Category: بین الاقوامی

سعودی عرب میں جاری او آئی سی وزرائے خارجہ کونسل اجلاس کے موقع پر پاکستان کے وزیر خارجہ شاہ محمود قریشی نے ترک وزیر خارجہ میولود چاوش اولو سے ملاقات کی۔ شاہ محمود قریشی نے ملائیشیا کے اپنے ہم منصب سیف الدین عبداللہ سے بھی ملاقات کی ، اجلاس کے موقع پر پاکستان ترکی ملائشیا سہ ملکی مذاکرات ہوئے۔ مذاکرات میں وزیر خارجہ مخدوم شاہ محمود قریشی نے پاکستان جبکہ ترکی اور ملائشیاء کے وزرائے خارجہ نے اپنے اپنے ملک کی نمائندگی کی۔

باغی ٹی وی کی رپورٹ کے مطابق پاکستان کے وزیر خارجہ شاہ محمود قریشی نے سعودی عرب میں او آئی سی اجلاس کے موقع پر ترکی کے وزیر خارجہ سے ملاقات کی. اس موقع پرشاہ محمود قریشی نے کہا کہ پاکستان اور ترکی کے تعلقات کثیر الجہتی ہیں کیونکہ یہ حکومت سے حکومت، عوام سے عوام اور دل سے دل تک ہیں، دونوں ممالک نے مشکل وقت میں کھل کر ایک دوسرے کا ساتھ دیا۔ ترک وزیر خارجہ نے اس موقع پر کہا کہ 15 جولائی 2016ء کو ترکی پر آمریت کے ناکام حملے کے بعد پاکستان نے سب سے پہلے ترکی کی حکومت اور صدر رجب طیب اردوان کو اپنی حمایت کا یقین دلایا۔ پاکستان کی سپریم کورٹ کا فتح اللہ گولن کی تنظیم کو دہشت گرد قرار دینا قابل تحسین ہے۔ فریقین نے پاکستان اور ترکی دوطرفہ تجارتی، اقتصادی اور ثقافتی تعاون بڑھانے پر اتفاق کیا۔ ملائشیا کے وزیر خارجہ سے ملاقات کے دوران شاہ محمود قریشی نے کہا کہ پاکستان اور ملائیشیا کے باہمی تعلقات بہت گہرے اور مضبوط ہیں۔ ملائیشیا کے صدر ڈاکٹر مہاتیر محمد کے حالیہ دورہ پاکستان کے نقوش ابھی تک ہمارے ذہنوں میں ترو تازہ ہیں، دونوں ممالک کی قیادت کی طرف سے حالیہ دوروں کے نتیجے میں یہ دو طرفہ تعلقات مزید مستحکم ہونگے،

الیکشن میں کامیابی کے باوجود اسرائیلی وزیراعظم نتین یاہو حکومت بنانے میں ناکام ہو گئے ،اسرائیل میں ایک بار پھر الیکشن ہوں گے.

باغی ٹی وی کی رپورٹ کے مطابق اسرائیل میں رواں سال نو اپریل کو عام الیکشن ہوئے تھے ، چونسٹھ لاکھ کے قریب رجسٹرڈ ووٹرز نے ایک سو بیس نشستوں کے ووٹ کاسٹ کیا تھا، انتخابی نتائج کے مطابق کوئی بھی جماعت حکومت نہیں بنا سکتی تھی کیونکہ ان کے پاس مطلوبہ نشستیں پوری نہیں تھیں.حکومت بنانے کے لیے نیتن یاہو کی جماعت لیکوڈ پارٹی نے اتحادیوں سے رابطے شروع کیے تھے تاہم وہ اتحادیوں کو ساتھ ملا کربھی حکومت بنانے میں ناکام رہے .جس کے بعد اسرائیلی پارلیمنٹ میں دوبارہ الیکشن کی قرار داد پیش کی گئی جس کے بارے میں‌ ووٹنگ ہوئی تو الیکشن کرانے کے حق میں 74 ووٹ پڑے جبکہ 45 ارکان نے اس کی مخالفت کی۔ اب اسرائیل میں دوبارہ الیکشن اسی سال ستمبر میں ہوں گے، نیتن یاہو نے اعلان کیا ہے کہ وہ اگلے الیکشن میں بھی حصہ لیں گے اور انہیں امید ہے کہ وہ جیت جائیں گے۔ اسرائیل کی تاریخ میں ایسا پہلی مرتبہ ہوا ہے کہ عام انتخابات میں کامیابی کے باوجود کوئی بھی جماعت حکومت نہیں بناسکی۔

بھارت میں‌ کانگریس کے کارکنان نے صدر راہل گاندھی سے استعفیٰ واپس لینے کا مطالبہ کرتے ہوئے ملک کے مختلف علاقوں‌ میں احتجاجی مظاہرے کئے ہیں.

