Category: بہاولپور

اوچ شریف,باغی ٹی وی (نامہ نگار حبیب خان )اوچ شریف و گردنواح میں آوارہ کتے قیمتی جانوروں کی موت کا موجب بن گئے، محنت کش کی 7 قیمتی بکریاں کتوں نے نوچ ڈالیں، ہسپتالوں میں باؤلے کتے کی ویکسین بھی نایاب، عوام میں تشویش کی لہر، چلنا پھرنا محدود کردیا، عوامی سماجی حلقوں کا آوارہ اور باؤلے کتے تلف کرنے کا مطالبہ،

تفصیلات کے مطابق گزشتہ روز اوچ شریف کے نواحی علاقے موضع طاہر والی میں آوارہ کتوں نے کاشتکار خلیل احمد کے گھر کے باہر باندھے ہوئے پالتو جانوروں پر حملہ کر دیا، جس سے تقریباً 10 لاکھ روپے مالیت کی نایاب بکریاں موقع پر دم توڑ گئیں،

ذرائع نے انکشاف کیا ہے کہ طاہر والی میں یہ دوسرا واقعہ رونما ہو گیا ہے، شہریوں کا کہنا تھا کہ اوچ شریف شہر و گردونواح کے دیہاتوں میں آوارہ اور باؤلے کتوں کے غول کے غول چلتے پھرتے نظر آتے ہیں اور ان سے راہگیروں کی زندگیاں محفوظ نہیں۔ہر آنے جانے والوں کو کاٹ کر زخمی کردیتے ہیں اور جب یہ لوگ علاج کرانے نزدیکی ہسپتال میں کیلیے جاتے ہیں تو وہاں اکثر کتے کے کاٹے کی ویکسین نایاب ہوتی ہے اور ہسپتال کا عملہ ان مریضوں سے سوتیلی ماں کا سلوک کرتے ہوئے ڈسٹرکٹ ہسپتال ریفر کرنے کو ترجیح دیتے ہیں،

لوگوں میں شدید خوف و ہراس کے باعث خونخوار کتوں کے ڈر سے چلنا پھرنا بند کر دیا ہے،۔یہ امر قابل ذکر ہے کہ ماضی میں بلدیاتی اداروں نے آوارہ اور باؤلے کتے مارنے کیلیے باقاعدہ سرکاری ملازم رکھے ہوئے تھے مگر اب کافی عرصہ سے یہ مہم نہیں چلائی گئی، یہ بھی پتہ چلا ہے کہ کتے مار مہم کے فنڈز مبینہ کرپٹ ملازمین کی جیبیں بھرنے کے کام آتے ہیں۔

مقامی سماجی و عوامی حلقوں نے ڈی سی بہاول پور سے مطالبہ کیا ہے کہ فوری طور پر محکمہ صحت اور ٹی ایم اے حکام کو پابند کیا جائے کہ آوارہ اور باؤلے کتوں کے خاتمہ کی مہم چلائیں اور قریبی ہسپتالوں میں ویکسین بھی فراہم کریں.

اوچ شریف،باغی ٹی وی ( نامہ نگارحبیب خان)ڈسٹرکٹ پولیس آفیسر اسد سرفراز خان کا شہریوں کے مسائل ترجیحی بنیادوں پر حل کرنے کیلئے روزانہ کی بنیاد پر اپنے دفتر میں کھلی کچہری کا انعقاد، 30 سے زائد شہریوں سمیت اوچ شریف کے مقامی صحافی شفیق انجم نے اپنے مسائل ڈی پی او کے سامنے رکھے۔ پراپرٹی کے مقدمات میں جلد ریکوری کرکے رپورٹ پیش کرنے کے احکامات جاری کیے، شہریوں کے مسائل ترجیحی بنیادوں پر حل کرنا اصل مقصد ہے ،ڈی پی او اسد سرفراز خان

تفصیلات کے مطابق وزیر اعلی پنجاب اور انسپکٹر جنرل آف پولیس پنجاب کے ویژن اور احکامات کی روشنی میں ڈی پی او اسد سرفراز خان کی روزانہ کی بنیاد پر اپنے دفتر میں کھلی کچہری کے دوران 30 سے زائد شہریوں کے مسائل دریافت کئے۔ ڈی پی او اسد سرفراز خان نے کھلی کچہری میں تمام سائلین کو باری باری تفصیل سے سنا

اوچ شریف کے مقامی صحافی شفیق انجم پر ہونے والی جھوٹی ایف آئی آر کے بارے شفیق انجم نے ڈی پی او کو بتایا اور ڈی پی او بہاول پور نے فوری طور پر مقامی صحافی پر ہونے والی ایف آئی آر ختم کرانے کی یقین دہائی کرائی اور انفرادی طور پر متعلقہ افسران کو بذریعہ فون کال بروقت قانونی کارروائی اور واپسی رپورٹ کے احکامات جاری کیے جبکہ متعدد ایس ایچ اوز کو کھلی کچہری میں طلب کر کے براہ راست جواب طلبی کی۔

