Category: بہاولپور

اوچ شریف (باغی ٹی وی نامہ نگار حبیب خان) تھانہ اوچ شریف کی حدود میں قومی شاہراہ پر واقع پولیس چوکی مقبول شہید کی غیر فعالیت کے باعث علاقے میں چوری، ڈکیتی اور راہزنی کی وارداتوں میں تشویشناک حد تک اضافہ ہو گیا ہے۔ جرائم پیشہ عناصر کے لیے یہ چوکی محفوظ پناہ گاہ بن چکی ہے، جس سے شہریوں میں خوف و ہراس بڑھ رہا ہے۔

ذرائع کے مطابق، چوکی مقبول شہید گزشتہ کچھ عرصے سے نامعلوم وجوہات کی بنا پر بند ہے، جس کا فائدہ اٹھاتے ہوئے جرائم پیشہ عناصر کچے کے علاقوں سے یہاں گزر کر وارداتیں کر رہے ہیں۔ کپاس کے سیزن کے دوران آڑھتی اور بیوپاری حضرات روزانہ لٹنے پر مجبور ہیں۔ چوکی کی عمارت اب چوروں، ڈاکوؤں اور نشے کے عادی افراد کا مرکز بن چکی ہے، جہاں سے یہ عناصر دیگر ملحقہ علاقوں میں جرائم کی وارداتیں کرتے ہیں۔

اہل علاقہ نے احتجاج کرتے ہوئے ایڈیشنل آئی جی جنوبی پنجاب اور دیگر اعلیٰ حکام سے اپیل کی ہے کہ فوری طور پر چوکی مقبول شہید کو دوبارہ فعال بنایا جائے اور پولیس اہلکار تعینات کیے جائیں، تاکہ شہری سکھ کا سانس لے سکیں اور علاقے میں امن و امان بحال ہو۔

اوچ شریف (باغی ٹی وی،نامہ نگارحبیب خان) اوچ شریف میں سیوریج کے گندے پانی سے بڑے پیمانے پر سبزیوں کی کاشت کا انکشاف ہوا ہے۔ اس مضر صحت سبزیوں کو مقامی سطح پر استعمال کے ساتھ ساتھ دیگر علاقوں میں بھی سپلائی کیا جا رہا ہے، جس کے باعث شہریوں کی صحت پر سنگین اثرات مرتب ہونے کا خدشہ ہے۔ علاقے کے لوگ اس غیر ذمہ دارانہ عمل پر شدید پریشان ہیں اور اسے انسانی صحت کے لیے خطرہ قرار دیتے ہوئے اعلیٰ حکام سے فوری کارروائی کا مطالبہ کر رہے ہیں۔

مقامی ذرائع کے مطابق حسینی چوک اور اس کے گرد و نواح کے رقبے پر سیوریج کے گندے پانی سے سبزیاں کاشت کی جا رہی ہیں۔ یہاں اگائی جانے والی سبزیوں کو اوچ شریف کے مختلف بازاروں میں فروخت کے لیے بھیجا جاتا ہے، جس کے نتیجے میں عوام ان مضر صحت سبزیوں کے کھانے پر مجبور ہیں۔ شہریوں کا کہنا ہے کہ ان سبزیوں کے استعمال سے متعدد خطرناک امراض جیسے کہ ہیپاٹائٹس، معدے کے امراض اور جلدی مسائل میں اضافے کا خدشہ ہے۔

تشویش کی بات یہ ہے کہ میونسپل کمیٹی اوچ شریف کی جانب سے کاشتکاروں کو گندے پانی کی سپلائی پر مبینہ طور پر معاوضہ بھی وصول کیا جا رہا ہے، جس کی وجہ سے بلاخوف و خطر سیوریج کا پانی فصلوں کو فراہم کیا جا رہا ہے۔ شہریوں کا کہنا ہے کہ یہ عمل سرکاری افسران کی چشم پوشی اور عدم توجہی کے سبب جاری ہے اور اس سے ثابت ہوتا ہے کہ صحت عامہ کے تحفظ کے لیے اقدامات کی سخت کمی ہے۔

