Category: بہاولپور

اوچ شریف باغی ٹی وی ( نامہ نگار حبیب خان ) یونین کونسل سیکریٹری رشوت لیتے رنگے ہاتھوں گرفتار

اوچشریف کے علاقے یونین کونسل کوٹ خلیفہ میں تعینات سیکریٹری محمد عمران کو انٹی کرپشن ٹیم نے رشوت لیتے ہوئے رنگے ہاتھوں گرفتار کر لیا۔ تفصیلات کے مطابق ملزم نے بستی ماہی آرائیں کے رہائشی جہانگیر سے اس کی بہن کے برتھ سرٹیفکیٹ کے اجرا کے لیے 20 ہزار روپے رشوت طلب کی تھی۔

جہانگیر کی شکایت پر انٹی کرپشن ٹیم نے فوری کارروائی کرتے ہوئے چھاپہ مارا اور ملزم سے رشوت کی رقم برآمد کرلی۔ چھاپے کے دوران رقم لینے کے تمام شواہد بھی حاصل کر لیے گئے، جس کے بعد محمد عمران کو گرفتار کر کے مزید تفتیش کا آغاز کر دیا گیا ہے۔

عوامی حلقوں نے انٹی کرپشن ٹیم کی اس کارروائی کو سراہتے ہوئے کہا کہ ایسے اقدامات سے کرپشن کا خاتمہ اور حکومتی اداروں پر عوام کا اعتماد بحال ہوگا۔

اوچ شریف ،باغی ٹی وی (نامہ نگار حبیب خان) میونسپل کمیٹی اوچ شریف کا عملہ صفائی کے بجائے تنخواہوں تک محدود، شہر گندگی اور ناکارہ سیوریج کے باعث بدبو اور بیماریوں کی لپیٹ میں آ گیا۔

محلہ اکبر ٹاؤن، سحر پبلک اسکول والی گلی سمیت کئی علاقے گٹروں کے گندے پانی میں ڈوب چکے ہیں، جس سے نمازیوں، طلبہ اور عام شہریوں کو شدید مشکلات کا سامنا ہے۔ تعفن اور گندگی کے باعث شہری گھروں میں محصور ہو چکے ہیں، جبکہ میونسپل کمیٹی کے عملے کی عدم دلچسپی نے صورتحال مزید بگاڑ دی ہے۔

شہریوں کا ڈپٹی کمشنر بہاولپور سے فوری کارروائی کا مطالبہ – ان کا کہنا ہے کہ سیوریج لائنوں کو فوری بحال کیا جائے تاکہ عوام کو اس عذاب سے نجات ملے۔ گندے پانی میں گرنے سے بچے جلدی بیماریوں کا شکار ہو رہے ہیں اور ناقص نکاسی آب کے باعث وبائی امراض پھیلنے کا خطرہ بڑھ چکا ہے۔

شہریوں نے خبردار کیا کہ اگر جلد از جلد صفائی کے انتظامات بہتر نہ کیے گئے تو احتجاج پر مجبور ہوں گے۔

اوچ شریف (باغی ٹی وی، نامہ نگار حبیب خان) اوچ شریف کے نواحی علاقے بیٹ احمد میں افسوسناک حادثہ، ٹریکٹر ٹرالی کی زد میں آکر 5 سالہ ریحان ولد شہباز جاں بحق ہوگیا۔

تفصیلات کے مطابق بچہ سڑک کنارے دوستوں کے ساتھ کھیل رہا تھا کہ اچانک گنے سے لوڈ ٹریکٹر ٹرالی کے نیچے آ گیا اور شدید زخمی ہو گیا۔ حادثے کی اطلاع ملتے ہی ریسکیو ٹیمیں فوری طور پر موقع پر پہنچ گئیں اور بچے کو ابتدائی طبی امداد فراہم کرنے کے بعد رورل ہیلتھ سینٹر (RHC) اوچ شریف منتقل کر دیا گیا۔جہاں بچہ زخموں کی تاب نہ لاتے ہوئے جاں بحق ہوگیا.

اوچ شریف،باغی ٹی وی(نامہ نگارحبیب خان) خیرپور ڈاہا پٹرولنگ پولیس نے بڑی کارروائی کرتے ہوئے اشتہاری ملزم رضا حسین ولد اللہ داد بلوچ کو گرفتار کر لیا۔ ملزم تھانہ سٹی لودھراں میں درج مقدمہ نمبر 1944/23 میں مطلوب تھا۔

اے ایس آئی محمد ساجد گھلیجہ کی قیادت میں پولیس ٹیم نے جدید ٹیکنالوجی کی مدد سے محض چند گھنٹوں میں ملزم کو ٹریس کر کے گرفتار کر لیا۔ پولیس کے مطابق یہ کارروائی علاقے میں امن و امان کی بحالی کے لیے اہم سنگ میل ثابت ہوگی۔

پولیس نے ملزم کو گرفتار کرکے تھانہ دھوڑکوٹ کے حوالے کر دیا، جہاں اس کے خلاف مزید قانونی کارروائی کی جا رہی ہے۔

