Category: ڈیرہ غازی خان

ڈیرہ غازی خان،باغی ٹی وی( نیوز رپورٹر شاہد خان) کمشنر ڈیرہ غازی خان ڈویژن اشفاق احمد چوہدری کی زیر صدارت اہم اجلاس منعقد ہوا، جس میں انسداد تجاوزات مہم کو ماہ رمضان سے قبل مکمل کرنے کا فیصلہ کیا گیا۔ اجلاس میں ستھرا پنجاب رمضان پیکج اور دیگر اہم معاملات کا بھی جائزہ لیا گیا۔

کمشنر اشفاق احمد چوہدری نے کہا کہ ڈیرہ غازی خان ڈویژن میں عارضی و پختہ تجاوزات کو ختم کرنے کے بعد شہر کی بیوٹیفکیشن اور مارکیٹوں میں روزگار کے فروغ کے اقدامات کیے جائیں گے۔ انہوں نے مزید کہا کہ تجاوزات نے مارکیٹوں کا حسن ماند کر دیا تھا، لیکن اب ان کا خاتمہ کر کے ٹریفک کی روانی اور بازاروں میں بہتری لائی جائے گی۔

کمشنر نے ستھرا پنجاب پروگرام کے تحت ہر چھوٹے گاؤں تک صفائی کے اقدامات پہنچانے کی اہمیت پر زور دیا۔ ماہ رمضان کے دوران ماڈل بازار، سہولت بازار اور اہم بازاروں میں چینی اور دیگر ضروری اشیاء کے سٹالز لگانے کا بھی اعلان کیا گیا۔

ڈیرہ غازیخان (باغی ٹی وی)خالدرسول کا صحافتی خدمات کا 4 سالہ دور مثالی رہا، خانیوال تبادلے پر خوبصورت پیغام

تفصیل کے مطابق ڈیرہ غازیخان میں خالدرسول نے بطور انفارمیشن آفیسر اپنے چار سالہ دور میں صحافیوں کے ساتھ بہترین تعلقات قائم کیے اور ہمیشہ احترام و محبت کے رشتہ کو فروغ دیا۔ انہوں نے کسی بھی صحافتی گروپ بندی یا تقسیم کا حصہ بننے کی بجائے، تمام صحافیوں کی عزت کی اور ان کی حوصلہ افزائی کی۔ اگر کسی مسئلے پر اختلافات ہوتے تو وہ پیار و محبت کے ساتھ دلیل سے قائل کرنے کی کوشش کرتے۔

خالدرسول نے اپنی ڈیرہ غازیخان میں تعیناتی کے دوران تمام افسران، ملازمین اور صحافیوں کے ساتھ بہترین وقت گزارا اور سب کے ساتھ احترام و محبت کا رشتہ برقرار رکھا۔ اپنے تبادلے کے حوالے سے خالدرسول نے کہا کہ "خانیوال تبادلے کے بعد میں سب کی بہترین یادیں سمیٹ کر جا رہا ہوں۔ تمام احباب کے مثالی تعاون پر ان کا شکر گزار ہوں اور دعا گو ہوں کہ خدا ہمیں اپنی بے پایاں رحمتیں اور فضل دے۔”

خالدرسول کا یہ پیغام ان کی کامیاب اور مثالی خدمات کی ایک جھلک پیش کرتا ہے جس سے نہ صرف صحافتی برادری کو فائدہ پہنچا بلکہ تمام افسران اور ملازمین کے ساتھ بھی ایک مضبوط رشتہ قائم ہوا۔

کوٹ چھٹہ،باغی ٹی وی(تحصیل رپورٹرمریدحسین ٹالپور) جامعہ سلطانیہ تعلیم القرآن تالپور روڈ خانپور میں 13واں سالانہ عظمتِ قرآن دستار فضیلت جلسہ منعقد ہوا، جس میں قرآن کریم مکمل کرنے والے طلبہ کی دستار بندی کی گئی۔ تقریب میں علماء، قراء، مشائخ عظام اور معزز مہمانوں سمیت بڑی تعداد میں عقیدت مندوں نے شرکت کی۔

