Category: بہاولپور

اوچ شریف (باغی ٹی وی،نامہ نگار حبیب خان) جنرل رپورٹر کے مطابق ڈپٹی کمشنر بہاولپور سید حسن رضا نے ریڑھی بازار اوچ شریف کا دورہ کیا جہاں انہوں نے صفائی ستھرائی اور دیگر انتظامی امور کا تفصیلی جائزہ لیا۔ اس موقع پر اسسٹنٹ کمشنر احمدپور شرقیہ نوید حیدر اور متعلقہ افسران بھی ان کے ہمراہ تھے۔

ڈپٹی کمشنر نے ریڑھی بازار میں قائم ریڑھی بانوں سے ملاقات کی اور شہریوں کو فراہم کی جانے والی سہولیات کا معائنہ کیا۔ انہوں نے بازار میں صفائی کے انتظامات مزید بہتر بنانے کی ہدایت دیتے ہوئے کہا کہ عوام کو صاف ستھرا اور منظم ماحول فراہم کرنا ضلعی انتظامیہ کی اولین ترجیح ہے۔

ڈی سی سید حسن رضا نے تجاوزات کے خاتمے، نکاسی آب کے مؤثر انتظامات اور پیدل چلنے والوں کی سہولت کے لیے راستوں کو کشادہ رکھنے پر زور دیا۔ انہوں نے متعلقہ محکموں کو ہدایت کی کہ روزانہ کی بنیاد پر صفائی کے عمل کو یقینی بنایا جائے اور کوڑا کرکٹ بروقت اٹھایا جائے۔

ڈپٹی کمشنر نے کہا کہ ریڑھی بازار شہریوں کی روزمرہ ضروریات پوری کرنے میں اہم کردار ادا کرتا ہے، اس لیے یہاں نظم و ضبط اور صفائی کے اعلیٰ معیار کو برقرار رکھنا ضروری ہے۔ انہوں نے واضح کیا کہ انتظامات میں کسی قسم کی کوتاہی برداشت نہیں کی جائے گی اور عوامی شکایات کا فوری ازالہ کیا جائے گا۔

دورے کے اختتام پر ڈپٹی کمشنر نے ریڑھی بانوں اور شہریوں سے تعاون کی اپیل کرتے ہوئے کہا کہ انتظامیہ اور عوام کے باہمی تعاون سے ہی شہر کو صاف ستھرا اور خوبصورت بنایا جا سکتا ہے۔

اوچ شریف (باغی ٹی وی، نامہ نگار حبیب خان) کڈپٹی کمشنر بہاولپور سید حسن رضا نے اوچ شریف میں زیرِ تعمیر اسپورٹس کمپلیکس کا تفصیلی دورہ کیا۔ اس موقع پر انہیں منصوبے کی پیش رفت، تعمیراتی معیار اور دیگر اہم امور کے بارے میں بریفنگ دی گئی۔

ڈپٹی کمشنر نے اسپورٹس کمپلیکس کے مختلف حصوں کا معائنہ کیا اور متعلقہ افسران کو ہدایت کی کہ تعمیراتی کام مقررہ مدت کے اندر مکمل کیا جائے اور معیار پر کسی قسم کا سمجھوتہ نہ کیا جائے۔ انہوں نے کہا کہ اسپورٹس کمپلیکس نوجوانوں کو صحت مند سرگرمیوں کی فراہمی میں اہم کردار ادا کرے گا اور علاقے میں کھیلوں کے فروغ کے لیے سنگِ میل ثابت ہوگا۔

دورے کے موقع پر اسسٹنٹ کمشنر احمد پور شرقیہ نوید حیدر بھی ڈپٹی کمشنر کے ہمراہ موجود تھے، جنہوں نے منصوبے کی موجودہ صورتحال، درپیش مسائل اور آئندہ کے لائحہ عمل سے آگاہ کیا۔

ڈپٹی کمشنر سید حسن رضا نے متعلقہ محکموں کو ہدایت کی کہ اسپورٹس کمپلیکس میں تمام سہولیات جدید تقاضوں کے مطابق مکمل کی جائیں تاکہ عوام بالخصوص نوجوانوں کو معیاری اور بہتر اسپورٹس سہولیات میسر آ سکیں۔

