Category: ڈیرہ غازی خان

ڈیرہ غازی خان،باغی ٹی وی (سٹی رپورٹرجواداکبر) آر پی او کیپٹن (ر) سجاد حسن خان کا پنجاب، خیبر پختونخواہ بارڈر کا ہنگامی دورہ، سکیورٹی اقدامات کا جائزہ

تفصیلات کے مطابق آر پی او ڈیرہ غازی خان کیپٹن (ر) سجاد حسن خان نے سکیورٹی اقدامات کا جائزہ لینے کے لیے پنجاب اور خیبر پختونخواہ کے سرحدی علاقے کا ہنگامی دورہ کیا۔ اس دورے کے دوران انہوں نے خوارجی دہشتگردوں کے حملے کا نشانہ بننے والی چیک پوسٹ حضرت عمر فاروق (جھنگی)، چیک پوسٹ لکھانی اور ترمن کا تفصیلی معائنہ کیا۔

آر پی او نے چیک پوسٹ جھنگی پر تعینات جوانوں سے خصوصی ملاقات کی اور دہشت گردوں کے حملے کو پسپا کرنے اور چیک پوسٹ کا بہترین دفاع کرنے پر جوانوں کو خراج تحسین پیش کیا۔ ان کا کہنا تھا کہ پنجاب پولیس کے الرٹ ہونے کی وجہ سے خوارجی دہشت گرد اپنے مذموم عزائم میں کامیاب نہیں ہو سکے۔ آر پی او نے سرحدی چوکیوں کے سیکورٹی اقدامات، تعینات نفری، گاڑیوں، اسلحہ، ایمنیشن، مورچوں اور تھرمل ڈوم کیمروں کے ذریعے چیکنگ کے طریقہ کار کا بھی جائزہ لیا۔

آر پی او نے سرحدی چیک پوسٹوں کی عمارتوں، باؤنڈری وال اور مورچوں کو مزید مضبوط بنانے کے لیے جاری تعمیراتی کاموں کو ہنگامی بنیادوں پر مکمل کرنے کے احکامات جاری کیے۔ اس دوران، انہوں نے ڈیوٹی پر تعینات اہلکاروں کو ہمہ وقت الرٹ رکھنے، ہنگامی حالت سے نمٹنے کے لیے ماک ایکسرسائزز کی مشق کرنے اور کیو آر ایف ٹیموں کے ریسپانس ٹائم کو مزید بہتر کرنے کے بھی احکامات دیے۔

آر پی او نے کہا کہ وزیر اعلی پنجاب کی ہدایت پر سرحدی چوکیوں کی عمارت اور مورچوں کو مزید مضبوط بنانے کا عمل تیزی سے جاری ہے۔ حکومت پنجاب نے سرحدی چوکیوں کو جدید ترین اسلحہ، ٹرانسپورٹ اور لاجسٹکس سے لیس کیا ہے تاکہ دہشت گردوں کے حملوں کا مؤثر جواب دیا جا سکے۔ انہوں نے مزید کہا کہ خیبرپختونخواہ کی سرحدی چوکیوں پر دہشت گردوں کے 11 حملوں کو ناکام بنایا گیا ہے، اور ان کا عزم ہے کہ دہشت گرد کبھی اپنے مذموم عزائم میں کامیاب نہیں ہوں گے۔

ڈی جی خان(باغی ٹی وی)تونسہ کے علاقہ وہوا میں جھنگی پولیس چیک پوسٹ پر دہشتگردوں کا حملہ ناکام، پولیس کا بھرپور جواب

تفصیل کے مطابق ڈی جی خان کے علاقے تھانہ وہوا کی حضرت عمر فاروق جھنگی پولیس چیک پوسٹ پر خوارج دہشتگردوں کا حملہ ایک بار پھر ناکام بنا دیا گیا۔ پنجاب پولیس کے بہادر جوانوں نے بھرپور جوابی کارروائی کرتے ہوئے دہشتگردوں کو پسپا ہونے پر مجبور کر دیا۔

ترجمان پنجاب پولیس کے مطابق 15 سے 20 دہشتگردوں نے رات کی تاریکی کا فائدہ اٹھاتے ہوئے مختلف اطراف سے چیک پوسٹ پر حملہ کیا۔ حملے میں راکٹ لانچرز، ہینڈ گرینیڈ اور دیگر جدید اسلحہ استعمال کیا گیا، تاہم چوکی پر تعینات پولیس اہلکاروں نے مستعدی سے مقابلہ کرتے ہوئے دشمن کو بھاگنے پر مجبور کر دیا۔

آر پی او ڈی جی خان کیپٹن (ر) سجاد حسن خان نے آپریشن کی قیادت کی جبکہ ڈی پی او سید علی بھی ہمراہ رہے۔ پنجاب پولیس کی جوابی کارروائی میں دہشتگردوں کے جانی نقصان کی اطلاعات ہیں، تاہم حتمی تفصیلات تاحال سامنے نہیں آئیں۔ علاقے میں سرچ آپریشن جاری ہے تاکہ دہشتگردوں کے ممکنہ ٹھکانوں کا پتہ لگایا جا سکے۔

