Category: ڈیرہ غازی خان

ڈیرہ غازی خان (باغی ٹی وی ،سٹی رپورٹرجواداکبر) وزیر اعلیٰ پنجاب مریم نواز شریف کے "صحت مند پنجاب” وژن اور سیکرٹری محکمہ صحت و آبادی نادیہ ثاقب کی ہدایات کی روشنی میں، پنجاب ایڈز کنٹرول پروگرام نے ضلع ڈیرہ غازی خان کی تحصیل تونسہ میں گھر گھر ایچ آئی وی/ ایڈز اسکریننگ مہم کا آغاز کر دیا ہے۔ یہ مہم پروگرام کی پراجیکٹ ڈائریکٹر ڈاکٹر سمیرہ اشرف کی سربراہی میں شروع کی گئی ہے۔

اس مہم کے تحت تقریباً 5600 گھروں اور 50,000 سے زائد افراد کی ایچ آئی وی/ ایڈز اسکریننگ کی جائے گی، جس کے لیے 40 ٹیمیں بھرپور لگن کے ساتھ تونسہ میں کام کر رہی ہیں۔ ورلڈ ہیلتھ آرگنائزیشن (WHO) کی معاونت سے جاری اس مہم کو مقامی آبادی کی جانب سے انتہائی مثبت ردعمل ملا ہے۔

اس اسکریننگ مہم کا مقصد نہ صرف علاقہ میں پھیلی ایڈز کی وبا پر قابو پانا ہے، بلکہ اس مرض میں مبتلا افراد کو ٹی ایچ کیو ہسپتال تونسہ میں موجود پنجاب ایڈز کنٹرول پروگرام کے سینٹر سے مفت علاج اور ادویات بھی فراہم کی جائیں گی۔ یہ مہم صوبے میں ایچ آئی وی سے نمٹنے کے لیے پنجاب ایڈز کنٹرول پروگرام کی کوششوں اور عزم کا منہ بولتا ثبوت ہے۔

ڈیرہ غازی خان (باغی ٹی وی،سٹی رپورٹرجواداکبر) کمشنر ڈیرہ غازی خان اشفاق احمد چوہدری کی زیر صدارت "ستھرا پنجاب پروگرام” کے حوالے سے ایک اعلیٰ سطحی جائزہ اجلاس منعقد ہوا۔

اجلاس میں ڈیرہ غازی خان ڈویژن کے ڈپٹی کمشنرز اور ویسٹ مینجمنٹ کمپنی کے افسران نے شرکت کی اور پروگرام سے متعلق تفصیلی بریفنگ پیش کی۔

اجلاس میں ڈپٹی کمشنر ڈیرہ غازی خان عثمان خالد، ڈپٹی کمشنر مظفرگڑھ عثمان طاہر جپہ، ڈپٹی کمشنر کوٹ ادو منور عباس بخاری اور ڈپٹی کمشنر راجن پور شفقت اللہ مشتاق سمیت دیگر متعلقہ حکام اور ویسٹ مینجمنٹ کمپنی کے نمائندے موجود تھے۔

اجلاس میں ستھرا پنجاب پروگرام کے تحت جاری صفائی مہم، ویسٹ کلیکشن، کوڑا کرکٹ کی تلفی اور شہری و دیہی علاقوں میں صفائی ستھرائی کے انتظامات کا تفصیلی جائزہ لیا گیا۔

کمشنر اشفاق احمد چوہدری نے اجلاس سے خطاب کرتے ہوئے کہا کہ صفائی شہری سہولیات کا بنیادی جزو ہے، اور اس پروگرام کو مؤثر اور نتیجہ خیز بنانے کے لیے تمام ضلعی افسران اپنی ذمہ داریاں ایمانداری سے ادا کریں۔ انہوں نے زور دیا کہ عوام کو صاف ماحول فراہم کرنا ہم سب کی اجتماعی ذمہ داری ہے۔ کمشنر کا مزید کہنا تھا کہ ستھرا پنجاب پروگرام وزیراعلیٰ پنجاب کا ایک انقلابی پروگرام ہے جو پنجاب کے شہروں اور دیہاتوں کو خوبصورت بنائے گا۔

