیئے.

پاکستان میں لیجنڈ بننے کے لیے اکثر مرنا پڑتا ہے،مبشر لقمان
تقریب سے خطاب کرتے ہوئے مبشر لقمان نے تقریب کے انعقاد پر منتظمین کو مبارکباد دیتے ہوئے کہا کہ میں یہاں کئی اہم شخصیات سے ملا ہوں، راشد صاحب، غلام محی الدین صاحب، یہ ہمارے زندہ لیجنڈز ہیں۔ ہمارے ہاں لیجنڈ بننے کے لیے اکثر مرنا پڑتا ہے۔ دکھ اس بات کا ہے کہ ایسے لوگوں کو 14 اگست کے موقع پرتمغہ امتیاز ملنا چاہئے، جو بدقسمتی سے نہیں ملتے۔ اس کا مطلب ہے کہ حکومت میں لسٹیں بنانے والے لوگ اندھے، گونگے اور بہرے ہیں۔

مبشر لقمان نے کہا کہ پاکستان اس وقت جمود کا شکار ہے اور معاشی سرگرمیوں کو مضبوط بنائے بغیر مثبت تبدیلی ممکن نہیں۔اچھی خبر اُس وقت آئے گی جب کاروباری افراد کو آزادی سے کام کرنے کا موقع ملے گا، جب ایکسپورٹ بڑھے گی، آئی ٹی اور ٹیکنالوجی کے شعبے آگے آئیں گے۔ ملک تب آگے بڑھے گا جب نوجوانوں اور بزنس کمیونٹی کو سپورٹ ملے گی

پاکستانی قوم نے متحد ہو کر مودی کو سرنڈر کروایا،مبشر لقمان
مبشر لقمان نے افواج پاکستان کی خدمات کو سراہتے ہوئے چھ سے دس مئی کے دوران پاکستانی عوام کے مثالی کردار کا ذکر کیا۔ ان کا کہنا تھا ان دنوں نوجوانوں نے ڈرونز کا پیچھا کیا، ذمہ داری کا ثبوت دیا۔ ایک ویڈیو بھی ایسی نہیں آئی جس میں فوج حرکت کرتی دکھائی دے۔ اس کے برعکس بھارتی میڈیا نے جھوٹی خبریں چلائیں، لیکن پاکستانیوں نے ایک قوم بن کر میمز کے ذریعے دنیا کو سچ دکھایا۔ ہم اس لیے جیتے کیونکہ قوم متحد تھی اور سب نے فیصلہ کیا تھا کہ مودی کو سرنڈر کروانا ہے اور کروایا۔ ہم ملک کو آگے لے کر جا سکتے ہیں، پاکستان کی ترقی کا راستہ میرٹ، کاروباری آسانیوں اور نوجوانوں کی سرپرستی سے ہو کر گزرتا ہے۔اگر آج فیصلہ کر لیں کہ ہم بزنس مین کا ہاتھ بٹائیں گے، نوجوانوں کی حوصلہ افزائی کریں گے اور میرٹ پر فیصلے ہوں گے، تو ملک خودبخود ترقی کرے گا۔ عدلیہ اور میڈیا ٹھیک ہو جائیں تو پاکستان آگے بڑھ سکتا ہے

مبشر لقمان نے ماحولیاتی بحران، پانی کی قلت اور شجرکاری کی اہمیت پر زور دیتے ہوئے کہاموسمیاتی تبدیلی ایک بڑا بحران ہے۔ ہم سب کو ذمہ داری کا مظاہرہ کرنا ہوگا۔ ہر سڑک، انٹرچینج یا ہسپتال کا نام نواز شریف رکھنے سے مسائل حل نہیں ہوں گے۔ ناموں سے باہر نکل کر ملک کے لیے سوچنا ہوگا۔ہر شہری پانی کا کم استعمال کرے اور شجر کاری مہم میں حصہ لے.

صدرِ مملکت آصف علی زرداری نے پاکستان آرمی، ایئرفورس اور نیوی ترمیمی بلز 2025ء کی منظوری دے دی۔

قومی اسمبلی اور سینیٹ سے منظوی کے بعد صدرِ مملکت نے پاکستان آرمی ترمیمی بل 2025ء، پاکستان ایئر فورس ترمیمی بِل 2025ء اور پاکستان نیوی ترمیمی بل 2025ء کی منظوری دے دی ہے،منظوری کے بعد یہ تینوں بِل آئین اسلامی جمہوریہ پاکستان کا حصہ بن گئے ہیں،آرمی ایکٹ کی منظوری کے بعد آرمی چیف اب چیف آف ڈیفنس فورسز (سی ڈی او) بھی ہوں گے، اِن کے عہدے کی مدت پانچ برس ہوگی۔