تقریب سے خطیبِ پاکستان حضرت مولانا محمد جعفر قریشی نے خطاب کیا اور قرآن کریم کی عظمت، حفاظ کرام کی فضیلت اور مدارس کی اہمیت پر روشنی ڈالی۔ ان کے ایمان افروز بیان نے محفل کو چار چاند لگا دیے اور سامعین پر گہرا اثر چھوڑا، یہاں تک کہ کئی آنکھیں اشکبار ہو گئیں۔

جلسے کا آغاز تلاوتِ کلامِ پاک سے ہوا، جس کی سعادت حافظ حق نواز تالپور نے حاصل کی۔ معروف نعت خواں محمد اسماعیل نے نعتِ رسول مقبول ﷺ پیش کر کے روحانی سماں باندھ دیا۔

منتظمین میں قاری محمد جمیل سلطانی، قاری محمد اشرف، ڈاکٹر عبدالرشید فوجی، رمضان شاکر، ڈاکٹر عبدالوحید قریشی، مولانا عبدالرحیم دایات، قاری وقار احمد لودھی، قاری فاروق احمد عطاری، قاری محمد ساجد فیضی تالپور، مولانا ساجد حسین فیضی بستی فوجہ شامل تھے۔

مہمانانِ خصوصی میں پیر سید محمد عارف شاہ، محمد ابراہیم خان، حاجی اللّٰہ وسایا خان لنڈ، ڈاکٹر مرید حسین تالپور، ڈاکٹر محمد اقبال بھٹہ، غلام سرور خان تالپور، خادم حسین تالپور، ظفر حسین پروزانی، حسین بخش تالپور، محمد شفیع خان، محمد حسین خان یارے آنی، حاجی سیف اللّٰہ خان رمدانی سمیت دیگر شخصیات نے شرکت کی۔

دستار بندی کے موقع پر محمد ذیشان، محمد شہزاد، محمد نعیم، محمد طاہر، محمد شاکر اور محمد احسان کو اعزاز بخشا گیا۔ مقررین نے حفاظِ کرام کی حوصلہ افزائی کرتے ہوئے ان کی دینی خدمات کو سراہا اور امت مسلمہ کی کامیابی کے لیے خصوصی دعائیں کیں۔

یہ روح پرور تقریب شرکاء کے لیے ایک ناقابل فراموش لمحہ بن گئی، جہاں قرآن کی روشنی سے دلوں کو منور کرنے کی سعادت حاصل ہوئی۔

ڈیرہ غازی خان (سٹی رپورٹر جواد اکبر) ضلع ڈیرہ غازی خان میں غیر سرکاری تنظیموں (این جی اوز) کو این او سی کے بغیر کام کی اجازت نہیں ہوگی، جبکہ این او سی کی تجدید کے لیے ایک ماہ کی مہلت دی گئی ہے۔

یہ اعلان ڈپٹی کمشنر محمد عثمان خالد نے این جی اوز کے نمائندہ اجلاس سے خطاب کرتے ہوئے کیا۔ انہوں نے کہا کہ مفادِ عامہ کے منصوبوں کے لیے این جی اوز کی حوصلہ افزائی کی جائے گی، تاہم کسی بھی منصوبے کے آغاز سے قبل انتظامیہ کو مکمل آگاہی دینا لازم ہوگا۔

ڈپٹی کمشنر نے واضح کیا کہ تمام این جی اوز کی کارکردگی کا مسلسل جائزہ لیا جائے گا، اور ان کے سربراہان کو ہر اجلاس میں شرکت یقینی بنانے کی ہدایت کی گئی ہے تاکہ باہمی مشاورت سے علاقے کی ترقی اور عوامی مسائل کو بہتر انداز میں حل کیا جا سکے۔

محمد عثمان خالد نے کہا کہ حکومت تنہا تمام مسائل کا حل نہیں نکال سکتی، لہٰذا این جی اوز حکومت کے شانہ بشانہ کام کریں تاکہ فلاحی منصوبے مؤثر اور نتیجہ خیز ثابت ہو سکیں۔

یہ اقدامات علاقے میں شفافیت، منصوبوں کی مؤثریت اور عوامی بہبود کو یقینی بنانے کے لیے کیے جا رہے ہیں۔