ویسٹ مینجمنٹ کمپنی کے نمائندوں نے اجلاس کو بتایا کہ پروگرام کے تحت تمام شہروں اور قصبوں میں صفائی کے انتظامات بہتر بنائے جا رہے ہیں، کوڑا کرکٹ اٹھانے کے لیے مشینری اور افرادی قوت میں اضافہ کیا گیا ہے، جبکہ مانیٹرنگ کا نظام بھی مؤثر بنایا گیا ہے۔

کمشنر نے تمام ڈپٹی کمشنرز کو ہدایت کی کہ وہ روزانہ کی بنیاد پر صفائی مہم کی نگرانی کریں اور عوامی شکایات کا بروقت ازالہ یقینی بنائیں۔ انہوں نے متعلقہ حکام کو یہ بھی ہدایت کی کہ شہری آگاہی مہمات چلائی جائیں اور اسکولوں، اسپتالوں اور دیگر عوامی مقامات پر صفائی ٹیمیں خصوصی توجہ دیں۔

اجلاس میں صفائی کے معیار کو مزید بہتر بنانے، گلی محلوں کی صفائی، ڈمپنگ پوائنٹس کی نشاندہی، اور ویسٹ کلیکشن نظام کی بہتری کے لیے مختلف تجاویز بھی زیر غور آئیں۔ اجلاس میں اس بات پر زور دیا گیا کہ ستھرا پنجاب پروگرام کو کامیاب بنانے کے لیے ضلعی انتظامیہ، ویسٹ مینجمنٹ کمپنیاں اور شہریوں کو باہم مل کر کام کرنا ہو گا۔

ڈیرہ غازی خان (باغی ٹی وی ،سٹی رپورٹرجواد اکبر)ڈپٹی کمشنر ڈیرہ غازی خان محمد عثمان خالد کی زیر صدارت ریونیو معاملات سے متعلق ایک اہم اجلاس منعقد ہوا جس میں ایڈیشنل ڈپٹی کمشنر ریونیو عثمان بخاری، اسسٹنٹ کمشنرز اور متعلقہ افسران نے شرکت کی۔

اجلاس میں ایڈیشنل ڈپٹی کمشنر ریونیو عثمان بخاری نے سرکاری واجبات کی وصولی، نادہندگان کی فہرست اور زیر التوا کیسز سے متعلق تفصیلی بریفنگ دی۔ اس موقع پر ڈپٹی کمشنر نے واضح ہدایات جاری کرتے ہوئے کہا کہ سرکاری واجبات کی 100 فیصد وصولی ہر صورت یقینی بنائی جائے۔ تمام ریونیو افسران فیلڈ میں نکل کر ریکوری کے عمل کو تیز کریں اور نادہندگان کے خلاف قانونی اختیارات کا مؤثر استعمال کیا جائے، جن میں جائیداد کی قرقی جیسے اقدامات بھی شامل ہوں۔

انہوں نے کہا کہ زیر التوا جوڈیشل انکوائریوں اور انضباطی کارروائیوں کو فوری طور پر نمٹایا جائے اور کسی قسم کی غفلت یا سستی برداشت نہیں کی جائے گی۔ ڈپٹی کمشنر نے تمام ریونیو افسران کو متنبہ کیا کہ فرائض میں عدم دلچسپی یا کارکردگی میں کمی پر سخت کارروائی کی جائے گی اور ان کی انفرادی کارکردگی کا باقاعدہ جائزہ لیا جائے گا۔

اجلاس میں موجود افسران نے یقین دہانی کروائی کہ جاری ہدایات پر مکمل عملدرآمد کو یقینی بنایا جائے گا تاکہ سرکاری محصولات کی وصولی کو مؤثر اور شفاف بنایا جا سکے۔

