Category: بہاولپور

اوچ شریف (باغی ٹی وی نامہ نگار حبیب خان) اوچ شریف میں کروڑوں روپے مالیت کی سرکاری کمرشل اور رہائشی اراضی پر مبینہ لینڈ مافیا نے دوبارہ قبضہ جما لیا۔

اوچ شریف (باغی ٹی وی نامہ نگار حبیب خان) اوچ شریف میں کروڑوں روپے مالیت کی سرکاری کمرشل اور رہائشی اراضی پر دوبارہ قبضے کا انکشاف ہوا ہے، جسے حکومت کی جانب سے واگزار کرایا گیا تھا۔ ذرائع کے مطابق، لینڈ مافیا نے نائب تحصیلدار ملک شہباز اور ریونیو عملے کی مبینہ ملی بھگت سے دوبارہ تعمیرات کر کے اپنی جگہیں بحال کر لی ہیں، جس پر شہریوں نے شدید احتجاج کیا ہے اور اعلیٰ حکام سے نوٹس لینے کا مطالبہ کیا ہے۔

تفصیلات کے مطابق، چند سال قبل حکومت پنجاب کی مہم کے تحت اوچ شریف میں ریلوے لائن کے قریب موجود سرکاری کمرشل اراضی پر بنائے گئے دکانوں اور رہائشی عمارتوں کو مسمار کر دیا گیا تھا۔ کئی عرصے تک ملبہ اور خالی پلاٹ موجود رہے، تاہم حالیہ دنوں میں مبینہ طور پر لینڈ مافیا نے دوبارہ تعمیرات شروع کر دی ہیں۔ شہریوں کا الزام ہے کہ نائب تحصیلدار ملک شہباز، گرداور اور متعلقہ پٹواری نے بھاری رشوت کے عوض مافیا کو دوبارہ قبضہ جمانے کی اجازت دی، جس سے علاقے میں تشویش کی لہر دوڑ گئی ہے۔

شہریوں محمد عبداللہ، محمد سلمان، محمد عدنان اور دیگر کا کہنا ہے کہ حکومت کے تجاوزات کے خاتمے کا ایجنڈا یہاں بری طرح ناکام ہو چکا ہے۔ ان کا مؤقف ہے کہ مقامی انتظامیہ کے افسران کے مبینہ تعاون سے سرکاری زمینوں پر دوبارہ قبضہ کرایا جا رہا ہے، جو حکومتی پالیسی کی واضح خلاف ورزی ہے۔ شہریوں نے مطالبہ کیا کہ وزیراعلیٰ پنجاب، ڈی جی اینٹی کرپشن اور ڈپٹی کمشنر بہاولپور فوری نوٹس لیں اور لینڈ مافیا کے خلاف سخت کارروائی کی جائے۔

اس سلسلے میں جب نائب تحصیلدار ملک شہباز سے موقف لیا گیا تو ان کا کہنا تھا کہ معاملے کی ذمہ داری متعلقہ گرداور کو سونپ دی گئی ہے۔ شہریوں نے اس جواب کو غیر تسلی بخش قرار دیا ہے اور مزید مؤثر اقدامات کی ضرورت پر زور دیا ہے۔

اوچ شریف(باغی ٹی وی ،نامہ نگار حبیب خان ) 17 سالہ لڑکی کا نہر میں ڈوبنے کا ڈرامہ، حقیقت میں زندہ برآمد، والدین اور ریسکیو کا وقت اور وسائل ضائع

تفصیلات کے مطابق گذشتہ روز اوچ شریف میں ایک 17 سالہ لڑکی (ع) نے نہر میں ڈوبنے کی افواہ پھیلا کر والدین، ریسکیو ٹیموں اور مقامی انتظامیہ کو سخت مشکلات میں ڈال دیا۔ لڑکی کے نہر میں کودنے کی اطلاع پر ریسکیو 1122 نے اندھیراچھاجانے تک کشتی آپریشن اور پانی میں غوطہ خوری جاری رکھی۔ سرد موسم میں غوطہ خوروں نے جانفشانی سے لڑکی کو تلاش کرنے کوشش کی اس دوران ایمبولینس اور دیگر ریسکیو عملہ بھی موقع پر موجود رہا۔ تاہم یہ آپریشن اس وقت بے نتیجہ ثابت ہوا جب مقامی پولیس نے لڑکی کو ایک دور دراز علاقے سے زندہ حالت میں برآمد کرلیا۔

