Category: ڈیرہ غازی خان

ڈیرہ غازی خان (سٹی رپورٹرجواد اکبر) حکومت پنجاب اور ورلڈ بینک کے تعاون سے دیہی علاقوں میں شہری سہولیات کے مساوی میونسپل سروسز فراہم کرنے کا منصوبہ شروع کر دیا گیا۔ اس پراجیکٹ کے تحت پنجاب کی 16 تحصیلوں کے 2008 دیہات مستفید ہوں گے، جب کہ ڈیرہ غازی خان ڈویژن کی تحصیل علی پور، تونسہ اور روجھان کو پہلے مرحلے میں شامل کیا گیا ہے۔

کمشنر اشفاق احمد چوہدری کی زیر صدارت اجلاس میں پنجاب رورل میونسپل سروسز کمپنی کے افسران نے بریفنگ دیتے ہوئے بتایا کہ سات سالہ منصوبے کے تحت صاف پانی کی فراہمی، سیوریج سسٹم کی بہتری، سالڈ ویسٹ مینجمنٹ، ماحولیاتی تحفظ اور عوامی رویوں میں مثبت تبدیلی پر خصوصی توجہ دی جائے گی۔ سیوریج کے پانی کو ٹریٹ کر کے آبپاشی سمیت دیگر مقاصد کے لیے قابلِ استعمال بنایا جائے گا، جب کہ ٹیوب ویلز اور دیگر مشینری کو بجلی کے ساتھ سولر سسٹم سے بھی منسلک کیا جا رہا ہے۔

پراجیکٹ کے تحت ہر گھر سے 2000 روپے ڈیمانڈ نوٹس اور 1000 روپے ماہانہ چارجز وصول کیے جائیں گے، جبکہ پانی کے استعمال کی نگرانی کے لیے میٹر بھی نصب کیے جا رہے ہیں۔ کمشنر اشفاق احمد چوہدری نے اس منصوبے کو دیہی علاقوں کے لیے انقلابی قدم قرار دیتے ہوئے کہا کہ کمپنی کے افسران نیک نیتی سے کام کریں تاکہ منصوبہ کامیاب ہو اور دیہی عوام کا معیارِ زندگی بہتر ہو سکے۔

اجلاس میں ڈائریکٹر ڈویلپمنٹ وسیم اختر جتوئی، ڈی بی اے شہزاد قدیر، تحصیل منیجرز محمد اورنگزیب، تنزیل الرحمان علوی، جمیل چانڈیہ سمیت دیگر افسران نے شرکت کی۔

ڈیرہ غازیخان (سٹی رپورٹر جواد اکبر) ڈیرہ غازیخان میں سکول داخلہ اور شجرکاری مہم کا آغاز کردیا گیا ہے۔ڈپٹی کمشنر محمد عثمان خالد نے گورنمنٹ گرلز ہائی سکول نمبر1میں داخلہ،شجرکاری مہم اور جشن بہاراں پروگرام کا افتتاح کیا۔

ڈپٹی کمشنر محمد عثمان خالد نے خطاب کرتے ہوئے کہا کہ وزیراعلی پنجاب مریم نواز شریف نے سرکاری سکولوں میں سہولیات دستیابی کو یقینی بنایا ہے،طلباوطالبات سرکاری سکولوں میں داخلے کو ترجیح دیں،سرکاری تعلیمی اداروں میں طلبا و طالبات کو نصابی و غیر نصابی تمام تر سہولیات فراہم کی گئی ہیں،

محمد عثمان خالد نے سکول میں ٹرانس جینڈر کلاس روم،سٹیچنگ یونٹ اور بیوٹی پارلر کا بھی دورہ کیا اور گفتگو کرتے ہوئے کہاکہ ٹرانس جینڈر طلباء کو ٹیوٹا اتھارٹی سے ٹیکنیکل کورسز کروائیں گے،ٹرانس جینڈر تعلیم کے ساتھ ساتھ محنت کریں اور معاشرے کے اہم رکن بنیں،وہ کسی پر بوجھ بننے کی بجائے سکلز پروگرامز پر فوکس کریں،ان کے تیار کردہ ملبوسات و دیگر آئیٹمز کی خریدو فروخت کیلئے متعلقہ اداروں سے رابطے کیے جائیں گے۔

ڈپٹی کمشنر نے ثقافتی و سائنس ماڈلز کا معائنہ کیا اور طالبات کی صلاحیتوں کو سراہا،انہوں نے سکول میں پودا لگاکر شجرکاری مہم کا باقاعدہ افتتاح بھی کیا۔تقریب میں سی ای او ایجوکشن محمد عامر،پرنسپل سیدہ فرزانہ سجاد بخاری،ڈی ای اوز محمودالحسن،جاوید احمد،ڈاکٹر ماجد بخاری،اساتذہ اورطالبات شریک تھیں.