اسلام آباد جوڈیشل کمپلیکس کچہری دھماکے کی تفتیش میں ایک اور اہم پیشرفت سامنے آ گئی، دھماکے میں استعمال ہونے والی خودکش جیکٹ تیار کرنے والا درزی اور جیکٹ اسلام آباد پہنچانے والا سہولتکار دونوں کو گرفتار کر لیا گیا ہے۔ ذرائع کا کہنا ہے کہ گرفتار ملزمان سے تحقیقات کا سلسلہ جاری ہے اور اہم انکشافات متوقع ہیں۔

تفتیشی ذرائع کے مطابق خودکش جیکٹ پشاور میں تیار کی گئی تھی جہاں اسے کچھ دن کے لیے ایک درزی کے پاس رکھا گیا تھا۔ ابتدائی تحقیقات میں انکشاف ہوا ہے کہ درزی کو اس بات کا علم تھا کہ وہ جس جیکٹ پر کام کر رہا ہے، وہ ایک خودکش جیکٹ ہے۔ انٹیلیجنس اداروں نے کارروائی کرتے ہوئے مذکورہ درزی کو گرفتار کر لیا ہے۔مزید معلومات کے مطابق خودکش جیکٹ کو پشاور سے اسلام آباد لانے کے لیے گڑکی بوری کا استعمال کیا گیا۔ سہولتکار نے جیکٹ کو انتہائی رازداری سے اسلام آباد منتقل کیا، جسے بعد ازاں حساس اداروں نے ایک خفیہ اطلاع پر گرفتار کر لیا۔ذرائع کا کہنا ہے کہ دونوں گرفتار شدہ ملزمان سے تفتیش جاری ہے اور امکان ظاہر کیا جا رہا ہے کہ اگلے چند روز میں دھماکے کے منصوبہ سازوں، معاون نیٹ ورک اور دیگر سہولتکاروں سے متعلق مزید اہم انکشافات سامنے آ سکتے ہیں۔ تفتیشی ٹیمیں اس معاملے کے تمام پہلوؤں کا باریک بینی سے جائزہ لے رہی ہیں تاکہ مکمل نیٹ ورک تک پہنچ کر آئندہ ایسے دہشت گرد حملوں کو روکا جا سکے۔

ڈی جی آئی ایس پی آر کی دی ملینیم یونیورسل کالج اور فیوچر ورلڈ سکول میں طلبہ و اساتذہ کے ساتھ خصوصی نشست ہوئی ہے

ڈی جی آئی ایس پی آر لیفٹینیٹ جنرل احمد شریف نے داخلی صورتحال اور ملکی دفاع کی اہمیت پر نوجوانوں سے اہم گفتگو کی،خصوصی نشست کے دوران طلباء اور اساتذہ کا پاک فوج کو زبردست خراج تحسین پیش کیا گیا،اس موقع پر اساتذہ نے اظہار خیال کرتے ہوئے کہا کہ؛پاک افواج خودمختاری اور قومی سالمیت کے تحفظ کے ساتھ عوام کی حفاظت بھی کرتی ہیں،آج کی نشست نے طلبہ کو روایتی سوچ سے ہٹ کر غوروفکر کرنے کا بھی موقع دیا، سیشن نے نوجوانوں کو پاکستانیّت، فعال شہریت اور سماجی ذمہ داریوں کے حقیقی تصور سے روشناس کیا

طلبہ کا کہنا تھا کہ؛معرکہ حق میں پاک افواج کے کردار نے نوجوانوں میں پاکستان کے نا قابل تسخیر دفاع کا عزم بڑھایا،آج کی نشست سے احساس ہوا کہ میڈیا پر خبروں کو بغیر تجزیہ اور تصدیق کے پھیلانا غیر ذمہ دارانہ عمل ہے،
پاک فوج ہم سے اور ہم پاک فوج سے ہیں،

پاکستان کے مختلف حصوں میں حالیہ سیکیورٹی صورتحال کے پیشِ نظر اہم پیش رفت سامنے آئی ہے، جن میں دہشت گردوں کی گرفتاری، خفیہ نیٹ ورکس کا خاتمہ، حساس واقعات کی تحقیقات میں کامیابی، قبائلی عمائدین کے جرگے اور حکومتی مشاورتی اجلاس شامل ہیں۔

