Category: بین الاقوامی

نئی دہلی:بھارت میں‌ہونے والے عام انتخابات میں‌شکست کے بعد اندراگاندھی کے پوتے راہول گاندھی نے آج پارٹی صدارت سے تو استعفیٰ دے ہی دیا تھا مگر بعد می ٹویٹر والوں کو بھی یہ پیغام بھیج دیا ہے کہ وہ اب واقعی ہی کانگریس کے صدر نہیں رہے . مسٹر راہل گاندھی نے آج یہ واضح کرنے کے بعد کہ وہ کانگریس صدر کے عہدے سے اپنا استعفی کسی بھی حالت میں واپس نہیں لیں گے، اپنے ہینڈل ٹوئٹر میں پروفائل سےصدر کا عہدہ ہٹا دیا ۔ انہوں نے اپنی پروفائل میں اب صد ر کے عہدے کی جگہ ’کانگریس رکن‘ اور ’ رکن پارلیمنٹ ‘لکھا ہے۔

لوک سبھا انتخابات کی شکست کی ذمہ داری لیتے ہوئے استعفی دے دیا تھا اور ورکنگ کمیٹی سے نیا صدر منتخب کرنے کو کہا تھا ۔ ورکنگ کمیٹی نے ان کے استعفی کی پیشکش کو مسترد کرتے ہوئے ان سے پارٹی کے تنظیمی ڈھانچے میں بنیادی تبدیلیاں کرنے کی درخواست کی تھی۔ اس کے بعد پارٹی سینئر لیڈروں نے مسٹر گاندھی سے استعفیٰ پر زور نہ دینے کا مسلسل اپیل کی ۔ پارٹی کے تقریبا 150 عہدیداروں نے مختلف عہدوں سے استعفے بھی دیے ۔ گزشتہ پیر کو کانگریس حکمرانی والی تمام ریاستوں کے وزرائےاعلیٰ نے ان سے ایک ساتھ ملاقات کر کے عہدے پر بنے رہنے کی درخواست کی تھی لیکن وہ اپنے استعفی پر اڑے رہے ۔

نئی دہلی:بھارت میں مودی مخالف سیاسی اتحاد اور بڑی سیاسی جماعتوں نے نریندرا مودی پر یہ الزام لگایا ہے کہ مودی نے یہ الیکشن دھاندلی سے جیتا ہے. اس سلسلے میں الیکشن کمیشن کو بڑی تعداد میں‌شکایات موصول ہوئی ہیں. دوسر ی طرف
سبکدوش افسروں نے انتخابی کمیشن کو خط لکھا ہے جس میں لوک سبھا انتخاب کے دوران بے ضابطگیوں سے متعلق کیے گئے سوالوں پر کمیشن کی خاموشی پر افسوس ظاہر کیا ہے۔

لوک سبھا انتخاب کے دوران اپوزیشن کے ذریعہ انتخابی کمیشن کی کارگزاری پر سوال کھڑے کیے جانے کے بعد اب سبکدوش سول اور فوجی افسروں کے ساتھ ساتھ ماہرین تعلیم نے بھی 2019 کے مینڈیٹ پر سنگین سوال کھڑے کیے ہیں۔ 64 سابق آئی اے ایس، آئی ایف ایس، آئی پی ایس اور آئی آر ایس افسران نے انتخابی کمیشن کو کھلا خط لکھا ہے۔ اس خط کی 83 سبکدوش سول اور فوجی افسروں کے ساتھ ساتھ ماہرین تعلیم نے بھی حمایت کی ہے۔ انگریزی اخبار ’دی ٹیلی گراف‘ کی رپورٹ کے مطابق سبکدوش افسروں نے انتخابی کمیشن کو لکھے خط میں کہا ’’2019 کا لوک سبھا انتخاب آزادانہ اور غیر جانبدارانہ انتخاب کے معاملے میں گزشتہ تین دہائیوں میں سب سے ذیلی سطح پر نظر آتا ہے۔‘‘ خط میں سبکدوش افسران نے 2019 کے مینڈیٹ کو شبہ کے گھیرے میں بتایا ہے۔

انتخابی کمیشن کو لکھے گئے خط پر دستخط کرنے والوں میں سابق آئی اے ایس افسر وجاہت حبیب اللہ، ارونا رائے، جوہر سرکار، ہرش مندر، این سی سکسینہ اور ابھجیت سین گپتا شامل ہیں۔ ان کے علاوہ سابق آئی ایف ایس افسر شیو شنکر مکھرجی اور دیب مکھرجی بھی خط کی حمایت کرنے والوں میں شامل ہیں۔ دیگر اہم ناموں میں ایڈمیرل وشنو بھاگوت، پرنجوئے گوہا ٹھاکر، ایڈمیرل ایل رام داس، نویدیتا مینن، لیلا سیمسن اور پربل داس گپتا وغیرہ ہیں۔

