Category: بہاولپور

اوچ شریف،باغی ٹی وی (نامہ نگارحبیب خان) مہنگی بجلی نے عوام کی چیخیں نکلوا دیں، بڑی عید پر بجلی کے بلوں میں ہوشربا بڑا اضافہ، مبینہ اضافی سر چارج اور فیول ایڈجسٹمنٹ کے نام پر لوٹ مار بند کی جائے شہریوں کا حکومت سے مطالبہ،

تفصیل کے مطابق شہریوں نے بجلی کے بلوں میں لگنے والے ظالمانہ ٹیکس کو مسترد کرتے ہوئے میڈیا کو بتایا ہے کہ آئی ایم ایف کو خوش کرنے کے لئے حکومت ملکی معیشت اور تاجر برادری سمیت عام آدمی کو تباہ و برباد کرنے میں کوئی کسر نہیں چھوڑ رہی ہے ہزاروں روپے سیلز ٹیکس ماہوار لگانا گھریلو صارفین و دکانداروں پر ظلم ہے، روزگار نہ ہونے کی وجہ سے عام شہری اور تاجر برادری پہلے ہی بے حال ہے اوپر سے حکومت بجلی کے بلوں میں سیلز ٹیکس عائد کرکے معاشی قتل کر رہی ہے،

شہریوں کا کہنا تھا کہ غریب عوام پہلے مہنگائی کی وجہ سے پریشان ہے آج ان بدترین حالات معاشی بدحالی، مہنگائی، بیروزگاری اور کاروبار پر جمود کی اصل وجہ یہ غیر مقبول ٹیکسز کا نظام ہی ہے حکومت نے آئی ایم ایف کے سامنے گھٹنے ٹیک کر تاجروں اور عوام کو ٹیکسوں کی دلدل میں دھکیل دیا ہے ان کا مزید کہنا تھا کہ آئی ایم ایف بھی وڈیروں اور جاگیرداروں پر ٹیکس لگانے کو نہیں کہتا صرف عوام کا خون نچوڑنے کے احکامات دیتا ہے

حکمران بھی عوام پر مختلف قسم کے ٹیکس لگاتے ہیں،فیول پرائس ایڈجسمنٹ کا جو ٹیکس بجلی کے بل میں آتا ہے وہ اس قدر زیادہ ہے کہ بجلی کی رقم اصل بل سے بھی زیادہ فیول ایڈجسٹمنٹ پرائس کی رقم ہوتی ہے شہری اس ظالمانہ ٹیکس کے خلاف غریب عوام اور تاجربرداری کے ساتھ ہے اور احتجاج کا حق محفوظ رکھتی ہے انہوں نے مطالبہ کیا کہ یہ نئے ٹیکس فوری واپس لیے جائیں تاکہ عوام اور تاجر سکھ کا سانس لے سکیں

شہریوں نے اس زیادتی پر شدید تنقید کا حکومت کو نشانہ بناتے ہوئے مطالبہ کیا کہ لوگوں کو زندہ رہنے کا حق دیا جائے اور فیول ایڈجسٹمنٹ چارجز کا خاتمہ کیا جائے پہلے ہی عوام دو وقت کی روٹی کا بندوبست نہیں کر پا رہے کیونکہ بڑھتی مہنگائی نے لوگوں کی زندگی اجیرن بنا رکھی ہے،

بجلی صارفین نے میڈیا سے گفتگو کرتے ہوئے کہا کہ حکومت بلوں میں عوام سے جبراً وہ ٹیکسز بھی وصول کررہی ہے جن کے بارے میں انہیں علم ہی نہیں کہ وہ کس مد میں یہ ٹیکسز ادا کر رہے ہیں۔نیپرا کی جانب سے بجلی کے نرخوں میں ایک ماہ کیلئے اضافہ کرنا درحقیقت عوام کو دیوار سے لگانے سے مترادف ہے جبکہ بجلی کے نرخوں میں جو اضافہ ایک ماہ کیلئے کیا جاتا ہے‘ وہ ایک ماہ بعد واپس لیا جاتا ہے یا نہیں‘ اس کا بھی عوام کو کچھ پتہ نہیں ہوتا کیونکہ جو بل موصول ہوتے ہیں وہ اس قدر پیچیدہ ہوتے ہیں کہ عام آدمی انہیں پڑھنے سے قاصر نظر آتا ہے کہ کونسے اضافی چارجز وہ ادا کر رہا ہے اور کونسے چارجز واپس لئے گئے ہیں۔

بجلی کے نرخوں میں اضافہ در اضافہ حکومت بالخصوص مسلم لیگ (ن) کیلئے لمحہ فکریہ ہے جو اپنی انتخابی مہم میں عوام کو 300 یونٹ تک بجلی فری دینے کے دعوے کرتی رہی ہے۔ اگر ماہانہ بنیادوں پر فیول ایڈجسٹمنٹ کے نام پر بجلی کے نرخوں میں اسی طرح اضافہ کیا جاتا رہا تو عوام کے صبر کا پیمانہ لبریز ہو سکتا ہے جو ردعمل کے طور پر سڑکوں پر نکل کر حکومت کیلئے مشکلات پیدا کر سکتے ہیں، شہریوں نے چیف جسٹس سپریم کورٹ سے مطالبہ کیا کہ واپڈا کی لوٹ مار کا از خود نوٹس لیکر شہریوں کو بچایا جائے.