پنجاب پولیس کے مطابق گزشتہ سال یکم اور 2 مئی کی درمیانی شب بھی جھنگی چوکی پر حملے کی ناکام کوشش کی گئی تھی۔ گزشتہ دو سالوں میں پنجاب پولیس کی سرحدی چوکیوں پر خوارج دہشتگردوں کے 18 حملے ناکام بنائے جا چکے ہیں۔

وزیر اعلیٰ پنجاب مریم نواز شریف کی ہدایت پر جھنگی چیک پوسٹ کو مزید محفوظ بنایا گیا ہے، جہاں اضافی نفری، جدید آلات اور اسلحہ فراہم کیا گیا ہے۔ آئی جی پنجاب ڈاکٹر عثمان انور نے حملے کو ناکام بنانے پر اہلکاروں کی بہادری کو سراہتے ہوئے کہا کہ پنجاب پولیس کے جوان ملک و قوم کے دشمنوں کے سامنے سیسہ پلائی دیوار ہیں۔

آئی جی پنجاب نے مزید کہا کہ پولیس چوکی پر تعینات تمام اہلکار محفوظ ہیں اور ان کا مورال بلند ہے۔ دشمن کی بزدلانہ کارروائیاں آئندہ بھی ناکام ہوں گی، کیونکہ پنجاب پولیس ہر قسم کی دہشتگردی کا مقابلہ کرنے کے لیے تیار ہے۔

ڈیرہ غازی خان،باغی ٹی وی (سٹی رپورٹرجواد اکبر) پولیس چوکی لاری اڈہ کی کارروائی، 1 کروڑ روپے مالیت کی چوری شدہ سرکاری ادویات برآمد

تفصیلات کے مطابق ڈیرہ غازی خان پولیس نے چوکی لاری اڈہ کے علاقے میں کارروائی کرتے ہوئے 1 کروڑ روپے مالیت کی چوری شدہ سرکاری ادویات برآمد کر لی۔ پولیس کو اطلاع ملی تھی کہ ایک شخص ممنوعہ اور چوری شدہ ادویات کی نقل و حمل میں ملوث ہے۔

موقع پر پہنچ کر پولیس نے ملزم کو حراست میں لے کر اس کے قبضے سے پنجاب حکومت کی سرکاری ملکیتی ادویات کے کئی کارٹن برآمد کیے۔ ابتدائی تفتیش میں ملزم نے انکشاف کیا کہ وہ یہ چوری شدہ ادویات ایک سرکاری ملازم سے حاصل کرتا تھا۔

پولیس نے دونوں ملزمان کے خلاف مقدمہ درج کر لیا ہے، اور مزید تحقیقات جاری ہیں تاکہ اس نیٹ ورک کے دیگر عناصر کو بھی قانون کے کٹہرے میں لایا جا سکے۔

ڈی پی او ڈیرہ غازی خان سید علی نے ڈی ایس پی سٹی عرفان اکبر، ایس ایچ او گدائی علی عمران اور انچارج چوکی لاری اڈہ عرفان حیدر کی کاوشوں کو سراہا۔

ڈیرہ غازیخان (باغی ٹی وی رپورٹ)کوٹ چھٹہ میں انڈس ہائی وے پر ایل پی جی ٹرالر میں آگ، ایک شخص جاں بحق، متعدد زخمی

تفصیل کے مطابق کوٹ چھٹہ میں انڈس ہائی وے پر شنواری پمپ کے قریب ایل پی جی ٹرالر میں اچانک آگ بھڑک اٹھی، جس نے تین دیگر کیپسول ٹرالروں کو بھی اپنی لپیٹ میں لے لیا۔ حادثے کے بعد تمام ڈرائیور موقع سے فرار ہو گئے۔

ریسکیو 1122 کو 13:24 پر ایمرجنسی کال موصول ہوئی، جس پر فوری کارروائی کرتے ہوئے قریبی اسٹیشن سے فائر وہیکل، موٹر بائیک ایمبولینس اور ریسکیو ایمبولینس روانہ کی گئیں۔ اضافی مدد کے لیے ڈی جی خان اور راجن پور کے مختلف اسٹیشنز سے 6 فائر وہیکلز اور 2 ریسکیو وہیکلز طلب کی گئیں۔

ریسکیو عملے نے ڈی سی کنٹرول روم اور پولیس کنٹرول روم کو مطلع کرنے کے ساتھ ساتھ پمپ اور قریبی ہوٹل کے تمام عملے کو محفوظ مقام پر منتقل کر دیا۔ فائر فائٹنگ اور کولنگ کے عمل کے دوران افسوسناک طور پر ایک 60 سالہ شخص آگ کے دھماکے میں جاں بحق ہو گیا، جبکہ چند ریسکیورز معمولی زخمی ہوئے۔

