Category: اہم خبریں

اسلام آباد: کینیڈین وزیر خارجہ کوشاہ محمود قریشی کا فون:ساری کہانی کھل کرسامنےآگئی ،اطلاعات کے مطابق کپتان کے کھلاڑی بھی سفارتکاری کے میدان میں اس وقت پیش پیش نظرآرہے ہیں ، ادھر اس حوالے سے یہ معلوم ہوا ہے کہ وفاقی وزیر خارجہ شاہ محمود قریشی کا کینیڈین وزیر خارجہ مارک گارنیو سے ٹیلیفونک رابطہ ہوا ہے، گفتگو کے دوران دونوں وزرائے خارجہ کے مابین دو طرفہ تعلقات اور افغانستان کی ابھرتی ہوئی صورتحال پر تبادلہ خیال کیا گیا۔

اسلام آباد سے وزارت خارجہ کےذرائع کے مطابق وزیر خارجہ نے افغانستان کو امدادی سامان کی ترسیل کیلئے ”انسانی راہداری“ کھولنے کی بابت کینیڈین ہم منصب کو آگاہ کیا۔ دونوں وزرائے خارجہ نے دو طرفہ تعلقات کی نوعیت پر اطمینان کا اظہار کرتے ہوئے انہیں مزید مستحکم بنانے کے عزم کا اظہار کیا ۔

ٹیلیفوک رابطے کے دوران وزیر خارجہ نے کہا کہ ایک پرامن اور مستحکم افغانستان نہ صرف پاکستان بلکہ پورے خطے کیلئے انتہائی اہمیت کا حامل ہے۔ انہوں نے کینیڈین وزیر خارجہ کو افغانستان کی صورتحال پر متفقہ لائحہ عمل کی تشکیل کے لیے کیے گئے حالیہ چار ملکی دورے کی تفصیلات سے بھی آگاہ کیا ۔

شاہ محمود قریشی نے افغانستان میں اجتماعیت کے حامل سیاسی تصفیے کی ضرورت پر زور دیتے ہوئے افغانستان میں قیام امن کو خطے کے امن و استحکام اور ترقی کیلئے ناگزیر قرار دیا۔

انہوں نے عالمی برادری پر زور دیا کہ وہ افغانستان کی معاشی و انسانی معاونت کیلئے آگے بڑھے۔ انہوں نے کہا کہ پاکستان، افغانستان میں انسانی المیے کے پیش نظر، افغانوں کو ہوائی اور زمینی راستوں سے امدادی سامان کی فراہمی جاری رکھے ہوئے ہے۔

شاہ محمود نے کہا کہ عالمی برادری کو ان ممالک کو نظر انداز نہیں کرنا چاہیے جو عرصہ دراز سے لاکھوں افغان مہاجرین کی میزبانی کرتے آ رہے ہیں۔

وزیر خارجہ شاہ محمود قریشی نے کہا کہ ہم کورونا وبائی صورتحال میں بہتری کی صورت میں پاکستان اور کینیڈا کے درمیان اگلے سیاسی مشاورتی اجلاس کے بالمشافہ انعقاد کے متمنی ہیں۔ وزیر خارجہ نے کینیڈین وزیر خارجہ کے ساتھ، ہملٹن کینیڈا میں، پاکستانی کینیڈین شہری کی ہلاکت اور اس کے 63 سالہ والد فقیر علی کے اغواکا معاملہ اٹھایا۔

کینیڈین وزیر خارجہ نے وزیر خارجہ نے مخدوم شاہ محمود قریشی کو یقین دلایا کہ متاثرہ خاندان کو انصاف کی فراہمی کیلئے، کینیڈین حکومت معاملے کی مکمل تحقیقات کر رہی ہے ۔

وزیر خارجہ نے کینیڈین ہم منصب سے مطالبہ کیا کہ وبائی صورتحال میں بہتری کو پیش نظر رکھتے ہوئے طلبا اور کاروباری حضرات کی مشکلات میں کمی لانے کیلئے ویزہ ایڈوائزری پر نظر ثانی کی جائے۔

کینیڈین وزیر خارجہ نے افغانستان میں قیام امن کیلئے پاکستان کی کاوشوں کو بھی سراہا اور کابل سے کینیڈین شہریوں کے انخلا میں پاکستان کی جانب سے فراہم کی گئی بھرپور معاونت پر وزیر خارجہ مخدوم شاہ محمود قریشی اور پاکستانی قیادت کا خصوصی شکریہ ادا کیا۔

