لندن:برطانیہ، پیٹرول، ڈیزل اور گیس بحران
پر قابو پانے کیلئے فوج سے مدد لینے کا فیصلہ ۔اطلاعات کے مطابق کورونا بحران اور بریگزٹ کے بعد جہاں برطانیہ میں لاری ڈرائیوروں کی شدید قلت نے سپلائی چین کو مفلوج کر کے رکھ دیا ہے وہیں پیٹرول ‘ ڈیزل اور گیس کا بحران سر چڑھ کا بولنے لگا،بحران پر قابو پانے کیلئے فوج سے بھی مدد لینے کی تجویز زیر غور آئی ہے،

سیکرٹری ٹرانسپورٹ گرانٹ شیپس نے موجودہ صورتحال پر برطانوی عوام کے نام پیغام میں کہا ہے کہ برطانوی باشندے معمول کے مطابق چلیں اور اپنے اعصاب کو پُرسکون رکھیں، حالات میں بہتری کیلئے بھر پور کوششیں جاری ہیں۔ گرانٹ شیپس نے ایچ جی وی ڈرائیوروں کی قلت کے معاملے سے نمٹنے کیلئے ہنگامی اقدامات کی طرف سے اشارہ کیا ہے ،

انہوں نے یہ بھی دعوی ٰ کیا کہ ٹرانسپورٹ فرمز ایسے ڈرائیوروں کو راغب کرنے کے لیے بھاری تنخواہوں کی پیشکش کر رہی ہیں جو اس انڈسٹری کو چھوڑ چکے ہیں۔حکومتی ذرائع کے مطابق ڈائوننگ اسٹریٹ کرسمس کے موقع پر حالات سے نمٹنے کے لیے انتہائی سنجیدگی جدوجہد کر رہی ہے، دوسری طرف وزرا نے شدید بحران کی صورت میں پیٹرول ٹینکر چلانے کیلئے فوج کو اسٹینڈ بائی رکھنے کے منصوبوں پر غور شروع کر دیا ہے۔

سیکرٹری ٹرانسپورٹ کا کہنا ہے کہ لوگوں کو حالات سے گھبرانے کی ضرورت نہیں وہ معمول کے مطابق کام جاری رکھیں۔ ایسیکس میں ایک بڑے پیٹرول پمپ کی طرف سے ڈیزل ختم ہونے کے اعلان کے بعد فور کورٹ کے باہر گاڑیوں کی میلوں لمبی قطاریں لگ گئیں، پیٹرول اسٹیشنوں کے باہر گاڑیوں کی لمبی قطاروں نے 1973کے اوپیک آئل بحران اور 2000کے ایندھن بحران کی یاد تازہ کر دی۔ برطانیہ میں خوراک اور ایندھن کی قلت سنگین مسئلہ بنتی جا رہی ہے، سپر مارکیٹوں میں گیس کی بڑھتی ہوئی قلت سے صارفین بھی سخت پریشان ہیں،

معروف کمپنی بی پی نے ٹیسکور ری فلنگ اسٹیشنوں کیلئے ضرورت کے مطابق مدد کرنے کا اعلان تو کیا ہے مگر گیس اور پیٹرول بحران بدستور قائم رہا تو یورپی یونین سے تجارت کیلئے برطانیہ کا مرکزی دروازہ بند ہونے کے خدشات تقویت اختیار کر جائیں گے ،پیٹرول ریٹیلرز ایسوسی ایشن کی طرف سے ڈرائیوروں کو خبردار کیا گیا ہے کہ وہ مقامی پیٹرول اسٹیشنوں کی ممکنہ بندش کے باعث گاڑیوں کے ٹینک میں ایندھن کی سطح ایک چوتھائی تک رکھیں ۔ لنکن شائر میں سبزیوں کی ایک معروف فرم کی طرف سے 30پائونڈ فی گھنٹہ ادائیگی کیلئے تشہیر کی جا رہی ہے،

سالانہ 62ہزار پائونڈز تک اجرت کی پیش کش کی گئی ہے۔ ،تیل سپلائی کرنے والی بڑی کمپنی بی جی کی طرف سے ڈرائیوروں کی قلت کے باعث ایندھن کی ترسیل کا نظام محدود کرنے کے اعلان سے سپر سٹور اور مارکیٹیں بھی سخت متاثر ہوئی ہیں جہاں کھانے پینے کی اشیاء کی قلت کا سامنا ہے اور باور کیا جا رہا ہے کہ حالات میں فوری بہتری نہ ہوئی تو کرسمس میں خوراک کا بحران سنگین صورتحال اختیار کر جائے گا۔

