Category: صحت

ڈپٹی کمشنر کیپٹن ریٹائرڈ انوار الحق کی ہدایت پر ایڈیشنل ڈپٹی کمشنر ہیڈکوارٹر عبداللہ محمود کا تحصیل ہیڈکواٹر ہسپتال مری کا دورہ کیا۔ سی ای او ہیلتھ ڈاکٹر فائزہ کنول بھی ان کے ہمراہ تھی۔ ایڈیشنل ڈپٹی کمشنر نے ہسپتال میں مریضوں کو دی جانے والی سہولیات کے بارے میں دریافت کیا۔ ہسپتال میں موجود مختلف شعبوں کا معائنہ بھی کیا۔ مریضوں کے علاج و معالجے میں کوئی کسر نہ چھوڑی جائے۔ مریضوں کے علاج و معالجے کے لیے حکومت پنجاب تمام تر وسائل بروئے کار لا رہی ہے. ہسپتال کے دورے کا مقصد انتظامات کے ساتھ ساتھ مریضوں کو علاج ومعالجے کے سلسلے میں دی جانے والی سہولیات کا جائزہ لے کر مزید بہتر بنانا ہے۔

این سی او سی کا تمام سکول، کالجز، پارکس اورہوٹلز وغیرہ کھولنے کا فیصلہ ایک غلط فیصلہ ہے جس نے کورونا کے بڑھنے کی گھنٹی بجا دی ہے۔ پی ایم اے سمجھتی ہے کہ ہسپتالوں کے اعدادوشمار یہ واضح کر رہے ہیں کہ کورونا کے پھیلنے کی شرح بدستور بڑھ رہی ہے اور شرح اموات میں بھی اضافہ ہو رہا ہے۔ آج بھی لاہور کے ہسپتالوں کے آئی سی یو وارڈز میں کرونا کے مریضوں کی تعداد خطرناک حد تک موجود ہے۔ سو فیصد حاضری کے ساتھ سکول کھولنے سے جب یہ بچے بیماری لے کر گھروں میں جائیں گے تو اِن کی وجہ سے بزرگوں کے کورونا میں مبتلا ہونے کی شرح بڑھ جائے گی۔اور پاکستان کا موجود کھوکھلا صحت کا نظام اس قابل نہیں ہے کہ وباء کے بڑھنے کی صورت میں احسن طریقے سے اس کا مقابلہ کر سکے
ان خیالات کا اظہارپی ایم اے ہاؤس میں ہونے والے ایک اجلاس میں کیا گیا جس کی صدارت پروفیسر ڈاکٹر اشرف نظامی صدر پی ایم اے لاہور نے کی۔ اجلاس میں ڈاکٹر ملک شاہد شوکت، ڈاکٹر اظہار احمد چوہدری،پروفیسر ڈاکٹر تنویر انور،پروفیسر خالد محمود خان، ڈاکٹرارم شہزادی، ڈاکٹر واجد علی، ڈاکٹر بشریٰ حق،ڈاکٹر احمد نعیم،پروفیسر ڈاکٹرثاقب سہیل،ڈاکٹر رانا سہیل، ڈاکٹر ریاض ذوالقرنین اسلم، ڈاکٹر طلحہ شیروانی، ڈاکٹرسلمان کاظمی نے شرکت کی۔
عہدیدان نے وزیراعظم پاکستان سے مطالبہ کیا ہے کہ تمام سیکٹرز کو کھولنے کے اعلان پر نظر ثانی کی جائے تاکہ کسی بھی ممکنہ خطرے سے بچا جا سکے۔

ڈاکٹریاسمین راشد کا کہنا ہے کہ صوبہ بھرکے سرکاری ہسپتالوں میں ڈاکٹرزکی حاضری پر کسی قسم کا سمجھوتہ نہیں کیاجائے گا۔