ڈیرہ غازی خان (سٹی رپورٹرجواد اکبر) حکومت پنجاب اور ورلڈ بینک کے تعاون سے دیہی علاقوں میں شہری سہولیات کے مساوی میونسپل سروسز فراہم کرنے کا منصوبہ شروع کر دیا گیا۔ اس پراجیکٹ کے تحت پنجاب کی 16 تحصیلوں کے 2008 دیہات مستفید ہوں گے، جب کہ ڈیرہ غازی خان ڈویژن کی تحصیل علی پور، تونسہ اور روجھان کو پہلے مرحلے میں شامل کیا گیا ہے۔

کمشنر اشفاق احمد چوہدری کی زیر صدارت اجلاس میں پنجاب رورل میونسپل سروسز کمپنی کے افسران نے بریفنگ دیتے ہوئے بتایا کہ سات سالہ منصوبے کے تحت صاف پانی کی فراہمی، سیوریج سسٹم کی بہتری، سالڈ ویسٹ مینجمنٹ، ماحولیاتی تحفظ اور عوامی رویوں میں مثبت تبدیلی پر خصوصی توجہ دی جائے گی۔ سیوریج کے پانی کو ٹریٹ کر کے آبپاشی سمیت دیگر مقاصد کے لیے قابلِ استعمال بنایا جائے گا، جب کہ ٹیوب ویلز اور دیگر مشینری کو بجلی کے ساتھ سولر سسٹم سے بھی منسلک کیا جا رہا ہے۔

پراجیکٹ کے تحت ہر گھر سے 2000 روپے ڈیمانڈ نوٹس اور 1000 روپے ماہانہ چارجز وصول کیے جائیں گے، جبکہ پانی کے استعمال کی نگرانی کے لیے میٹر بھی نصب کیے جا رہے ہیں۔ کمشنر اشفاق احمد چوہدری نے اس منصوبے کو دیہی علاقوں کے لیے انقلابی قدم قرار دیتے ہوئے کہا کہ کمپنی کے افسران نیک نیتی سے کام کریں تاکہ منصوبہ کامیاب ہو اور دیہی عوام کا معیارِ زندگی بہتر ہو سکے۔

اجلاس میں ڈائریکٹر ڈویلپمنٹ وسیم اختر جتوئی، ڈی بی اے شہزاد قدیر، تحصیل منیجرز محمد اورنگزیب، تنزیل الرحمان علوی، جمیل چانڈیہ سمیت دیگر افسران نے شرکت کی۔

ڈیرہ غازیخان (سٹی رپورٹر جواد اکبر) ڈیرہ غازیخان میں سکول داخلہ اور شجرکاری مہم کا آغاز کردیا گیا ہے۔ڈپٹی کمشنر محمد عثمان خالد نے گورنمنٹ گرلز ہائی سکول نمبر1میں داخلہ،شجرکاری مہم اور جشن بہاراں پروگرام کا افتتاح کیا۔

ڈپٹی کمشنر محمد عثمان خالد نے خطاب کرتے ہوئے کہا کہ وزیراعلی پنجاب مریم نواز شریف نے سرکاری سکولوں میں سہولیات دستیابی کو یقینی بنایا ہے،طلباوطالبات سرکاری سکولوں میں داخلے کو ترجیح دیں،سرکاری تعلیمی اداروں میں طلبا و طالبات کو نصابی و غیر نصابی تمام تر سہولیات فراہم کی گئی ہیں،

محمد عثمان خالد نے سکول میں ٹرانس جینڈر کلاس روم،سٹیچنگ یونٹ اور بیوٹی پارلر کا بھی دورہ کیا اور گفتگو کرتے ہوئے کہاکہ ٹرانس جینڈر طلباء کو ٹیوٹا اتھارٹی سے ٹیکنیکل کورسز کروائیں گے،ٹرانس جینڈر تعلیم کے ساتھ ساتھ محنت کریں اور معاشرے کے اہم رکن بنیں،وہ کسی پر بوجھ بننے کی بجائے سکلز پروگرامز پر فوکس کریں،ان کے تیار کردہ ملبوسات و دیگر آئیٹمز کی خریدو فروخت کیلئے متعلقہ اداروں سے رابطے کیے جائیں گے۔

ڈپٹی کمشنر نے ثقافتی و سائنس ماڈلز کا معائنہ کیا اور طالبات کی صلاحیتوں کو سراہا،انہوں نے سکول میں پودا لگاکر شجرکاری مہم کا باقاعدہ افتتاح بھی کیا۔تقریب میں سی ای او ایجوکشن محمد عامر،پرنسپل سیدہ فرزانہ سجاد بخاری،ڈی ای اوز محمودالحسن،جاوید احمد،ڈاکٹر ماجد بخاری،اساتذہ اورطالبات شریک تھیں.