آئل کمپنی نے حکومت کو آگاہ کیا ہے کہ سپلائی چین کے بحران سے اس کی ریفائنریز سے پٹرول اور ڈیزل کی نقل و حمل کی صلاحیت بہت زیادہ متاثر ہو رہی ہے۔

لاہور:نوازشریف کے قریبی ساتھی ،مریم کے سابق ترجمان کی رومانس کی ویڈیولیک،اطلاعات کے مطابق ن لیگ کے سابق گورنر سندھ ، نوازشریف کے رازدان اورمریم نواز کے سابق ترجمان محمد زبیر کی ایسی ویڈیولیک ہوگئی ہےکہ جس نے مریم نواز، نوازشریف اورمحمد زبیرکے تعلقات پرایک سوالیہ نشان چھوڑدیا ہے

اس وقت یوٹیوب پرایک ویڈیو وائرل ہوئی ہے جس میں ن لیگ کے سابق گورنراورمریم نواز کے انتہائی قریبی جانے جانے والے محمد زبیرعمرکسی خاتون کے ساتھ رنگ رلیاں منارہے ہیں

https://www.youtube.com/watch?v=1BdgOYo4JmQ

باغی ٹی وی کے ذرائع کے مطابق یہ ویڈیولیک کرائی گئی ہے اوریہ کام بھی ان کے اپنے لوگوں کا ہے ، یہ بھی سننےمیں آرہاہےکہ محمد زبیرشاید پارٹی بیانیے سے کچھ پیچھے ہٹنے کی کوشش کررہے تھے کہ ان کی کوششوں پرپانی پھیر دیا گیا ہے

ادھراہم ذرائع نے یہ بھی دعویٰ کیا ہےکہ یہ ویڈیون لیگی حلقوں نےایک اپنے ہی صحافی کوپہلے بھیجی اورپھراس صحافی نے اپنے دوستوں کو ٹویٹ کےذریعے اس ویڈیو کے لیک ہونے کی ایڈوانس اطلاع بھی دی تھی

اینکر پرسن غریدہ فاروقی کا کہنا ہے کہ نواز شریف اور مریم نواز کے ترجمان زبیر عمر نے سوشل میڈیا پر سامنے آنے والی مبینہ نازیبا ویڈیو کو فیک قرار دیا ہے۔ اپنے ایک ٹویٹ میں غریدہ فاروقی نے کہا کہ ویڈیو سامنے آنے کے بعد انہوں نے اس ویڈیو کی حقیقت جاننے کیلئے مسلم لیگ ن کے رہنما زبیر عمر سے بات کی۔ زبیر عمر کا کہنا ہے کہ یہ ویڈیو جھوٹی اور ایڈٹ کرکے بنائی گئی ہے۔غریدہ فاروقی کے مطابق زبیر عمر اس ویڈیو کی تحقیقات اور فرانزک آڈٹ کا ارادہ بھی رکھتے ہیں۔ غریدہ فاروقی نے ایک اور ٹویٹ میں بتایا کہ زبیر عمر اپنی مبینہ ویڈیو کے حوالے سے پیر کے روز اپنا موقف اور بیان دینے کا ارادہ رکھتے ہیں۔

کابل:افغانستان کو پشاور اور پاکستان کے دیگر علاقوں سے منسلک کیاجائےگا ،اطلاعات کے مطابق افغان طالبان کے ترجمان ذبیح اللہ مجاہد نے کہا ہے کہ پاکستان افغانیوں کا دوسرا گھر ہے ، ہمارا ہمسایہ ملک ہے،ان کا موقف قابل تحسین ہے، چاہتے ہیں سی پیک میں شامل ہوں، پاکستان ہمارا پڑوسی ملک اور افغانوں کا دوسرا گھر ہے، افغانستان کو پشاور اور پاکستان کے دیگر علاقوں سے منسلک کیاجائےگا جبکہ سی پیک منصوبہ اہم ہے جس پر تھوڑی تحقیق کی ضرورت ہے، دورہ پاکستان کی دعوت ملی توقیادت معاملےپر غورکرےگی۔

افغان میڈیا رپورٹس کے مطابق پاکستان کے ہمسایہ ملک افغانستان کے نئے حکمران طالبان کے ترجمان ذبیح اللہ مجاہد نے کہا کہ کئی ممالک نے امریکہ اور عالمی برادری کے سامنے ہمارے حق میں آواز اٹھائی، 6روز قبل چین اور روس نے بھی ہمای حکومت کے حق میں بات کی، قطر،ازبکستان اور دیگر ممالک نے بھی مثبت موقف اپنایا ہے۔