باغی ٹی وی کی رپورٹ کے مطابق کانگریس کارکنان کی جانب سے دہلی، بنگلور اور دوسرے مختلف شہروں‌ کی جانب سے کئے گئے. مظاہرہ کرنے والے کارکنان کا کہنا تھاکہ پارٹی کو مضبوط بنانے اور کارکنان کے حق میں راہل گاندھی کی قیادت ضروری ہے لہٰذا انھیں استعفیٰ واپس لینا چاہیے۔ مظاہرے میں حصہ لینے سے قبل نئی دہلی کی سابق وزیراعلیٰ اور دہلی کانگریس کی صدر شیلا ڈکشت نے کہا کہ کارکنان مظاہر ہ کرکے اپنے جذبات کا اظہار کررہے ہیں۔ راہل گاندھی کے استعفیٰ کی پیشکش کے بعد سے پورے ملک کے کارکنان میں مایوسی کا ماحول ہے۔

کرناٹک کے دارلحکومت بنگلور میں‌بھی کانگریس کے کارکنان نے مظاہرہ کر کے راہل گاندھی سے استعفیٰ‌واپس لینے کا مطالبہ کیا. مظاہرین نے ہاتھوں میں‌پلے کارڈز اور بینرز اٹھا رکھے تھے جن پر راہ گاندھی سے استعفیٰ‌ لینے کے مطالبات درج تھے.

یاد رہے کہ الیکشن میں‌ مودی کی پارٹی بی جے پی سے شکست کے بعد راہل گاندھی نے لوک سبھا الیکشن میں پارٹی کی شکست کی ذمہ داری لیتے ہوئے کانگریس کی پالیسی ساز یونٹ کانگریس مجلس عاملہ میں استعفیٰ کی پیشکش کی تھی تاہم مجلس عاملہ کے اراکین نے ان کا استعفیٰ مسترد کر دیا تھا لیکن راہل گاندھی استعفیٰ دینے پر بضد ہیں اور انہوں نے پارٹی کے مرکزی ذمہ داران سے کہا ہے کہ وہ گاندھی خاندان کے علاوہ پارٹی صدر ڈھونڈ لیں. اس سلسلہ میں انہیں‌ منانے کی کوششیں‌تاحال ناکام رہی ہیں.

بھارت میں ایک برقع پہنے ہوئی میڈیکل کی طالبہ کو زبردستی جے شری رام کے نعرے لگانے پر مجبور کئے جانے کا واقعہ پیش آیا ہے.

باغی ٹی وی کی رپورٹ کے مطابق یہ واقعہ مشرقی بنگال کے ایک میڈیکل کالج میں‌پیش آیا ہے جہاں دس سے بارہ ہندو انتہاپسندوں نے طالبہ کو ہندوؤں کے حق میں‌ مذہبی نعرے لگانے پر مجبور کیا گیا. متاثرہ طالبہ میڈیکل کالج میں‌ فائنل ایئر میں زیر تعلیم ہے. مذکورہ طالبہ نے بتایا کہ وہ اپنی ایک سہیلی کے ہمراہ رات کنٹین سے کھانا کھا کر واپس آرہی تھی کہ انہوں نے ہمیں جے شری رام کے نعرے لگانے پر مجبور کیا تو ہم وہاں‌سے بھاگ نکلے. متاثرہ طالبہ کا کہنا تھا کہ اس سے پہلے انہوں نے ان لوگوں‌کو کالج میں‌ نہیں‌دیکھا.

