Category: ڈیرہ غازی خان

ڈیرہ غازی خان (باغی ٹی وی نیوز رپورٹر شاہد خان)ملکی اور بین الاقوامی سکیورٹی حالات کے تناظر میں ضلع ڈیرہ غازی خان میں محرم الحرام کو حساس قرار دے دیا گیا ہے، جس کے پیش نظر سکیورٹی، انتظامی امور اور دیگر متعلقہ محکموں کو سخت ہدایات جاری کر دی گئی ہیں۔

ڈپٹی کمشنر محمد عثمان خالد کی زیر صدارت محرم الحرام سے متعلق اہم اجلاس منعقد ہوا، جس میں ایڈیشنل ڈپٹی کمشنر جنرل قدسیہ ناز، اے سی ہیڈ کوارٹر نذر حسین کورائی سمیت وفاقی و صوبائی اداروں کے سربراہان نے شرکت کی۔ اجلاس میں تمام متعلقہ محکموں سے محرم کے لیے جامع کنٹی جنسی پلان طلب کیے گئے ہیں۔

ڈپٹی کمشنر محمد عثمان خالد نے اجلاس سے خطاب میں کہا کہ
* مساجد، امام بارگاہوں، عبادت گاہوں اور دیگر حساس مقامات کی باقاعدہ چیکنگ کی جائے گی۔
* ہوٹلز، سرائے، اور ویران عمارتوں کی نگرانی سخت کی جائے گی، خاص طور پر جلوس روٹس کے اطراف۔
* فرقہ وارانہ وال چاکنگ، بینرز، اور نعرہ بازی والے پینا فلیکس فوری ہٹانے کی ہدایات دی گئی ہیں۔
* تجاوزات کے خلاف فوری آپریشن ہوگا تاکہ جلوسوں کے راستے کلیئر رہیں۔
* مجالس اور جلوسوں کی آڈیو و ویڈیو ریکارڈنگ لازم قرار دی گئی ہے۔
* غیرقانونی مجالس اور جلوسوں پر مکمل پابندی ہوگی۔
* بجلی کی بلا تعطل فراہمی کے ساتھ ساتھ جنریٹرز اور متبادل ذرائع کے انتظامات بھی یقینی بنانے کی ہدایت جاری کر دی گئی ہے۔
* سٹریٹ لائٹس اور جلوس روٹس پر روشنی کے تمام انتظامات کو فعال رکھنے کے احکامات بھی دیے گئے ہیں۔

ڈپٹی کمشنر نے زور دیا کہ تمام ادارے باہمی رابطے کے ساتھ مؤثر حکمت عملی اختیار کریں تاکہ امن و امان کی صورتحال مکمل طور پر قابو میں رہے۔ محرم الحرام کے دوران ہر قسم کی غفلت یا کوتاہی کو برداشت نہیں کیا جائے گا۔

ڈیرہ غازی خان (باغی ٹی وی، نیوز رپورٹر شاہد خان) غازی یونیورسٹی ڈیرہ غازی خان میں وائس چانسلر پروفیسر ڈاکٹر اشفاق احمد کی زیر صدارت نیشنل آؤٹ ریچ پروگرام کے تحت فیکلٹی ڈویلپمنٹ کی افتتاحی تقریب منعقد ہوئی۔ اس موقع پر بتایا گیا کہ ہائر ایجوکیشن کمیشن اسلام آباد کے ذیلی ادارے نیشنل اکیڈمی آف ہائر ایجوکیشن کے تعاون سے 20 روزہ تربیتی پروگرام کا آغاز کیا گیا ہے جس میں غازی یونیورسٹی کے 27 لیکچررز اور اسسٹنٹ پروفیسرز حصہ لے رہے ہیں۔

ٹریننگ میں ملک بھر سے ماہرین تعلیم اور پروفیسرز لیکچرز دیں گے، جبکہ ٹریننگ کوآرڈینیٹر کی ذمہ داری ڈاکٹر جاوید اقبال، چیئرمین ایجوکیشن ڈیپارٹمنٹ کو دی گئی ہے۔ تربیتی سیشنز میں تدریس کے جدید رجحانات، تعلیمی نفسیات، تعلیم بطور پیشہ، طلبہ کی کردار سازی، نصاب سازی، تعلیمی منصوبہ بندی، اور جدید ٹیکنالوجی کے تعلیمی استعمال پر توجہ دی جا رہی ہے۔