ڈیرہ غازی خان (جواد اکبر سٹی رپورٹر) ڈپٹی کمشنر ڈیرہ غازی خان محمد عثمان خالد نے جنوبی پنجاب کے معروف سیاحتی مقام فورٹ منرو میں ترقیاتی منصوبوں کا جائزہ لیا۔ حکومت پنجاب کی ہدایات پر فورٹ منرو میں 200 کنال اراضی پر 40 کروڑ روپے کی لاگت سے ٹی ڈی سی پی ریزارٹ تعمیر کیا جائے گا، جو سیاحوں کے لیے جدید سہولیات سے آراستہ ہوگا۔

سیاحوں اور مقامی آبادی کو صاف پانی کی مسلسل فراہمی یقینی بنانے کے لیے ساڑھے چھ کروڑ روپے کی لاگت سے نئی پائپ لائن بچھائی جائے گی، جو رکنی اور دیگر علاقوں سے پانی فورٹ منرو تک پہنچائے گی۔

ڈپٹی کمشنر محمد عثمان خالد نے ریزارٹ اور واٹر سپلائی سکیموں کے مجوزہ مقامات کا معائنہ کیا اور ترقیاتی کاموں پر اطمینان کا اظہار کیا۔ اس موقع پر پولیٹیکل اسسٹنٹ کوہ سلیمان محمد اسد چانڈیہ اور متعلقہ محکموں کے افسران نے انہیں منصوبوں پر تفصیلی بریفنگ دی۔

ڈپٹی کمشنر نے فورٹ منرو میں موجود سرکاری ریسٹ ہاؤسز کی بحالی اور تزئین و آرائش کے جاری منصوبوں کا بھی جائزہ لیا۔ انہوں نے کہا کہ فورٹ منرو کو جدید اور پرکشش سیاحتی مرکز میں بدلنے کے لیے ہر ممکن اقدامات کیے جا رہے ہیں، جن میں سیکیورٹی، صاف پانی، رہائش اور دیگر بنیادی سہولیات کی فراہمی اولین ترجیح ہے۔

ڈیرہ غازیخان (باغی ٹی وی، نیوز رپورٹر شاہد خان)بورڈ آف انٹرمیڈیٹ اینڈ سیکنڈری ایجوکیشن ڈیرہ غازیخان کے زیر اہتمام میٹرک امتحانات 2025 کے نتائج کا اعلان کمشنر ڈیرہ غازی خان و چیئرمین بورڈ اشفاق احمد چوہدری نے کر دیا۔ اس سال مجموعی طور پر 91,180 طلباء و طالبات نے امتحانات میں شرکت کی، جن میں سے 81.35 فیصد امیدوار کامیاب قرار پائے۔

سائنس گروپ (طالبات):
ڈی پی ایس گرلز لیہ کی ہانیہ محمود نے 1187 نمبر لے کر بورڈ میں پہلی پوزیشن حاصل کی جبکہ وژن گرلز سکول لیہ کی انشا احمد 1186 نمبرز کے ساتھ دوسرے نمبر پر رہیں۔ تیسری پوزیشن 1184 نمبرز حاصل کرنے والی تین طالبات نے مشترکہ طور پر حاصل کی جن میں دی راوین گرلز ہائی سکول راجن پور کی زارش فاطمہ، سنٹر آف ایکسی لینس مظفرگڑھ کی زینب شوکت اور گورنمنٹ گرلز ہائی سکول نمبر 1 ڈی جی خان کی لائبہ رضا شامل ہیں۔

سائنس گروپ (طلباء):
سنٹر آف ایکسی لینس ڈی جی خان کے نعمان وارث نے 1184 نمبرز لے کر پہلی پوزیشن حاصل کی، مظفرگڑھ کے امیر عبداللہ نے 1183 نمبرز کے ساتھ دوسرا جبکہ ڈی جی خان کے عبداللہ عثمان اور مظفرگڑھ کے محمد اسد نے 1181 نمبرز کے ساتھ تیسری پوزیشن شیئر کی۔