ڈیرہ غازی خان(باغی ٹی وی )جنوبی پنجاب میں اسمگلنگ روکنے کے لیے ڈی جی خان کے قبائلی علاقوں میں سیکیورٹی مزید سخت کرنے کا فیصلہ کر لیا گیا۔ نئی چیک پوسٹوں کی تعمیر جاری ہے، جن پر جوائنٹ فورسز تعینات کی جائیں گی جبکہ بارڈر ملٹری پولیس (بی ایم پی) میں نئی بھرتیاں بھی کی جا رہی ہیں۔

یہ بات کمشنر ڈی جی خان اشفاق احمد چوہدری نے ایڈیشنل چیف سیکرٹری ساؤتھ پنجاب فواد ہاشم ربانی سے ملاقات کے دوران بتائی۔ ایڈیشنل چیف سیکرٹری نے اسمگلنگ کے خلاف سخت ترین اقدامات کی ہدایت دیتے ہوئے کہا کہ ایرانی آئل کی اسمگلنگ سے ملکی معیشت کو نقصان پہنچ رہا ہے، جبکہ کھاد کی اسمگلنگ جنوبی پنجاب میں زرعی پیداوار پر منفی اثر ڈال رہی ہے۔

انہوں نے مزید کہا کہ جدید اسلحے کی اسمگلنگ کے حوالے سے بھی خفیہ اطلاعات موصول ہوئی ہیں، لہٰذا غیر قانونی سرگرمیوں میں ملوث عناصر کے خلاف بھرپور کارروائی کی جائے۔ انہوں نے کوہ سلیمان میں انفرا اسٹرکچر میں اضافے اور ڈرون ٹیکنالوجی کے ذریعے نگرانی کا بھی حکم دیا۔

کمشنر ڈی جی خان اشفاق احمد چوہدری نے بریفنگ میں بتایا کہ بین الصوبائی اسمگلنگ کی روک تھام کے لیے بارڈر فورس کی مشترکہ ٹیمیں تشکیل دے دی گئی ہیں، جبکہ بارڈر ملٹری پولیس میں بھی نئی بھرتیاں شروع کر دی گئی ہیں۔

16 نئی چیک پوسٹیں تعمیر ہو چکی ہیں، جبکہ جوائنٹ فورسز کی تعیناتی کے لیے 3 بڑی چیک پوسٹوں کی تعمیر کے ٹینڈر جاری کر دیے گئے ہیں۔
کوہ سلیمان امپروومنٹ پراجیکٹ کے تحت 15 سڑکوں کی تعمیر مکمل، جبکہ 8 مزید پر کام جاری ہے۔گزشتہ ایک سال میں 268 اسمگلرز گرفتار، 216 مقدمات درج اور 278 گاڑیاں ضبط کی جا چکی ہیں۔

انتظامیہ نے واضح کیا ہے کہ اسمگلنگ میں ملوث عناصر کو کسی صورت رعایت نہیں دی جائے گی، اور ان کے خلاف سخت قانونی کارروائی کی جائے گی۔

ڈیرہ غازی خان (سٹی رپورٹر جواد اکبر) وزیراعلیٰ پنجاب محترمہ مریم نواز شریف کے وژن کے مطابق کمشنر ڈیرہ غازی خان اشفاق احمد چوہدری اور ڈپٹی کمشنر محمد عثمان خالد کی ہدایات پر میونسپل کمیٹی کوٹ چھٹہ کے زیر اہتمام دکانوں پر بورڈز لگانے کا عمل شروع ہو گیا۔

اس مہم کی نگرانی اسسٹنٹ کمشنر/ایڈمنسٹریٹر محمد جنید خان اور چیف آفیسر جواد الحسن گوندل کر رہے ہیں، جبکہ ایم او آر معطر کرن اور ایم او آئی اینڈ ایس غلام اکبر اس عمل کو مکمل کروا رہے ہیں۔

بازار کے دکانداروں کو ہدایت دی گئی ہے کہ جلد از جلد بورڈز کی تنصیب مکمل کریں تاکہ شہر کی خوبصورتی میں بہتری لائی جا سکے۔