اوچ شریف کے باشعور عوام نے اس غیر ذمہ دارانہ عمل پر سخت رد عمل کا اظہار کرتے ہوئے اعلیٰ حکام سے مطالبہ کیا ہے کہ فوری طور پر اس معاملے کا نوٹس لیا جائے۔ عوام نے مطالبہ کیا ہے کہ گندے پانی سے سبزیوں کی کاشت پر فوری پابندی عائد کی جائے اور میونسپل کمیٹی کو گندے پانی کی فراہمی کے حوالے سے جوابدہ ٹھہرایا جائے۔ علاوہ ازیں عوامی صحت کو لاحق خطرات کے پیش نظر حکومت سے درخواست کی گئی ہے کہ شہر میں صفائی ستھرائی کے نظام کو بہتر بنایا جائے اور مضر صحت سبزیوں کی فروخت کے سلسلے کو روکا جائے۔

شہریوں کی جانب سے اس سنگین معاملے پر جلد اقدامات نہ کیے جانے کی صورت میں احتجاج کی دھمکی دی گئی ہے تاکہ حکام کی توجہ اس اہم مسئلے کی جانب مبذول کرائی جا سکے۔

اوچ شریف(باغی ٹی وی ،نامہ نگارحبیب خان ) اوچ شریف میں کپاس کی لکڑیوں سے بھری ٹرالیاں،شہر کی خوبصورتی اور شہریوں کی جان کیلئے خطرہ بن گئی ہیں

تفصیل کے مطابق شہر میں کپاس کی لکڑیوں سے بھری اوور لوڈ ٹرالیوں کا مسئلہ شدت اختیار کر گیا ہے۔ یہ ٹرالیاں نہ صرف شہر کی گرین بیلٹ کو تباہ کر رہی ہیں بلکہ شہریوں کی جان کو بھی خطرے میں ڈال رہی ہیں۔

یہ ٹرالیاں شہر کے اہم علاقوں جیسے للووالی پل، حسینی چوک اور غوث الاعظم چوک سے گزرتی ہوئی الشمس چوک تک پہنچتی ہیں۔ سڑک کے کنارے لگے درختوں اور پودوں کو یہ ٹرالیاں روند ڈالتی ہیں جس سے شہر کی خوبصورتی متاثر ہو رہی ہے۔

مقامی لوگوں کا کہنا ہے کہ ٹریفک پولیس کے کچھ اہلکار ان ٹرالی والوں سے رشوت لے کر انہیں شہر میں داخل ہونے کی اجازت دیتے ہیں۔ دوسری طرف میونسپل کمیٹی کا عملہ بھی اس مسئلے پر آنکھیں بند کرکے اسے نظرانداز کر رہا ہے۔

ان اوور لوڈ ٹرالیوں کی وجہ سے شہر میں حادثات کا خطرہ بھی بڑھ گیا ہے۔ شہریوں کا کہنا ہے کہ یہ ٹرالیاں نہ صرف دیگر گاڑیوں کے لیے خطرہ ہیں بلکہ خود ان ٹرالیوں کے ڈرائیوروں کی جان کو بھی خطرہ ہے۔

شہریوں نے اعلیٰ حکام سے فوری نوٹس لینے اور اس مسئلے کو حل کرنے کے لیے مؤثر اقدامات کرنے کا مطالبہ کیا ہے۔ شہریوں کا کہنا ہے کہ شہر کی خوبصورتی اور شہریوں کی جان کو بچانے کے لیے فوری طور پر اقدامات کیے جانے چاہئیں۔

اوچ شریف(باغی ٹی وی،نامہ نگارحبیب خان ) خستہ حال بجلی کے کھمبے سے مدرسے کے طلبہ اور نمازیوں کو خطرہ، فوری تبدیلی کا مطالبہ

تفصیل کے مطابق اوچ شریف کے علاقے امیر آباد میں مدرسہ عربیہ امیر المدارس کے وضو خانے کے قریب بجلی کا کھمبا خستہ حالی کے باعث کسی بھی وقت گرنے کا خطرہ بن چکا ہے، جس سے مدرسے میں تعلیم حاصل کرنے والے بچوں اور نمازیوں میں شدید تشویش پائی جاتی ہے۔ مقامی رہائشیوں عبد الحمید خان، سمیع اللہ، عبد الستار، حماد، اعظم اور ارشاد احمد نے بتایا کہ واپڈا کو متعدد بار اس کھمبے کے حوالے سے شکایات دی گئیں، لیکن واپڈا کی جانب سے اس پر کوئی کارروائی نہیں کی گئی۔

رہائشیوں کا کہنا ہے کہ واپڈا ملازمین نے کھمبے کی تبدیلی کے لیے مبینہ طور پر رقم کی ڈیمانڈ کی، جو ان کے لیے ادا کرنا ممکن نہیں۔ انہوں نے ضلعی انتظامیہ اور ڈپٹی کمشنر بہاولپور سے اپیل کی ہے کہ فوری طور پر اس معاملے کا نوٹس لیا جائے اور مدرسے کے نزدیک موجود خطرناک کھمبے کو تبدیل کرنے کے احکامات جاری کیے جائیں تاکہ علاقے کے مکینوں کی جان و مال کی حفاظت یقینی بنائی جا سکے۔

اوچ شریف(باغی ٹی وی،نامہ نگارحبیب خان)نلکا اڈہ پرعباسیہ لنک کینال کا خستہ حال پل، عوام کو شدید مشکلات کا سامنا

تفصیل کے مطابق اوچ شریف کے نواحی علاقے نلکا اڈہ میں واقع عباسیہ لنک کینال کا پل خستہ حالی کا شکار ہے، جس کی وجہ سے عوام کوآمدورفت میں شدید خطرات لاحق اور مشکلات کا سامنا کرنا پڑرہا ہے ۔

مقامی افراد کا کہنا ہے کہ پل کی ٹوٹ پھوٹ اور حفاظتی جنگلوں کی عدم موجودگی کے باعث روزانہ ہزاروں افراد کی زندگی کو خطرات لاحق ہیں۔ اس پل کو روزانہ استعمال کرنے والے مقامی رہائشی عبد اللہ، عبد الستار، مظہر حسین، نادر محمد، یعقوب اور ناصر حسین نے میڈیا کو بتایا کہ "ہم روزانہ خوف کے سائے میں پل عبور کرتے ہیں، اگرخدانخواستہ کوئی حادثہ پیش آیا تو اس کی ذمہ داری کس کی ہوگی؟”

یہ پل بچوں، بزرگوں اور مزدوروں کے لیے روزمرہ آمدورفت کا اہم راستہ ہے لیکن اس کی خستہ حالت نے یہاں کے باسیوں کو مشکلات میں ڈال رکھا ہے۔ مقامی رہنماؤں اور اہل علاقہ نے حکومت سے فوری مرمت کا مطالبہ کرتے ہوئے کہا ہے کہ یہ پل نہ صرف روزمرہ آمدورفت بلکہ مقامی معیشت کے لیے بھی انتہائی اہمیت رکھتا ہے۔

انہوں نے مزید کہا کہ ہیڈ پنجند اور نلکا اڈہ جیسے تاریخی مقامات کی وجہ سے سیاح بڑی تعداد میں یہاں آتے ہیں لیکن اس پل کی حالت دیکھ کر مایوس ہو جاتے ہیں۔ مقامی رہنماؤں کا کہنا ہے کہ حکومتی غفلت عوامی مایوسی کا سبب بن رہی ہے اور لوگ اب محفوظ متبادل راستے کی تلاش میں ہیں۔ اگر بروقت اقدامات نہ کیے گئے تو یہ صورتحال کسی بڑے حادثے کا سبب بن سکتی ہے۔

اوچ شریف(باغی ٹی وی نامہ نگار حبیب خان کی رپورٹ) کھمبوں پرجھولتے تاراور میٹرز، شہریوں کیلئے لٹکتی موت،واپڈا کی کب آنکھ کھلے گی؟

تفصیل کے مطابق اوچ شریف میں شہر بھر میں بجلی کے کھمبوں پر بے ہنگم تاریں اور لٹکتے میٹرز خطرناک صورتحال پیدا کر رہے ہیں، جس کے باعث شہریوں میں تشویش پائی جا رہی ہے۔ واپڈا اہلکاروں کی مبینہ عدم توجہی کے باعث یہ تاریں شہریوں کے لیے موت کا سبب بننے لگی ہیں۔

شہریوں نے شکایت کی ہے کہ بارش یا سپارکنگ کے باعث میٹرز میں آگ لگنے کے واقعات میں اضافہ ہو رہا ہے، جس کی قیمت انہیں چکانی پڑتی ہے۔ ان کا کہنا ہے کہ متعدد بار واپڈا حکام کو صورتحال سے آگاہ کرنے کے باوجود کوئی عملی اقدامات نہیں کیے گئے ہیں۔

شہریوں نے مطالبہ کیا ہے کہ واپڈا حکام فوری طور پر لٹکتے میٹرز اور بے ترتیب تاروں کو درست کریں تاکہ کسی بھی ممکنہ حادثے سے بچا جا سکے۔ ان کا کہنا ہے کہ ہنگامی بنیادوں پر اس مسئلے کا حل تلاش کیا جانا ضروری ہے تاکہ عوام کی زندگیوں کو محفوظ بنایا جا سکے۔

اوچ شریف(باغی ٹی وی ،نامہ نگارحبیب خان) اسسٹنٹ کمشنر کا سرپرائز وزٹ، گراں فروشی کرنے والے تاجروں کی دوکانیں سیل

تفصیل کےاوچ شریف میں اسسٹنٹ کمشنر احمد پور شرقیہ میاں عثمان امین نے اچانک دورہ کیا اور گراں فروشی کی شکایات کا فوری نوٹس لیا۔ انہوں نے شہریوں کی جانب سے آٹے کی زائد قیمت پر فروخت کی شکایت پر ایک ہول سیل کریانہ اسٹور کو سیل کیا۔

اس کے علاوہ انہوں نے سویٹ شاپس کی چیکنگ کے دوران تین دوکانیں سیل کیں اور ایک دکاندار کو اوپن پیٹرول کی ناقص کوالٹی اور زائد قیمت وصولی پر سزا دی۔

بہت سے دکاندار گراں فروشی کے باعث بھاگ گئےجبکہ کئی ایک کو وارننگ بھی دی گئی۔ تجاوزات مافیا کے خلاف سخت اقدامات کرتے ہوئے، اسسٹنٹ کمشنر نے ریڑھی بانوں کو صفائی ستھرائی کے لیے کوڑے دان رکھنے کی ہدایت کی۔ انہوں نے میونسپل کمیٹی کے ملازمین کی کارکردگی کو سراہتے ہوئے مزید جانفشانی سے کام کرنے کی ہدایت دی۔

اوچ شریف (باغی ٹی وی، نامہ نگار: حبیب خان) شہر کی مصروف سڑکوں پر اسپیڈ بریکرز کی عدم موجودگی کے باعث حادثات معمول بن چکے ہیں جبکہ منچلوں کی تیز رفتاری اور ون ویلنگ نے شہریوں کی زندگیاں خطرے میں ڈال دی ہیں۔ عوامی حلقوں کا کہنا ہے کہ اسپیڈ بریکرز کی تعمیر وقت کی ضرورت ہے تاکہ حادثات اور قیمتی جانوں کے ضیاع کو روکا جا سکے۔

تفصیلات کے مطابق اوچ شریف کی اہم شاہراہوں، جن میں للو والی پل روڈ، علی پور روڈ، خیرپور ڈاہا روڈ اور احمد پور شرقیہ روڈ شامل ہیں، پر اسپیڈ بریکرز نہ ہونے کی وجہ سے تیز رفتار گاڑیاں اور ون ویلنگ کے واقعات عام ہو چکے ہیں۔ گزشتہ دنوں ایک افسوسناک حادثے میں اوچموغلہ کے رہائشی عاشق کے 8 سالہ بیٹے کو تیز رفتار ٹریکٹر ٹرالی نے کچل دیا، جس سے بچہ موقع پر ہی جاں بحق ہو گیا۔

شہریوں کا کہنا ہے کہ ان سڑکوں پر تعلیمی ادارے اور دیگر اہم مقامات موجود ہونے کے باوجود اسپیڈ بریکرز تعمیر نہیں کیے گئے، جس کے نتیجے میں متعدد حادثات پیش آ چکے ہیں۔ ان حادثات میں کئی افراد جان کی بازی ہار چکے ہیں، جبکہ متعدد افراد معذوری کا شکار ہو کر محتاجی کی زندگی گزارنے پر مجبور ہیں۔

عوامی اور سماجی حلقوں نے ضلعی انتظامیہ اور مقامی نمائندوں سے فوری نوٹس لینے کا مطالبہ کرتے ہوئے سڑکوں پر اسپیڈ بریکرز کی تعمیر کا مطالبہ کیا ہے تاکہ شہریوں کی زندگیاں محفوظ بنائی جا سکیں۔