اوچ شریف (نامہ نگار حبیب خان)صوبائی کوالٹی کنٹرول بورڈ پنجاب نے سال 2025ء کی کارکردگی رپورٹ جاری کر دی ہے جس کے مطابق صوبہ بھر میں جعلی اور غیر قانونی ادویات کی روک تھام کے لیے تاریخی اور بھرپور اقدامات عمل میں لائے گئے۔ رپورٹ میں انکشاف کیا گیا ہے کہ پنجاب کے 36 ضلعی کوالٹی کنٹرول بورڈز کو فیلڈ ڈرگ انسپکٹرز اور دیگر متعلقہ اداروں کی جانب سے مجموعی طور پر 6604 کیسز موصول ہوئے، جن پر فوری کارروائی کا آغاز کیا گیا۔ ضلعی بورڈز نے ان کیسز کی مکمل چھان بین کے بعد 5389 مقدمات کے فیصلے سنائے، جن میں جعلی یا غیر قانونی ادویات کی تیاری اور فروخت میں ملوث پائے جانے والے 62 افراد اور کمپنیوں کے خلاف باقاعدہ فوجداری مقدمات درج کرنے کے احکامات جاری کیے گئے۔

رپورٹ کی تفصیلات کے مطابق، سنگین نوعیت کی خلاف ورزیوں پر مبنی 2405 مقدمات پنجاب کے چھ اہم ڈرگ کورٹس بشمول لاہور، گوجرانوالہ، راولپنڈی، ملتان اور بہاولپور کو کارروائی کے لیے بھجوائے گئے ہیں۔ اس کے علاوہ انسانی زندگیوں سے کھیلنے والے عناصر کے خلاف گھیرا تنگ کرتے ہوئے 68 میڈیکل اسٹورز، فارمیسیز، ڈسٹری بیوٹرز اور مینوفیکچرنگ کمپنیوں کے ڈرگ لائسنسز کی مستقل منسوخی کی سفارشات چیف ڈرگز کنٹرولر پنجاب کو ارسال کر دی گئی ہیں۔ واضح رہے کہ ضلعی کوالٹی کنٹرول بورڈز کی سربراہی متعلقہ اضلاع کے ڈپٹی کمشنرز کر رہے ہیں، جن کی معاونت کے لیے میڈیکل اور فارماسیوٹیکل ماہرین بطور ممبران شامل ہیں تاکہ پنجاب میں ادویات کے اعلیٰ معیار کو ہر صورت یقینی بنا کر عوام کو صحت کے ممکنہ خطرات سے محفوظ رکھا جا سکے۔

اوچ شریف (باغی ٹی وی، نامہ نگار حبیب خان)اوچ شریف شہر اور اس کے گردونواح میں موسمِ سرما کی پہلی بارش نے دستک دے دی، جس کے بعد سردی کی شدت میں واضح اضافہ ریکارڈ کیا گیا ہے۔ ہلکی سے درمیانی بارش کے باعث فضا میں خنکی بڑھ گئی جبکہ ٹھنڈی ہواؤں نے موسم کو مزید سرد بنا دیا۔

بارش کے بعد شہریوں نے گرم ملبوسات کا استعمال شروع کر دیا ہے، جبکہ صبح اور شام کے اوقات میں سردی زیادہ محسوس کی جا رہی ہے۔ بارش سے جہاں موسم خوشگوار ہو گیا، وہیں روزمرہ معمولات بھی جزوی طور پر متاثر ہوئے، سڑکوں پر پھسلن کے باعث ٹریفک کی روانی سست رہی۔

کسانوں کے مطابق یہ بارش فصلوں، خصوصاً گندم اور سبزیات کے لیے نہایت فائدہ مند ثابت ہوگی، جس سے زمین میں نمی بڑھے گی اور بہتر پیداوار کی توقع ہے۔ محکمہ موسمیات کا کہنا ہے کہ آئندہ چند روز کے دوران سردی کی شدت میں مزید اضافہ متوقع ہے۔

شہریوں نے موسم کی اس خوشگوار تبدیلی پر اطمینان کا اظہار کرتے ہوئے کہا ہے کہ طویل خشک موسم کے بعد بارش نے فضا کو صاف اور ماحول کو خوشگوار بنا دیا ہے۔

اوچ شریف (باغی ٹی وی،نامہ نگارحبیب خان):اوچ شریف جو کہ جنوبی پنجاب کا تاریخی اور ثقافتی شہر ہے، اب ماحولیاتی آلودگی کی شدید زد میں ہے۔ یہاں قائم پرانے طرز کے بھٹہ جات سے نکلنے والا زہریلا دھواں، راکھ اور مضر گیسیں فضا کو شدید آلودہ کر رہی ہیں، جبکہ پلاسٹک (پوتھین) بیگز کا بے دریغ استعمال شہری ماحول کو مزید خطرناک بنا رہا ہے۔ ماہرین کے مطابق اگر فوری اور مؤثر اقدامات نہ کیے گئے تو شہر مستقبل میں سموگ، فضائی بیماریوں، صحت کے بحران اور قدرتی وسائل کی تباہی کا شکار ہو سکتا ہے۔