وزیر خارجہ نے کنیندین ہم منصب کو یقین دلایا کہ پاکستان افغانستان سے انخلا کے عمل میں معاونت کا سلسلہ جاری رکھنے کیلئے پر عزم ہے ۔

اسلام آباد:امریکاکےپاس کوئی مربوط پالیسی نہیں:طالبان حکومت کو تسلیم نہ کیا تومسائل بڑھیں گے: اطلاعات کےمطابق وزیراعظم عمران خان نے کہا ہے کہ دنیا کے پاس کوئی راستہ نہیں۔ امریکا کی طرف سے طالبان حکومت کو تسلیم نہ کرنے سے مسائل بڑھیں گے۔ افغان طالبان کے ساتھ بات کرنی چاہیے۔

روسی میڈیا کو انٹرویو دیتے ہوئے وزیراعظم نے کہا کہ پورے خطے کیلئے اس وقت افغانستان سب سے اہم موضوع ہے، افغانستان اس وقت تاریخی دوراہے پر کھڑا ہے۔ پاکستان افغانستان میں امن کا خواہشمند ہے۔ بدقسمتی سے ہمارے خلاف ایک پروپیگنڈا مہم شروع کی گئی ہے۔ 22 کروڑ عوام کیلئے پاکستان کا ٹوٹل بجٹ 50ارب ڈالر ہے۔ یہ کیسے ہوا کہ 3 لاکھ افغان فوج لڑی ہی نہیں، کیا پاکستان نے انہیں لڑنے سے منع کیا تھا۔

ان کا کہنا تھا کہ پاکستان کے نقطہ نظر سے افغان سرزمین سے دہشتگردی کا بھی خطرہ ہے۔ انخلاء سے دو ہفتے قبل افغان آرمی ہتھیار ڈال دیتی ہے، ایس سی او سربراہی اجلاس میں افغانستان کے تمام ہمسایہ ملک شریک ہیں، پورے خطے کے لیے اس وقت افغانستان سب سے اہم ہے، وہ تاریخی دوراہے پر کھڑا ہے، 40 سال کی جنگی صورتحال کے بعد استحکام کی طرف بڑھے گا

عمران خان نے کہا ہے کہ افغانستان میں امن و استحکام کی واحد صورت مشترکہ حکومت ہے، بیرونی طاقتوں کے خلاف جنگ کو افغان عوام جہاد سمجھتے ہیں، طالبان نے 20 سال میں بہت کچھ سیکھا، امریکا کی طرف سے طالبان حکومت کو تسلیم نہ سے مسائل بڑھیں گے۔ ہمارے وزیر خارجہ کی امریکی وزیر خارجہ سےبات ہوئی ہے۔ تمام ہمسایوں ملک کے ساتھ ملکر کام کر رہے ہیں۔

وزیراعظم نے کہا کہ امریکا کی طرف سے طالبان حکومت کو تسلیم کیے جانے سے متعلق کچھ نہیں کہہ سکتا، اس وقت امریکا کی افغانستان کے معاملے پر ایک مربوط پالیسی ہے یا نہیں، اس پر کچھ نہیں کہہ سکتا۔ افغانستان غلط سمت چلا گیا تو مہاجرین کا مسئلہ بڑھے گا۔

انہوں نے کہا کہ سابق افغان حکومت کو افغانیوں کی اکثریت کٹھ پتلی سمجھتی ہے، سابق افغان حکومت کی افغانیوں کی نظر میں کوئی وقعت نہیں تھی۔

امریکی وزیر خارجہ کی سینیٹ کو حالیہ دی گئی بریفنگ کے سوال پر جواب میں انہوں نے کہا کہ کچھ ریمارکس پر بہت زیادہ افسوس ہے، پاکستان کو افغانستان میں ناکامی کا ذمہ ٹھہرائے جانے کا سننا ہمارے لیے بہت تکلیف دہ ہے، پاکستان وہ ملک ہے جس نے امریکا کی افغانستان میں جنگ کے لیے سب سے زیادہ قربانیاں دی، ہمارا ملک کیسے اس جنگ میں مدد فراہم کرسکتا تھا، امریکا نے جنگ میں دو ہزار ارب ڈالر خرچ کیے۔

