Category: کشمیر

میاں اسلم اقبال کی ڈسٹرکٹ کیمپ جیل میں یوم یکجہتی کشمیر کے حوالے سے منعقدہ تقریب میں شرکت

یورپی معاشرے میں اگر جانور پر بھی ظلم ہوجائے تو کہرام مچ جاتا ہے، مقبوضہ وادی میں گزشتہ 7عشروں سے انسانیت کی تذلیل ہورہی ہے- میاں اسلم اقبال کا کہنا تھا کہ نہتے کشمیریوں پر بھارتی مظالم پر عالمی برادری کی بے حسی قابل افسوس ہے، خطے میں پائیدار امن کیلئے کشمیر کے تنازع کا حل نکالنا ہوگا-صوبائی وزیر نے کیمپ جیل میں قیدی بچوں کی تعلیم و تربیت کے عمل بھی جائزہ لیا

صوبائی وزیر صنعت و تجارت میاں اسلم اقبال نے آج ڈسٹرکٹ کیمپ جیل میں یوم یکجہتی کشمیر کے حوالے سے منعقدہ تقریب میں بطور مہمان خصوصی شرکت کی.آئی جی جیل خانہ جات مرزا شاہد سلیم بیگ نے کیمپ جیل آمد پر صوبائی وزیر کا استقبال کیا۔تقریب میں لوک فنکار سائیں ظہور، احمدنوازگلوکاراور دیگر فنکاروں نے ملی نغمے گا کر شرکاء کا لہو گرمایہ۔

صوبائی وزیر صنعت و تجارت میاں اسلم اقبال نے تقریب سے خطاب کرتے ہوئے کہا کہ بھارت نے 5 اگست کو مقبوضہ وادی کی خصوصی حیثیت ختم کرکے بین الاقوامی قوانین کی خلاف ورزی کی ہے۔قائداعظم نے کشمیر کو پاکستان کی شہ رگ قرار دیا ہے اور کشمیریوں کے ساتھ ہمارا دینی اور قلبی رشتہ ہے۔پوری پاکستانی قوم آج کشمیریوں کے ساتھ اظہار یکجہتی کادن منارہی ہے۔ صوبائی وزیر نے کہا کہ یورپی معاشرے میں اگر کسی جانور پر ظلم ہو جائے تو کہرام مچ جاتا ہے۔مقبوضہ وادی میں گزشتہ 7عشروں سے انسانیت کی تذلیل ہو رہی ہے۔والدین کے سامنے بچوں اور بچوں کے سامنے والدین کو شہید کیا جارہا ہے۔ماؤں، بیٹیوں اور بہنوں کی عصمت دری ہو رہی ہے۔نہتے کشمیریوں پر بھارتی مظالم پر عالمی برادری کی بیحسی قابل افسوس ہے۔

صوبائی وزیر نے کہا کہ عالمی برادری اور اقوام متحدہ کو کشمیریوں پر بھارتی جبرو ستم رکوانے کیلئے اپنا کردار ادا کر نا ہوگا اور خطے میں پائیدار امن کیلئے کشمیر کے تنازعہ کوکشمیریوں کی امنگوں اور سلامتی کونسل کی قراردادوں کی روشنی میں حل کرنا ضروری ہے، انہوں نے کہا کہ وزیر اعظم عمران خان نے دنیا کے ہر فورم پر کشمیر کا مقدمہ لڑا ہے اور پاکستان کے 22 کروڑ عوام اپنے کشمیری بہن بھائیوں کے ساتھ کھڑے ہیں۔ صوبائی وزیر نے کہا کہ قوم کے نونہالوں کو جیلوں میں دیکھ کر دلی دکھ ہوتا ہے۔جیلوں میں اصلاحات کے ذریعے انہیں جرائم کی آماجگاہ کی بجائے اصلاحی مراکز بنانا ہو گا۔قیدیوں کو مختلف فنون کی تربیت کے لئے ٹیوٹا کے ساتھ اشتراک بڑھایا جائے گا۔ آئی جی جیل خانہ جات مرزا شاہد سلیم بیگ نے تقریب سے خطاب کرتے ہوئے کہا کہ پنجاب بھر کی جیلوں میں اصلاحات کا عمل جاری ہے۔پنجاب کی مختلف جیلوں میں ٹیوٹا کے اشتراک 15 مختلف کورسز کرائے جارہے ہیں جبکہ 12 ہزار قیدیوں کو ٹیوٹا کے اشتراک سے فنی تر بیت فراہم کی گئی ہے۔صوبائی وزیر صنعت و تجارت نے قیدی بچوں کی تعلیم و تربیت کے مراکز کادورہ کیا اور قیدی بچوں کو دی جانے والی تعلیم و تربیت کے عمل کا جائزہ لیا۔آئی جی جیل خانہ جات مرزا شاہد سلیم بیگ،سپرنٹنڈنٹ جییل نورحسن اور دیگر پولیس افسران بھی ہمراہ تھے-
٭