افتتاحی تقریب میں پروفیسر ڈاکٹر سعد اللہ لغاری، ڈاکٹر راشدہ قاضی، ڈاکٹر عبدالغفار، ڈاکٹر عنصر حسین، ڈاکٹر شاہد نثار، ڈاکٹر اللہ بخش گلشن، ڈاکٹر مقبول سمیت دیگر فیکلٹی ممبران شریک تھے۔ تقریب سے ریسورس پرسن ڈاکٹر محمد زبیر اور وائس چانسلر ڈاکٹر اشفاق احمد نے خطاب کرتے ہوئے اساتذہ پر زور دیا کہ وہ اس موقع سے بھرپور فائدہ اٹھائیں۔

ڈیرہ غازی خان (باغی ٹی وی، سٹی رپورٹر جواد اکبر) ڈپٹی کمشنر ڈیرہ غازی خان محمد عثمان خالد نے تحصیل تونسہ شریف کا دورہ کیا، ان کے ہمراہ ایڈیشنل ڈپٹی کمشنر و ڈی جی پی ایچ اے قدسیہ ناز، ڈپٹی ڈائریکٹر ڈویلپمنٹ امیر مسلم، اسسٹنٹ کمشنر احمد ندیم اور دیگر افسران موجود تھے۔ ڈپٹی کمشنر نے تحصیل ہیڈکوارٹر اسپتال تونسہ، کمال پارک، فیملی پارک، زیر تعمیر پیرا اسٹیشن، سنگھڑ پل اور دیگر ترقیاتی منصوبوں کا جائزہ لیا۔

ٹی ایچ کیو اسپتال تونسہ میں مختلف شعبہ جات کا تفصیلی معائنہ کیا گیا، جہاں ڈیوٹی روسٹر کے مطابق ڈاکٹروں اور پیرا میڈیکل سٹاف کی حاضری چیک کی گئی۔ مریضوں کی عیادت کے دوران ادویات کی مفت فراہمی اور علاج کی سہولیات سے متعلق معلومات حاصل کی گئیں۔

ڈپٹی کمشنر محمد عثمان خالد نے کہا کہ ترقیاتی منصوبوں میں مٹیریل کے معیار پر کوئی سمجھوتہ نہیں کیا جائے گا اور عوامی مفاد کے کاموں میں کسی قسم کی تاخیر ہرگز برداشت نہیں کی جائے گی۔ دورے کے دوران متعلقہ افسران نے منصوبوں پر پیشرفت سے متعلق تفصیلی بریفنگ بھی دی۔

ڈیرہ غازی خان (باغی ٹی وی،نیوز رپورٹر شاہد خان)ڈپٹی کمشنر محمد عثمان خالد عید کے تینوں روز صفائی کے عمل کی نگرانی میں سرگرم، شہریوں میں بیگز تقسیم، عوام مطمئن

تفصیل کے مطابق ڈپٹی کمشنر ڈیرہ غازی خان محمد عثمان خالد نے عیدالاضحیٰ کے تینوں روز شہر سمیت کوٹ چھٹہ، چوٹی زیریں، مانہ احمدانی، سمینہ اور دیگر علاقوں کا دورہ کر کے صفائی کے انتظامات کا خود جائزہ لیا۔ انہوں نے گلی محلوں اور بلاکس میں پیدل جا کر صفائی کے عمل کا معائنہ کیا، شہریوں سے صفائی کے متعلق معلومات لیں اور آلائشوں کی بروقت تلفی پر اطمینان کا اظہار کیا۔

ڈپٹی کمشنر نے موقع پر موجود صفائی عملے سے ملاقاتیں کیں، ان کی کارکردگی کو سراہا اور شاباش دی۔ اس موقع پر اسسٹنٹ کمشنرز تیمور عثمان، جنید خان، چیف آفیسرز جواد الحسن گوندل، اشفاق احمد، ویسٹ مینجمنٹ کمپنی اور دیگر محکموں کے افسران بھی ان کے ہمراہ تھے۔

ڈپٹی کمشنر نے ویسٹ مینجمنٹ کمپنی اور دیگر اداروں کی جانب سے لگائے گئے کیمپس کا بھی معائنہ کیا۔ صفائی کے عمل کی مؤثر نگرانی کے لیے سیکٹر سطح پر افسران کی ڈیوٹیاں لگائی گئی تھیں، جبکہ ضلعی کنٹرول روم بھی فعال رہا۔

محمد عثمان خالد نے شہریوں میں آلائشوں کو محفوظ طریقے سے تلف کرنے کے لیے خصوصی بیگز بھی تقسیم کیے اور عوام سے اپیل کی کہ دیئے گئے بیگز میں آلائشیں ڈال کر مقررہ مقامات پر رکھیں تاکہ شہر کو صاف ستھرا رکھا جا سکے۔ شہریوں نے صفائی کے بہترین انتظامات پر ضلعی انتظامیہ کی کارکردگی کو سراہا اور اطمینان کا اظہار کیا۔