ان کا کہنا تھا کہ پاکستان کو افغانستان میں امریکی چڑھائی کا حصہ بننے کے لیے کہا گیا جبکہ پاکستان کا نائن الیون کےساتھ کوئی لینا دینا نہیں تھا، ہم نے 150 ارب ڈالر گنوائے اور 70 ہزار سے ز ائد لوگ جاں بحق ہوئے۔ کچھ لوگوں نے پاکستان کیخلاف ہتھیار اٹھا لیے اور فوج اور عوام پر خود کش حملے کیے، 50 مختلف مسلح گروہوں نے بٹ کر پاکستانی ریاست پر حملے کرنا شروع کر دیئے، اس وقت اسلام آباد قلعے کی حیثیت اختیار کر چکا تھا۔

ایک سوال کے جواب میں انہوں نے کہا کہ افغانستان میں طالبان ایک حقیقت ہیں، دنیا کے پاس اب اور کوئی راستہ نہیں، افغان طالبان نے کنٹرول سنبھال لیا ہے، افغان طالبان کے ساتھ بات کرنی چاہیے کیونکہ اب اگر پابندیاں لگائی گئیں تو وہاں پر بہت سارے مسائل ہوں گے، افغانستان کا 75 فیصد انحصار غیر ملکی امداد پر ہوتا تھا۔

بھارت سے متعلق پوچھے گئے سوال کے جواب میں ان کا کہنا تھا کہ بھارت میں اچھے دوست ہیں، کرکٹ وہاں سبھی کو بہت پسند ہے، میں نے نیک نیتی کے ساتھ پوری کوشش کی ہمارے تعلقات بھارت سے اچھے ہو جائیں، مگر بدقسمتی سے بھارت میں اس وقت ایک دہشتگرد نظریے کی حکومت ہے۔ جو پاکستان مخالف نظریہ رکھتے ہیں اور جارحانہ رویے کے حامل ہیں۔

عمران خان کا کہنا تھا کہ میرے لیے یہ مشکل ہو رہا ہے کہ کیسے بھارت کے ساتھ تعلقات بڑھاؤں، پھر انہوں نے 5 اگست کو مقبوضہ کشمیر کی ریاستی حیثیت ختم کر دی، کشمیر پاکستان اور بھارت کے درمیان ایک متنازع علاقہ ہے، جس کے بعد بھارت کے ساتھ تمام رابطے منقطع ہو گئے۔

وزیراعظم کا کہنا تھا کہ دنیا کو طالبان کی جانب سے انسانی حقوق کی بہت فکر ہے مگر کشمیریوں پر نظر کیوں نہیں رکھتا جہاں پر 8 لاکھ فوج کشمیریوں پر ظلم ڈھا رہی ہے، کشمیریوں کے ہر حق کی خلاف ورزی ہو رہی ہے، خواتین کے حقوق کی بات نہیں ہو رہی اور ان کی پامالی ہو رہی ہے، اقوام متحدہ کے انسانی حقوق کمیشن کی دستاویزات بھی موجود ہیں۔

دوشنبے:وزیراعظم عمران خان اورتاجک صدرکے درمیان اہم گفتگوپھراعلامیہ بھی جاری کردیا گیا ،اطلاعات کے مطابق آج تاجک صدر سےبات کرتے ہوئے وزیراعظم عمران خان نے کہا ہےکہ تین دہشتگرد گروپ اب بھی افغان سرزمین پاکستان کے خلاف استعمال کررہے ہیں۔

تاجک صدر کے ہمراہ مشترکہ پریس کانفرنس کرتے ہوئے وزیراعظم نے کہا کہ ایس سی او کے انعقاد پر تاجک صدر کو مبارک باد دیتا ہوں، دونوں ملکوں کے درمیان اہم گفتگو اور افغان صورتحال سے متعلق بات ہوئی، تاجکستان کے ساتھ تجارت، سیاحت، اطلاعات اور ادویہ سازی سمیت مختلف شعبوں پر بھی بات ہوئی۔

وزیراعظم عمران خان کا کہنا تھا کہ افغانستان میں پنجشیر کی صورتحال پر فکر ہے، پاکستان اور تاجکستان پنجشیر معاملہ مذاکرات سے حل کرنا چاہتے ہیں، پنجشیر میں تاجک اور طالبان کے درمیان معاملے کے پر امن حل کے لیے ثالثی پر بات ہوئی ہے، صدر امام علی رحمان تاجک گروپوں پر جب کہ پاکستان پشتون گروپوں پر اثرورسوخ استعمال کرے گا۔