ریسکیو آپریشن کی نگرانی ڈسٹرکٹ ایمرجنسی آفیسر ڈیرہ غازیخان وقاص خلیق کر رہے ہیں اور فائر فائٹنگ کا عمل اب بھی جاری ہے۔

ڈیرہ غازی خان،باغی ٹی وی (سٹی رپورٹرجواداکبر)ہاؤسنگ سوسائٹیز میں اربوں کا فراڈ، ذمہ داران کو فوری گرفتارکیا جائے.شیخ عثمان فاروق

جماعت اسلامی پاکستان کے ڈپٹی سیکرٹری جنرل شیخ عثمان فاروق ایڈووکیٹ نے گلبرگ ہاؤسنگ سوسائٹی اور سمارٹ ولاز کے منصوبوں میں اربوں روپے کے فراڈ پر سخت ردعمل دیتے ہوئے ذمہ داران کی فوری گرفتاری اور متاثرین کو حق دلانے کا مطالبہ کیا ہے۔

دفتر جماعت اسلامی میں بزنس فورم کے صدر میاں نعیم ثاقب اور شیخ سلیم ارشد کے ہمراہ پریس کانفرنس کرتے ہوئے انہوں نے کہا کہ غلام اصغر گورمانی اور ملک ظفر تھتھل سمیت ان کے حاشیہ بردار بروکرز نے عوام کو سبز باغ دکھا کر اربوں روپے ہڑپ کر لیے۔ کئی سال گزرنے کے باوجود نہ ولاز فراہم کیے گئے اور نہ ہی پلاٹس کی رجسٹریاں مکمل کی گئیں۔

انہوں نے انکشاف کیا کہ سمارٹ ولاز کے رجسٹری شدہ خریداروں کو قبضہ نہیں دیا گیا جبکہ گلبرگ ہاؤسنگ کے پلاٹ مالکان کو غیر قانونی طور پر عثمانیہ گارڈن نامی منصوبے میں مزید رقم ادا کرنے پر مجبور کیا جا رہا ہے۔

شیخ عثمان نے مزید کہا کہ وزیر اعظم اور وزیر اعلیٰ پنجاب کی سرپرستی کے دعویدار یہ فراڈیے کھلے عام دندناتے پھر رہے ہیں، جبکہ ضلعی اور ڈویژنل انتظامیہ بھی خاموش تماشائی بنی ہوئی ہے۔

انہوں نے حکومت سے مطالبہ کیا کہ ملزمان کے نام ایگزٹ کنٹرول لسٹ میں شامل کیے جائیں، ایف آئی اے اور نیب کے ذریعے تحقیقات کرائی جائیں اور متاثرین کو ان کا حق دلایا جائے۔ بصورت دیگر جماعت اسلامی متاثرین کے ساتھ احتجاجی دھرنوں کی قیادت کرے گی، اور اگر امن و امان کا مسئلہ پیدا ہوا تو اس کی ذمہ داری حکومت اور فراڈ میں ملوث افراد پر ہوگی۔

پیرعادل،باغی ٹی وی(نامہ نگارباسط علی) ڈیرہ غازیخان کی حدود تھانہ دراہمہ ،سبزی منڈی کے قریب واقع ایک برائی کے اڈے کے خلاف کارروائی نہ ہونے اور پولیس کی جانب سے درخواست گم کرنے کے الزامات سامنے آئے ہیں۔

حسکول پمپ کے مالک سیف اللہ خان سوری، اسد خان سوری اور دیگر شہریوں نے مشترکہ درخواست دے کر تھانہ دراہمہ کو آگاہ کیا تھا کہ پمپ کے پیچھے جھونپڑیوں میں فحاشی اور دیگر غیر قانونی سرگرمیاں جاری ہیں۔ انہوں نے خوف ظاہر کیا تھا کہ اس سے جرائم میں اضافہ ہو رہا ہے اور نوجوان نسل تباہ ہو رہی ہے۔

تاہم، دو ہفتے گزر جانے کے بعد بھی پولیس نے کوئی کارروائی نہیں کی۔ جب اسد خان سوری تھانہ پہنچے تو انہیں بتایا گیا کہ ان کی درخواست گم ہو گئی ہے۔ اس پر انہوں نے الزام لگایا کہ پولیس نے جان بوجھ کر درخواست گم کی ہے تاکہ برائی کے اڈے کو بند نہ کروایا جائے۔

اسد خان سوری نے وزیر اعلیٰ پنجاب، آئی جی پنجاب، آر پی او اور ڈی پی او ڈیرہ غازی خان سے اپیل کی ہے کہ وہ اس معاملے میں مداخلت کریں اور پولیس کے خلاف قانونی کارروائی کریں۔

دوسری طرف صحافی برادری نے بھی اس معاملے پر تشویش کا اظہار کیا ہے۔ اسد خان سوری اور دیگر شہریوں نے بتایا ہے کہ وہ صحافی برادری کے ساتھ مل کر ڈی پی او ڈیرہ غازی خان کے سامنے اپنی درخواست پیش کریں گے اور انصاف کا مطالبہ کریں گے۔