Category: ڈیرہ غازی خان

ڈیرہ غازی خان،باغی ٹی وی(سٹی رپورٹرجواداکبر) میونسپل کارپوریشن کے ایم او آئی محمد شفیق کی جانب سے ملازمین کو تنگ کرنے اور گالیاں دینے کی شکایات، افسران بالا سے فوری کارروائی کا مطالبہ

تفصیل کے مطابق میونسپل کارپوریشن ڈیرہ غازیخان کے ایم او آئی محمد شفیق کا ملازمین کے ساتھ ناروا سلوک اور گالیاں دینے کا سلسلہ شدت اختیار کرگیا ہے جس سے ملازمین میں شدید غم و غصہ پایا جاتا ہے۔ محمد شفیق جو ضلع کونسل سے ٹرانسفر ہوکر میونسپل کارپوریشن آئے ہیں، روزانہ ملازمین کے ساتھ توہین آمیز رویہ اپناتے ہیں اور اختیارات کا ناجائز استعمال کرتے ہیں۔ اس کرپٹ آفیسر نے لاہورہائیکورٹ ملتان بنچ کے احکامات کے باوجود ملازمین کے کلوز ڈے الاؤنس دبا رکھے ہیں ،جب ملازمین اپنا حق مانگنے جاتے ہیں تو انہیں گالیاں دینا اور ان کی تذلیل کرنا معمول بنا لیا ہے۔

ملازمین نے شکایت کی ہے کہ محمد شفیق کا رویہ غیر مناسب ہے، جس کے باعث ان کا دفتر جانا مشکل ہوگیا ہے۔ علاوہ ازیں اس نےمحمد عامر نامی ٹیوب ویل آپریٹر کواپنافرنٹ مین بنارکھاہے جو تمام معاملات کو سنبھالتا ہے اور دونوں دیر رات گئے تک دفتر میں سرگرم رہتے ہیں جبکہ سائل کام نہ ہونے کی شکایات کس کے پاس لیکر جائیں، ملازمین کے ساتھ رویہ کی وجہ سے ملازمین بھی کام کے سلسلے میں اسکے دفتر جانے سے کتراتے ہیں

شہریوں اور ملازمین نے افسران بالا سے مطالبہ کیا ہے کہ اس افسر کے خلاف فوری کارروائی کی جائے اور اسے کسی دوسری جگہ پر تبدیل کیا جائے۔ جب متعلقہ افسر کے دفتر سے اس سلسلے میں موقف لینے کی کوشش کی گئی تو وہ دفتر سے غائب ہوگئے۔

ڈیرہ غازی خان ،باغی ٹی وی(سٹی رپورٹرجواداکبر) گورنر پنجاب نے ٹیچنگ ہسپتال کے اکاؤنٹنٹ عنایت احمدانی کی اپیل مسترد کردی، پیڈا ایکٹ کے تحت کارروائی کا حکم

تفصیلات کے مطابق گورنر پنجاب نے علامہ اقبال ٹیچنگ ہسپتال کے اکاؤنٹنٹ عنایت احمدانی کی جانب سے محتسب پنجاب کے فیصلے کے خلاف دائر اپیل مسترد کردی۔ گورنر نے حکم دیا ہے کہ اضافی تنخواہوں کی وصولی کے معاملے میں ذمہ دار افراد کے خلاف پیڈا ایکٹ 2006 کے تحت فوری کارروائی کی جائے اور اضافی رقم واپس سرکاری خزانے میں جمع کرائی جائے۔

محتسب پنجاب نے اپنی تحقیقات میں انکشاف کیا تھا کہ ہسپتال کی ایک چارج نرس، جو مسلسل غیر حاضر تھی، تنخواہ وصول کرتی رہی۔ یہ سلسلہ اکاؤنٹنٹ کی ملی بھگت سے جاری رہا، حالانکہ ہسپتال انتظامیہ اور میڈیکل سپرنٹنڈنٹ اس صورتحال سے باخبر تھے۔

محتسب نے حکم دیا تھا کہ میڈیکل سپرنٹنڈنٹ نہ صرف ذمہ دار افراد کی نشاندہی کریں بلکہ ان کے خلاف قانونی کارروائی کرتے ہوئے 30 دن کے اندر تعمیل رپورٹ پیش کریں۔