متاثرہ طالبہ کا کہنا تھا کہ مقامی پولیس نے ابتداء میں شکایت درج کرنے سے انکار کردیا لیکن شکایت میں سے دھمکی کا لفظ نکالنے کی شرط پر انہوں نے ہماری شکایت درج کی۔ لیکن بعد ازاں دوسرے دن وہ لفظ بھی شامل کردیاگیا۔ مذکورہ طالبہ نے مزید کہا کہ میں ہمیشہ برقع پہن کر باہر نکلتی ہو ں۔ لیکن آج تک میرے ساتھ اس طرح کا معاملہ پیش نہیں آیا۔ اس وقت سڑک پر کوئی موجود نہیں تھا جو ہماری مدد کرسکے۔

یاد رہے کہ حالیہ لوکھ سبھا الیکشن میں‌ہندوانتہاپسند تنظیم بی جے پی کی کامیابی کے بعد یہ چوتھا واقعہ ہے جس میں زبردستی مسلمانوں کو جئے شری رام کے نعرہ لگانے پر مجبور کیا گیا اور تشدد کا نشانہ بنانے کی کوشش کی گئی ہے.

عمان (مسقط_نمائندہ باغی ٹی) عمان میں نجی اور سرکاری شعبوں کے لیے عید الفطر کی تعطیلات کا اعلان کر دیا گیا ہے۔ 4 جون 2019ء بروز منگل سے 6 جون 2019ء بروز جمعرات تک 3 چھٹیاں دی گئی ہیں
عمان نیوز ایجنسی کے مطابق غیر سرکاری اداروں اور کمپنیوں میں 4 جون سے عید الفطر کی تعطیلات کا آغاز ہو گا اور جمعہ المبارک کی معمول کی چھٹی کو ملا کر مجموعی طور پر 4 دن عام تعطیل رہے گی۔ جبکہ سرکاری اداروں میں 29 رمضان المبارک 4 جون سے شروع ہونے والی چھٹیوں کا اختتام 8 جون بروز ہفتہ کو ہو گا۔ اور تمام سرکاری ادارے اتوار 9 جون سے معمول کے مطابق کھل جائیں گے۔ یاد رہے جمعہ اور ہفتہ کو ریاست میں ہفتہ وار عام تعطیل ہوتی ہے۔

بھارت میں مغربی بنگالی کی وزیر اعلیٰ‌ ممتا بنرجی نے ہندوستانی وزیر اعظم نریندر مودی کی حلف برداری کی تقریب میں‌شرکت سے معذرت کر لی ہے.

باغی ٹی وی کی رپورٹ کے مطابق ہندوستانی وزیر اعظم نریندر مودی کے حلف برداری کی تقریب میں شرکت کرنے کے اعلان کے ایک دن بعد ہی ممتا بنرجی نے کہا کہ نئے حالات میں وہ مودی کی حلف برداری کی تقریب میں شرکت نہیں کریں گی۔ یا د رہے کہ کل 30مئی کو نریندر مودی دوسری مدت کیلئے وزیر اعظم کے عہدہ کا حلف لیں گے۔ ممتا بنرجی نے کہا کہ انہوں نے حلف برداری کی تقریب میں شرکت کرنے کا فیصلہ کیا تھا مگر آخری چند گھنٹوں میں دیکھا کہ میڈیا میں بی جے پی کی جانب سے دعویٰ کیا جارہا ہے کہ مغربی بنگال میں سیاسی تشدد کے واقعات میں 54افراد کی موت ہوگئی ہے جبکہ یہ بالکل جھوٹ ہے. بنگال میں سیاسی بنیادوں‌پر قطعی طور پر قتل نہیں‌ ہوا لہٰذا موجودہ حالات کو دیکھتے ہوئے میں نے فیصلہ کیا ہے کہ مودی کی حلف برداری کی تقریب میں‌ شرکت نہ کروں.

یاد رہے کہ مودی دوسری مرتبہ وزیر اعظم کا حلف اٹھا رہے ہیں.

بھارت میں‌ ہندوستانی وزیرا عظم نریندر مودی کے انتخابات جیتنے کے بعد ان کی حلف برداری کی تقریب کی تیاریاں بڑے پیمانے پر جاری ہیں۔

باغی ٹی وی کی رپورٹ‌کے مطابق حلف برداری کی تقریب میں کئی بین الاقوامی رہنماؤں، مختلف ملکوں‌کے سربراہان اور علاقائی لیڈر شریک ہوں‌گے. مغربی بنگال کی وزیراعلیٰ ممتا بنرجی پہلے اس تقریب میں شامل ہونے والی تھیں تاہم آج انہوں نے آنے سے انکار کر دیا ہے. 2014 میں جب مودی کی حلف برداری کی تقریب ہوئی تھی تو اس وقت بھی وہ سیاسی مخالفت کی وجہ سے حلف برداری کی تقریب میں شامل نہیں‌ ہوئی تھیں.

