Category: بہاولپور

اوچ شریف،باغی ٹی وی(نامہ نگارحبیب خان) حلقہ پی پی 250 سے پاکستان پیپلز پارٹی کے ٹکٹ ہولڈر اور رکن پنجاب اسمبلی مخدوم سید عامر علی شاہ عمرہ کی سعادت حاصل کرنے کے لیے سعودی عرب روانہ ہو گئے۔

روانگی سے قبل انہوں نے اپنے بھائی مرحوم مخدوم سید علی حسن گیلانی شہید کی قبر پر حاضری دی اور فاتحہ خوانی کی۔ بعد ازاں انہوں نے اپنے حلقے کے عوام، عزیز و اقارب اور پارٹی کارکنان سے ملاقات کر کے نیک تمناؤں کا اظہار کیا۔

مخدوم سید عامر علی شاہ نے روانگی کے موقع پر کہا کہ وہ مقدس مقامات پر حاضری کے دوران ملک، عوام اور خطے کی ترقی و خوشحالی کے لیے خصوصی دعائیں کریں گے۔

ان کی روانگی پر سیاسی، سماجی اور مذہبی حلقوں کی جانب سے نیک خواہشات کا اظہار کیا گیا۔

اوچ شریف،باغی ٹی وی(نامہ نگارحبیب خان) کامریڈ ماڈل ہائیر سیکنڈری اسکول نے پلے گروپ تا جماعت ہشتم سالانہ رزلٹ 2025 کا باقاعدہ اعلان کر دیا۔

اس موقع پر سکول کے مین کیمپس میں ایک پروقار تقریب منعقد کی گئی، جس میں سی ای او فاروق احمد ملک اور بانی ادارہ محمد عثمان غنی نے نمایاں کارکردگی دکھانے والے طلبہ میں انعامات اور میڈل تقسیم کیے۔

سی ای او فاروق احمد ملک نے طلبہ کی محنت اور اساتذہ کی رہنمائی کو سراہتے ہوئے کہا کہ اسکول کے بچوں نے ہر سال کی طرح اس سال بھی شاندار تعلیمی کارکردگی کا مظاہرہ کیا۔ انہوں نے طلبہ کو مزید محنت اور لگن سے تعلیم حاصل کرنے کی تلقین کی۔

تقریب میں اساتذہ کرام اور والدین کی کثیر تعداد نے شرکت کی اور ادارے کی کارکردگی کو خوب سراہا۔

اوچ شریف ،باغی ٹی وی(نامہ نگارحبیب خان) گورنمنٹ صادق عباس گریجویٹ کالج، ڈیرہ نواب صاحب کینٹ احمد پور شرقیہ میں مادری زبانوں کے عالمی دن کی مناسبت سے شعبہ سرائیکی کے زیر اہتمام ایک خصوصی تقریب کا انعقاد کیا گیا۔ تقریب کی صدارت صدر شعبہ سرائیکی پروفیسر ڈاکٹر محمد الطاف ڈاھر جلالوی نے کی، جبکہ طلبہ، اساتذہ اور ماہرینِ تعلیم کی بڑی تعداد نے شرکت کی۔

تقریب میں سرائیکی شعرا شاہد کلیار اور ناساز نے اپنی شاعری پیش کی، جسے حاضرین نے بے حد سراہا۔ ڈاکٹر الطاف ڈاھر جلالوی نے خطاب میں کہا کہ مادری زبان نہ صرف ثقافت کی روح ہے بلکہ ترقی و خوشحالی کی کنجی بھی ہے۔ انہوں نے حکومت سے مطالبہ کیا کہ سرائیکی زبان کو فوری طور پر پی پی ایس سی اور سی ایس ایس امتحانات میں شامل کیا جائے اور ابتدائی تعلیم مادری زبان میں دی جائے۔

دوسری جانب، اوچ شریف میں بھی عالمی یومِ مادری زبان کے حوالے سے ایک اجلاس منعقد ہوا، جس میں مخدوم سید افتخار الحسن گیلانی، شیخ ناصر سلیم ایڈووکیٹ، میاں محمد عامر صدیقی، خواجہ غلام شبیر، اور دیگر معززین نے شرکت کی۔ مقررین نے کہا کہ کسی بھی قوم کی زبان اس کی شناخت اور ثقافتی ورثے کی بنیاد ہوتی ہے، اور اگر مادری زبان کو نظرانداز کیا گیا تو تاریخ اور تہذیب بھی مٹ سکتی ہے۔