تمام وائس چانسلرزاورپرنسپل حضرات اپنے ماتحت ہسپتالوں میں ڈاکٹرزکی حاضری کو خود مانیٹرکریں
سرکاری ہسپتالوں میں مریضوں کے علاج میں کسی قسم کی کوتاہی برداشت نہیں کی جائے گی۔وزیر صحت پنجاب
لاہور24 فروری: وزیر صحت پنجاب ڈاکٹریاسمین راشدکی زیرصدارت محکمہ سپیشلائزڈ ہیلتھ کئیراینڈ میڈیکل ایجوکیشن میں اعلیٰ سطحی اجلاس منعقد ہوا،جس میں سیکرٹری صحت بیرسٹرنبیل اعوان،ایڈیشنل سیکرٹری ڈاکٹر آصف طفیل،وائس چانسلرکنگ ایڈورڈ میڈیکل یونیورسٹی پروفیسرڈاکٹرخالدمسعودگوندل،وائس چانسلرفاطمہ جناح میڈیکل یونیورسٹی پروفیسرڈاکٹرعامرزمان خان،پرنسپل علامہ اقبال میڈیکل کالج پروفیسرڈاکٹرعارف تجمل،پرنسپل امیرالدین میڈیکل کالج پروفیسرڈاکٹر سردارالفرید، ایگزیکٹوڈائریکٹر پنجاب انسٹی ٹیوٹ آف نیوروسائنسز پروفیسرڈاکٹرخالدمحمود،ایم ایس جناح ہسپتال ڈاکٹریحییٰ سلطان، ڈاکٹر علی رزاق،ایم ایس یکی گیٹ ہسپتال ڈاکٹرگلزاراحمد،میاں زاہدالرحمن باٹہ ودیگرافسران نے شرکت کی۔صوبائی وزیر صحت ڈاکٹریاسمین راشدنے اجلاس کے دوران سرکاری ہسپتالوں میں ڈاکٹرزکی حاضری،مریضوں کے علاج،صفائی ستھرائی،ادویات کی فراہمی ودیگرانتظامی امورکا تفصیلی جائزہ لیا۔ایڈیشنل سیکرٹری ڈاکٹرآصف طفیل نے اجلاس کے دوران مختلف سرکاری ہسپتالوں کے حالات بارے تفصیلات پیش کیں۔
صوبائی وزیر صحت ڈاکٹریاسمین راشدنے کہاکہ تمام سرکاری ہسپتالوں میں ڈاکٹرزکی حاضری پر کسی قسم کا سمجھوتہ نہیں کیاجائے گا۔سرکاری ہسپتالوں میں ڈاکٹرزکی کمی کوفوراًپورا کیا جائے۔ڈاکٹریاسمین راشدنے کہاکہ سرکاری ہسپتالوں میں مریضوں کے علاج میں کسی قسم کی کوتاہی برداشت نہیں کی جائے گی اور صفائی ستھرائی کے ناقص انتظامات کا ذمہ دار ایم ایس ہوگا۔کسی بھی سرکاری ہسپتال میں ادویات کی کوئی کمی نہیں ہے۔صوبائی وزیر صحت نے مزیدکہاکہ سرکاری ہسپتالوں کے حالات مزیدبہتربنانے کیلئے سرپرائزوزٹس کا سلسلہ جاری رہے گا۔تمام وائس چانسلرزاورپرنسپل حضرات اپنے ماتحت ہسپتالوں میں ڈاکٹرزکی حاضری کو خود مانیٹرکریں۔ایک ماہ بعد سرکاری ہسپتالوں کے حالات بارے دوبارہ اجلاس طلب کیاجائے گا۔

چودھری پرویزالٰہی کا کہنا ہے کہ ریسکیو 1122 جیسے شاندار کارکردگی کے حامل ادارے کو خودمختار نہ بنا کر اس کے ساتھ زیادتی کی جا رہی ہے.