ترجمان طالبان کا مزید کہنا تھا کہ افغانستان کے ساتھ عالمی برادری کے روابط ضروری ہیں، افغانستان کو تجارت اور اقتصادی امور میں ہمسایہ ممالک کی ضرورت ہےاور اس بات کی توقع ہے کہ ہمسایہ ممالک اپنا مثبت کردار جاری رکھیں گے۔

انہوں نے کہا کہ پنج شیر میں لڑائی ختم ہوچکی ہے، بیشترمقامی عمائدین ،علمائے کرام اور مجاہدین ہمارے ساتھ ہیں، ہم کسی کے ساتھ جنگ نہیں چاہتے اور پوری دنیا کے ساتھ بہتر تعلقات چاہتےہیں، لیکن اگر کوئی لڑائی یا حملے کی خواہش رکھتاہے تو سخت جواب دیاجائےگا۔

ان کا کہنا تھا کہ افغانستان میں امن کے بعد ہماری ترجیح ہے کہ تجارت فروغ پائے، لاکھوں افغان مہاجرین اب بھی پاکستان میں رہائش پذیر ہیں، ہماری زبان ،مذہب مشترکہ اور رسم ورواج بھی ایک جیسے ہیں جبکہ دورہ پاکستان کی دعوت ملی توقیادت معاملےپر غورکرےگی۔

ذبیح اللہ مجاہد نے کہا کہ افغان سرزمین کسی ملک کیخلاف استعمال نہیں ہونے دیں گے، ہم ایک اسلامی ریاست قائم کرناچاہتےہیں، کشمیری ہمارے بھائی ہیں، اس لئے عالمی برادری مقبوضہ کشمیر میں جاری بھارتی مظالم بند کرائے۔

ترجمان طالبان نے کہا کہ کشمیری،میانمار اور فلسطینی بھائیوں کی سیاسی وسفارتی حمایت کریں گے۔دوسری جانب طالبا ن نے عالمی برادری سے افغانستان کے لئے بین الاقوامی پروازوں کی بحالی کی اپیل کردی ہے۔

افغان وزارت خارجہ نے امریکہ کی جانب سے پابندیوں میں نرمی کا خیر مقدم کرتے ہوئے بین الاقوامی پروازوں کی بحالی کی درخواست کی اور کہا کہ طالبان قیادت تمام ایئر لائنز کو مکمل تعاون کی یقین دہانی کرواتی ہے، نئے سیاسی نظام کی آمد کے باعث ایوی ایشن کو ٹیکنیکل مسائل کا سامنا تھا جسکے باعث بین الاقوامی پروازیں منسوخ کردی گئیں۔

اب کابل ایئر پورٹ مکمل طور پر آپریشنل ہے، لہذا عالمی برادری پروازوں کو بحال کرے ،وطن لوٹنے کے خواہش مندافغان شہری دیگر مما لک میں پھنسے ہوئے ہیں اور نہ ہی بیرون ملک نوکری اور تعلیم حاصل کرنے والے افغان شہری باہر جا پا رہے ہیں ۔

طالبا ن نے امریکی حکومت کی جانب سے پابندیوں میں نرمی کا خیر مقدم کرتے ہوئے عالمی برادری اور بین الاقوامی اداروں سے افغانستان کی امداد کی اپیل کی ہے جبکہ امریکہ نے افغان طالبان پر پابندیوں میں کچھ نرمی کرتے ہوئے انسانی امداد کی فراہمی کے لیے دو لائسنس جاری کئے تھے

افغانستان کے قائم مقام وزیر خارجہ نے چین اور قازقستان کے سفیروں سے ملاقاتیں کرتے ہوئے ہمسایہ ممالک کے ساتھ تجارت کی مکمل بحالی پر زور دیا جبکہ عالمی ادارہ برائے اطفال کی جانب سے صوبہ جوزجان میں طبی سہولیات پہنچائی گئیں۔

نیویارک: وزیراعظم عمران خان دنیا کے مقبول ترین لیڈر:اقوام متحدہ نے بھی تصدیق وتائید کردی ،اطلاعات کے مطابق وزیراعظم پاکستان عمران خان دنیا کے مقبول ترین لیڈربن کرسامنے آئے ہیں اور اس حوالے سے اقوام متحدہ نے بھی اس اعزاز کی تصدیق کردی ہے ،