ڈیرہ غازی خان(باغی ٹی وی )جنوبی پنجاب میں اسمگلنگ روکنے کے لیے ڈی جی خان کے قبائلی علاقوں میں سیکیورٹی مزید سخت کرنے کا فیصلہ کر لیا گیا۔ نئی چیک پوسٹوں کی تعمیر جاری ہے، جن پر جوائنٹ فورسز تعینات کی جائیں گی جبکہ بارڈر ملٹری پولیس (بی ایم پی) میں نئی بھرتیاں بھی کی جا رہی ہیں۔

یہ بات کمشنر ڈی جی خان اشفاق احمد چوہدری نے ایڈیشنل چیف سیکرٹری ساؤتھ پنجاب فواد ہاشم ربانی سے ملاقات کے دوران بتائی۔ ایڈیشنل چیف سیکرٹری نے اسمگلنگ کے خلاف سخت ترین اقدامات کی ہدایت دیتے ہوئے کہا کہ ایرانی آئل کی اسمگلنگ سے ملکی معیشت کو نقصان پہنچ رہا ہے، جبکہ کھاد کی اسمگلنگ جنوبی پنجاب میں زرعی پیداوار پر منفی اثر ڈال رہی ہے۔

انہوں نے مزید کہا کہ جدید اسلحے کی اسمگلنگ کے حوالے سے بھی خفیہ اطلاعات موصول ہوئی ہیں، لہٰذا غیر قانونی سرگرمیوں میں ملوث عناصر کے خلاف بھرپور کارروائی کی جائے۔ انہوں نے کوہ سلیمان میں انفرا اسٹرکچر میں اضافے اور ڈرون ٹیکنالوجی کے ذریعے نگرانی کا بھی حکم دیا۔

کمشنر ڈی جی خان اشفاق احمد چوہدری نے بریفنگ میں بتایا کہ بین الصوبائی اسمگلنگ کی روک تھام کے لیے بارڈر فورس کی مشترکہ ٹیمیں تشکیل دے دی گئی ہیں، جبکہ بارڈر ملٹری پولیس میں بھی نئی بھرتیاں شروع کر دی گئی ہیں۔

16 نئی چیک پوسٹیں تعمیر ہو چکی ہیں، جبکہ جوائنٹ فورسز کی تعیناتی کے لیے 3 بڑی چیک پوسٹوں کی تعمیر کے ٹینڈر جاری کر دیے گئے ہیں۔
کوہ سلیمان امپروومنٹ پراجیکٹ کے تحت 15 سڑکوں کی تعمیر مکمل، جبکہ 8 مزید پر کام جاری ہے۔گزشتہ ایک سال میں 268 اسمگلرز گرفتار، 216 مقدمات درج اور 278 گاڑیاں ضبط کی جا چکی ہیں۔

انتظامیہ نے واضح کیا ہے کہ اسمگلنگ میں ملوث عناصر کو کسی صورت رعایت نہیں دی جائے گی، اور ان کے خلاف سخت قانونی کارروائی کی جائے گی۔

ڈیرہ غازی خان (سٹی رپورٹر جواد اکبر) وزیراعلیٰ پنجاب محترمہ مریم نواز شریف کے وژن کے مطابق کمشنر ڈیرہ غازی خان اشفاق احمد چوہدری اور ڈپٹی کمشنر محمد عثمان خالد کی ہدایات پر میونسپل کمیٹی کوٹ چھٹہ کے زیر اہتمام دکانوں پر بورڈز لگانے کا عمل شروع ہو گیا۔

اس مہم کی نگرانی اسسٹنٹ کمشنر/ایڈمنسٹریٹر محمد جنید خان اور چیف آفیسر جواد الحسن گوندل کر رہے ہیں، جبکہ ایم او آر معطر کرن اور ایم او آئی اینڈ ایس غلام اکبر اس عمل کو مکمل کروا رہے ہیں۔

بازار کے دکانداروں کو ہدایت دی گئی ہے کہ جلد از جلد بورڈز کی تنصیب مکمل کریں تاکہ شہر کی خوبصورتی میں بہتری لائی جا سکے۔

ڈیرہ غازیخان (سٹی رپورٹر جواد اکبر) ڈیرہ غازیخان ڈویژن میں ترقیاتی منصوبوں کی بروقت تکمیل کیلئے ٹائم لائنز مقرر کر دی گئی ہیں . معیاری مٹیریل کا استعمال یقینی بنانے کیلئے سخت نگرانی کے بھی احکامات جاری کر دیئے گئے ہیں . یہ احکامات کمشنر اشفاق احمد چوہدری نے جائزہ اجلاس کی صدارت کرتے ہوئے جاری کیے . ڈائریکٹر ڈویلپمنٹ وسیم اختر جتوئی اوردیگر نے منصوبوں کی پیشرفت سے متعلق بریفنگ دی .