اس ادارے کی نہ صرف اندرون ملک بلکہ UNO نے بھی تعریف کی اور اس کی کارکردگی کو سراہا، لیکن پھر بھی اس کے اہلکاروں کو ریگولرائز نہیں کیا گیا تو یہ نہایت افسوسناک بات ہے
اگر اس محکمے کو وہ سٹیٹس نہ دیا گیا جو اس کو دینا چاہئے تھا تو میں ان تمام لوگوں کی فہرست سامنے لاؤں گا جو اس ادارے کی ترقی کی راہ میں رکاوٹ بن رہے ہیں:
سپیکر پنجاب اسمبلی چودھری پرویزالٰہی کی زیر صدارت اسمبلی اجلاس میں پاکستان مسلم لیگ کی رکن خدیجہ عمر فاروقی نے پنجاب ایمرجنسی سروس کا ترمیمی بل ایوان میں پیش کیا تو تمام ارکان اسمبلی نے اس بل کی تائید کی۔ سپیکر چودھری پرویزالٰہی نے کہا کہ اس محکمے کے بل کو 2004ء میں ہماری حکومت نے ہی پاس کروایا تھا جس کی اب تک کی کارکردگی نہایت شاندار رہی ہے جس کی نہ صرف اندرون ملک بلکہ UNO نے بھی تعریف کی اور اس کی کارکردگی کو سراہا، لیکن پھر بھی اگر اس ادارے کو خودمختار اور اس کے اہلکاروں کو ریگولرائز نہیں کیا گیا تو یہ نہایت افسوسناک بات ہے۔ انہوں نے کہا کہ ریسکیو 1122 نے اس ادارے نے بلاتفریق امیر و غریب کے آج تک 90 لاکھ سے زائد مریضوں کو ریسکیو کر کے ان کی جانیں بچائیں، آگ کے واقعات میں ایک لاکھ 55 ہزار جائیدادیں جن کی مالیت 400 ارب روپے ہے بروقت respond کر کے ان کا تحفظ کیا۔ انہوں نے مزید کہا کہ اگر چیف منسٹر انسپکشن ٹیم اور ڈیزاسٹر مینجمنٹ کو خودمختار بنایا جا سکتا ہے تو کیا امر مانع ہے کہ اس ادارے کو ابھی تک خودمختار نہیں بنایا گیا، اس ادارے کو کبھی شہری دفاع کے ساتھ منسلک کر دیا جاتا ہے تو کبھی کسی اور ادارے کے ساتھ جو اس محکمے اور اس کے اہلکاروں کے ساتھ زیادتی ہے۔ انہوں نے کہا کہ اگر اس محکمے کو وہ سٹیٹس نہ دیا گیا جو اس کو دینا چاہئے تھا تو میں ان تمام لوگوں کی فہرست سامنے لاؤں گا جو اس ادارے کی ترقی کی راہ میں رکاوٹ بن رہے ہیں۔ وزیرقانون راجہ بشارت نے یقین دہانی کروائی کہ اس ادارے کی اہمیت سے کوئی انکار نہیں، حکومت اس کے مسودہ قانون میں ترمیم کیلئے کام کر رہی ہے اور انشاء اللہ جمعرات تک وہ اس ہاؤس کے سامنے وہ تمام سفارشات پیش کریں گے جو آپ نے بیان کی ہیں اس میں کسی بھی قسم کا کوئی فرق نہیں ہو گا۔