اے ایس آئی محمد ساجد گھلیجہ نے اس کامیابی کا کریڈٹ پولیس کی محنت اور جدید ٹیکنالوجی کے موثر استعمال کو دیا۔ انہوں نے عوام سے اپیل کی کہ وہ پولیس کے ساتھ تعاون کریں تاکہ جرائم کے خاتمے کے لیے مزید کامیابیاں حاصل کی جا سکیں۔

اوچ شریف،باغی ٹی وی(نامہ نگارحبیب خان) پرائس کنٹرول مجسٹریٹ اور ضلعی فوکل پرسن برائے ڈینگی، ہیلتھ انسپکٹر عمران حیدر سیال نے انسداد ڈینگی مہم کے تحت دارارقم اسکول، عمر ٹاؤن کا اچانک دورہ کیا، جہاں صفائی کے ناقص انتظامات پر شدید برہمی کا اظہار کیا گیا اور اسکول کے سربراہ باسط کو شوکاز نوٹس جاری کر دیا گیا۔

انسپکٹر عمران حیدر سیال نے اسکول میں پینے کے پانی اور دیگر بنیادی سہولتوں کا جائزہ لیا، جہاں ناقص صفائی اور غفلت پر انتظامیہ کو سخت ہدایات جاری کیں۔ ان کا کہنا تھا کہ”بچے ہمارا روشن مستقبل ہیں، ان کی صحت و زندگی سے کسی کو کھیلنے نہیں دیا جائے گا۔”

سکول انتظامیہ کو فوری طور پر صفائی کے نظام کی بہتری اور پینے کے صاف پانی کی فراہمی یقینی بنانے کا حکم دیا گیا، بصورت دیگر اسکول کو سیل کرنے کا عندیہ دیا گیا۔ ہیلتھ انسپکٹر نے واضح کیا کہ”بچوں کی صحت پر کوئی سمجھوتہ نہیں ہوگا، اسکول انتظامیہ کو اپنی ذمہ داری کا احساس دلایا جائے گا۔”

دورے کے دوران وارننگ لیٹر اور لیگل نوٹس جاری کرتے ہوئے عمران حیدر سیال نے کہا کہ بچوں کے تحفظ کے لیے ہر ممکن اقدام اٹھایا جائے گا تاکہ تعلیمی اداروں میں صحت و صفائی کے معیارات کو یقینی بنایا جا سکے۔

اوچ شریف ،باغی ٹی وی( نامہ نگارحبیب خان) میونسپل کمیٹی اوچ شریف کی تجاوزات کے خلاف کارروائی کے دوران شدید مزاحمت پر مقامی افراد کے خلاف مقدمہ درج کر لیا گیا۔

گزشتہ روز میونسپل کمیٹی اور ایڈمنسٹریٹر کی زیر نگرانی الشمس چوک سے للو والی پل تک تجاوزات کے خلاف آپریشن کیا گیا، تاہم مقامی افراد نے سخت مزاحمت کی۔ بلڈنگ میٹریل ہٹانے پر ملک جاوید، ملک پرویز، ملک جمیل، ملک نواز، جام بھورل، سجاد عرف سجی سمیت 10 نامعلوم افراد نے ہاتھا پائی شروع کر دی اور احتجاجاً ٹائر جلا کر روڈ بلاک کر دیا، جس سے عوام میں خوف و ہراس پھیل گیا۔

پولیس کے مطابق ملزمان اس سے قبل بھی مختلف مواقع پر تجاوزات کے حق میں دباؤ ڈالنے اور دھمکیاں دینے میں ملوث رہے ہیں۔ انفورسمنٹ انسپکٹر (بلڈنگ) سجاد ابراہیم کی رپورٹ پر پولیس نے مقدمہ درج کر لیا ہے۔

نامزد افراد کے خلاف تھانہ اوچ شریف میں دفعہ 341 (راستہ بلاک کرنا)، 435 (آگ لگانا)، 506 (دھمکیاں دینا)، 186 (کارِ سرکار میں مداخلت) اور 148/149 (غنڈہ گردی) کے تحت مقدمہ درج کر لیا گیا ہے۔ پولیس نے معاملے کی مزید تحقیقات شروع کر دی ہیں۔

اوچ شریف،باغی ٹی وی(نامہ نگارحبیب خان) بہاولپور کی تحصیل احمد پور شرقیہ میں غیرت کے نام پر ایک شخص کو بے دردی سے قتل کر دیا گیا۔ واقعہ تھانہ سٹی کی حدود میں محلہ اسلام پورہ میں پیش آیا، جہاں 37 سالہ محمد الطاف کو مبینہ طور پر غیرت کے نام پر قتل کر دیا گیا۔

پولیس کے مطابق مقتول محمد الطاف کو گولی مار کر قتل کیا گیا۔ ابتدائی تحقیقات میں شبہ ظاہر کیا جا رہا ہے کہ قتل کی وجوہات خاندانی تنازع یا غیرت کے معاملات ہو سکتے ہیں، تاہم مزید تفتیش جاری ہے۔ واقعے کے بعد ملزمان فرار ہو گئے، جن کی گرفتاری کے لیے پولیس چھاپے مار رہی ہے۔

پولیس حکام کا کہنا ہے کہ واقعے کا مقدمہ درج کر لیا گیا ہے اور ملزمان کو جلد گرفتار کر کے قانون کے کٹہرے میں لایا جائے گا۔