Category: بین الاقوامی

پیرس میں ایک ایسے چرچ کی تعمیر کا منصوبہ بنایا گیا ہے جس میں جلی ہوئی لکڑی کا استعمال ہوگا.یہ چرچ کیتھیڈرل چرچ کے مقابلے ایک عارضی چرچ ہوگا.

امریکی انجینئروں کے ایک گروپ نے پیرس میں آگ سے متاثرہ تاریخی نوترے ڈیم کیتھڈرل چرچ کے مقابل ایک عارضی چرچ کی تعمیر کا منصوبہ پیش کیا ہے۔

منصوبے کی خاص بات یہ ہے کہ عارضی چرچ کی تعمیر میں بطور مزاحمتی علامت جل جانے والی لکڑی کا استعمال کیا جائے گا۔ فرانسیسی خبر رساں ایجنسی کے مطابق عارضی چرچ کی تعمیر کا مقصد نوترے ڈیم کیتھڈرل چرچ کی دوبارہ تعمیر مکمل ہونے تک لوگوں کو عبادت کے لیے جگہ فراہم کرنا ہے۔

انجینئروں اور ڈیزائن ماہرین کے گروپ "گینسلر” کے مطابق منصوبے کی منظوری کی صورت میں اس کو مکمل کرنے میں چھ ماہ کا عرصہ لگ جائے گا۔

عارضی چرچ کا رقبہ 1600مربع میٹر ہو گا اور اس سے روزگار کے کئی مواقع پیدا ہوں گے۔

ڈیزائننگ کی ایک کمپینی فیلپ بیرے نے فرانسیسی خبر رساں ایجنسی سے گفتگو کرتے ہوئے بتایا کہ جلی ہوئی لکڑی کا انتخاب اس لحاظ سے بھی اہمیت کا حامل ہے کہ یہ قدیم تکنیک لکڑی کو آگ کے اثرات سے محفوظ بناتی ہے۔ انہوں نے بتایا کہ جلی ہوئی لکڑی سے معاونت کے ساتھ ساتھ جدید ترین ٹکنالوجی کا بھی استعمال کیا جائے گا تا کہ "ایک کم وزن تنصیب” حاصل کی جا سکے

جاپان میں شدید گرمی کی وجہ سے گذشتہ ہفتے 11 افراد ہلاک ہو گئے ہیں جبکہ 5 ہزار 664 افراد کو سن اسٹروک کی وجہ سے ہسپتالوں میں منتقل کر دیا گیا ہے۔

تفصیلات کے مطابق . آفات انتظامیہ کے حوالے سے شائع کردہ خبر کے مطابق ملک بھر میں گرمی کی شدید لہر کی وجہ سے گذشتہ ہفتے 11 افراد ہلاک ہو گئے ہیں۔

خبر کے مطابق گرمی سے متاثرہ 5 ہزار 664 افراد کو ہسپتالوں میں علاج کی سہولیات فراہم کی جا رہی ہیں تاہم ان میں سے 119 افراد کم از کم 3 ہفتے تک ہسپتالوں میں داخل رہیں گے۔

حکام نے عوام کو متنبہ کیا ہے کہ تیزی سے بڑھتے درجہ حرارات کے مقابل حفاظتی اقدامات اختیار کریں اور جسم میں پانی کی کمی کی روک تھام کے لئے زیادہ سے زیادہ پانی کا استعمال کریں۔

اقوام متحدہ کے انسانی حقوق ہائی کمیشن نے اسرائیل سے مطالبہ کیاہے کہ وہ 9 سالہ فلسطینی بچے کوگولیاں مار کر شدید زخمی کرنے کے واقعے کی آزادانہ تحقیقات کرائے اور اس میں ملوث عناصر کے خلاف سخت ترین قانونی کارروائی کی جائے۔
غزہ پٹی کی سرحد پر اسرائیلی فائرنگ سے فلسطینی نوجوان جاں بحق
اقوام متحدہ کے ہائی کمشنر برائے انسانی حقوق رابرٹ کولفیل نے ایک پریس کانفرنس کے دوران کہا کہ اسرائیلی فوجیوں نے 100 میٹر دور سے فلسطینی بچے کو گولیاں ماریں۔

یاد رہے کہ اسرائیلی فوج نے غرب اردن میں دو روز قبل ایک احتجاجی مظاہرے کے دوران 9 سالہ فلسطینی بچے عبدالرحمان کووحشیانہ طریقے سے گولیاں مار کر شدید زخمی کردیا تھا۔

بھارتی شہر علی گڑھ میں نماز جمعہ کی ادائیگی کے حوالے سے علماءنے فیصلہ کر لیا ہے اور شہر کے مفتی محمد خالد حمید نے شہر بھر کی مساجد انتظامیہ کومسجدوں کی چھت پر نماز جمعہ ادا کرانے سے متعلق انتظام کرنے کی ہدایت کر دی ہے۔