کوہاٹ، ڈرگ کنٹرول ٹیم کوہاٹ نے ایم عرفان وزیر کی قیادت میں پیر کے روز کچہری چوک، تیراہ بازار اور فرنٹیئر میڈیکل سنٹر کوہاٹ کا دورہ کر کے ڈرگ ایکٹ 1976 ء کی تعمیل میں مختلف میڈیکل سٹورز کا معائنہ کیا۔اس دوران کچہری چوک میں ایک میڈیکل سٹور کو لائسنس کے بغیر چلانے اور السید پلازہ تیراہ بازار میں ایک میڈیکل سٹور کو زائدالمیعاد لائسنس پر چلانے کے جرم میں سیل کردیاگیاجبکہ مالکان کے خلاف کیس مزید کارروائی کے لئے پشاور بھیجے جائیں گے۔ایک دوکان سے غیر ضروری ادویات برآمد ہوئیں جن کو فارم چھ پر درج کرکے شو کاز نوٹس جاری کئے گئے۔اسی طرح معائنے کے دوران پانچ مشکوک ادویات کے نمونے فارم پانچ پر درج کرکے ٹسٹ اور انالیسیز کے لئے بھیجے گئے جن پر رپورٹ آنے کے بعد مزید کارروائی کی جائے گی۔

مردان۔ کمشنر مردان منتظر خان نے کہا ہے کہ کورونا ویکسنیشن کے عمل میں تیزی لائی جائے تاکہ اس وبائی مرض پر جلد از جلد قابو پایا جاسکیں۔ ان خیالات کا اظہار کمشنر مردان نے اپنے دفتر میں کورونا ویکسنیشن کے حوالے سے منعقدہ اجلاس کی صدارت کے دوران کیا۔ اجلاس میں ڈپٹی کمشنر مردان حبیب اللہ عارف، ایم ڈی مردان میڈیکل کمپلیکس ڈاکٹر مختیار، ڈی ایچ او مردان ڈاکٹر کچکول، پلمونالوجسٹ ایم ایم سی مردان ڈاکٹر سجاد، ڈبلیو ایچ او کے ایریا کوآرڈینیٹر ڈاکٹر نذیر، فوکل پرسن برائے کووڈ 19-ڈاکٹر امتیاز، ڈاکٹر باسط اور دیگر متعلقہ افسران نے شرکت کی۔ اجلاس کو بتایا گیا کہ ضلع مردان کو پہلے مرحلے میں کل 1533 ویکسینز فراہم کی گئی ہیں جن میں سے مردان میڈیکل کمپلیکس کے ہیلتھ سٹاف کو131جبکہ ڈی ایچ کیو ہسپتال مردان میں 225 خوراکیں دیئے جاچکی ہیں۔جبکہ دوسرے مرحلے کیلئے مزید 1733خوراکیں اور بھی ملی ہیں۔ مردان میں کل 11 ویکسینشن کاؤنٹرز قائم کی جاچکی ہیں۔ جن میں مریضوں کو کووڈ کے ویکسینز لگائی جائینگی۔ کمشنر مردان نے کہا کہ اس عمل میں جتنی بھی پیچیدگیا ں اور مشکلات ہیں ان کو دور کرنے کیلئے ایک مربوط لائحہ عمل طے کیا جائے تاکہ عوام کو پریشانیوں کا سامنا نہ کرنا پڑے۔کمشنر مردان نے ڈی ایچ او مردان کو ہدایت کی کہ ویکسینیشن کے اگلے مرحلے کی تیاریوں کے حوالے سے رپورٹ ڈپٹی کمشنر مردان کیساتھ شیئر کریں۔ دریں اثناء کمشنر مردان کے دفتر میں مردان سپر لیگ کرکٹ ٹورنامنٹ کے حوالے سے ایک اجلاس منعقد ہوا جس میں مردان سپر لیگ کے منیجنگ ڈائریکٹر عبد العز یز خان، ریجنل سپورٹس آفیسر امیر بشر، ڈسٹرکٹ سپورٹس آفیسر مردان، اور مردان سپر لیگ کے نمائندوں نے شرکت کی۔ اجلاس کو 23مارچ سے شروع ہونے والے مردان سپر لیگ کرکٹ ٹورنامنٹ کے حوالے سے بریفنگ دی گئی، جن میں کل چھ ٹیمیں حصہ لیں گی۔ اور یہ ٹورنامنٹ 18دن تک جاری رہیگا۔ اس ٹورنامنٹ میں قومی کرکٹ ٹیم کی کھلاڑی بھی شرکت کریں گے۔ کمشنر مردان نے کہا کہ مردان میں سپورٹس کی ترقی کیلئے عملی کام کررہے ہیں اور انشاء اللہ مردان سپر لیگ ایک شاندار اور یادگار ایونٹ ہوگا۔