کشمیریوں کو حق خود ارادیت ملنے تک عالمی امن کا خواب پورا نہیں ہو سکتا، فردوس عاشق اعوان۔
بھارتی ریاستی دہشت گردی ہزاروں بے گناہ کشمیریوں کی جان لے چکی،مودی نے 6لاکھ فوجیوں کو نہتے کشمیریوں کے قتل عام پر مامور کر دیا
بھارت میں تمام اقلیتیں ہندوتوا مائنڈ سیٹ کا شکار ہیں۔پاکستان ہر سطح پرکشمیریوں کی سفارتی، اخلاقی اور سیاسی حمایت جاری رکھے گا
معاون خصوصی وزیر اعلیٰ کا تقریب سے خطاب
لاہور05فروری: اقوام متحدہ کی قراردادوں کی روشنی میں کشمیری بہن بھائیوں کو حق خود ارادیت دلوانے کیلئے عالمی ضمیر کو جھنجھوڑنا اور احساس دلانا ہو گا کہ کشمیریوں کو حق خود ارادیت ملنے تک عالمی امن کا خواب پورا نہیں ہو سکتا۔ پاکستانی قوم کشمیریوں کو انکا حق دلوانے کیلئے ان کے شانہ بشانہ کھڑی ہے۔ کشمیر پاکستان کے وجود کا حصہ ہے اسکے بغیر پاکستان نا مکمل اور ادھورا ہے۔پاکستان ہر سطح پرکشمیریوں کی سفارتی، اخلاقی اور سیاسی حمایت جاری رکھے گا۔ وزیر اعظم عمران خان نے کشمیریوں کے ترجمان اور وکیل بن کر عالمی ضمیر کو جھنجھوڑنے کا وعدہ اپنے جنرل اسمبلی کے خطاب میں وعدہ پورا کیا اور دنیا کو بارآور کروایا کہ دنیا کی سب سے بڑی جمہوریت کے دعویدار بھارت نے کس طرح کشمیرکو دنیا کی سب سے بڑی جیل میں تبدیل کر رکھا ہے۔
ان خیالات کا اظہار معاون خصوصی وزیر اعلیٰ پنجاب ڈاکٹر فردوس عاشق اعوان نے لاہور پریس کلب میں یوم کشمیر کے حوالے سے منعقدہ سیمینار سے خطاب کرتے ہوئے کیا۔ معاون خصوصی نے کہا کہ بھارتی فوج نے کشمیر میں بہنوں،بیٹیوں کی عصمت دری کی خوفناک داستانیں رقم کی ہیں اور وہاں نوجوانوں کی پیلٹ گن سے بینائی چھینی جا رہی ہے۔ بھارت کشمیریوں کی بینائی تو چھین سکتا ہے مگر ان سے آزادی کے خواب نہیں چھین سکتا۔ کشمیری عوام کے اظہار رائے پر پابندی لگانے کے باوجود انکی آواز پہلے سے زیادہ گونج رہی ہے۔ انہوں نے کہا کہ مودی نے 6لاکھ سے زائد فوج کو نہتے کشمیریوں پر چڑھائی کیلئے وقف کر رکھا ہے۔ کشمیر کی آزادی کی خاطر اپنی جائیں قربان کرنے والے شہدا، حریت رہنماؤں کے حوصلے اور ان تمام کشمیریوں کو جنہوں نے آزادی کی شمع روشن رکھنے کیلئے اپنی نسلوں کی قربانی دی، پاکستانی قوم کی طرف سے سلام پیش کرتی ہوں۔ ہندوستان نے طاقت کے بل بوتے پر کشمیریوں کی آواز دبانے کی کوشش کی مگر اب یہ ہتھکنڈے ناکام ہو چکے ہیں۔ سوشل میڈیا کے دور میں کشمیریوں کی آواز کسی صورت دبائی نہیں جا سکتی۔ انہوں نے کہا کہ پنجاب حکومت یوم یکجہتی کشمیر سرکاری سطح پر بھرپور انداز میں منا رہی ہے،وزیر اعلیٰ پنجاب نے کشمیریوں سے اظہار یکجہتی کی مہم کی سربراہی کی۔ پنجاب کے تعلیمی اداروں میں کشمیر کے حوالے سے تقریری مقابلوں، ملی نغموں اور مشاعروں کا اہتمام کیا گیا ہے۔ بھارت میں تمام اقلیتیں ہندوتوا مائنڈ سیٹ کا شکار ہیں۔مودی کا سکھوں اور دیگر اقلیتوں کے ساتھ بدسلوکی سے اب دنیا آگاہ ہے۔ پاکستان کے 22کروڑ عوام مودی کو اس کے ناپاک عزائم میں کبھی کامیاب نہیں ہونے دیں گے اور لہو کے آخری قطرے اور بندوق کی آخری گولی تک کشمیری بہن بھائیوں کا ساتھ دیں گے۔قبل ازیں اپنے ٹویٹر پیغام میں معاونِ خصوصی وزیراعلی پنجاب نے کہا کہ بھارتی ریاستی دہشت گردی میں اب تک ہزاروں بے گناہ کشمیری شہید ہوچکے ہیں۔ ایک لاکھ 7 ہزار 813 بچے یتیم، 22ہزارخواتین بیوہ ہوچکیں، بھارتی درندہ فوج 11ہزار 234 کشمیری خواتین کو اجتماعی زیادتیوں کا نشانہ بنا چکی ہے مگر مسلسل ظلم کا سامنا کرتے کشمیریوں کے حوصلے چٹانوں سے بھی بلندہیں۔ بعد ازاں ڈسکہ میں فرینڈز آف کشمیر کے زیر اہتمام یوم یکجہتی کشمیر کے موقع پر منعقدہ کشمیر کانفرنس سے خطاب کر تے ہوئے ڈاکٹر فردوس عاشق اعوان نے کہا کہ اقوام عالم اور بالخصوص انسانی حقوق کی علمبردار تنظیموں کو مظلوم کشمیریوں کی چیخ وپکارکیوں سنائی نہیں دیتی ان کو بھارتی فوج کے مظالم کیوں نظر نہیں آتے۔ انہوں نے کہاکہ کشمیر ہماری شہ رگ ہے اور اپنی شہ رگ کو دشمن کی گرفت سے آزاد کرائے بغیر ہر گز آرام نہیں بیٹھیں گے۔ انہوں نے مطالبہ کیا کہ اقوام عالم اپنی منظور شدہ قرار داد پر عملدرآمد کروائے اور کشمیر یوں کو استصواب رائے کے ذریعے اپنے مستقبل کا فیصلہ کرنے کا حق دلا کر اپنی ذمہ داریاں انجام دیں۔ ڈاکٹر فردوس عاشق اعوان نے ڈسکہ میں اظہار یکجہتی ریلی کی قیادت کی جو میلاد چوک سے شروع کر بنگلہ چوک میں اختتام پذیر ہوئی۔ ریلی کے شرکا نے کشمیر بنے گا پاکستان اورکشمیریوں سے رشتہ کیا لاالہ الاللہ۔۔۔کے نعرے لگائے