کھلی کچہری میں ڈی پی او اسد سرفراز خان نے متعدد سائلین کی درخواستوں پر انکوائریوں کا حکم دیا اور متعدد پر ایس ایچ اوز اور تفتیشی افسران کو حکم دیا کہ کھلی کچہری میں متعلقہ شہری کی موجودگی میں حاضر آکر مقدمات کی پراگرس کے متعلق بریف کریں، ریکوری کے مقدمات میں ڈی پی او اسد سرفراز خان نے تفتیشی افسران کو حکم دیا ایک ہفتے کے اندر اندر ریکوری کرکے مدعی مقدمہ کے حوالے کر کے رپورٹ جمع کروائیں۔

ڈی پی او اسد سرفراز خان نے کھلی کچہری میں شہریوں سے بات کرتے ہوئے کہا کہ کھلی کچہری کا مقصد یہ ہےکہ شہریوں اور پولیس افسران کے درمیان خلیج نہ رہے اور تمام جائز مسائل بروقت میرٹ پر حل ہوں۔

انہوں نے مزید کہا کہ مقدمات کو طے شدہ ضابطہ کے مطابق بر وقت یکسو نہ کرنا اور شہریوں کو انصاف فراہم نہ کرنے والے افسران سے جواب طلبی کی جا رہی ہے، سرکل اور تھانہ جات میں موجود افسران شہریوں کو پہلی فرصت میں انصاف فراہم کریں۔

انہوں نے ایس ڈی پی اوز اور ایس ایچ اوز کو ہدایات جاری کرتے ہوئے کہا کہ عوام الناس کے مسائل ان کی دہلیز پر ہی حل کیے جائیں تاکہ وہ سفر کی صعوبت سے بچ جائیں اور یہی ہمارا اولین فرض بھی ہے

اوچ شریف ،باغی ٹی وی(نامہ نگارحبیب خان) اوچ شریف پل چھٹہ کے مقام پر ٹرک اور کیری وین میں تصادم، ایک شخص موقع پر جاں بحق دوسرا شدید زخمی، ہسپتال منتقل

تفصیل کے مطابق اوچشریف جلال پور پیروالہ روڈ پر پل چٹھہ کے نزدیک ایک کیری وین مخالف سمت سے آنے والے ٹرک کے ساتھ زور دار دھماکے سے ٹکرا گئی، جس کے نتیجہ میں ایک شخص جسکی شناخت محمد نواز ولد محمد اجمل بعمری 30 سال سکنہ ترنڈہ گورگیج سے ہوئی ہے موقع پر جاں بحق ہو گیا جبکہ زخمی ہونے والے شخص کی شناخت غلام علی ولد ولد محمد رمضان سکنہ بیٹ میرہزار کے نام سے ہوئی ہے

شدید زخمی اور جاں بحق ہونے والوں کو مقامی پولیس اور ریسکیو ٹیم اہلکاروں نے موقع پر پہنچ کر مقامی رورل ہیلتھ سنٹر اوچ شریف منتقل کر دیا ہے.

اوچ شریف،باغی ٹی وی ( نامہ نگارحبیب خان)نان بائیوں نے حکومتی احکامات ہوا میں اڑا دئیے، روٹی سستی کرنے والے نان بائیوں نے 100 گرام کے بجائے روٹی کا وزن 86 گرام کردیا، روٹی کا ریٹ 15 روپے کی بجائے 20 روپے اور نان 27 روپے میں فروخت، ضلعی انتظامیہ کی زبانی جمع خرچ پر مبنی پھرتیاں جاری، چند ایک مقامات پر ریٹس کے بینرز آویزاں کروانے کے بعد خاموشی، عوام کا ڈپٹی کمشنر بہاولپور سے فوری نوٹس لینے کا مطالبہ،

اوچ شریف سمیت گردونواح میں تندور اور ہوٹل مالکان نے نان و روٹی کے من مرضی نرخ مقرر کرکے مہنگے داموں نان و روٹی کی فروخت شروع کر رکھی ہے، روٹی کے مقررہ وزن 100گرام کی بجائے 86 گرام اور روٹی کی قیمت 15 روپے کی بجائے 20 روپے میں فروخت جاری ہے،