اسلام آباد کی سیکٹر J-11 کچہری میں ہونے والے خودکش حملے کی تحقیقات میں اہم کامیابی حاصل ہوئی ہے۔ سیکیورٹی ذرائع کے مطابق، انٹیلی جنس بیورو اور کاؤنٹر ٹیررازم ڈیپارٹمنٹ نے مشترکہ کارروائی کرتے ہوئے کالعدم ٹی ٹی پی سے وابستہ پورا دہشت گرد سیل گرفتار کر لیا ہے۔ گرفتار افراد میں حملے کے مرکزی ہینڈلر، آپریشنل کمانڈر اور تین سہولت کار شامل ہیں۔تحقیقات میں انکشاف ہوا ہے کہ حملے کی منصوبہ بندی افغانستان میں موجود ٹی ٹی پی کے اہم کمانڈر اور خفیہ شعبے کے سربراہ سعید الرحمان عرف داداللہ نے کی۔ وہ ٹیلیگرام ایپ کے ذریعے پاکستان میں موجود کارندوں سے مسلسل رابطے میں رہا اور ہدایات دیتا رہا۔تفتیش کے دوران ہینڈلر ساجداللہ عرف شینہ نے اعتراف کیا کہ وہ خودکش بمبار عثمان عرف قاری کو افغانستان سے پاکستان لایا اور اسے اسلام آباد کے مضافات میں چھپائے رکھا۔ عثمان کا تعلق ننگرہار کے ضلع اچین کے شنواری قبیلے سے بتایا گیا ہے۔ اسے خودکش جیکٹ وہی پہنائی گئی جو ساجداللہ نے پشاور کے اخون بابا قبرستان سے وصول کی تھی۔ حملے کے روز یہی جیکٹ پہن کر عثمان ہدف کی جانب روانہ ہوا۔

کوئٹہ میں چیف سیکریٹری شکیل قادر خان کی زیر صدارت اعلیٰ سطح اجلاس میں لیویز فورس کو صوبائی پولیس میں ضم کرنے کے انتظامی و تکنیکی مراحل کو حتمی شکل دے دی گئی۔وزیراعلیٰ میر سرفراز بگٹی نے ہدایت کی کہ انضمام کو باوقار اور مؤثر طریقے سے مکمل کیا جائے اور اس دوران ترقیوں، تبادلوں اور سینیارٹی کے معاملات کو باقاعدہ منظوری دی جائے۔مزید برآں، اہلکاروں کے لیے جدید تربیتی ماڈیولز اور بنیادی پولیس ٹریننگ نافذ کرنے کی منظوری بھی دی گئی تاکہ صوبے میں امن و امان کے اداروں کے درمیان ہم آہنگی اور سروس ڈلیوری بہتر بنائی جا سکے۔

خیبر پختونخوا کے ضلع کرک کے علاقے بانڈہ داؤد شاہ میں سی ٹی ڈی اور پولیس کے مشترکہ آپریشن میں ایک انتہائی مطلوب دہشت گرد مارا گیا۔فائرنگ کے شدید تبادلے کے بعد ہلاک دہشت گرد کی شناخت سلیمان عرف اکرم کے نام سے ہوئی، جو کالعدم کلیم اللہ تشکیل گروہ کا اہم رکن اور متعدد دہشت گرد کارروائیوں میں ملوث تھا۔سیکیورٹی اداروں نے اس عزم کا اعادہ کیا ہے کہ صوبے سے دہشت گردی کے خاتمے کے لیے بھرپور کارروائیاں جاری رہیں گی۔

کوہاٹ میں خفیہ اطلاعات کی بنیاد پر سی ٹی ڈی اور پولیس کے مشترکہ آپریشن میں تین انتہائی مطلوب دہشت گرد مارے گئے۔ہلاک ہونے والے دہشت گردوں میں محمد قاسم ولد خانا جان، شاہمد ولد مشعل خان اور ساحر عرف پاٹا ولد نسیم شامل ہیں۔ یہ سب درہ آدم خیل سے سرگرم سعد عرف شاہ گل تشکیل گروہ سے وابستہ تھے اور متعدد حملوں میں ملوث تھے، جن میں کانسٹیبل حضرت عمر کی شہادت کا واقعہ بھی شامل ہے۔سیکیورٹی حکام کے مطابق کارروائیاں مکمل امن کے قیام تک جاری رہیں گی۔