ذرائع کے مطابق اس حوالے سے اقوام متحدہ کی جنرل اسمبلی کے اجلاس میں ہونے والے عالمی رہنماؤں کے خطابات میں سے وزیراعظم عمران خان کا خطاب دنیا میں بہت زیادہ پسند کیا گیا۔اقوام متحدہ جنرل اسمبلی کے اجلاس میں عالمی رہنماؤں کی تقاریر یوٹیوب پر نشر کی گئی تھیں، جن کو دنیا بھر سے تعلق رکھنے والے لوگوں نے دیکھا اور سُنا۔

اقوام متحدہ کے یوٹیوب چینل پر امریکی صدر جوبائیڈن، بھارتی وزیراعظم نریندر مودی، نیوزی لینڈ، چین، برطانیہ، قطر اور بنگلا دیش سمیت دیگر سربراہان مملک کی ویڈیو شیئر کی گئیں۔

وزیراعظم عمران خان کی تقریر کو مسلسل تیسرے سال بھی زیادہ لوگوں نے دیکھا، اس حساب سے وزیراعظم عمران خان نے ویورشپ میں بڑےعالمی رہنماؤں کوپیچھےچھوڑ دیا۔اقوام متحدہ آفیشل چینل پر عمران خان کی شیئر ہونے والی تقریر سب سے زیادہ دیکھی اور سُنی جانے والی تقریر بن گئی۔

امریکی صدرجوبائیڈن ،بھارتی وزیراعظم مودی ، چین،برطانیہ، سعودی عرب،قطر، نیوزی لینڈ، بنگلادیش ، جرمنی، فرانس، روس، ملائشیا، آسٹریلیا کےسربراہان کی ویورشپ عمران خان سے بہت پیچھے رہ گئے۔

یوٹیوب پر شیئر ہونے والی عالمی رہنماؤں کی تقاریر میں سے اب تک عمران خان کی تقریر کو 3 لاکھ 53 ہزار لوگوں نے دیکھا، جبکہ مودی کی تقریر پر ایک لاکھ 77 ہزار، جوبائیڈن کی تقریر پر صرف 69 ہزار ویوز آئے، اسی طرح چینی صدر شی جنگ کی تقریر کو اب تک 47 ہزار افراد نے دیکھا۔

اگر درجہ بندی کی بات کی جائے تو عمران خان پہلے، مودی دوسرے، جوبائیڈن تیسرے، چینی صدر چوتھے، بورس جانسن 47 ہزار ویوز کے ساتھ پانچویں، ایرانی صدر 45 ہزار کے ساتھ چھٹے، ترک صدر 27 ہزار ویوز کے ساتھ 7ویں اور نیوزی لینڈ کی وزیر اعظم 8ویں نمبر پر رہیں۔

راولپنڈی:مچھ میں سکیورٹی فورسز کی چوکی پردہشتگردوں کا حملہ،فائرنگ کا تبادلہ،ایک سپاہی شہید،2زخمی ،اطلاعات کے مطابق دہشتگردوں کے بلوچستان کے علاقہ مچھ میں سکیورٹی فورسز کی چوکی پر حملہ سے سپاہی عرفان شہید جبکہ دو زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے صوبہ بلوچستان کے علاقہ مچھ میں سکیورٹی فورسز کی چوکی پر حملہ کیا جبکہ دہشتگردوں سے فائرنگ کے تبادلہ میں ایک سپاہی شہید اور دو زخمی ہوگئے۔

آئی ایس پی آر کی جانب سے کہا گیا کہ پاک فوج دہشت گردوں کی بزدلانہ کارروائیوں کو ناکام بنانے کے لیے پرعزم ہے جبکہ دہشت گردوں کو محنت سے حاصل امن کو خراب کرنے کی اجازت نہیں دی جائے گی ۔

قبل ازیں مستونگ کے علاقے کانک میں سکیورٹی فورسز کے آپریشن کے دوران کالعدم تنظیم کا مقامی سربراہ ممتازعرف موٹا پہلوان مارا گیا۔ دوسری جانب شمالی وزیرستان کے ضلع ڈوسالی میں بھی سکیورٹی فورسز نے کارروائی کی جس کے دوران ایک دہشت گرد ہلاک ہو گیا۔