اوچ شریف اور گرد و نواح میں موجود متعدد بھٹہ جات اب تک جدید زِگ زیگ ٹیکنالوجی پر منتقل نہیں ہوئے۔ پرانے بھٹہ جات سے خارج ہونے والی گیسیں سانس کی بیماریاں، آنکھوں کی جلن، جلد کی الرجی اور دل کی بیماریوں میں اضافہ کر رہی ہیں، جبکہ بچے، خواتین اور بزرگ سب سے زیادہ متاثر ہو رہے ہیں۔

شہریوں کے مطابق صبح و شام دھوئیں کی موٹی تہہ شہر کو ڈھانپ لیتی ہے اور مقامی کسانوں نے دعویٰ کیا کہ آلودگی کی وجہ سے فصلیں بھی متاثر ہو رہی ہیں۔

پلاسٹک بیگز کا بے دریغ استعمال بھی نکاسی آب کے نظام کو متاثر کر رہا ہے اور شہر میں گندگی اور بیماریوں کے خطرات بڑھا رہا ہے۔ ضلعی انتظامیہ نے متعدد اجلاس منعقد کر کے بھٹہ جات اور پلاسٹک بیگز کے خلاف کارروائی کی ہدایات دی ہیں، لیکن شہریوں کا کہنا ہے کہ عملی نفاذ کمزور ہے۔

ماحولیاتی ماہرین اور شہریوں نے مطالبہ کیا ہے کہ قوانین پر فوری اور شفاف عملدرآمد کیا جائے تاکہ اوچ شریف کو ایک صاف، سبز اور صحت مند شہر بنایا جا سکے۔

اوچ شریف (باغی ٹی وی، نامہ نگار حبیب خان):حکومتِ پنجاب نے پنجاب لوکل گورنمنٹ ایکٹ 2025 کے تحت ضلع بہاولپور میں مقامی حکومتوں کی حد بندی، درجہ بندی اور نام گذاری کا باضابطہ عمل شروع کر دیا ہے۔ اس سلسلے میں ڈپٹی کمشنر و ڈیمارکیشن آفیسر بہاولپور سید حسن رضا کی جانب سے عوامی نوٹس جاری کیا گیا ہے، جس کے تحت شہریوں کو حد بندی کے عمل میں براہِ راست شمولیت کا موقع فراہم کیا گیا ہے۔

اعلامیے کے مطابق ضلع بہاولپور کی مختلف تحصیلوں اور بلدیاتی اداروں کی حد بندی کے ابتدائی مسودات تیار کر لیے گئے ہیں، جن میں تحصیل کونسل بہاولپور صدر، احمد پور ایسٹ، یزمان، حاصل پور اور خیرپور ٹامیوالی شامل ہیں۔ اس کے علاوہ ٹاؤن کارپوریشن بہاولپور-I، ٹاؤن کارپوریشن بہاولپور-II، میونسپل کارپوریشن احمد پور ایسٹ اور میونسپل کمیٹیاں خانقاہ شریف، سمہ سٹہ، اوچ شریف، چنی گوٹھ، مبارک پور، یزمان، حاصل پور، قائم پور اور خیرپور ٹامیوالی بھی اس عمل کا حصہ ہیں۔

ڈپٹی کمشنر آفس کے مطابق ان تمام مقامی اداروں کی حد بندی سے متعلق ابتدائی تجاویز بدھ 7 جنوری 2026 سے ڈپٹی کمشنر بہاولپور کے دفتر، اسسٹنٹ کمشنرز کے دفاتر، ڈسٹرکٹ کونسل بہاولپور، میونسپل کارپوریشن بہاولپور اور متعلقہ میونسپل کمیٹیوں میں عوامی آگاہی کے لیے آویزاں کی جائیں گی۔ شہری ان تجاویز کی نقول دفتری اوقات میں 10 روپے فی صفحہ کے عوض حاصل کر سکتے ہیں۔

اعلامیے میں مزید بتایا گیا ہے کہ شہری 7 جنوری سے 14 جنوری 2026 تک حد بندی سے متعلق اپنی تجاویز یا اعتراضات تحریری صورت میں متعلقہ اسسٹنٹ کمشنر یا اسسٹنٹ ڈیمارکیشن آفیسر کے دفتر میں جمع کرا سکتے ہیں۔ موصول ہونے والی تجاویز اور اعتراضات کو 15 جنوری سے 17 جنوری تک عوام کے سامنے رکھا جائے گا، اس دوران جوابی اعتراضات (کاؤنٹر اعتراضات) بھی وصول کیے جائیں گے۔ صرف وہی تجاویز اور اعتراضات قابلِ سماعت ہوں گے جو پنجاب ڈیمارکیشن، درجہ بندی اور نام گذاری قواعد 2025 کے رول 8 اور 9 کے مطابق جمع کرائی جائیں۔