اجلاس میں رواں مالی سال کی اے ڈی پی کے ترقیاتی منصوبوں کا جائزہ لیاگیا. بریفنگ میں بتایا گیا کہ صوبائی سالانہ ترقیاتی پروگرام 2024-25کے تحت ڈیرہ غازیخان ڈویژن میں 582منصوبوں پر کام کیا جارہاہے جس کیلئے حکومت پنجاب نے رواں مالی سال کیلئے 39ارب روپے مختص کیے ہیں . علامہ اقبال ٹیچنگ ہسپتال میں صحت کی سہولیات میں بہتری اور اضافہ کیلئے زچہ بچہ ہسپتال ، نئی او پی ڈی اور گائنی وا رڈ تعمیر کیا جار ہا ہے . ڈویژنل ہیڈ کوارٹر پر ایک اور سپورٹس کمپلیکس تعمیر کیا جائے گا .

کمشنر اشفاق احمد چوہدری نے کہاکہ تعمیراتی محکموں کے افسران فیلڈ میں زیادہ وقت گزاریں اور منصوبوں کو مانیٹر کیا جائے . مفاد عامہ کے منصوبوں میں ناقص مٹیریل ثابت ہونے پر تعمیراتی کمپنی کو آئندہ سرکاری منصوبوں کیلئے بلیک لسٹ کیا جائے گا تو وہاں متعلقہ تعمیراتی محکموں کے افسران کے خلاف بھی قانون کے تحت کارروائی ہو گی.

کمشنر اشفاق احمد چوہدری نے کہاکہ ترقیاتی منصوبوں کی جلد تکمیل کیلئے حائل رکاوٹوں اور خامیو ںکو دور کیا جائے . تمام محکمے مل کر کام کریں ، ذمہ داریاں ایک دوسرے پر عائد کرنے کی روش ترک کی جائے .

ڈیرہ غازی خان،باغی ٹی وی (سٹی رپورٹرجواداکبر ) ڈیرہ غازی خان آرٹس کونسل میں سرائیکی ثقافتی میلے کا شاندار افتتاح کیا گیا۔ میلے میں سرائیکی اجرکوں اور سرائیکی جھمر نے چار چاند لگا دئیے۔ سرائیکی ثقافتی اور کتابوں کے سٹالز بھی توجہ کا مرکز بنے رہے۔

افتتاح کے موقع پر ڈائریکٹر آرٹس کونسل نعیم اللہ طفیل، ڈائریکٹر تعلقات عامہ محمد شہزاد، سرائیکی رہنما منظور خان دریشک اور سرائیکی میلے کے چیف آرگنائزر ظہور دھریجہ موجود تھے۔ انہوں نے ربن کاٹ کر میلے کا باقاعدہ افتتاح کیا۔

آرگنائزر ظہور دھریجہ نے کہا کہ وسیب کی شناخت کو کوئی نہیں مٹا سکتا۔ انہوں نے مزید کہا کہ وہ وقت دور نہیں جب وسیب کے لوگ اپنا صوبہ اور اپنے حقوق حاصل کریں گے۔ انہوں نے کہا کہ صدیوں بعد وسیب کے لوگوں نے اپنی زبان و ثقافت کو پھر سے زندہ کر کے امن عالم کے لیے اپنا کردار ادا کیا ہے۔

ڈائریکٹر آرٹس کونسل نعیم اللہ طفیل نے کہا کہ سرائیکی ثقافت دنیا کی بہترین ثقافت ہے۔ انہوں نے ظہور دھریجہ کا شکریہ ادا کیا کہ انہوں نے ڈی جی خان آرٹس کونسل کے اشتراک سے بہترین اور یادگار پروگرام کا انعقاد کیا ہے۔

ڈائریکٹر تعلقات عامہ محمد شہزاد نے کہا کہ سرائیکی ثقافت کی ترقی کے لیے وسیب کے فنکاروں کا کردار اہمیت کا حامل ہے۔ انہوں نے ظہور دھریجہ اور ان کے ادارے کی خدمات کو سراہا۔