ذرائع کا کہنا ہے کہ لڑکی مبینہ طور پر اپنے عاشق کے ساتھ فرار ہوگئی تھی مگر بزدل عاشق نے اسے اکیلا چھوڑ کر بھاگنے میں عافیت جانی۔ مزید یہ کہ ذرائع کے مطابق مذکورہ لڑکی نے نہر میں گرنے کی جھوٹی اطلاع دینے کے لیے اپنی سہیلی کو بھی اس جھوٹ پر آمادہ کیا اور ایک من گھڑت کہانی ترتیب دی تاکہ مبینہ طور پر اس کا اغوا یا غائب ہونا کسی اور زاویے سے دکھایا جاسکے۔

ریسکیو آپریشن پر عوامی وسائل اور وقت کے ضیاع پر مقامی لوگوں نے شدید ردِ عمل دیا ہے۔ اس جعلی ڈرامے کی وجہ سے حکومتی ذرائع کے مطابق تقریباً ایک لاکھ روپے کا خرچ ہوا اور ریسکیو عملہ شدید مشکلات کا سامنا کرتا رہا۔ انتظامیہ اور عوام نے اس واقعے کے سدباب اور مستقبل میں جھوٹے دعووں کو روکنے کے لیے مؤثر قانونی کارروائی کا مطالبہ کیا ہے۔

اوچ شریف (باغی ٹی وی ،نامہ نگار حبیب خان)اوچ شریف کے علاقے حسینی چوک کے قریب ایک افسوسناک حادثہ پیش آیا جہاں 14 سالہ لڑکی کپڑے دھوتے ہوئے نہر میں گر کر ڈوب گئی۔ لڑکی کا نام نہیں بتایا گیالیکن وہ محمد ریاض کی بیٹی تھی۔ اس واقعے کے بعد اس کے خاندان پر غم کا پہاڑ ٹوٹ گیا ہے۔

یہ حادثہ اس وقت پیش آیا جب لڑکی نہر کے کنارے کپڑے دھورہی تھی اور اچانک اس کا پاؤں پھسل گیا۔ نہر کی گہرائی تقریباً 15 فٹ اور چوڑائی 45 فٹ ہے، جس کی وجہ سے تلاش میں مشکلات پیش آ رہی ہیں۔

اطلاع ملتے ہی ریسکیو ٹیمیں موقع پر پہنچ گئیں۔ غوطہ خور اور کشتی کے ذریعے لڑکی کی تلاش کا عمل شروع کر دیا گیا ہے اور یہ آپریشن ابھی جاری ہے۔

اوچ شریف (باغی ٹی وی، نامہ نگار حبیب خان)کوئٹہ خودکش دھماکہ،پاک فوج کا جوان نائیک محمد صدیق بڈانی شہید

تفصیل کے مطابق اوچ شریف کے نواحی علاقے چک کیہل سے تعلق رکھنے والے پاک فوج کے نائیک محمد صدیق بڈانی کوئٹہ ریلوے اسٹیشن پر ہونے والے خودکش دھماکے میں شہید ہوگئے۔ یہ افسوسناک واقعہ اوچ شریف اور ملک بھر کے لیے ایک بڑا سانحہ ہے، جس میں ایک بہادر سپاہی نے وطن کی حفاظت کے لیے اپنی جان کا نذرانہ پیش کیا۔

نائیک محمد صدیق بڈانی پاک فوج کے ایک بہادر اور محنتی سپاہی تھے جو کوئٹہ ریلوے اسٹیشن پر اس وقت موجود تھے جب یہ المناک دھماکہ ہوا۔ وہ اپنے گھر اوچ شریف واپسی کے سفر پر تھے جب یہ حملہ پیش آیا، جس میں وہ شہید ہوگئے۔

شہید محمد صدیق بڈانی کی شہادت پر اوچ شریف اور پورے علاقے میں سوگ کا سماں ہے۔ ان کے اہل خانہ اور علاقہ مکینوں نے ان کی قربانی کو خراج عقیدت پیش کیا۔ ان کے والدین نے ان کی شہادت کو فخر کا باعث قرار دیتے ہوئے کہا کہ ان کا بیٹا ہمیشہ کے لیے ان کے دلوں میں زندہ رہے گا۔

اوچ شریف(باغی ٹی وی،نامہ نگارحبیب خان) دھان کی باقیات کو آگ لگانے سے اسموگ میں اضافہ، شہری پریشان، متعلقہ اداروں سے فوری کارروائی کا مطالبہ

اوچ شریف اور تحصیل بھر میں دھان کی باقیات کو جلانے کا سلسلہ جاری ہے، جس سے ماحولیاتی آلودگی اور اسموگ میں خطرناک حد تک اضافہ ہو رہا ہے۔ شہری شدید تشویش کا شکار ہیں جبکہ متعلقہ ادارے اس صورتحال پر خاموش ہیں۔ عوام نے ڈپٹی کمشنر بہاول پور سے فوری نوٹس لینے کا مطالبہ کیا ہے۔

