Category: بہاولپور

اوچ شریف(باغی ٹی وی،نامہ نگارحبیب خان) دھان کی باقیات کو آگ لگانے سے اسموگ میں اضافہ، شہری پریشان، متعلقہ اداروں سے فوری کارروائی کا مطالبہ

اوچ شریف اور تحصیل بھر میں دھان کی باقیات کو جلانے کا سلسلہ جاری ہے، جس سے ماحولیاتی آلودگی اور اسموگ میں خطرناک حد تک اضافہ ہو رہا ہے۔ شہری شدید تشویش کا شکار ہیں جبکہ متعلقہ ادارے اس صورتحال پر خاموش ہیں۔ عوام نے ڈپٹی کمشنر بہاول پور سے فوری نوٹس لینے کا مطالبہ کیا ہے۔

تفصیلات کے مطابق، کسانوں کی جانب سے دھان کی باقیات کو جگہ جگہ جلایا جا رہا ہے، جو کالے دھویں کے ذریعے فضائی آلودگی کو بڑھا رہا ہے۔ یاد رہے کہ عدالت عالیہ نے فصلوں کی باقیات کو جلانے پر پابندی عائد کر رکھی ہے۔ اس آلودگی سے اسموگ میں مسلسل اضافہ ہو رہا ہے، جس پر عوامی و سماجی حلقے پریشان ہیں۔

شہریوں کا کہنا ہے کہ محکمہ زراعت اوچ شریف کے عملے کی مبینہ ملی بھگت اور نااہلی کے باعث کسان کھلے عام ماحول کو نقصان پہنچا رہے ہیں۔ شہریوں نے متعلقہ اداروں سے سخت کارروائی کا مطالبہ کیا ہے۔

اوچ شریف (باغی ٹی وی،نامہ نگارحبیب خان): کراچی سے ملتان جانے والی ملت ایکسپریس ٹرین کی زد میں آ کر ایک شخص جاں بحق ہو گیا۔ ریسکیو سٹاف نے موقع پر پہنچ کر متوفی کی نعش کو تحصیل ہیڈ کوارٹر ہسپتال احمد پور شرقیہ منتقل کر دیا۔

واقعہ اس وقت پیش آیا جب ملت ایکسپریس ٹرین احمد پور شرقیہ ریلوے اسٹیشن کے قریب پہنچی اور دوسری جانب سے ذہنی توازن سے مفلوج شخص اللہ دتہ ریلوے لائن کراس کرنے کی کوشش کر رہا تھا۔ ٹرین کی زد میں آنے سے وہ موقع پر ہی جاں بحق ہو گیا۔

اطلاع پر ریسکیو ٹیم اور مقامی پولیس فوری طور پر جائے حادثہ پر پہنچ گئی۔ متوفی اللہ دتہ مدنی کالونی احمد پور شرقیہ کا رہائشی تھا۔

اوچ شریف (باغی ٹی وی نامہ نگار حبیب خان)موہانہ والی موری پنجند کینال سے نوجوان شخص کی لاش برآمد

تفصیلات کے مطابق اوچ شریف کے نواحی علاقے موہانہ والی موری پنجند کینال سے ایک نوجوان شخص کی لاش برآمد ہوئی ہے۔ ریسکیو اہلکاروں نے لاش کو کینال سے نکال کر ہسپتال منتقل کر دیا ہے۔ نوجوان کی شناخت ابھی تک نہیں ہو سکی ہے اور اس کے وارثان کی تلاش جاری ہے۔

مقامی پولیس نے موقع پر پہنچ کر تفتیش شروع کر دی ہے تاکہ واقعے کی نوعیت کا پتہ چلایا جا سکے۔ ابھی تک یہ واضح نہیں ہو سکا کہ نوجوان کی موت قدرتی تھی یا کسی دوسرے سبب سے ہوئی۔ پولیس نے تحقیقات کا دائرہ وسیع کر دیا ہے اور مزید معلومات حاصل کرنے کی کوشش کی جا رہی ہے۔

اوچ شریف (باغی ٹی وی نامہ نگار حبیب خان)کھیل کود کے دوران بچوں کی لڑائی میں بڑے کود پڑے، ایک شخص جاں بحق

تفصیلات کے مطابق نواحی علاقہ خلیل آباد میں کھیلنے کے دوران بچوں کی آپس میں لڑائی نے بڑی صورت اختیار کر لی، جس کے نتیجے میں ایک شخص جان سے ہاتھ دھو بیٹھا،اللہ یار ولد اللہ ڈیوایا اور عبدالستار ولد محمد صادق جن کی عمر تقریباً چار سے پانچ سال ہے، خلیل آباد سکول میں ایک ہی جماعت میں پڑھتے ہیں۔ کھیل کے دوران دونوں بچوں کی لڑائی ہوئی، جس پر خان محمد ولد حاجی خان ان دونوں کو چھڑانے کے لیے مداخلت کرنے گیا۔