ڈیرہ غازی خان (باغی ٹی وی ،سٹی رپورٹرجواد اکبر)عیدالاضحی کے پرمسرت موقع پر ریجنل پولیس آفیسر (آر پی او) کیپٹن (ر) سجاد حسن خان اور کمشنر ڈیرہ غازی خان اشفاق احمد چوہدری نے عوامی خدمت کے مختلف اداروں کا خصوصی دورہ کیا۔ ٹیچنگ ہسپتال، چائلڈ پروٹیکشن بیورو اور سنٹرل جیل میں کیے گئے ان دوروں کا مقصد مریضوں، بے سہارا بچوں اور قیدیوں کو عید کی خوشیوں میں شریک کرنا اور ان کی خیریت دریافت کرنا تھا۔

ٹیچنگ ہسپتال میں آر پی او اور کمشنر نے ٹراما سینٹر سمیت مختلف وارڈز کا معائنہ کیا، مریضوں کی عیادت کی اور انہیں وزیراعلیٰ پنجاب کی جانب سے مٹھائی اور پھول پیش کیے۔ عملے کو عید کی مبارکباد دیتے ہوئے صحت کی سہولیات مزید بہتر بنانے کی ہدایت بھی کی گئی۔

چائلڈ پروٹیکشن بیورو کے دورے میں بے سہارا بچوں سے ملاقات کی گئی، جہاں انہیں تحائف اور مٹھائی دی گئی۔ آر پی او نے بچوں کو حکومت کی طرف سے مکمل کفالت اور تحفظ کی یقین دہانی کروائی اور ادارے میں موجود سہولیات کا جائزہ لیا۔

بعد ازاں، سنٹرل جیل ڈیرہ غازی خان کا دورہ کیا گیا۔ ڈی آئی جی جیل اسد جاوید وڑائچ نے استقبال کیا اور جیل عملے نے سلامی پیش کی۔ آر پی او اور کمشنر نے نوعمر وارڈ، خواتین وارڈ، کچن اور دیگر بیرکس کا جائزہ لیا۔ قیدیوں میں مٹھائی تقسیم کرتے ہوئے انہیں نیکی کی راہ اختیار کرنے کی تلقین کی گئی۔ جیل کے سیکیورٹی انتظامات کا جائزہ لیتے ہوئے آر پی او نے موک ایکسرسائزز اور ہمہ وقت الرٹ رہنے کی ہدایت دی۔

دورے کے دوران ڈی پی او سید علی، ڈپٹی کمشنر عثمان خالد اور دیگر اعلیٰ حکام بھی موجود تھے۔ افسران کا کہنا تھا کہ عید کی خوشیوں میں ہر طبقے کو شریک کرنا حکومت پنجاب کی ترجیح ہے۔

ڈی جی خان عید الاضحیٰ سر پر ہے اور جہاں ملک کے دیگر شہروں میں قربانی کی آلائشوں کو محفوظ طریقے سے ٹھکانے لگانے کے لیے شاپر بیگز کی تقسیم مکمل ہو چکی ہے، وہیں ڈی جی خان میں انتظامیہ کی نااہلی ایک بار پھر کھل کر سامنے آ گئی ہے۔ شہریوں کی جانب سے شدید شکایات موصول ہو رہی ہیں کہ شہر میں صفائی کے انتظامات کا فقدان ہے اور قربانی کی آلائشیں جمع کرنے کے لیے ضروری شاپر بیگز بھی تقسیم نہیں کیے گئے۔

عوامی حلقوں کا کہنا ہے کہ ویسٹ مینجمنٹ کے ذمہ دار افسران کی غفلت اور عدم دلچسپی کے باعث شہریوں کو شدید مشکلات کا سامنا کرنا پڑے گا۔ عید جیسے اہم موقع پر صفائی کے انتظامات کا فقدان نہ صرف شہریوں کے لیے اذیت کا باعث ہے بلکہ صحت عامہ کے لیے بھی سنگین خطرات پیدا کر سکتا ہے۔

شہریوں کا سوال ہے کہ کیا ضلعی انتظامیہ اس صورتحال کا نوٹس لے گی اور بروقت اقدامات کرے گی، یا پھر ڈی جی خان کے باسیوں کو اس عید پر بھی محرومی کا سامنا کرنا پڑے گا؟