اس موقع پر سرائیکی رہنما حضور بخش گلفاد، ڈاکٹر ارشاد احمد ناصر، مرتضیٰ موہانہ، خلیل خان چنگوانی، حاجی غلام فرید کنیرہ، ملک سلیم، عاشق صدقانی، رضوانہ تبسم درانی، ثوبیہ ملک، محمد اختر خان چنال، جعفر حسین جعفری، حسنین عباس، ریاض خان، انعام اللہ، آصف دھریجہ، سہیل صدیقی، واحد بخش خان گبول، عبدالخالق دھریجہ، حنیف خان گبول، ڈاکٹر شہزاد گھلو، یوسف خان گبول، سید عامر مشہدی، ڈاکٹر سکندر کھکھل، حاجی نذیر جھلن، سانول خان بلوچ، شان دھریجہ، ملک زبیر وینس، داؤد خان المانی، ولید خان المانی، حسان خان المانی سمیت وسیب سے بڑی تعداد میں لوگ موجود تھے۔

ڈیرہ غازیخان،باغی ٹی وی(سٹی رپورٹرجواداکبر) کمشنر اشفاق احمد چوہدری نے کہا کہ ڈیرہ غازی خان ڈویژن کے 3072 مواضعات میں سے 2794 کو آن لائن کردیا گیا ہے، جس سے ریونیو سسٹم کی ڈیجیٹلائزیشن کی طرف اہم قدم اٹھایا گیا ہے۔ انہوں نے یہ بات سینئر ممبر بورڈ آف ریونیو نبیل جاوید کی زیرِ صدارت اجلاس میں بتائی۔

کمشنر نے مزید کہا کہ ڈویژن کی 16 تحصیلوں میں 26 پراپرٹیز کی نیلامی مکمل کرلی گئی ہے۔ سرکاری واجبات کی وصولی کے لیے ریونیو افسران کو فیلڈ میں متحرک کر دیا گیا ہے، اور نادہندگان کی جائیداد قرق کرنے کے ساتھ ساتھ دیگر قانونی کارروائی کی جائے گی۔

رواں مالی سال کے دوران 582 ترقیاتی منصوبوں پر کام جاری ہے، جس کے لیے حکومت پنجاب نے 39 ارب روپے مختص کیے ہیں۔ اس کے علاوہ معیاری مٹیریل کے استعمال کو یقینی بنانے کے لیے کڑی مانیٹرنگ کی جارہی ہے۔

ڈیرہ غازی خان (سٹی رپورٹر جواد اکبر) سینئر ممبر بورڈ آف ریونیو نبیل جاوید نے ڈیرہ غازی خان، سخی سرور اور فورٹ منرو کا دورہ کیا، جہاں انہوں نے ترقیاتی منصوبوں، ثقافتی ورثے کے تحفظ اور سیلاب سے بچاؤ کے اقدامات کا جائزہ لیا۔

کمشنر آفس میں ہونے والے اجلاس میں ریونیو اہداف، ترقیاتی منصوبوں اور دیگر امور پر بریفنگ لی گئی۔ اس موقع پر کمشنر اشفاق احمد چوہدری، ڈپٹی کمشنر محمد عثمان خالد، پولیٹیکل اسسٹنٹ کوہ سلیمان محمد اسد چانڈیہ سمیت دیگر افسران بھی موجود تھے۔

ایس ایم بی آر نبیل جاوید نے حضرت سخی سرورؒ کے مزار پر حاضری دی، چادر چڑھائی اور فاتحہ خوانی کی، جبکہ درگاہ کی جانب سے ان کی دستار بندی بھی کی گئی۔

فورٹ منرو میں انہوں نے تاریخی و ثقافتی ورثے کے تحفظ کے احکامات جاری کیے اور کمشنر آفس میں اجلاس کی صدارت کرتے ہوئے ہدایت کی کہ ترقیاتی منصوبوں میں تکنیکی جدت لائی جائے اور مٹیریل کے معیار پر کوئی سمجھوتہ نہ کیا جائے۔

انہوں نے مزید کہا کہ سرکاری اراضی کو زراعت، فش فارمنگ اور جھینگا فارمنگ کے لیے استعمال کیا جائے، جبکہ قبضہ مافیا سے محکمہ اوقاف اور دیگر سرکاری محکموں کی زمینیں فوری واگزار کرائی جائیں۔

لینڈ ریکارڈ کی ڈیجیٹلائزیشن کے لیے ڈپٹی کمشنرز کو ذاتی دلچسپی لینے کی ہدایت کرتے ہوئے کہا کہ سرکاری واجبات کی وصولی میں کوتاہی برداشت نہیں کی جائے گی۔