گوادر:پاکستان دشمنوں کی ایک اورشرارت:گوادرمیں دستی بم حملے کے نتیجے میں قائداعظم کا مجسمہ منہدم ،اطلاعات کے مطابق بلوچستان کے ساحلی علاقے گوادر میں شر پسندوں نے دستی بم حملے سے بانی پاکستان قائداعظم محمد علی جناح کا مجسمہ تباہ کردیا۔’

گوادر میں قائم لیویز کنٹرول روم کے مطابق بانی پاکستان کا مجسمہ گوادر کی میرین ڈرائیو پر نصب تھا جس پر اتوار کی صبح نامعلوم شرپسندوں نے دستی بم سے حملہ کیا۔بم حملے کے نتیجے میں بانی پاکستان قائد اعظم محمد علی جناح کا مجسمہ منہدم ہوگیا۔لیویز حکام کا کہنا تھا کہ دستی بم حملے کے نتیجے میں کسی قسم کا کوئی جانی نقصان نہیں ہوا۔

واقعے کے بعد سیکیورٹی فورسز نے علاقے کو گھیرے میں لے کر تفتیش کا آغاز کردیا جبکہ تاحال کسی بھی کالعدم تنظیم کی جانب سے واقعے کی ذمہ داری قبول نہیں کی گئی۔گوادر سے ذرائع کے مطابق قائداعظم کا مجسمہ رواں برس اس مقام پر نصب کیا گیا تھا۔

The demolition of Quaid-e-Azam's statue in #Gwadar is an attack on Ideology of Pakistan. I request authorities to punish the perpetrators in the same way as we did with those behind the attack on Quaid-e-Azam residency in Ziarat. pic.twitter.com/BQeeZjsHg3

— Sarfraz Bugti (@PakSarfrazbugti) September 26, 2021

دوسری جانب بلوچستان سے تعلق رکھنے والے سینیٹر سرفراز بگٹی نے قائد اعظم کے مجسمے کی تباہی کونظریہ پاکستان پر حملہ قرار دیا۔ایک ٹوئٹر پیغام میں انہوں نے کہا کہ ‘میں حکام سے درخواست کرتا ہوں کہ مجرموں کو اسی طرح سزا دیں جس طرح ہم نے زیارت میں قائداعظم ریذیڈنسی پر حملہ کرنے والوں کو دی تھی’۔

یاد رہے کہ سال 2013 میں بلوچستان کے علاقے زیارت میں قائد اعظم محمد علی جناح کی آخری ایام میں استعمال ہونے والے ریسٹ ہاؤس زیارت ریزیڈنسی کالعدم بلوچ لبریشن آرمی نے پندرہ جون، 2013 میں بم حملوں سے راکھ کا ڈھیر بنا دیا تھا۔عمارت کو لگنے والی آگ اتنی شدید تھی کہ اسے بجھانے میں کئی گھنٹے لگے تھے، اس حملے میں یہ تاریخی عمارت نوے فیصد تباہ ہوگئی تھی۔

گوادر:ایران کے شہرشیران سے گوادرکے خلاف سازشیں،دھماکے،دہشت گردیاں جاری:گرفتارملزمان کے خطرناک انکشافات،اطلاعات کے مطابق انسداد دہشت گردی (سی ٹی ڈی) نے دیگر قانون نافذ کرنے والے سیکیورٹی اداروں کے ساتھ مل کر بلوچستان کے ضلع کیچ میں انٹیلی جنس بیس آپریشن کرتے ہوئے 3 ایسے ملزمان کو گرفتار کرلیا ہے، جو گزشتہ ماہ گوادر میں ہونے والے خود کش حملے میں ملوث ہیں۔

ان ملزمان کو ایران کے شہرشیران سے ایک ایرانی دہشت گرد سرغنہ رسول بنگش گوادراورگردونواح کے علاقوں میں دہشت گردی کےلیے استعمال کررہا تھا

یہ بھی معلوم ہوا ہے کہ چہ بہار کے علاقے شیران میں ایران کے حساس علاقے سے رسول بنگش بڑے عرصے سے بلوچستان میں دہشت گردی کارروائیاں کروا رہا ہے اوریہ ایرانی خفیہ ایجنسیوں کے علم میں لائے بغیرممکن نہیں ہوسکتا

ادھر کوئٹہ سے سی ٹی ڈی کے ترجمان کے مطابق سیکیورٹی فورسز نے تربت کے علاقے میں ایک گھر پر چھاپہ مارا اور شعیب نامی شخص کو گرفتار کیا، بعد ازاں شعیب کی فراہم کردہ معلومات پر سیکیورٹی اداروں نے ایک اور مقام پر چھاپہ مار کارروائی کے دوران 2 ملزمان کو گرفتار کرلیا، یہاں سے سیکیورٹی اداروں نے متعدد ہتھیار اور دھماکا خیز مواد کے ساتھ دستی بم بھی برآمد کیے۔