انہوں نے مزید کہاکہ افغانستان میں امن نا صرف پاکستان اور تاجکستان بلکہ پورے خطے کے مفاد میں ہے، 3 دہشتگرد گروپ اب بھی افغان سرزمین پاکستان کے خلاف استعمال کررہے ہیں۔

دوسری جانب وزیراعظم عمران خان کے دورہ تاجکستان کے حوالے سے مشترکہ اعلامیہ جاری کردیا گیا جس میں کہا گیا ہے کہ دونوں ممالک نے ٹرانسپورٹ کے شعبے میں تعاون بڑھانے پر اتفاق کیا ہے۔

مشترکہ اعلامیے کے مطابق پاکستان تاجکستان نے توانائی کے منصوبوں کو مشترکہ مفاد اور تعاون کے تحت بنانے کا فیصلہ کیا ہے، دونوں ممالک نے ہائیڈرو پروجیکٹس اور ٹرانسمیشن لائنز مشترکہ سرمایہ کاری سے بنانے کا بھی فیصلہ کیا ہے۔

پاکستان اور تاجکستان نے صحت، فارماسیوٹیکل، میڈیکل، قدرتی آفات اور ایمرجنسی سیکٹرز میں تعاون بڑھانے پر اتفاق کیا، پاکستان اور تاجکستان نے مختلف شعبوں میں مشترکہ منصوبے شروع کرنے کا فیصلہ کیا۔

اعلامیے میں کہا گیا ہےکہ دونوں ممالک کے درمیان اسٹریٹیجک تعلقات کو مزید مضبوط بنانے میں معاون ثابت ہوگا۔

لاہور:اللہ کے فضل وکرم سے مشکلات کے باوجود ملک میں امن اور ترقی کی بنیاد رکھ دی:اطلاعات کے مطابق پاک فوج کے سربراہ آرمی چیف جنرل قمر جاوید باجوہ کا لاہور میں ایک تقریب سے خطاب کرتے ہوئے کہنا تھا کہ تمام مشکلات کے باوجود ملک میں امن اور ترقی کی بنیاد رکھ دی ہے۔

پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سپہ سالار جنرل قمر جاوید باجوہ نے گورنمنٹ کالج یونیورسٹی لاہور کا دورہ کیا۔ آرمی چیف نے یونیورسٹی کے کانووکیشن میں بطور مہمان خصوصی شرکت کی۔

آئی ایس پی آر کے مطابق آرمی چیف نے نوجوانوں کی بہترین تربیت پر یونیورسٹی کی انتظامیہ کی تعریف کی، جنرل قمر جاوید باجوہ نے نوجوانوں کو قائد کی سوچ کے مطابق سخت محنت کے ذریعہ اعلی ترین مقام حاصل کرنے پر زور دیا۔

پاک فو ج کے سربراہ آرمی چیف جنرل قمرجاوید باجوہ کا کہنا تھا کہ یونیورسٹی پاکستان کے تعلیمی اداروں کے تاج میں لگا ایک موتی ہے۔ یونیورسٹی نے دنیا میں قابل ترین افراد پیدا کیے ، ان افراد نے اپنے اپنے شعبہ میں بہت نام کمایا

ان کا کہنا تھا کہ میں پاکستان کے روشن مستقبل کے حوالے سے بہت پرامید ہوں، ہم ایک محتنی قوم ہیں، نوجوان ہمارا حقیقی اثاثہ ہیں، تمام مشکلات کے باجود عظیم قربانیوں دے کر ہم نے ملک میں امن اور ترقی کی بنیاد رکھ دی ہے ، اب نوجوانوں کی ذمہ داری ہے کہ وہ ملک کو نئی بلندیوں پر لیجانے میں اپنا اہم کردار ادا کریں۔

لاہور:نیوزی لینڈ کرکٹ ٹیم کا دورہ ہویا پھرریڈ لسٹ کا معاملہ:امریکہ افغانستان میں رسوائی کا بدلہ لے گا،ہرطرف ایک ہی کہانی سنائی جارہی ہےکہ نیوزی لینڈ کرکٹ ٹیم نے پاکستان کا دورہ سیکورٹی وجوہات کی بنیاد پرملتوی کردیا ہے

اس فیصلے کے پیچھے نیوزی لینڈ کرکٹ ٹیم کی مرضی نہیں بلکہ ان قوتوں کا کھیل ہے جو اس وقت عالمی سازشوں کا حصہ ہیں اور پاکستان سے افغانستان میں ہونے والی رسوائی کا بدلہ لینا چاہتے ہیں ،