تفصیلات کے مطابق، کسانوں کی جانب سے دھان کی باقیات کو جگہ جگہ جلایا جا رہا ہے، جو کالے دھویں کے ذریعے فضائی آلودگی کو بڑھا رہا ہے۔ یاد رہے کہ عدالت عالیہ نے فصلوں کی باقیات کو جلانے پر پابندی عائد کر رکھی ہے۔ اس آلودگی سے اسموگ میں مسلسل اضافہ ہو رہا ہے، جس پر عوامی و سماجی حلقے پریشان ہیں۔

شہریوں کا کہنا ہے کہ محکمہ زراعت اوچ شریف کے عملے کی مبینہ ملی بھگت اور نااہلی کے باعث کسان کھلے عام ماحول کو نقصان پہنچا رہے ہیں۔ شہریوں نے متعلقہ اداروں سے سخت کارروائی کا مطالبہ کیا ہے۔

اوچ شریف (باغی ٹی وی،نامہ نگارحبیب خان): کراچی سے ملتان جانے والی ملت ایکسپریس ٹرین کی زد میں آ کر ایک شخص جاں بحق ہو گیا۔ ریسکیو سٹاف نے موقع پر پہنچ کر متوفی کی نعش کو تحصیل ہیڈ کوارٹر ہسپتال احمد پور شرقیہ منتقل کر دیا۔

واقعہ اس وقت پیش آیا جب ملت ایکسپریس ٹرین احمد پور شرقیہ ریلوے اسٹیشن کے قریب پہنچی اور دوسری جانب سے ذہنی توازن سے مفلوج شخص اللہ دتہ ریلوے لائن کراس کرنے کی کوشش کر رہا تھا۔ ٹرین کی زد میں آنے سے وہ موقع پر ہی جاں بحق ہو گیا۔

اطلاع پر ریسکیو ٹیم اور مقامی پولیس فوری طور پر جائے حادثہ پر پہنچ گئی۔ متوفی اللہ دتہ مدنی کالونی احمد پور شرقیہ کا رہائشی تھا۔

اوچ شریف (باغی ٹی وی نامہ نگار حبیب خان)موہانہ والی موری پنجند کینال سے نوجوان شخص کی لاش برآمد

تفصیلات کے مطابق اوچ شریف کے نواحی علاقے موہانہ والی موری پنجند کینال سے ایک نوجوان شخص کی لاش برآمد ہوئی ہے۔ ریسکیو اہلکاروں نے لاش کو کینال سے نکال کر ہسپتال منتقل کر دیا ہے۔ نوجوان کی شناخت ابھی تک نہیں ہو سکی ہے اور اس کے وارثان کی تلاش جاری ہے۔

مقامی پولیس نے موقع پر پہنچ کر تفتیش شروع کر دی ہے تاکہ واقعے کی نوعیت کا پتہ چلایا جا سکے۔ ابھی تک یہ واضح نہیں ہو سکا کہ نوجوان کی موت قدرتی تھی یا کسی دوسرے سبب سے ہوئی۔ پولیس نے تحقیقات کا دائرہ وسیع کر دیا ہے اور مزید معلومات حاصل کرنے کی کوشش کی جا رہی ہے۔

اوچ شریف (باغی ٹی وی نامہ نگار حبیب خان)کھیل کود کے دوران بچوں کی لڑائی میں بڑے کود پڑے، ایک شخص جاں بحق

تفصیلات کے مطابق نواحی علاقہ خلیل آباد میں کھیلنے کے دوران بچوں کی آپس میں لڑائی نے بڑی صورت اختیار کر لی، جس کے نتیجے میں ایک شخص جان سے ہاتھ دھو بیٹھا،اللہ یار ولد اللہ ڈیوایا اور عبدالستار ولد محمد صادق جن کی عمر تقریباً چار سے پانچ سال ہے، خلیل آباد سکول میں ایک ہی جماعت میں پڑھتے ہیں۔ کھیل کے دوران دونوں بچوں کی لڑائی ہوئی، جس پر خان محمد ولد حاجی خان ان دونوں کو چھڑانے کے لیے مداخلت کرنے گیا۔

اس دوران لڑائی کا دائرہ بڑوں تک پہنچ گیا اور محمد صادق قوم بلوچ اور اس کے بیٹے وغیرہ نے خان محمد کو لکڑی وغیرہ سے مبینہ طور پر مارا۔ مقامی پولیس کو 15 پر اطلاع دی گئی اور پولیس موقع پر پہنچ کر خان محمد کو زخمی حالت میں ہسپتال لے آئی تاہم وہ زخموں کی تاب نہ لاتے ہوئے جاں بحق ہوگیا۔

مقامی پولیس نے واقعے کا نوٹس لیتے ہوئے ابتدائی تفتیش شروع کر دی ہے اور مزید کارروائی جاری ہے۔