یہ فیصلہ مسلم کمیونٹی کے اراکین کی ضلعی انتظامی افسران سے ملاقات کے بعد سامنے آیا ہے۔

مفتی محمد خالد حمید نے کہا کہ سڑکوں پر نماز ادا کرنے کا کوئی انتظام نہیں ہے، لیکن کبھی کبھی لوگ مسجد کے اندر جگہ کی کمی کے سبب ایسا کرتے ہیں۔ انھوں نے کہا ”میں نے تمام مساجد کی انتظامیہ کو اس بارے میں آگاہ کر دیا ہے کہ ضرورت پڑنے پر انھیں مسجد کی چھت پر انتظام کرنا ہوگا۔“

مفتی حمید نے مزید کہا کہ ”عید اور عیدالاضحیٰ جیسے خاص مواقع پر مسلمان جامع مسجد اور عیدگاہ کے برابر سڑکوں پر نماز ادا کر سکتے ہیں۔“

یاد رہے کہ ضلعی انتظامیہ نے سڑکوں پر سبھی مذہبی سرگرمیوں پر پابندی عائد کر دی تھی۔
اسی طرح ضلعی مجسٹریٹ سی بی سنگھ نے بھی کہا تھا کہ خصوصی مواقع کے لیے مسجدوں یا کسی دیگر مذہبی ادارے کو پہلے سے اجازت لینی ہوگی جو انھیں دی جائے گی۔

حریت کانفرنس (ع) کے چیرمین میر واعظ عمر فاروق نے پولیس کی طرف سے مساجد ، منتظمین و اماموں کی فہرست طلب کرنے کی سختی سے مذمت کرتے ہوئے کہا ہے کہ مساجد ومذہبی امور کے خلاف کسی بھی اقدام کا ڈٹ کر مقابلہ کیا جائے گا۔

اپنے ایک ٹوئٹ میںانہوں نے کہا کہ ’اضافی فوج کی تعیناتی کے بعد انتظامیہ کی طرف سے لوگوں میں خوف پیدا کرنے کے لئے روزانہ بنیادوں پر حکم نامے جاری کرنے پر فکر مند ہوں، ہماری مساجد اور ہمارے مذہبی امور کے خلاف کسی بھی اقدام کا ریاست کے لوگ ڈٹ کر مقابلہ کریں گے، صورتحال کو جان بوجھ کر نہ بگاڑا جائے‘۔

یاد رہے کہ سری نگر کے ضلع پولیس صدر دفتر کی طرف سے جاری ایک خط میں تمام پولیس سپرنٹنڈنٹس سے کہا گیا تھا کہ وہ اپنے علاقے کی مساجد، انتظامیہ اور وہاں تعینات امام کی ساری معلومات بھیجیں۔

ایرانی اپوزیشن کی طرف سے 19 جولائی کو آبنائے ہرمز میں یرغمال بنائے گئے برطانوی تیل بردار جہاز کے بارے میں اہم معلومات کا انکشاف کیا ہے۔

تفصیلات کےمطابق اپوزیشن کی طرف سے فراہم کردہ اطلاعات کے مطابق ایرانی پاسداران انقلاب کے ‘ذوالفقار’ بریگیڈ کےزیرانتظام یونٹ نے بریگیڈ ابو عبداللہ کے تعاون سے برطانوی تیل بردار جہاز کو یرغمال بنایا۔ ابو عبداللہ بریگیڈ ایرانی نیوی کا اہم ترین بریگیڈ سمجھا جاتا ہے جو اس وقت جزیرہ فارور میں تعینات ہے۔

ایرانی عوامی مزاحمتی کونسل کی طرف سے جاری کردہ رپورٹ میں بتایا گیا ہے کہ برطانوی جہاز کےاغواء سے ایک روز قبل 18 جولائی کو پاسداران انقلاب کے سربراہ جنرل حسین سلامی نے متحدہ عرب امارات کے تین مقبوضہ جزیروں ابو موسیٰ، طنب الصغریٰ اور طنب الکبری کا دورہ کیا تھا۔

اس سے قبل خلیج فارس کے آبنائے ہرمز میں سپاہ پاسداران انقلاب کے فوجیوں نے ایک اور برطانوی آئل ٹینکر کو روک کر اپنی تحویل میں لے لیا۔الزام یہ تھا کہ اس نے بین لاقوامی قوانین کی خلاف ورزی کی ہے.

معروف برطانوی جریدے انڈی پنڈنٹ نے بھی اس بات کی تصدیق کی تھی کہ ایران نے دوسرے برطانوی آئل ٹینکر کو اپنی تحویل میں‌لے لیا ہے،ایران نے بھی ایسا ہی دعویٰ کیا تھا کہ اس کے پاسداران انقلاب نے خلیج میں‌ایک برطانوی آئل ٹینکر اپنی تحویل میں لے کر اس میں سوار تمام اہلکاروں کو گرفتار کرلیا ہے.