گورنر نے محتسب کے فیصلے کی توثیق کرتے ہوئے کہا کہ یہ حقائق اور شواہد کی بنیاد پر کیا گیا ہے اور اس میں کسی مداخلت کی ضرورت نہیں۔ اکاؤنٹنٹ عنایت احمدانی کی اپیل کو ناقابل سماعت قرار دے کر مسترد کردیا گیا۔

گورنر نے ہسپتال انتظامیہ کو محتسب کے حکم پر فوری عمل درآمد کا حکم دیا ہے تاکہ انتظامی بدعنوانی کا سدباب کیا جا سکے اور عوامی وسائل کا تحفظ یقینی بنایا جا سکے۔

ڈیرہ غازی خان (سٹی رپورٹر جواد اکبر بھٹی) باغی ٹی وی کی 13ویں سالگرہ کے موقع پر ایک پروقار تقریب منعقد کی گئی جس میں معروف ادبی اور دانشور شخصیت صاحبزادہ رحیم آصف مجددی، ملک محمد ایاز کھوکھر، ایڈوکیٹ انجینئر محمد ندیم لنگاہ، سید صدام گیلانی، شعیب قریشی اور دیگر صحافیوں نے شرکت کی۔

تقریب میں سٹی رپورٹر جواد اکبر بھٹی کے ہمراہ سالگرہ کا کیک کاٹا گیا۔ باغی ٹی وی کی سال بھر کی شاندار کارکردگی کے اعتراف میں جواد اکبر بھٹی کو باغی ٹی وی کی جانب سے سرٹیفکیٹ پیش کیا گیا۔

تقریب سے خطاب کرتے ہوئے صاحبزادہ رحیم آصف مجددی نے باغی ٹی وی کے سی ای او اور معروف اینکر مبشر لقمان، ایڈیٹر ممتاز حیدر اعوان، انچارج نمائندگان ڈاکٹر مصطفیٰ بڈانی اور ان کی پوری ٹیم کو مبارکباد پیش کی۔ انہوں نے کہا کہ باغی ٹی وی نے ہمیشہ عوامی مسائل اجاگر کرنے میں اہم کردار ادا کیا ہے اور صحافت کے میدان میں اپنی الگ پہچان بنائی ہے۔

تقریب کے اختتام پر باغی ٹی وی کی مزید کامیابیوں کے لیے خصوصی دعا کی گئی۔ شرکاء نے باغی ٹی وی کی ٹیم کے عزم اور محنت کو سراہتے ہوئے نیک تمناؤں کا اظہار کیا۔

ڈیرہ غازی خان،باغی ٹی وی (سٹی رپورٹرجواداکبر) ڈسٹرکٹ بار کے سالانہ ڈنر کی پروقار تقریب، وکلاء کو اعزازی شیلڈز دی گئیں

ڈیرہ غازی خان ڈسٹرکٹ بار ایسوسی ایشن کے سالانہ ڈنر کی پروقار تقریب شہر کے فٹبال گراؤنڈ میں منعقد ہوئی، جس میں وکلاء برادری اور معزز مہمانان کی بڑی تعداد نے شرکت کی۔ یہ تقریب، بار کے صدر عارف گورمانی اور جنرل سیکرٹری محمد علی چنڑ کی جانب سے منعقد کی گئی، جس کا مقصد سال بھر کی کامیابیوں اور وعدوں کی تکمیل کو اجاگر کرنا تھا۔

تقریب کا آغاز قرآن مجید کی تلاوت ایڈوکیٹ مفتی قاری طیب حنفی نے کیا، جبکہ نعت رسول مقبول ﷺ ایڈوکیٹ سردار اسلم خان چانڈیہ نے پیش کی۔ سٹیج کی میزبانی کے فرائض جنرل سیکرٹری محمد علی چنڑ نے انجام دیے۔ سال بھر بہترین کارکردگی دکھانے والے وکلاء کو اعزازی شیلڈز سے نوازا گیا۔

تقریب کے مہمانِ خصوصی لاہور ہائی کورٹ کے جسٹس امجد رفیق بھٹہ نے وکلاء برادری کے مسائل حل کرنے کے لیے اپنے تعاون کا وعدہ کیا۔ دیگر معزز مہمانوں میں لاہور ہائی کورٹ ملتان بنچ کے صدر سجاد حیدر میتلا، ڈپٹی کمشنر عثمان خالد، ڈی پی او سید محمد علی، اور پنجاب بار کے اراکین شامل تھے۔