واضح کیا گیا ہے کہ ہر درخواست فارم نمبر II پر تین نقول میں، دستخط یا انگوٹھے کے نشان اور قومی شناختی کارڈ کی کاپی کے ہمراہ جمع کروانا لازمی ہوگا۔ درخواست بذریعہ خود یا مجاز نمائندے کے ذریعے دی جا سکتی ہے۔

ضلعی انتظامیہ کا کہنا ہے کہ حد بندی کا یہ عمل آبادی، جغرافیائی حدود، شہری و دیہی تقاضوں، انتظامی سہولت اور دستیاب وسائل کو مدنظر رکھتے ہوئے مکمل کیا جا رہا ہے تاکہ مستقبل میں بااختیار اور مؤثر بلدیاتی نظام قائم کیا جا سکے۔ انتظامیہ نے عوام سے اپیل کی ہے کہ وہ اس اہم جمہوری عمل میں بھرپور حصہ لے کر اپنی رائے اور تجاویز ضرور جمع کروائیں۔

نوٹس کے مطابق مزید معلومات اور رہنمائی کے لیے شہری ڈپٹی کمشنر آفس بہاولپور یا متعلقہ تحصیلوں کے اسسٹنٹ کمشنرز کے دفاتر سے رابطہ کر سکتے ہیں۔

اوچ شریف (باغی ٹی وی، نامہ نگار حبیب خان):اوچ شریف شہر میں بدانتظامی، تجاوزات اور تعمیراتی ملبے کی وجہ سے شہری زندگی شدید خطرات سے دوچار ہے۔ اس صورتحال پر اسسٹنٹ کمشنر احمد پور شرقیہ نوید حیدر نے میونسپل کمیٹی کے افسران کو کڑی سرزنش کرتے ہوئے سخت برہمی کا اظہار کیا اور واضح کیا کہ شہریوں کی جان و مال کے تحفظ کو خطرے میں ڈالنے والے کسی بھی افسر یا عملے کو نہیں بخشا جائے گا۔

ذرائع کے مطابق اسسٹنٹ کمشنر نے شہر کے مختلف علاقوں کا خود معائنہ کیا، جہاں سڑکوں، فٹ پاتھوں اور رہائشی گلیوں میں اینٹوں، ریت اور تعمیراتی ملبے کے ڈھیر کئی دنوں سے پڑے تھے، جو عوام کی آمدورفت میں رکاوٹ بن رہے تھے اور موٹر سائیکل سوار، بزرگ، خواتین اور بچوں کے لیے سنگین خطرات پیدا کر رہے تھے۔

اسسٹنٹ کمشنر نوید حیدر نے میونسپل کمیٹی کے افسران کو ہدایت دی کہ یہ ملبہ فوری طور پر ہٹایا جائے، فٹ پاتھ اور سڑکیں اصل حالت میں بحال کی جائیں، اور ذمہ دار افراد کی شناخت کر کے ان کے خلاف سخت قانونی و محکمانہ کارروائی کی جائے۔ انہوں نے عملے کو انتباہ دیا کہ کسی بھی قسم کی لاپرواہی یا ملی بھگت برداشت نہیں کی جائے گی۔

نوید حیدر نے تاکید کی کہ تجاوزات کے خاتمے اور شہری سہولیات کی بحالی کے لیے سرکاری فنڈز کا شفاف اور بروقت استعمال یقینی بنایا جائے۔ عوامی حلقوں نے اسسٹنٹ کمشنر کے سخت موقف کو خوش آئند قرار دیا اور مطالبہ کیا کہ عملی اقدامات فوراً شروع کیے جائیں، ورنہ شہری احتجاج پر مجبور ہوں گے۔ شہریوں نے خبردار کیا کہ بدانتظامی یا لاپرواہی کی صورت میں پیدا ہونے والے کسی بھی حادثے یا نقصان کی تمام تر ذمہ داری میونسپل کمیٹی اور ضلعی انتظامیہ پر عائد ہوگی۔

اسسٹنٹ کمشنر نوید حیدر نے آخری انتباہ دیا کہ اوچ شریف کو غیر ذمہ دارانہ حکمرانی، بدانتظامی اور عوام دشمن رویے سے نکالنے کے لیے فوری، سخت اور مؤثر اقدامات ضروری ہیں، اور کوئی بھی افسر اس سے مستثنیٰ نہیں ہوگا۔