اوچ شریف ،باغی ٹی وی ( حبیب خان نامہ نگار)عید قربان،ٹماٹرٹرپل اور پیازڈبل سینچری کے قریب ،لہسن ،ادرک کے درمیان بھی مقابلہ جاری اورسبز مرچ کو پر لگ گئے، مقامی و تحصیل انتظامیہ منظر سے غائب، گرانفروشوں کو کھلی چھٹی، سبزی مافیاء عام آدمی کی کھال اتارنے میں مصروف

تفصیلات کے مطابق اوچ شریف شہر و گردونواح میں گرانفروشی اپنے عروج پر پہنچ چکی ہے، عید سے قبل اشیاء خوردونوش کی قیمتوں میں خودساختہ اضافہ کردیا گیا ہے اس حوالہ سے ضلعی کی پرائس کمیٹی اور ضلعی انتظامیہ خاموش تماشائی نظر آرہی ہے، عید قریب آتے ہی گھروں میں استعمال ہونے والے خشک مصالحہ جات اور پیاز، ٹماٹر، ادرک، لہسن، سبز مرچ ودیگر اشیاء کی قیمتیں بھی بڑھ گئیں جبکہ جیسے جیسے بکرا عید قریب آرہی ہے ویسے ہی قیمتوں میں بھی اضافہ جاری ہے،

مہنگائی سے ستائے شہریوں محمد یاسر، احمد علی، محمد بخش، اللہ وسایا، الٰہی بخش و دیگر نے میڈیا سے گفتگو کرتے ہوئے کہا کہ مہنگائی پہلے ہی اتنی ہے کہ ہم پریشان ہیں اور اب گرانفروش مافیاء نے غریب عوام کو عید سے پہلے ذبح کرنا شروع کردیا ہے،ٹماٹر300 روپے فی کلو ،پیاز150 روپے فی کلو لہسن ادرک بھی قوت خرید سےباہر ہوگئے

اسی طرح مختلف اقسام کے مصالحہ جات کی قیمتوں میں بھی غیر معمولی اضافہ دیکھنے میں آرہا ہے۔اس حوالے سے شہریوں کا کہنا ہے کہ عید قربان کے قریب آتے ہی دکانداروں نے خود ساختہ مہنگائی کا طوفان برپا کرکے رکھ دیا ہے، جس کیوجہ سے متوسط اور مزدورطبقے سے تعلق رکھنے والے افراد شدید پریشانی کا شکار ہیں۔

پرائس کنٹرول مجسٹریٹس ائیر کنڈیشنڈ کمروں میں بیٹھ کر مہنگائی سے بلبلاتے شہریوں کی آہ و بکا پر خاموش تماشائی بنے ہوئے ہیں اور ہر دکاندار کے اپنے اپنے نرخ ہیں کہیں بھی حکومتی رٹ قائم ہوتی نظر نہیں آرہی،شہریوں نے تاجران کی مبینہ خود ساختہ گرانفروشی پر شدید احتجاج کرتے ہوئے ضلعی و تحصیل انتظامیہ سے مطالبہ کیا ہے کہ فوری طور پر اس کا نوٹس لیتے ہوئے قانونی کارروائی عمل میں لائی جائے.

اوچشریف،باغی ٹی وی (نامہ نگارحبیب خان) محکمہ زراعت پیسٹ وارننگ بہاولپورکی کارروائی، مبینہ غیر رجسٹرڈ زرعی کمپنی کی ادویات فروخت کرنے پر ایک ملزم گرفتار،ایک لاکھ روپے کی زرعی ادویات برآمد کرکے قبضہ میں لے لیں، ملزمان کیخلاف مقدمہ کے اندراج کیلئے استغاثہ دائر،

تفصیل کے مطابق ڈائریکٹر پیسٹ وارننگ احمد نوید احسن کی سربراہی اور اسسٹنٹ ڈائریکٹر پیسٹ وارننگ شاہد حسین کی زیر نگرانی پیسٹی سائیڈز انسپکٹر عاقل قریشی اور عبدالرحیم نے دھوڑکوٹ میں کامیاب چھاپہ مارکر 1لاکھ روپے مالیت کی جعلی زرعی زہریں برآمد کرلیں اور موقع سے 1ملزم کو بھی گرفتار کروادیا۔