یہ قوتیں جن کو چین مخالف قوتیں بھی کہا جاسکتا ہے اس وقت سخت ہزیمت اٹھا رہی ہیں ، اس بلاک میں امریکہ کے ساتھ یورپ بھی ہے اورکچھ چین کے فطری مخالف ملک جن میں‌بھارت ، جاپان ، آسٹریلیا ، تائیوان اورکچھ نادیدہ ہمسائیگی کی قوتیں ہیں جوچین کوچین سے نہیں دیکھنا چاہتے

یہ بھی یاد رہے کہ یہ قوتیں چین کی فتح ، ترقی اورخوشحالی کو پاکستان کے مرہون منت سمجھتے ہیں ، ان قوتوں کا خیال ہے کہ اگرپاکستان چین کا ساتھ نہ دے تو چین کبھی اتنا طاقتورنہ بنتا

ان قوتوں کا یہ بھی خیال ہے کہ افغانستان ہویا مشرق وسطیٰ کی لڑائی ، بوسنیا ہویا فلسطین میں اسرائیل کے خلاف مزاحمت ان سب کےپیچھے پاکستان اورنظریہ پاکستان کارفرما ہے

اب ان قوتوں کوافغانستان میں جوشکست ہوئی اس شکست نے تو ان کی کمرتوڑ دی ،

اب جوقوتیں کہہ رہی ہیں کہ نیوزی لینڈ کرکٹ ٹیم سیکورٹی مسائل کی وجہ سے پاکستان نہیں آرہی توان عقل کے اندھوں کو یہ بھی پتا ہونا چاہیے کہ افغانستان سے یورپین ، آسٹریلین ، نیوزی لینڈ اوردیگرملکوں کے شہری پی آئی اے اوردیگرپروازوں کے ذریعے پاکستان میں پناہ تلاش کرتے کرتے پہنچے اورپھرانہوں نے سکھ اورسکون کا سانس لیا اورجاتے جاتے پاکستان کا شکریہ بھی ادا کیا کہ اگرآپ ہمیں پاکستان نہ لاتے توہم مرجاتے

یہ نادیدہ قوتیں پہلے بھی پاکستان کے خلاف سازشیں کررہی تھیں اوراب بھی کررہی ہیں ، ایف اے ٹی ایف میں یہی توعوامل کارفرما ہیں

اب ان نادیدہ قوتوں نے نیوزی لینڈ کوپاکستان جانے سے روک کرکئی مقاصد حاصل کرنے کی کوشش کی ہے
سب سے پہلے پاکستانی اپوزیشن کوحکومت اوراداروں کے خلاف پراپیگنڈے کا موقع دیا اوراس جلتی ہوئی آگ پرتیل ڈالا ، کیوں کہ یہ قوتیں جانتی ہیں کہ اگرعمران خان رہا تو پھراس خطے میں امریکہ اوراتحادیوں کی نہیں بلکہ چین اورپاکستان کی حکمت عملی چلے گی اس لیے یہ نادیدہ قوتیں پاکستان کی اپوزیشن کو ایسی گراونڈ فراہم کریں گے کہ جسے حکومت کی ناکامی قرار دے کرامریکہ اوراتحادیوں کے مقاصد کی تکمیل کی جائے گی

دوسرا یہ تاثردینے کی کوشش کی جارہی ہے کہ پاکستان میں سیکورٹی کے مسائل ہیں لٰہذا غیرملکی دوروں کاسلسلہ رک جائے چاہے وہ کھیل ہویا تجارت ، تاکہ پاکستان کا امیج ڈاون ہواورپاکستانی حکومت عدم استحکام کا شکار ہو

کس امریکن نے نیوزی لینڈ حکومت اورکرکٹ بورڈ سے پاکستان نہ آنے کا حکم صادرکیا یہ تو پتا چل گیا ہے لیکن کب کیا ہوا اس کے بارے میں‌ سب باتیں بعد میں پیش کی جائیں گی

مختصریہ کہ نیوزی لینڈ کرکٹ ٹیم کا پاکستان کا دورہ منسوخ کرنا پاکستان مخالف قوتوں کوکمک دینے کی ایک گھٹیا سازش ہے جس کی لپیٹ میں سب آجائیں گے ، کیونکہ پاکستان اب ایسی سازشوں کا مقابلہ کرنے کا عادی ہو گیا اورشیخ رشید جو کہہ رہے ہیں وہ بھی انہیں نادیدہ قوتوں کا ذکرکررہےہیں ،