مسئلہ کشمیر کا پر امن حل نا گزیر،بھارت عالمی قوانین روند رہا ہے:عبدالعلیم خان
وزیر اعظم عمران خان نے مودی کو ہر فورم پر بے نقاب کیا: یوم کشمیر پرخصوصی گفتگو
کشمیر کے معاملے پر تمام سیاسی جماعتوں کو قومی موقف کا ساتھ دینا چاہیے: ٹویٹ

سینئر وزیر پنجاب عبدالعلیم خان نے کہا ہے کہ کشمیریوں کی امنگوں کے مطابق اس دیرینہ مسئلے کا حل نکالنا ضروری ہے اور اب بھارتی ظلم و استبداد زیادہ دیر تک کشمیریوں کی آزادی روک نہیں سکے گا۔ انہوں نے کہا کہ مسئلہ کشمیر کے پر امن حل میں ناکامی عالمی امن بھی تباہ کر سکتی ہے لہذا مودی ہوش کے ناخن لے،اُسے کشمیریوں کو حق خود ارادیت دینا ہی ہوگا۔

یوم کشمیر کے حوالے سے سینئر وزیر پنجاب عبدالعلیم خان نے اپنی خصوصی گفتگو اور ٹوئٹ میں کہا کہ 5فروری کا دن کشمیریوں کی جدوجہد اور قربانیوں کو خراج عقیدت پیش کرتا ہے۔انہوں نے کہا کہ وزیر اعظم عمران خان نے اقوام متحدہ میں اپنے خطاب سمیت ہر عالمی فورم پر مودی اور بھارت کو مکمل طور پر بے نقاب کیا اور کشمیر کے حوالے سے ہونے والی زیادتیوں پر آواز اٹھائی۔انہوں نے کہا کہ مسئلہ کشمیر پر تمام سیاسی جماعتوں کو باہمی اختلافات سے بالا ترہوکر قومی موقف کا ساتھ دینا چاہیے۔سینئر وزیر عبدالعلیم خان کا مزید کہنا تھا کہ وادی کشمیر پر ناجائز قبضہ بر قرار رکھنے کے لئے بھارت تمام عالمی قوانین کو روند رہا ہے لیکن دن بدن مسئلہ کشمیر ابھی نہیں تو کبھی نہیں کی صورت اختیار کر رہا ہے اور انشاء اللہ کشمیریوں کو حق خود ارادیت دینا ہی ہوگا۔ عبدالعلیم خان کہنا تھا کہ بھارتی فوج کو بھی کشمیر میں ذلت اور رسوائی کا سامنا ہے اور کشمیریوں کی جدوجہد آزادی جلد رنگ لانے والی ہے-

ضلع خیبر لنڈیکوتل پاک افغان شاہراہ پر ضلعی انتظامیہ قومی مشران تاجروں اور سیاسی قائدین فلاحی تنظیموں کے مشران نے یوم یکجہتی کشمیر پر ریلی نکالی گئی