دوسری طرف کانگریس کے صدر راہول گاندھی نے بھی مودی پر الزام لگایا ہے کہ مودی حکومت نے یہ الیکشن دھاندلی سے جیتا ہے جس میں ایک طرف تو پیسہ استعمال کیا گیا ہے تو دوسری طرف دیگر ذرائع استعمال کرکے اپنے مخالفین کو ہرایا ہے.

دوحہ:قطر میں 7 جولائی کوامریکہ اور افغان طالبان کے درمیان ہونے والے مذاکرات کی تفصیلات آنا شروع ہوگئی ہیں جس کے مطابق یہ مذاکرات دو دن جاری رہیں گے اور اس میں موجودہ افغان حکومت کا کوئی نمائندہ شریک نہیں ہوگا ۔ دوسری جانب امریکی صدر نے افغانستان سے اپنی فوج میں بتدریج کمی کرنے کا عندیہ دیا ہے۔

قطر کے دارالحکومت میں ہونے والی اس کانفرنس کے انعقاد میں جرمنی اور قطر پیش پیش ہیں۔ سات جولائی کی امن کانفرنس کا اعلان ایسے وقت میں سامنے آیا ہے جب امریکا اور طالبان کے دوحہ میں مذاکرات جاری ہیں۔ طالبان جاری مذاکراتی عمل کو انتہائی اہم اور حساس قرار دے چکے ہیں۔ دو روزہ میٹنگ میں افغانستان سے چالیس اہم سیاسی و مذہبی شخصیات اور مختلف حلقوں کے سرگرم کارکن شریک ہوں گے۔ یہ بات طے ہے کہ اس میں کوئی حکومتی کارندہ شامل نہیں ہو گا۔ ان چالیس افراد کی فہرست کے بارے میں ابھی کوئی واضح تفصیل سامنے نہیں آئی ہے۔ ان افراد کو جرمن اور قطری مصالحت کاروں نے مدعو کیا ہے۔

اسی ویک اینڈ پر ہونے والی امن کانفرنس میں جرمنی کی آزاد غیر حکومتی اور غیر منافع بخش تنظیم بیرگ ہوف فاؤنڈیشن کے مبصرین اور مصالحت کار بھی شریک ہوں گے۔ اس تنظیم کے پیشہ ورانہ ماہرین کا کردار معاونت کا ہو گا جب کہ یہ دو روزہ کانفرنس کلی طور پر چالیس افغان معتبرین اور طالبان کے درمیان امن معاملات کے تناظر میں ہوگی۔

روس نے Ka-32 ہیلی کاپٹر ترکی کے حوالے کر دئیے.روسی دفاعی صنعت کی کمپنی روستے سے منسلک شعبے رشئین ہیلی کاپٹرز کے ڈائریکٹر جنرل ایندرے بوگنسکی نے جاری کردہ بیان میں کہا ہے کہ ترکی کو 3 عدد Ka-32A11BC کثیر المقاصد ہیلی کاپٹر فراہم کر دئیے گئے ہیں۔بوگنسکی نے کہا ہے کہKa-32A11BC کی برآمد کے لئےگذشتہ سال طے پانے والے سمجھوتے کے دائرہ کار میں ہیلی کاپٹروں کی ترسیل مکمل کر دی گئی ہے اور اس وقت ہم ترکی کے ساتھ نئی ترسیل کے بارے میں بات چیت کر رہے ہیں۔

مذکورہ ہیلی کاپٹروں کو آگ بجھانے اور تلاش و بچاو کے علاوہ تعمیراتی کاموں میں بھی استعمال کیا جا سکتا ہے۔بوگنسکی نے اس سے قبل اپنے بیان میں کہا تھا کہ جنگی ہیلی کاپٹروں کی پیداوار میں ترکی کامیاب تجربوں کا حامل ہے۔انہوں نے کہا ہے کہ ترکی میں بنائے جانے والے اسپئیر پارٹس کی مدد سے ہم رشئین ہیلی کاپٹر بنا سکتے ہیں علاوہ ازیں روس اور ترکی کی مشترکہ ہیلی کاپٹر پیداوار بھی ممکن ہو سکتی ۔