اس دوران لڑائی کا دائرہ بڑوں تک پہنچ گیا اور محمد صادق قوم بلوچ اور اس کے بیٹے وغیرہ نے خان محمد کو لکڑی وغیرہ سے مبینہ طور پر مارا۔ مقامی پولیس کو 15 پر اطلاع دی گئی اور پولیس موقع پر پہنچ کر خان محمد کو زخمی حالت میں ہسپتال لے آئی تاہم وہ زخموں کی تاب نہ لاتے ہوئے جاں بحق ہوگیا۔

مقامی پولیس نے واقعے کا نوٹس لیتے ہوئے ابتدائی تفتیش شروع کر دی ہے اور مزید کارروائی جاری ہے۔

اوچ شریف (باغی ٹی وی،نامہ نگارحبیب خان) احمد پور شرقیہ میں 30 لاکھ روپے کی ڈکیتی، مزاحمت پر شہری زخمی

تحصیل احمد پور شرقیہ میں ڈکیتی کی واردات نے علاقے میں خوف و ہراس پھیلا دیا۔ دو مسلح ڈاکوؤں نے شہری محمد عمران سے 30 لاکھ روپے چھین لیے۔ یہ واقعہ اس وقت پیش آیا جب محمد عمران بینک سے بڑی رقم نکال کر اپنی گاڑی میں جا رہا تھا۔ ڈاکوؤں نے اس کی گاڑی کا پیچھا کیا اور شہر کے اندر آ کر گن پوائنٹ پر لوٹ مار کی۔

محمد عمران نے مزاحمت کی تو ڈاکوؤں نے فائرنگ کر دی، جس کے نتیجے میں وہ شدید زخمی ہو گیا۔ زخمی شہری کو فوری طور پر ریسکیو 1122 کے اہلکاروں نے احمد پور شرقیہ کے مقامی ہسپتال منتقل کیا، جہاں اس کی حالت بہتر بتائی جا رہی ہے۔

پولیس نے تفتیش کا آغاز کر دیا ہے اور قریبی سی سی ٹی وی کیمروں کی مدد سے ڈاکوؤں کا سراغ لگانے کی کوشش کر رہی ہے۔ پولیس حکام کا کہنا ہے کہ ملزمان کی گرفتاری کے لیے مختلف اقدامات کیے جا رہے ہیں۔

اس واقعہ کے بعد شہریوں میں تشویش کی لہر دوڑ گئی ہے اور انہوں نے پولیس سے فوری حفاظتی اقدامات کا مطالبہ کیا ہے۔

اوچ شریف (باغی ٹی وی نامہ نگار حبیب خان) اوچ شریف کے علاقے للو والی پل کے قریب ایک گیس سلنڈر کی دکان پر کرنٹ لگنے کے نتیجے میں ایک نوجوان جاں بحق اور دوسرا شدید زخمی ہوگیا۔ یہ افسوسناک واقعہ اس وقت پیش آیا جب گیس سلنڈر کی دکان پر کام کرنے والے دو نوجوانوں محمد اسحاق اور اکرام کو کرنٹ کا سامنا ہوا۔

ریسکیو ذرائع کے مطابق محمد اسحاق کو کرنٹ اس وقت لگا جب وہ دکان پر موجود تھا۔ اکرام نے اسحاق کو بچانے کی کوشش کی لیکن اس دوران وہ بھی کرنٹ کی زد میں آ گیا۔ کرنٹ لگنے سے محمد اسحاق موقع پر ہی جاں بحق ہوگیا جبکہ اکرام کی حالت تشویشناک رہی۔ ریسکیو ٹیم نے فوری طور پر اکرام کو ہسپتال منتقل کیا، جہاں اس کی حالت خطرے سے باہر بتائی جا رہی ہے۔

مقامی پولیس نے واقعہ کی تحقیقات کا آغاز کر دیا ہے اور دکان میں کرنٹ لگنے کے اس واقعے کی وجوہات کا تعین کرنے کی کوشش کی جا رہی ہے۔ اس افسوسناک واقعے کے بعد علاقے میں غم و غصہ کی لہر دوڑ گئی ہے اور عوام نے دکانوں کی حفاظتی تدابیر پر سوالات اٹھائے ہیں۔

اوچ شریف (باغی ٹی وی،نامہ نگارحبیب خان) اوچ شریف کی موبائل مارکیٹ میں شارٹ سرکٹ کے باعث ایک موٹر سائیکل رکشہ میں اچانک آگ بھڑک اٹھی، تاہم مقامی تاجروں نے فوری طور پر اپنی مدد آپ کے تحت آگ پر قابو پا لیا، جس سے بڑے نقصان کا خطرہ ٹل گیا۔