اسی طرح نان کے مقرر کردہ وزن 120گرام کی بجائے 100گرام پر 20 روپے کی بجائے 27 روپے وصول کی جارہی ہے ، پرائس کنٹرول مجسٹریٹس بااثر تندور و ہوٹل مالکان کے سامنے بے بس دکھائی دیتے ہیں انتظامیہ نے صارفین کو ناجائز منافع خوروں کے رحم و کرم پر چھوڑ دیا۔ تاہم روٹی کے ریٹس پر عملدرآمد کروانے میں ناکام ضلعی انتظامیہ نے شہریوں کے لیے دوہری مشکل کھڑی کردی ہے،

شہریوں کا کہنا ہے کہ انتظامیہ نے قیمت پنجاب ایپ پر روٹی کی قیمت 15روپے جبکہ نان کی قیمت 20روپے مقرر کررکھی ہے لیکن اوچ شریف شہر سمیت گردونواح میں تندور و ہوٹل مالکان من مرضی کے نرخ وصول کررہے ہیں جس سے ظاہر ہوتا ہے کہ گراں فروشی کے مرتکب دکانداروں کو متعلقہ افسران کی سرپرستی حاصل ہے جس کی وجہ سے گراں فروشوں نے اپنی الگ ریاست قائم کر رکھی ہے۔

شہریوں نے ڈپٹی کمشنر بہاولپور سے نوٹس لینے اور گراں فروشی کے مرتکب دکانداروں اور ان کی سرپرستی کرنے والے افسران کے خلاف قانونی کارروائی کا مطالبہ کیاہے

اوچ شریف،باغی ٹی وی (نامہ نگارحبیب خان) پٹرولنگ پولیس چوکی جبار شہید کی ٹیم کا ایک اور کارنامہ دوران گشت دو سال سے سندھ پولیس کو مطلوب اشتہاری دھر لیا

تفصیل کے مطابق ایس پی بہاول پور ملک مزمل حسین کے وژن اور ڈی ایس پی عرفان اکبر خان کے احکامات کی روشنی میں پیٹرولنگ پوسٹ جبار شہید احمد پور شرقیہ کے انچارج سب انسپکٹر محمد وحید کی زیر پرستی اسسٹنٹ سب انسپکٹر ممتاز حسین نے محمد آفتاب اشرف اور دیگر ملازمان کے ہمراہ جدید ٹیکنالوجی کا استعمال کرتے ہوئے مجرم اشتہاری B کیٹگری ارشاد حسین ولد محمد رمضان مقدمہ نمبر 740/22، بجرم 380/34 ت ب تھانہ بوٹ بیسن ڈسٹرکٹ ساؤتھ صوبہ سندھ مطلوب تھا گرفتار کرکے تھانہ صدر احمد پور شرقیہ کے حوالے کیا گیا ہے

شاندار کارروائی پر ایس پی پٹرولنگ ملک مزمل حسین نے پیٹرولنگ پوسٹ جبار شہید کے ملازمان کو شاباش دی ہے

اوچ شریف، باغی ٹی وی (نامہ نگار حبیب خان)غریب اور مظلوم عوام کیلئے درد دل رکھنے والےسینئر سیاست دان ملک عبدالمجید چنڑ دل کا دورہ پڑنے سے انتقال کر گئے،

ملک عبدالمجید چنڑ ٹکٹ ہولڈر پی پی 253 پاکستان پیپلزپارٹی تھے، ان کی عمر57 سال تھی ان کی نمازجنازہ گذشتہ روز ہاکی اسٹیڈیم بہاول پور میں ادا کی گئی ،نماز جنازہ میں پاکستان پیپلزپارٹی کے عہدہ داران سمیت دیگر سیاسی شخصیات اور صحافیوں وکلاء اور ہزاروں عمائدین شہر نے کثیر تعداد کی شرکت کی،

ملک عبدالمجید کا بہاولپور کے سینئر سیاستدانوں میں شمار ہوتا تھا سٹی میں یونین کونسل کے ناظم بھی رہے ہیں اور گزشتہ الیکشن میں پاکستان پیپلز پارٹی کے ٹکٹ پر صوبائی اسمبلی حلقہ پی پی 253 میں الیکشن بھی لڑ چکے ہیں

ملک عبدالمجید چنڑ کے انتقال پر ہر آنکھ اشکبار تھی غریبوں کا میسحا کے نام سے مشہور تھے اور بڑے بڑے جاگیرداروں اوروقت کے فرعونوں کو نتھ ڈال رکھی تھی

بہاولپور کے تاریخی نماز جنازے میں ہر آنکھ اشکبار نظر آئی اور مرحوم کی بخشش کیلئے دعائیں کی گئی، ملک عبدالمجید چنڑ کے ایصال ثواب کیلئے بروز جمعہ کو قرآنی خوانی اور قل خوانی کا ختم شریف پڑھایا جائے گا،