بنوں میں بڑھتی ہوئی بدامنی اور اغوا کے واقعات کے تناظر میں سرکاری ملازمین کے لیے خصوصی سیکیورٹی ایڈوائزری جاری کی گئی ہے۔ہدایت نامہ کے مطابق سفر کے دوران سرکاری شناخت ظاہر نہ کریں،عوامی مقامات پر غیر ضروری وقت نہ گزاریں،غیر ضروری سفر اور رات کی نقل و حرکت سے گریز کریں،موبائل فون میں سرکاری و ذاتی ڈیٹا محفوظ رکھیں.مشکوک علاقوں اور غیر ضروری اجتماعات سے پرہیز کریں،رات گئے دستک دینے والے کے لیے دروازہ نہ کھولیں،حکام کے مطابق یہ اقدامات موجودہ حالات کے تقاضوں کے مطابق ضروری ہیں۔

خیبر ضلع باڑہ میں بارم خیل قبیلے کے مشران اور فرنٹیئر کور کے مابین بڑا جرگہ منعقد ہوا جس میں علاقے میں بڑھتی ہوئی بدامنی، جرائم اور منشیات کے پھیلاؤ پر تشویش کا اظہار کیا گیا۔جرگے میں “سپریم یونٹی کمیٹی” کے قیام کا بھی اعلان کیا گیا، جو علاقے میں جرائم پیشہ عناصر کی نشاندہی اور کارروائی میں معاونت کرے گی۔

تیراہ میدان میں گزشتہ رات دہشت گردوں نے منشیات مافیا کے تعاون سے سیکورٹی فورسز کی پانچ چوکیوں پر حملے کیے، جنہیں فوری جوابی کارروائی سے ناکام بنا دیا گیا۔ ابتدائی اطلاعات کے مطابق سات دہشت گرد مارے گئے جبکہ زخمیوں کو بعد ازاں اسپتال منتقل کیا گیا، جہاں اسے غلط طور پر ڈرون حملہ ظاہر کرنے کی کوشش کی گئی۔ذرائع کے مطابق زخمیوں کے زخم چھوٹے ہتھیاروں کی فائرنگ سے مطابقت رکھتے ہیں۔ کسی بھی زخمی میں ڈرون حملے کے مخصوص دھماکہ خیز زخم نہیں پائے گئے۔

باجوڑ میں مبینہ ڈرون حملے میں 12 سے 15 دہشت گردوں کی ہلاکت کی اطلاعات موصول ہوئی ہیں۔پولیس کے مطابق اس مقام پر مسلح افراد کی موجودگی کی پہلے سے اطلاع تھی۔ مزید حقائق کی تصدیق جاری ہے۔

شمالی وزیرستان کے اسپین وام کے گاؤں برکلی میں خفیہ اطلاع پر کیے گئے آپریشن کے دوران دہشت گرد عید مرجان کے تین مبینہ سہولت کار گرفتار کر لیے گئے۔گرفتار افراد میں اورنگزیب، امیر الرحمان اور مہرب عابد شامل ہیں۔ تینوں کو تفتیش کے لیے ہیڈکوارٹر منتقل کر دیا گیا ہے۔ عید مرجان کی گرفتاری کے لیے کارروائیاں جاری ہیں۔

باجوڑ میں سیکیورٹی فورسز کی حالیہ انٹیلی جنس بیسڈ کارروائی میں مارے جانے والوں میں کالعدم ٹی ٹی پی کے دو اہم کارندے سجاد اور حبیب کی شناخت کی تصدیق ہو گئی ہے۔سیکیورٹی اہلکاروں کے مطابق علاقے میں دہشت گرد نیٹ ورک کے خاتمے کے لیے کارروائیاں جاری ہیں۔

تیراہ ویلی میں سوشل میڈیا پر پھیلائے جانے والے اس دعوے کی سختی سے تردید کی گئی ہے کہ مسجد پر پاکستانی فورسز نے ڈرون حملہ کیا۔حیات آباد میڈیکل کمپلیکس کے ڈاکٹروں نے تصدیق کی ہے کہ زخمیوں کے زخم معمولی نوعیت کے ہیں اور کسی قسم کا ڈرون حملہ نہیں ہوا۔سیکیورٹی ذرائع کے مطابق واقعہ ذاتی دشمنی کا تھا، جسے فساد پھیلانے کے لیے غلط رنگ دیا جا رہا ہے۔

خیبر ضلع شلوبار میں شلوبار ارجالی ریور پوسٹ پر دہشت گردوں کی فائرنگ کا سیکیورٹی فورسز نے بھرپور جواب دیتے ہوئے حملہ ناکام بنا دیا۔جوابی کارروائی میں متعدد حملہ آور زخمی ہوئے جبکہ سیکیورٹی فورسز کے اہلکار محفوظ رہے۔ علاقے میں سرچ آپریشن جاری ہے۔