ہندوستانی وزیر اعظم نریندر مودی نے خلیج بنگال کے سرحدی یا ساحلی ممالک کے عالمی تکنیکی اور معاشی تعاون کی تنظیم(BIMSTEC ) بمس ٹیک کے رکن ممالک ہندوستان، بنگلہ دیش ، میانمار، شری لنکا، تھائی لینڈ بھوٹان اور نیپال کے رہنماؤں کو تقریب میں شرکت کی دعوت دی ہے. یاد رہے کہ پاکستانی وزیر اعظم عمران خان کو اس تقریب میں شرکت کی دعوت نہیں‌ دی گئی ہے.

بھارت میں‌ 32 سال سے زائد عرصہ تک ہندوستانی فوج میں ملازمت کرنے والے مسلم شخص اور اس کے خاندان کو غیر ملکی قرار دے کر حراست میں‌ لے لیا گیا ہے۔

باغی ٹی وی کی رپورٹ کے مطابق ثناء اللہ نامی شہری جسے غیر ملکی قرار دیا گیا ہے، وہ بھارتی فوج میں کیپٹین کے عہدہ سے سبکدوش ہوئے تھے۔ مذکورہ شہری فوج میں ملازمت کے دوران مقبوضہ کشمیراو رشمال مشرقی ریاستوں میں مختلف کاروائیوں اور آپریشن میں حصہ لیتے رہے ہیں۔ اس کے بعد انہوں نے رضاکارانہ سبکدوشی کے بعد ایس آئی بارڈر پولیس کے طور پر بھی کام کیا ہے۔

رپورٹ کے مطابق ثناءاللہ نے بتیس سال تک فوج میں ملازمت کی لیکن اب انہیں، ان کی اہلیہ اور تین بچوں کو گرفتار کر کے حراستی مرکز بھیج دیا گیا ہے۔ یا د رہے کہ ثناءاللہ اور ان کے خاندان سے متعلق کہا گیا ہے کہ ان کا نام این آئی آر سی میں موجود نہیں تھا۔ بھارت میں آسام واحد ریاست ہے جہاں سٹیزن شپ رجسٹر کا انتظام ہے جس کا نام اس میں نہیں ہوتا اسے بھارتی شہری تسلیم نہیں کیا جاتا۔ یہ قانون بھارت میں نافذ شہریت قانون سے الگ ہے۔

انڈیا کی ریاست مہاراشٹر میں دو دہشت گردوں کی افواہ پر سات تھانوں کی پولیس نے زبردست سرچ آپریشن شروع کر دیا تاہم بعد میں انکشاف ہوا کہ یہ دونوں دہشت گرد نہیں ہیں بلکہ دہشت گرد وں کے روپ میں فلم کی شوٹنگ میں حصہ لے رہے ہیں۔

باغی ٹی وی کی رپورٹ کے مطابق یہ مضحکہ خیز واقعہ ہندوستانی ریاست مہاراشٹر کے علاقہ پال گھر میں پیش آیا ہے جہاں بالی ووڈ اداکارہریتک روشن اور ٹائیگر شراف کی ایک فلم کی شوٹنگ چل رہی تھی ، جس میں دو جونیئر آرٹسٹ دہشت گرد کا کردار نبھا رہے تھے۔ شوٹنگ سے بریک لے کر یہ دونوں نزدیک میں ہی واقع ایک دکان پر سگریٹ خریدنے کیلئے پہنچ گئے۔ اس دوران پنچ وٹی ناکہ علاقہ میں ایک اے ٹی ایم گارڈ نے دہشت گردوں کو کھلے مقام پر گھومتے دیکھا تو فورا پولیس کو اطلاع دیدی۔ فلم کی شوٹنگ کرنے والے اداکاروں کو لوگوں نے دہشت گرد سمجھا اورمقامی پولیس ایک گھنٹے تک سرچ آپریشن کرتی رہی۔

رپورٹ کے مطابق سات تھانوں کی پولیس گاڑیوں پر دہشت گردوں کی تلاش کرتی رہی۔ اس دوران سی سی ٹی وی فوٹیج دیکھی گئیں جس کے بعد سامنے آیا کہ یہ دونوں دہشت گرد نہیں بلکہ اداکار تھے، تب پولیس نے راحت کی سانس لی۔ بھارتی میڈیا کے مطابق تقریبا ایک گھنٹے تک یہ ڈرامہ چلتا رہا۔