انہوں نے حکومت سے مطالبہ کیا کہ تعلیمی نظام میں ایسی اصلاحات کی جائیں، جن کے تحت بچوں کو ابتدائی تعلیم ان کی مادری زبان میں دی جائے تاکہ وہ بہتر طریقے سے سیکھ سکیں۔ مقررین نے والدین پر بھی زور دیا کہ وہ گھروں میں بچوں سے مادری زبان میں گفتگو کریں تاکہ نئی نسل اپنی زبان اور ثقافت سے جڑی رہے۔

اوچ شریف (باغی ٹی وی، نامہ نگار حبیب خان) اوچ شریف کے الشمس چوک پر نجی تعلیمی اداروں کے اساتذہ، سکول کے طلباء اور انجمن تاجران نے تعلیمی اداروں کو کمرشل بنانے اور اضافی ٹیکسوں کے نفاذ کے خلاف بھرپور احتجاج کیا۔ احتجاجی ریلی کی قیادت مرکزی صدر انجمن تاجران اوچ شریف اور سول سوسائٹی کے رہنما عمر خورشید سہمن نے کی۔ ریلی ڈاکخانہ چوک سے الشمس چوک تک نکالی گئی، جس میں بڑی تعداد میں اساتذہ، طلباء اور تاجروں نے شرکت کی۔

ریلی کے شرکاء نے حکومت کے فیصلے کے خلاف شدید نعرے بازی کی اور مطالبہ کیا کہ تعلیمی اداروں کو کمرشل قرار دینے کا فیصلہ واپس لیا جائے۔ احتجاج کے دوران اساتذہ اور تاجروں نے کہا کہ تعلیمی اداروں پر بھاری ٹیکسوں کا نفاذ نہ صرف نجی تعلیمی اداروں کے لیے مشکلات پیدا کر رہا ہے بلکہ طلباء کے تعلیمی مستقبل کو بھی خطرے میں ڈال رہا ہے۔

مظاہرین نے الزام عائد کیا کہ میونسپل کمیٹی اوچ شریف کی جانب سے آئے دن سکولوں کو مختلف وجوہات کی بنا پر سیل کر دیا جاتا ہے، جس کے باعث بچوں کی تعلیم میں مسلسل خلل پیدا ہو رہا ہے۔ مظاہرین نے کہا کہ انتظامیہ کے ان اقدامات سے طلباء اور والدین ذہنی دباؤ کا شکار ہو رہے ہیں۔

خطاب کرتے ہوئے عمر خورشید سہمن نے کہا کہ "یہ اقدامات بچوں کے مستقبل کے لیے سنگین خطرہ ہیں اور قوم کے نونہالوں کا مستقبل تاریک ہوتا نظر آ رہا ہے۔ اگر حکومت نے اس فیصلے پر نظرثانی نہ کی تو ہم احتجاج کا دائرہ وسیع کریں گے۔” انہوں نے ڈپٹی کمشنر بہاولپور سے مطالبہ کیا کہ فوراً تمام سکولوں کو ڈی سیل کیا جائے اور تعلیمی اداروں پر عائد بھاری ٹیکسوں کو ختم کیا جائے۔

احتجاج کے دوران سکول سربراہان اور دیگر شرکاء نے اعلان کیا کہ اگر حکومت نے ہمارے مطالبات پر کوئی سنجیدہ قدم نہیں اٹھایا تو ہم ڈپٹی کمشنر بہاولپور آفس کے سامنے دھرنا دیں گے۔ انہوں نے حکومت پر زور دیا کہ تعلیم جیسے بنیادی شعبے کو کاروباری زمرے میں شامل نہ کیا جائے اور فوری طور پر تعلیمی اداروں کو درپیش مسائل کا حل نکالا جائے تاکہ طلباء کی تعلیم اور اساتذہ کی محنت متاثر نہ ہو۔

مظاہرین نے حکومت سے پرزور مطالبہ کیا کہ تعلیمی اداروں پر عائد غیر ضروری ٹیکسوں اور رکاوٹوں کو فوری طور پر ختم کیا جائے تاکہ بچوں کی تعلیمی سرگرمیاں متاثر نہ ہوں۔ انہوں نے کہا کہ تعلیم ہر شہری کا بنیادی حق ہے اور اس میں کسی بھی قسم کی رکاوٹ کسی صورت قبول نہیں کی جائے گی۔

احتجاج کے بعد شرکاء پرامن طور پر منتشر ہو گئے، تاہم انہوں نے واضح کیا کہ اگر ان کے مطالبات پر فوری عملدرآمد نہ کیا گیا تو وہ مزید سخت احتجاجی اقدامات اٹھانے پر مجبور ہوں گے۔