تفصیلات کے مطابق ضلع خیبر لنڈیکوتل پاک افغان شاہراہ پر ضلعی انتظامیہ قومی مشران سیاسی قائدین اور تاجروں و فلاحی تنظیموں کے زیر اہتمام یوم یکجہتی کشمیر پر ریلی نکالی گئی. ریلی میں اسسٹنٹ کمشنر لنڈی کوتل اکبر افتخار. ٹی ایم او شہباز خان تنظیم اہلسنت والجماعت کے ناظم اعلیٰ حاجی حکیم خان شینواری. پاکستان تحریک انصاف کے سینئر رہنماء حاجی ضرب اللہ شینواری. لنڈی کوتل فلاحی تنظیم کے صدر اختر علی شینواری چئرمین بنارس شینواری. ملک ماثل شینواری ملک میر علی شاہ شلمانی. ملک خیال رسول شینواری خیبر سٹوڈنٹس ایسوسی ایشن کے سربراہ ابودردا شینواری اور دیگر مشران سیاسی قائدین اور عوام نے کثیر تعداد میں شرکت یومِ یکجہتی کشمیر کے ریلی کے موقع پر مقررین فلاحی تنظیم کے صدر اختر علی شینواری ملک ماثل شینواری ناظم اعلیٰ حاجی حکیم خان شینواری بنارس شینواری اور دیگر مقررین نے کہا کہ یوم یکجہتی کشمیر کے موقع پر مقبوضہ کشمیر کے مسلمانوں اور عوام کے ساتھ شانہ بشانہ کھڑے ہونگے اور اس ضمن میں کسی بھی قربانی سے دریغ نہیں کرینگے انہوں نے کہا کہ مقبوضہ کشمیر میں بھارتی فوج کے بربریت اور کشمیری مسلمانوں پر مظالم کی بھرپور مزمت کرتے ہیں اور اقوام متحدہ اور دیگر انسانی حقوق کے ممالک مقبوضہ کشمیر میں جاری انڈیا کے مظالم کا نوٹس لیا جائے اور کشمیری مسلمانوں کو آزادی کا حق دیا جائے مقررین نے کہا قبائلی عوام اور مشران نے پہلے بھی کشمیری مسلمانوں کے آزادی کے لئے متحد تھے اور آئندہ بھی کشمیری مسلمانوں کے آزادی تک جدوجہد جاری رہے گی مقررین نے کہا کہ پاکستان کے تمام عوام اس مشکل گھڑی میں کشمیری عوام کے ساتھ اظہار یکجہتی کیلئے کھڑے ہیں اور ان کے آزادی کے حصول تک ان کے ساتھ رہے گی. یوم یکجہتی ریلی کے اختتام پر پاکستان کے سلامتی اور کشمیری مسلمانوں کے آزادی کے لئے خصوصی دعائیں کی گئے

کشمیر کی آزادی سے ہی پاکستان کی تکمیل ہے کشمیری عوام کی جدوجہد سے وادی کشمیر میں آزادی کا سورج جلد طلوع ہوگا:ڈاکٹر محمد زبیر

قاری زوار بہادر کا کہنا تھا کہ مودی بھارتی عوام کو جنگ کا ایندھن بنانے پر تلا ہوا ہے پاکستانی قوم اپنے وطن کےلئے اپنی جانوں کا نذرانہ دیں گے- بھارت پاک افواج اور قوم کے جذبات کا کئی بارآزماچکا، بچہ بچہ اپنی مسلح افواج کے ساتھ ہے جے یو پی کے زیر اہتمام ملک بھر میں ”یوم یکجہتی کشمیر “منایا گیا-

لاہورمیں جمعیت علماءپاکستان کے زیر اہتمام ملک بھر میں ”یوم یکجہتی کشمیر“ منایا گیااس سلسلہ میں لاہور میں کشمیری شہداءکے لئے قرآن خوانی کی گئی اوراس موضوع پر خطابات کیے گئے مقررین نے کہا ہے کہ مودی کبھی کشمیری عوام کو فتح نہیں کر سکے گا اقوام عالم بھارت میں 70 سال سے مقبوضہ کشمیر میں عوام کے ساتھ ظلم وستم اور سکھوں پر گزشتہ 2 ماہ سے تشدد کے خلاف آواز بلند کریں18 ماہ سے مقبوضہ کشمیر کے عوام لاک ڈاﺅن میں ہیںلیکن بھارتی حکومت یاد رکھے کشمیر کی آزادی سے ہی پاکستان کی تکمیل ہے کشمیری عوام کی جدوجہد رنگ لگائے گی اور وادی کشمیر میں آزادی کا سورج جلد طلوع ہوگا مودی سرکار بھارت کے ٹکڑے ٹکڑے کردے گی جو پاکستان اور کشمیریوں کی دشمنی میں اندھی ہو چکی ہے ۔ بھارت مقبوضہ کشمیر میں اب تک لاکھوں کشمیری بے گناہوں کا خون بہا چکا ہے اور وہاں مسلسل کشمیریوں کے خلاف ظلم وستم کا بازار گرم رکھے ہوئے ہے پاک بھارت سرحد پر کشیدگی روزانہ کا معمول بن گئی ہے اور بھارت سرحدی خلاف ورزیوں کے ذریعے پاکستان نے نہتے عوام کو نشانہ بناتارہتا ہے ۔