ممبر پنجاب بار ملک محمد اقبال ثاقب نے ڈیرہ غازی خان کے نامور وکلاء کو خراجِ عقیدت پیش کیا، جبکہ صدر بار عارف گورمانی نے مہمانان گرامی اور وکلاء برادری کا شکریہ ادا کیا۔ آخر میں شیخ امجد اقبال نے دعا کروائی۔

تقریب میں شہر اور مضافاتی علاقوں سے سینئر اور جونیئر وکلاء نے بڑی تعداد میں شرکت کی۔ نمایاں شرکاء میں سردار طارق شیر خان لنڈ، سید محمد اظہر ترمزی، بیرسٹر سردار محی الدین کھوسہ، ملک محمد منور ثاقب، اور میاں عامر محمود بھٹی شامل تھے۔ اس موقع پر بار کی کامیابیوں کا جشن منایا گیا اور وکلاء نے آپس میں اپنے تجربات کا تبادلہ کیا۔

ڈیرہ غازیخان،باغی ٹی وی (سٹی رپورٹرجواد اکبر) واٹر فلٹریشن پلانٹ منصوبے میں مبینہ طورپر 25 لاکھ کی کرپشن، شہریوں کا احتجاج

ڈیرہ غازی خان میں چٹ سرکانی چوک پر 35 لاکھ روپے مالیت سے شروع کیا جانے والا واٹر فلٹریشن پلانٹ کا منصوبہ ٹھیکیدار گل حسن لغاری کی مبینہ کرپشن کا شکار ہو گیا۔ اہل علاقہ کا کہنا ہے کہ ٹھیکیدار منصوبے کی عمارت کھڑی کرنے کے بعد تین سال سے غائب ہے اور اب تک 25 لاکھ روپے سے زائد کی کرپشن کی جا چکی ہے۔

واٹر فلٹریشن پلانٹ کے لیے فنڈز محکمہ پبلک ہیلتھ انجینئرنگ ڈیپارٹمنٹ کو دیے گئے تھے، لیکن افسران کی مبینہ ملی بھگت سے یہ منصوبہ لوٹ کھسوٹ کا ذریعہ بن گیا۔ اہل علاقہ کا کہنا ہے کہ ٹھیکیدار گل حسن لغاری نہ صرف منصوبے کو ادھورا چھوڑ کر فرار ہو چکا ہے بلکہ فلٹریشن پلانٹ کے لیے خریدی گئی مشینری اور سولر پلیٹیں اپنے گھر پر نصب کر لی ہیں۔

اہل علاقہ کا کہنا ہے کہ فلٹریشن پلانٹ مکمل نہ ہونے کی وجہ سے وہ زیر زمین کڑوا پانی پینے پر مجبور ہیں، جو صحت کے لیے شدید نقصان دہ ہے۔ علاقے میں پیلا اور کالا یرقان، گردے کی بیماریاں اور دیگر صحت کے مسائل تیزی سے بڑھ رہے ہیں۔ لوگوں نے سیاسی قائدین اور ضلعی انتظامیہ کو کئی بار شکایات کیں، لیکن کوئی کارروائی عمل میں نہ لائی گئی۔

چٹ سرکانی کے عوام نے احتجاج کرتے ہوئے وزیراعلیٰ پنجاب مریم نواز، سیکرٹری پبلک ہیلتھ انجینئرنگ ڈیپارٹمنٹ، چیف انجینئر، وزیر بلدیاتی امور، مقامی ایم پی اے محمود قادر لغاری، وفاقی وزیر پانی و بجلی اویس لغاری اور ڈائریکٹر جنرل اینٹی کرپشن سمیت دیگر اعلیٰ حکام سے فوری کارروائی کا مطالبہ کیا ہے۔

اہل علاقہ نے مطالبہ کیا ہے کہ کرپٹ ٹھیکیدار گل حسن لغاری اور محکمہ پبلک ہیلتھ کے افسران کے خلاف سخت کارروائی کی جائے۔
لوٹی گئی رقم کو ریکور کرکے فلٹریشن پلانٹ کو مکمل کیا جائے۔
اہل علاقہ کو فوری طور پر صاف پانی کی سہولت فراہم کی جائے تاکہ صحت کے مسائل کا خاتمہ ہو سکے۔
فلٹریشن پلانