Category: بہاولپور

اوچشریف،باغی ٹی وی (نامہ نگارحبیب خان) محکمہ زراعت پیسٹ وارننگ بہاولپورکی کارروائی، مبینہ غیر رجسٹرڈ زرعی کمپنی کی ادویات فروخت کرنے پر ایک ملزم گرفتار،ایک لاکھ روپے کی زرعی ادویات برآمد کرکے قبضہ میں لے لیں، ملزمان کیخلاف مقدمہ کے اندراج کیلئے استغاثہ دائر،

تفصیل کے مطابق ڈائریکٹر پیسٹ وارننگ احمد نوید احسن کی سربراہی اور اسسٹنٹ ڈائریکٹر پیسٹ وارننگ شاہد حسین کی زیر نگرانی پیسٹی سائیڈز انسپکٹر عاقل قریشی اور عبدالرحیم نے دھوڑکوٹ میں کامیاب چھاپہ مارکر 1لاکھ روپے مالیت کی جعلی زرعی زہریں برآمد کرلیں اور موقع سے 1ملزم کو بھی گرفتار کروادیا۔

ملزم غیر رجسٹرڈ پیسٹی سائیڈز کمپنی کی زہریں فروخت کررہا تھا۔اس موقع پرڈائریکٹر پیسٹ وارننگ احمد نوید احسن نے کہا کہ وزیر زراعت پنجاب سید عاشق حسین کرمانی کی ہدایت پر جعلی زرعی مداخل تیار و فروخت کرنے والے مافیا کے خلاف زیرو ٹالرنس پالیسی کے تحت آہنی ہاتھوں سے نمٹا جارہا ہے اور اس کاروبار کی بیخ کنی کیلئے تمام ممکنہ کارروائیاں عمل میں لائی جارہی ہیں۔

پیسٹی سائیڈز انسپکٹر  نے فوری طور پر کارروائی کرتے ہوئے ملزمان شبیر اور شیراز کیخلاف غیر رجسٹرڈ پیسٹی سائیڈز کمپنی کی زہریں فروخت کرنے کے جرم میں پیسٹی سائیڈز آرڈیننس کے تحت تھانہ دھوڑکوٹ تحصیل احمد پور شرقیہ میں مقدمہ کے اندارج کیلئے استغاثہ دائر کردیا جبکہ پیسٹی سائیڈز قبضہ میں لیکر حوالہ پولیس کردیں۔موقع پر زرعی زہروں کے نمونہ جات حاصل کرکے تجزیہ کیلئے لیبارٹری بھی بھجوا دئیے گئے ہیں،

اوچ شریف، باغی ٹی وی نامہ نگار ( حبیب خان سے) عید الضحی سے قبل مہنگائی کا طوفان، مصالحہ جات، ٹماٹر، پیاز، ادرک، لہسن، سبز مرچ مزید مہنگی، گرانفروشی عروج پر، پرائس کنٹرول مجسٹریٹ "مال” بنانے میں مصروف، مافیاء کے ڈیروں پر شام کے وقت فروٹس کے شاپرز پہنچاۓ جانے لگے، عوام کی جیبوں پر ڈاکہ بارے انتظامیہ خاموش تماشائی، غریب آدمی کیسے سالن پکا سکتا ہے؟ شہری پھٹ پڑے

تفصیلات کے مطابق اوچ شریف شہر وگردونواح میں ریڑھی بانوں اور دوکانداروں نے عید سے قبل اشیاء خوردونوش کی قیمتوں میں خود ساختہ اضافہ کردیا ہے، اس حوالہ سے ضلع کی پرائس کمیٹیاں اور ضلعی انتظامیہ حسبِ سابق خاموش تماشائی کا کردار ادا کرتی نظر آرہیں ہیں، شہریوں نے تاجران کی خود ساختہ گرانفروشی پر شدید احتجاج کرتے ہوئے ضلعی انتظامیہ سے مطالبہ کیا ہے کہ فوری طور پر اس کا نوٹس لیا جائے اور قانونی کارروائی عمل میں لائی جائے،

بکرا عید قریب آتے ہی گھروں میں استعمال ہونے والے مصالحہ جات پیاز، ٹماٹر، ادرک، لہسن، سبز مرچ و دیگر اشیاء کی قیمتیں بھی بڑھا دی گئیں ہیں،جبکہ جیسے جیسے بکرا عید قریب آرہی ہے ویسے ہی قیمتوں میں بھی اضافہ ہوتا دکھائی دے رہا ہے، مہنگائی سے ستائے شہریوں محمد یاسر، احمد علی، محمد بخش، اللہ وسایا، الٰہی بخش و دیگر نے گفتگو کرتے ہوئے کہا کہ مہنگائی پہلے ہی اتنی ہے کہ ہم پریشان ہیں کہ بچوں کے کپڑوں کی خریداری کیسے کریں، کیونکہ مہنگائی کے طوفان نے زندگی اجیرن بنادی ہے اور ہمارے لیےقربانی کرنا بھی بہت مشکل ہوچکا ہے،

مویشی منڈی میں جانوروں کےریٹ بھی آسمان سے باتیں کررہے ہیں جنہیں خریدنا بہت مشکل ہے۔ مہنگائی نے غریب عوام کو عید سے پہلے ذبح کرنا شروع کردیا ہے پیاز ٹماٹر لہسن ادرک آلو مرغی کے گوشت سمیت دیگر اشیا سمیت مصالحہ جات کی قیمتوں میں ہوشربا اضافہ کرکے شہریوں کے اوسان خطا کر دیئے، اسی طرح مختلف اقسام کے مصالحہ جات کی قیمتوں میں بھی غیر معمولی اضافہ دیکھنے میں آرہا ہے۔

اس مہنگائی کے طوفان کا نوٹس لینے والے پرائس کنٹرول مجسٹریٹس ائیر کنڈیشنڈ کمروں میں بیٹھ کر مہنگائی سے بلبلاتے شہریوں کی آہ و بکا سنتے ہو ئے بھی تماشائی کا کردار ادا کر رہے ہیں،کہیں بھی حکومتی رٹ قائم ہوتی نظر نہیں آرہی.

اوچ شریف،باغی ٹی وی (نامہ نگارحبیب خان )اوچ شریف میں میپکو حکام کی نااہلی، جابجا جھولتی تاریں موت کے پھندوں میں تبدیل، کھمبوں پر لگے بجلی کے ان گنت میٹر صارفین کے لئے وبال جان بن گئے،

تفصیلات کے مطابق اوچ شریف میں میپکو حکام کی مبینہ غفلت اور نااہلی کے باعث جابجا جھولتی تاریں شہریوں کے لیے موت کے پھندوں میں تبدیل ہو چکی ہیں جب کہ کھمبوں پر لگے بجلی کے میٹر اور تاروں کے گچھے بھی صارفین کے لیے وبال جان اور اذیت کا سبب بن کر رہ گئے ہیں،

شہریوں نے میپکو حکام کے خلاف احتجاج کرتے ہوئے میڈیا کو بتایا کہ جھولتی تاروں اور کھمبوں پر لگے بجلی کے میٹروں کے باعث کئی نقصانات ہو چکے ہیں، ایک میٹر جل جائے تو اس کے اردگرد لگے میٹر بھی متاثر ہوتے ہیں، جس کا بھاری مالی نقصان صارفین کو برداشت کرنا پڑتا ہے جبکہ دفتروں کا طواف علیحدہ کرنا پڑتا ہے،

شہریوں کاکہنا ہے کہ متعدد بار میپکو حکام کو شکایات درج کرانے کے بعد بھی کوئی نوٹس نہیں لیا جاتا۔

اوچ شریف ،باغی ٹی وی(نامہ نگارحبیب خان) میونسپل کمیٹی اوچ شریف کا تجاوزات کے خلاف اپریشن، دکان داروں کو بھاری جرمانے، قبضے میں لی جانے والی درجنوں ریڑھیوں کے ٹائروں پر ”کاتیاں ” چلا دیں،

تفصیل کے مطابق اسسٹنٹ کمشنر احمد پور شرقیہ/ ایڈمنسٹریٹر میونسپل کمیٹی اوچ شریف فیصل احمد کے زیرنگرانی میونسپلٹی عملے نے الشمس چوک، مین بازار، خیر پور ڈاہا روڈ اور عباسیہ روڈپر تجاوزات کے خلاف آپریشن کرتے ہوئے دکان داروں پر بھاری جرمانے عائد کیے اور برلب سڑک پر موجود سامان بھی تحویل میں لے لیا،

آپریشن کے دوران ٹریفک کی روانی اور خریداری کے لیے بازار آنے والی خواتین و دیگر راہگیروں کے پیدل چلنے میں رکاوٹ اور پریشانی کا سبب بننے والے درجنوں ریڑھیوں کو بھی قبضے میں لے لیا گیا،

اس موقع پر میونسپل کمیٹی کی طرف سے بار بار وارننگ دینے اور تجاوزات ختم نہ کرنے والے عادی ریڑھی بانوں کی ریڑھیوں کے ٹائرز ٹیوب چھریوں سے کاٹ کر ناکارہ بنا دیے گئے،

اس حوالے سے میڈیا سے بات چیت کرتے ہوئے اسسٹنٹ کمشنر نے کہا کہ انسداد تجاوزات کے حوالے سے ریڑھی بانوں اور دکان داروں کو ریلیف فراہم کرنے اور ہر بار وارننگ دینے کے ساتھ ساتھ متعدد بار تجاوزات ختم کرنے اور سامان دکانوں کے اندر رکھنے کا کہا گیا ہے لیکن ریڑھی بان اور دکان دار حضرات قانون کی مسلسل خلاف ورزی کر رہے ہیں جو کسی صورت برداشت نہیں کریں گے،

انہوں نے کہا کہ تاریخی شہر اوچ شریف سے تجاوزات کا خاتمہ کر کے ٹریفک کی آمدورفت کو یقینی بنانے اور شہر کی اصل خوبصورتی کو ہر صورت بحال کریں گے۔

دریں اثناء ریڑھی بانوں نے اپنے موقف میں بتایا کہ ہم غریب لوگ روزانہ کرائے پر ریڑھیاں لے کر شدید گرمی میں محنت مزدوری کر کے اپنے بچوں کا پیٹ پالتے ہیں، پہلے بھی کئی بار جرمانے ادا کر چکے ہیں اور اپنے کنڈے بھی ضبط کرا چکے ہیں۔ دھوپ میں پڑے پڑے سارا سامان خراب ہو جاتا ہے، ٹائروں کو ناکارہ کر دینے سے ہم ریڑھی مالکان کو معاوضہ کہاں سے اور کیسے ادا کریں گے؟

اوچشریف،باغی ٹی وی (نامہ نگار حبیب خان ) خسرہ کی وبا بے قابو ہوگئی دو سال کا بچہ جاں بحق،متعددبچے اس خطرناک وباء میں مبتلا

تفصیل کے مطابق اوچ شریف کے نواحی علاقہ موضع مانجھی والی میں خسرہ کی وبا بے قابو ہوگئی ہے اس متعدی بیماری اب تک کئی بچے مبتلا ہوچکے ہیں ،خسرہ کے باعث دو سال کا بچہ حسن رضا جاں بحق ہو گیا مزید بچوں کی حالت اس وقت تشویش ناک ہے ،علاقہ میں خطرناک جان لیوا بیماری سے والدین شدید پریشان ہیں

خسرہ سے متعلق جب ڈاکٹرمحمدعثمان ظفرسے بات کی تو انہوں نے بتایا کہ بیماری کی ابتدائی علامات جیسے بخار، کھانسی، ناک بہنا اور آشوب چشم کو سنجیدہ نہیں لیا جاتا اور مریض ہسپتالوں میں صرف اس وقت آتے ہیں جب علامات سنگین ہوجاتی ہیں۔

ڈاکٹرمحمدعثمان ظفرنے والدین کو مشورہ دیاکہ وہ اپنے بچوں کو ویکسین لگوائیں، اگر پہلے سے ویکسین لگواچکے ہیں تو یقینی بنائیں کہ ان کے قریبی لوگ بھی ویکسین لگائیں۔

انہوں نے کہا کہ خسرہ میں پیچیدگیاں خود وائرل انفیکشن یا سیکنڈری بیکٹیریل انفیکشن کی وجہ سے ہو سکتی ہیں جو کہ بہت خطرناک ہے۔

ڈاکٹرمحمدعثمان ظفرنے بتایا کہ خسرہ کی بیماری کے ساتھ جب کوئی مریض کھانستا یا چھینک مارتا ہے تو متاثرہ شخص کے نہایت چھوٹے آلودہ قطرے پھیل کر ارد گرد کی اشیا پر گر جاتے ہیں اور یہ بیماری ہوا اور سانس لینے سے پھیلتی ہے، جس وجہ سے ایک مریض متعدد افراد کو متاثر کر سکتا ہے۔

اوچ شریف باغی ٹی وی (نامہ نگار حبیب خان) چار اور پانچ جون کی درمیانی شب ضلع بہاول پور کے عوام پر بھاری گزری، احمد پور شرقیہ میں موٹر سائیکل ڈکیتی کی واردات کے دوران مزاحمت پر 28 سالہ نوجوان پر ڈاکوؤں کی فائرنگ دوسرے کو بٹ مارے گئے، نیو سبزی منڈی بہاول پور ایریا میں ڈاکوؤں نے کلینک پر آ کر ڈاکٹر کی ٹانگ پر گولی مار کر نقدی اور موبائل چھین لیا اور فرار ہو گئے، پولیس ضابطہ کی کارروائی میں مصروف،

ریسکیو 1122 سٹاف نے زخمیوں کو ہسپتال شفٹ کر دیا، شہریوں کا ڈی پی او بہاول پور سے فوری نوٹس لینے اور پولیس گشت کو مؤثر بنانے کا مطالبہ۔ تفصیل کے مطابق ریسکیو 1122 ذرائع سے معلوم ہوا ہے کہ چوکی موڑ تحصیل احمد پور شرقیہ میں چار جون کی رات تقریباً سوا دس بجے موٹر سائیکل سوار جہانگیر ولد غوث بخش بعمری 28 سال، سکنہ موضع فیض پور احمد پور شرقیہ کو موٹر سائیکل کی ڈکیتی کی واردات کے دوران مزاحمت کرنے پر کولہوں پر گولی مار دی جبکہ دوسرے موٹر سائیکل سوار محمد یوسف ولد مرید خان بعمری 33 سال، سکنہ موضع نوشہرہ احمد پور شرقیہ کو سر میں بٹ مار کر زخمی کر دیا۔

تاہم دوسرے واقعہ میں نیو سبزی منڈی بہاول پور کے علاقہ میں پانچ جون رات ساڑھے بارہ بجے (Early) ڈاکٹر شوکت مامون ولد محمد شفیع بعمری 63 سال، کے کلینک المامون پر کچھ نا معلوم لوگ آئے اور انہوں نے نقدی اور موبائل فون چھین لیا اور جاتے ہوئے ڈاکٹر کے بائیں پاؤں کے کولہوں کے جائنٹ پر گولی مار دی اور فرار ہونے میں کامیاب ہو گئے۔

تاہم اطلاع پر متعلقہ پولیس نے اپنے اپنے علاقوں کے جائے وقوعہ پر پہنچ کر ضابطہ کی کارروائی کا آغاز کر دیا ہے جبکہ ریسکیو 1122 سٹاف نے دونوں علاقوں سے مضروبین کو ابتدائی طبی امداد فراہم کر کے متعلقہ ہسپتالوں میں شفٹ کر دیا ہے۔

دوسری جانب شہریوں نے ڈسٹرکٹ پولیس آفیسر اسد سرفراز خان سے مطالبہ کیا ہے کہ وہ ضلع بھر میں پولیس گشت کو مزید فعال اور مربوط و مؤثر بنانے کے لیے اقدامات کریں تاکہ شہریوں کی جان و مال کا تحفظ یقینی بن سکے۔