کوئٹہ سے سی ٹی ڈی ترجمان کا کہنا تھا کہ ان تنیوں ملزمان کا تعلق کالعدم بلوچ لبریشن آرمی (بی ایل اے) سے ہے۔انہوں نے مزید کہا کہ گرفتار کیے جانے والے ملزمان نے گوادر میں ہونے والے خود کش حملے میں معاونت کی تھی اور ساتھ ہی دعویٰ کیا کہ یہ ملزمان سیکیورٹی اداروں سمیت شہریوں پر مزید حملوں کی منصوبہ بندی کررہے تھے۔

رپورٹ میں بتایا گیا کہ تفتیش کے دوران ملزمان نے اعتراف کیا کہ وہ اس دہشت گرد تنظیم کا حصہ ہیں جنہوں نے گوادر میں خود کش حملہ کیا تھا۔

خیال رہے کہ اس واقعے میں خود کش بمبار نے گوادر میں چینی پاشندوں کو لے جانے والی گاڑی کو نشانہ بنایا تھا جس کے نتیجے میں دھماکے کے مقام پر موجود 4 بچے ہلاک ہوگئے تھے۔واقعے میں ہلاک ہونے والے بچے سڑک کے کنارے کھیل رہے تھے جبکہ گاڑی کا ڈرائیور واقعے میں شدید زخمی ہوگیا تھا۔

ترجمان کا کہنا تھا کہ گرفتار ملزمان میں سے ایک عارف نے تفتیسی اہلکارووں کو بتایا کہ اس کے بھائی احمد نے خود کش بمبار کو ایران کے علاقے رامین سے گوادر منتقل کیا تھا۔ملزم نے مزید بتایا کہ اس نے خود کش بمبار کو 10 اور 11 اگست کی درمیانی شب وصول کیا اور بعد ازاں اسے کسٹم ویئر ہاؤس کے قریب رہائش فراہم کی۔

عارف نے انکشاف کیا کہ ایران میں شیران چاہ بہار کے علاقے کا رہائشی رسول بنگش اس حملے کا ماسٹر مائنڈ تھا، اس نے مزید انکشاف کیا کہ رسول بنگش نے 2019 میں گوادر کے پی سی ہوٹل پر ہونے والے حملے میں ملوث افراد کو منتقل کرنے کے لیے اپنے مرحوم والد کو استعمال کیا تھا۔

ترجمان سی ٹی ڈی کا کہنا تھا کہ نیٹ ورک کے دیگر ملزمان کو گرفتار کرنے کے لیے آپریشن سے متعلق منصوبہ بندی کی جارہی ہے۔

مستونگ: سکیورٹی فورسزکی کارروائیاں:مستونگ اور ڈوسالی میں2 دہشتگرد ہلاک،بھاری اسلحہ برآمد ،اطلاعات کے مطابق مستونگ کے علاقے کانک میں سکیورٹی فورسز کے آپریشن کے دوران کالعدم تنظیم کا مقامی سربراہ ممتازعرف موٹا پہلوان مارا گیا۔

ادھر ذرائع کے مطابق دوسری جانب شمالی وزیرستان کے ضلع ڈوسالی میں بھی سکیورٹی فورسز نے کارروائی کی جس کے دوران ایک دہشت گرد ہلاک ہو گیا۔

تفصیلات کے مطابق سکیورٹی فورسز کے کانک میں آپریشن کے دوران 3 گھنٹے تک فائرنگ مقابلہ جاری رہا، دہشت گرد کے قبضے سے اسلحے کی بھاری مقدار برآمد ہوئی۔

ذرائع کے مطابق اس دہشتگرد کا تعلق کالعدم تنظیم داعش سے بتایا گیا ہے جو خاصا متحرک اور تنظیم کا مقامی امیر تھا۔ اس کے خلاف قتل کے درجنوں مقدمات درج ہیں، حکومت نے ممتاز کے سر کی قیمت 50 لاکھ مقررکر رکھی تھی۔

دوسری جانب شمالی وزیرستان کے ضلع ڈوسالی میں بھی سکیورٹی فورسز نے آپریشن کیا جس کے دوران ایک دہشت گرد مارا گیا، قبضے سے اسلحہ اور گولہ بارود بھی برآمد کیا گیا۔