جنرل گروپ (طلباء):
کوٹ ادو سے محمد فہیم نے 1077 نمبرز حاصل کر کے پہلی، مظفر گڑھ سے محمد مزمل نے 1054 نمبرز کے ساتھ دوسری اور روجھان سے محمد شیراز نے 1051 نمبرز لے کر تیسری پوزیشن حاصل کی۔

جنرل گروپ (طالبات):
مظفر گڑھ کی قراۃ العین اور لیہ کی لائبہ فیاض نے 1087 نمبرز حاصل کر کے پہلی اور دوسری پوزیشن حاصل کی جبکہ ڈی جی خان سے زہرا فاطمہ 1076 نمبرز کے ساتھ تیسرے نمبر پر رہیں۔

چیئرمین بورڈ اشفاق احمد چوہدری نے تمام پوزیشن ہولڈرز، ان کے والدین، اساتذہ اور اداروں کو شاندار کامیابی پر مبارکباد دی اور امید ظاہر کی کہ یہ طلباء مستقبل میں بھی ملک و قوم کا نام روشن کریں گے۔

ڈیرہ غازی خان (باغی ٹی وی رپورٹ)بلوچستان میں پنجاب سے تعلق رکھنے والے معصوم شہریوں کے حالیہ افسوسناک قتل کے واقعات کے بعد ڈیرہ غازی خان کی ضلعی حدود میں سیکیورٹی ہائی الرٹ کر دی گئی ہے۔ ڈپٹی کمشنر و چیئرمین ریجنل ٹرانسپورٹ اتھارٹی محمد عثمان خالد کی ہدایت پر بلوچستان جانے والی تمام پبلک اور پرائیویٹ ٹرانسپورٹ کو شام پانچ بجے کے بعد سخی سرور اور بواٹہ کے سرحدی مقامات پر روکنے کے احکامات جاری کر دیے گئے ہیں، جس کا باقاعدہ مراسلہ بھی جاری کر دیا گیا ہے۔

ضلعی انتظامیہ کے مطابق آئندہ بلوچستان میں ٹریفک کا داخلہ صرف دن کی روشنی میں ممکن ہوگا، جبکہ رات کے وقت کسی بھی قسم کی ٹرانسپورٹ کو داخلے کی اجازت نہیں دی جائے گی۔ یہ اقدام عوامی جان و مال کے تحفظ کو یقینی بنانے کے لیے اٹھایا گیا ہے۔

ڈپٹی کمشنر نے سخی سرور اور بواٹہ پر مسافروں اور ٹرانسپورٹرز کو تمام ضروری سہولیات فراہم کرنے کی ہدایت جاری کی ہے۔ جاری کردہ مراسلے کے مطابق بس اڈوں پر پبلک ٹرانسپورٹ گاڑیوں کے ڈرائیوروں اور مسافروں کی ویڈیو ریکارڈنگ کی جائے گی، جبکہ تمام گاڑیاں سخت سیکیورٹی میں قافلوں کی صورت میں روانہ کی جائیں گی۔

مزید براں، تمام پبلک ٹرانسپورٹ پر سی سی ٹی وی کیمرے نصب کیے جائیں گے، GPS ٹریکنگ سسٹم فعال رکھا جائے گا اور ایمرجنسی پینک/آلارم بٹن مہیا کیا جائے گا تاکہ کسی بھی ممکنہ خطرے یا ہنگامی صورتحال میں فوری ردعمل ممکن بنایا جا سکے۔

ڈپٹی کمشنر محمد عثمان خالد نے واضح کیا ہے کہ شہریوں کی جان و مال کا تحفظ ضلعی انتظامیہ کی اولین ترجیح ہے، اور اس سلسلے میں سیکیورٹی انتظامات کو مزید سخت اور مؤثر بنایا جا رہا ہے۔