مودی سرکار ہوش کے ناخن لے اور خطے کو جنگ کی آگ میں دھکیلنے سے باز رہے نریندر مودی بھارتی عوام کو جنگ کا ایندھن بنانے پر تلا ہوا ہے پاکستانی قوم اپنے مادر وطن کی سا لمیت کے لئے اپنی جانوں کا نذرانہ دے کر اس کی حفاظت کریں گے ۔رہنماﺅں نے کہا کہ پاکستان ایک ایٹمی قوت ہے بھارتی حکمران مودی اور فوجی قیادت کسی غلط فہمی میں نہ رہے بھارت ماضی میں پاکستان کی مسلح افواج اور قوم کے جذبات کا کئی بارآزماچکا ہے۔ پاکستان کا بچہ بچہ اپنی مسلح افواج اور حکومت کے ساتھ ہے ۔ ان خیالات کا اظہار جمعیت علماءپاکستان کے سربراہ صاحبزادہ ڈاکٹر ابو الخیر محمد زبیر،علامہ قاری محمد زوار بہادر، ڈاکٹر جاوید اعوان،سید محمد صفدر شاہ گیلانی، علامہ ابو یاسر اظہر حسین فاروقی، حافظ نصیر احمد نورانی، رشید احمد رضوی، مفتی تصدق حسین ، محمد ارشد مہر، مولانا سلیم اعوان،مفتی جمیل رضوی ،مولانا نعیم جاوید نوری، حاجی شوکت علی، مولانا زوار حسین،قاری لیاقت علی رضوی، قاری خلیل مہروی،مولانا مستنصر نورانی، مولانا شبیر حسین فریدی نے مختلف تقاریب میں یوم یکجہتی کشمیرسے خطاب کرتے ہوئے کیا ۔دریں اثناءجمعیت علماءپاکستان کے زیراہتمام ملک بھر میں ”یوم یکجہتی کشمیر“ منایا گیا جے یو پی کے مرکزی دفتر لاہور میں موصولہ اطلاعات کے مطابق کراچی میں ، سکھر میں ، راولپنڈی میں، اسلام آباد میں، فیصل آباد میں جمعتہ المبارک کے اجتماعات اور مختلف پروگرام میں یوم یکجہتی کشمیرکے موضوع پر خطابات کیے۔

جمعتہ المبارک اوریومِ یکجہتی کشمیرکے موقع پر لاہور پولیس کے فول پروف سکیورٹی انتظامات
ریلیوں کو سکیورٹی کے لئے 1500کے قریب پولیس افسران و اہلکار تعینات کئے گئے
دوران ڈیوٹی غفلت برتنے پر ایس ایچ او باٹا پور کو شوکازجبکہ ٹی اے ایس آئی کو معطل کرنے کے احکامات جاری.
لاہور،05فروری2021:
ڈی آئی جی آپریشنز لاہور ساجد کیانی کی ہدایت پر جمعتہ المبارک اور یوم یکجہتی کشمیر کے موقع پر فول پروف سکیورٹی انتظامات عمل میں لائے گئے۔لاہور پولیس نے ہمیشہ کی طرح ریلیوں کے شرکاء کو بھرپورتحفظ فراہم کرنے کے لئے مربوط سکیورٹی پلان مرتب کیا . جس کے مطابق06 ایس پیز، 08ڈی ایس پیز،29 ایس ایچ اوز، 185 اَپر سب آرڈینیٹس سمیت 1500کے قریب پولیس افسران و جوانوں نے ریلیوں کے شرکا کو سکیورٹی فراہم کی۔ریلیوں کے راستے میں آنے والی بلند عمارات کی چھتوں پر سنائپرز تعینات کئے گئے تھے۔ڈولفن سکواڈ،پی آر یو کی ٹیموں اور پولیس کے دیگریونٹس کے جوان ریلیوں کے روٹ اور ملحقہ مقامات پر مسلسل اور موثر پٹرولنگ یقینی بناتے رہے. ڈی آئی جی آپریشنز ساجد کیانی شہر کی اہم مساجد، امام بارگاہوں، عبادتگاہوں اور یوم یکجہتی کشمیر کی مناسبت سے نکلنے والی ریلیوں کے روٹ کی سکیورٹی کی نگرانی خود کرتے رہے. ڈی آئی جی آپریشنز پولیس کی طرف سے کئے جانے والے سکیورٹی ودیگر انتظامات کا جائزہ لیتے رہے۔ڈی آئی جی آپریشنز نے وزٹ کے دوران پوائنٹ ڈیوٹیوں پر تعینات افسران و جوانوں سمیت ڈولفن اور پولیس رسپانس ٹیموں کو الرٹ رہ کر ڈیوٹی کرنے اور گشت یقینی بنانے بارے ہدایات بھی دیں.ساجد کیانی نےڈیوٹی کے دوران غفلت کے مرتکب پائے جانے والے ایس ایچ او باٹا پور کو شوکاز نوٹس جاری کیا.فرائض میں غفلت برتنے پر تھانہ شاہدہ کے ٹی اے ایس آئی کو معطل اور لائن حاضر کرنے کے بھی احکامات جاری کئے. ڈی آئی جی آپریشنز نے کہا کہ فرائض میں غفلت اور لا پروائی کسی صورت برداشت نہیں کی جائے گی.انہوں نے کہا کہ شہریوں کی حفاظت اور امن و امن کا قیام اولین ترجیح ہے جس کے لئے ہرممکن اقدامات کئے جا رہے ہیں.