ملزم غیر رجسٹرڈ پیسٹی سائیڈز کمپنی کی زہریں فروخت کررہا تھا۔اس موقع پرڈائریکٹر پیسٹ وارننگ احمد نوید احسن نے کہا کہ وزیر زراعت پنجاب سید عاشق حسین کرمانی کی ہدایت پر جعلی زرعی مداخل تیار و فروخت کرنے والے مافیا کے خلاف زیرو ٹالرنس پالیسی کے تحت آہنی ہاتھوں سے نمٹا جارہا ہے اور اس کاروبار کی بیخ کنی کیلئے تمام ممکنہ کارروائیاں عمل میں لائی جارہی ہیں۔

پیسٹی سائیڈز انسپکٹر  نے فوری طور پر کارروائی کرتے ہوئے ملزمان شبیر اور شیراز کیخلاف غیر رجسٹرڈ پیسٹی سائیڈز کمپنی کی زہریں فروخت کرنے کے جرم میں پیسٹی سائیڈز آرڈیننس کے تحت تھانہ دھوڑکوٹ تحصیل احمد پور شرقیہ میں مقدمہ کے اندارج کیلئے استغاثہ دائر کردیا جبکہ پیسٹی سائیڈز قبضہ میں لیکر حوالہ پولیس کردیں۔موقع پر زرعی زہروں کے نمونہ جات حاصل کرکے تجزیہ کیلئے لیبارٹری بھی بھجوا دئیے گئے ہیں،

اوچ شریف، باغی ٹی وی نامہ نگار ( حبیب خان سے) عید الضحی سے قبل مہنگائی کا طوفان، مصالحہ جات، ٹماٹر، پیاز، ادرک، لہسن، سبز مرچ مزید مہنگی، گرانفروشی عروج پر، پرائس کنٹرول مجسٹریٹ "مال” بنانے میں مصروف، مافیاء کے ڈیروں پر شام کے وقت فروٹس کے شاپرز پہنچاۓ جانے لگے، عوام کی جیبوں پر ڈاکہ بارے انتظامیہ خاموش تماشائی، غریب آدمی کیسے سالن پکا سکتا ہے؟ شہری پھٹ پڑے

تفصیلات کے مطابق اوچ شریف شہر وگردونواح میں ریڑھی بانوں اور دوکانداروں نے عید سے قبل اشیاء خوردونوش کی قیمتوں میں خود ساختہ اضافہ کردیا ہے، اس حوالہ سے ضلع کی پرائس کمیٹیاں اور ضلعی انتظامیہ حسبِ سابق خاموش تماشائی کا کردار ادا کرتی نظر آرہیں ہیں، شہریوں نے تاجران کی خود ساختہ گرانفروشی پر شدید احتجاج کرتے ہوئے ضلعی انتظامیہ سے مطالبہ کیا ہے کہ فوری طور پر اس کا نوٹس لیا جائے اور قانونی کارروائی عمل میں لائی جائے،

بکرا عید قریب آتے ہی گھروں میں استعمال ہونے والے مصالحہ جات پیاز، ٹماٹر، ادرک، لہسن، سبز مرچ و دیگر اشیاء کی قیمتیں بھی بڑھا دی گئیں ہیں،جبکہ جیسے جیسے بکرا عید قریب آرہی ہے ویسے ہی قیمتوں میں بھی اضافہ ہوتا دکھائی دے رہا ہے، مہنگائی سے ستائے شہریوں محمد یاسر، احمد علی، محمد بخش، اللہ وسایا، الٰہی بخش و دیگر نے گفتگو کرتے ہوئے کہا کہ مہنگائی پہلے ہی اتنی ہے کہ ہم پریشان ہیں کہ بچوں کے کپڑوں کی خریداری کیسے کریں، کیونکہ مہنگائی کے طوفان نے زندگی اجیرن بنادی ہے اور ہمارے لیےقربانی کرنا بھی بہت مشکل ہوچکا ہے،

مویشی منڈی میں جانوروں کےریٹ بھی آسمان سے باتیں کررہے ہیں جنہیں خریدنا بہت مشکل ہے۔ مہنگائی نے غریب عوام کو عید سے پہلے ذبح کرنا شروع کردیا ہے پیاز ٹماٹر لہسن ادرک آلو مرغی کے گوشت سمیت دیگر اشیا سمیت مصالحہ جات کی قیمتوں میں ہوشربا اضافہ کرکے شہریوں کے اوسان خطا کر دیئے، اسی طرح مختلف اقسام کے مصالحہ جات کی قیمتوں میں بھی غیر معمولی اضافہ دیکھنے میں آرہا ہے۔

اس مہنگائی کے طوفان کا نوٹس لینے والے پرائس کنٹرول مجسٹریٹس ائیر کنڈیشنڈ کمروں میں بیٹھ کر مہنگائی سے بلبلاتے شہریوں کی آہ و بکا سنتے ہو ئے بھی تماشائی کا کردار ادا کر رہے ہیں،کہیں بھی حکومتی رٹ قائم ہوتی نظر نہیں آرہی.