رپورٹ کے مطابق موبائل مارکیٹ میں ایک موٹر سائیکل رکشہ کپڑوں کے بورے منیر کلاتھ ہاؤس پہنچانے کے لیے نکلا ہی تھا کہ اچانک شارٹ سرکٹ کی وجہ سے رکشے میں آگ بھڑک اٹھی۔ اس حادثے نے مارکیٹ میں موجود تاجروں اور خریداری کے لیے آئے ہوئے افراد کو شدید پریشانی میں مبتلا کر دیا۔ آگ کی لپیٹ میں آنے والا رکشہ مکمل طور پر شعلوں میں گھِر چکا تھا جس کے باعث آس پاس موجود دکانداروں اور مارکیٹ میں موجود افراد نے فوراً مدد کے لیے ایک دوسرے کو آواز دی۔

مارکیٹ کے تاجروں نے فوری طور پر آگ پر قابو پانے کے لیے بھرپور کوششیں شروع کر دیں۔ انہوں نے اپنی مدد آپ کے تحت دستیاب وسائل سے آگ بجھانے کی کوشش کی اور بروقت اقدام سے آگ کو مزید پھیلنے سے روک لیا۔ تاجروں کی فوری اور موثر کارروائی نے نہ صرف مارکیٹ کے دیگر حصوں کو محفوظ رکھا بلکہ کسی بڑے مالی اور جانی نقصان سے بھی بچاؤ ممکن بنایا۔

اوچ شریف(باغی ٹی وی ،نامہ نگارحبیب خان) خاندانی دشمنی پر فائرنگ، تین افراد زخمی

تفصیل کے مطابق اوچ شریف کے نواحی علاقے خیرپور ڈاھا میں خاندانی دشمنی کے باعث دو گروپوں میں لڑائی کے دوران فائرنگ کا تبادلہ ہوا، جس میں تین افراد زخمی ہو گئے۔ زخمیوں میں جاوید، آصف اور فقیر بخش شامل ہیں، جنہیں فوری طور پر ہسپتال منتقل کر دیا گیا۔

ریسکیو ذرائع کے مطابق ریسکیو 1122 کو کال موصول ہوئی جس میں اطلاع دی گئی کہ تین افراد کو گولیاں لگی ہیں تاہم کالر موقع پر موجود نہیں تھا۔ کنٹرول روم نے فوری کارروائی کرتے ہوئے اوچ شریف سے ایمبولینس روانہ کر دی۔ موقع پر پہنچنے کے بعد ریسکیو ٹیم نے زخمیوں کو فرسٹ ایڈ فراہم کی اور انہیں ہسپتال منتقل کیا۔

اوچ شریف (باغی ٹی وی، نامہ نگار حبیب خان) اوچ شریف اور گردونواح میں چائلڈ لیبر ایکٹ کی خلاف ورزیوں پر حکومتی ادارے مکمل طور پر ناکام نظر آ رہے ہیں۔ معصوم بچوں کو دیہاڑی اور کھانے کے عوض جبری محنت مشقت پر مجبور کیا جا رہا ہے، جبکہ مقامی و ضلعی انتظامیہ اور لیبر ڈیپارٹمنٹ خاموش تماشائی بنے ہوئے ہیں۔ اطلاعات کے مطابق، لیبر انسپکٹرز پر ماہانہ منتھلی لینے کے الزامات بھی عائد کیے گئے ہیں، جس کے باعث وہ بچوں سے جبری مشقت کروانے والوں کے خلاف کاروائی سے گریزاں ہیں۔

اوچ شریف کے مختلف کاروباری مراکز، ورکشاپس، بھٹہ خشت، چائے کے ہوٹل، بیکری، اور کباڑ خانوں سمیت کئی مقامات پر کمسن بچوں سے سخت محنت کروائی جا رہی ہے۔ صوبائی حکومت نے چائلڈ لیبر کے خلاف کارروائی کے احکامات دیے ہیں، مگر لیبر ڈیپارٹمنٹ کے افسران کی مبینہ بے حسی اور منتھلی معاملات کی وجہ سے یہ احکامات محض کاغذی کاروائی بن کر رہ گئے ہیں۔ نتیجتاً، سکول جانے کی عمر کے بچے اپنے اہل خانہ کی کفالت کے لیے مزدوری کرنے پر مجبور ہیں۔

متعدد بار بچوں پر تشدد اور غیر انسانی سلوک کے واقعات بھی سامنے آچکے ہیں لیکن لیبر ڈیپارٹمنٹ کی مجرمانہ خاموشی کے باعث کوئی عملی قدم نہیں اٹھایا گیا۔ شہریوں کا کہنا ہے کہ محکمہ لیبر کے افسران کی ملی بھگت اور بااثر افراد کی سرپرستی کے سبب چائلڈ لیبر میں دن بہ دن اضافہ ہو رہا ہے۔

اوچ شریف کے شہریوں نے وزیر اعلیٰ پنجاب سے اپیل کی ہے کہ لیبر ڈیپارٹمنٹ میں فرض شناس اور ایماندار افسران کو تعینات کیا جائے تاکہ جبری مشقت کا شکار بچوں کا مستقبل محفوظ بنایا جا سکے۔ شہریوں کا کہنا ہے کہ اگر فوری طور پر کارروائی نہ کی گئی تو یہ معصوم بچے ہمیشہ کے لیے علم و ترقی سے محروم رہ جائیں گے۔