تاریخ: 05-02-2021
لاہور( )تحریک لبیک یا رسول اللہ صلی اللہ علیک وسلم اور تحریک صراط مستقیم کی اپیل پر پاکستان اور آزاد کشمیر میں ”یوم یکجہتی کشمیر“ منایا گیا۔ آئمہ و خطباء نے جمعۃ المبارک کے اجتماعات میں کشمیری مسلمانوں پر ہونے والے بھارتی مظالم کی مذمت کی اور مسلمانوں پر اپنے مظلوم بھائیوں کی مدد کے لیے جو ذمہ داریاں عائد ہوتی ہیں، انہیں موضوع بنایا۔ نیز ایک قرار داد کے ذریعے حکومت پاکستان سے اخلاقی اور سفارتی مدد سے بڑھ کر کشمیریوں کی عملی مدد کا مطالبہ کیا گیا اور نماز جمعہ کے بعد مختلف شہروں میں ریلیاں نکالیں گئیں۔ لاہور میں تحریک لبیک یا رسول اللہ صلی اللہ علیک وسلم اور تحریک صراط مستقیم کے بانی ڈاکٹر محمدا شرف آصف جلالی، تحریک لبیک یارسول اللہ صلی اللہ علیک وسلم ضلع لاہور کے امیر علامہ محمد فیاض وٹو جلالی، تحریک صراط مستقیم ضلع لاہور کے امیر علامہ محمد صدیق مصحفی جلالی اور جلالیہ علماء کونسل کے امیر علامہ محمد حنیف حسینی جلالی کی قیادت میں قائد اعظم انٹر چینج سے جلو موڑ  (واہگہ بارڈر) تک ”کشمیر بزور شمشیر مارچ“ کے ٹائٹل کے تحت عظیم الشان مارچ کیا گیا۔ مارچ میں شرکاء کی کثیر تعداد نے شرکت کی اور ”اللہ اکبر“، ”لبیک یا رسول اللہ صلی اللہ علیک وسلم“، ”الجہاد الجہاد لبیک لبیک“، ”کشمیر بنے گا پاکستان“ کے نعروں کے علاوہ بھارتی فوج کے خلاف اور کشمیریوں کے حق میں نعرہ بازی کی۔ ”کشمیر بزور شمشیر مارچ“ سے خطاب کرتے ہوئے تحریک لبیک یا رسول اللہ صلی اللہ علیک وسلم کے سربراہ ڈاکٹر محمد اشرف آصف جلالی نے کہا: کشمیری حُرّیت پسندوں کی جدو جہد سے پورے بھارت میں ایک بیداری آ چکی ہے۔ کشمیریوں نے کشمیر بزور شمشیر کے راستے میں ہزاروں جانیں قربان کی ہیں۔ کشمیر ہرگز کسی ملاقات، یاداشت، مذاکرات اور قرارداد سے نہیں، ان شاء اللہ جہاد سے آزاد ہوگا۔ بھارت کشمیر میں وہی داستان ظلم رقم کر رہا ہے جو اسرائیل نے فلسطین میں کی ہے۔ بھارت مقبوضہ کشمیر میں مسلمانوں کی جائیدادیں ہتھیا کر وہاں ہندوؤں کو آباد کر رہا ہے۔ بھارت کے ہاتھ سے اپنی شہ رگ چھڑانے کے لیے پاکستان کو فوری دلیرانہ فیصلہ کرنا ہوگا۔ مودی مائنڈ سیٹ کی جارحیت کے مقابلے امن کی تجویز خودکشی کے مترادف ہے۔ بھارت سے مذاکرات کی بھیک مانگنا قومی وقار کے خلاف ہے۔ بھارت کے جنگی جنون کا علاج پاک فوج ہی کر سکتی ہے۔ مارچ میں علامہ محمد مظہر اقبال نورانی، علامہ محمد وقار نقشبندی، مفتی محمد حذیفہ جلالی، قاری محمد اصٖغر ترابی،مولانا محمد نعمان آصفی، علامہ محمد عظمت علی جلالی، مولانا حبیب اللہ جلالی و دیگر نے شرکت کی۔

تاجر انصاف کے زیر اہتمام کشمیریوں سے یکجہتی کیلئے ریلی نکالی گئی

شاہد خان کا کہنا تھا کہ اقوام متحدہ بھارت میں جاری ریاستی دہشتگردی کا نوٹس لیکر مظلوم کشمیریوں کو آزادی دلائے-

پشاورمیں تاجر انصاف خیبر پختونخوا کے زیر اہتمام کشمیر ڈے کی مناسبت اور کشمیریوں سے یکجہتی کیلئے جناح پارک روڈ پر ریلی نکالی گئی جس کی قیادت صدر تاجر انصاف شاہد خان‘ ایس پی سٹی محمد عمران ، ایڈمنسٹریٹر ٹائون ون سلیم خان ، شاہ پور سلام‘ ارشد انگار‘ گلریز خان‘ شاہد بلال چمکنی‘ شاہد آفریدی اور نانبائی ایسوسی ایشن کے صدر حاجی اقبال اور دیگر کر رہے تھے۔ ریلی کے شرکاء نے ہاتھوں میں پاکستان اور کشمیر کے پرچم اٹھا رکھے تھے۔ ریلی کے شرکاء نے افواج پاکستان کے حق میں اور بھارت کے خلاف شدید نعرے بازی کی۔

ریلی کے شرکاء سے خطاب کرتے ہوئے صدر تاجر انصاف شاہد خان نے کہا کہ اقوام متحدہ بھارت میں جاری ریاستی دہشتگردی کا نوٹس لے کر مظلوم کشمیریوں کو آزادی دلائے۔ انہوں نے کہا کہ حق خود ارادیت اور آزادی کشمیری عوامکا حق ہے اور پاکستان کے عوام اور حکومت اس بنیادی حق کے حصول کیلئے کشمیری بھائیوں کی اخلاقی‘ سیاسی اور سفارتی حمایت جاری رکھے گی۔ انہوں نے کہا کہ مودی سرکار نے گزشتہ کئی عرصہ سے ریاستی دہشتگردی شروع کی ہوئی ہے جس پر عالمی برادری کی خاموشی معنی خیز ہے۔ انہوں نے کہا کہ مظلوم کشمیریوں کی جدوجہد رنگ لائے گی اور وہ وقت دور نہیں کہ کشمیر آزاد ہو کر پاکستان کا حصہ ہو گا۔ انہوں نے کہا کہ بھارتی مظالم دنیا کے سامنے بے نقاب ہو چکے ہیں اور ہر فورم پر بھارت کو نا کامی اور شرمندگی کا سامنا کرناپڑا ہے۔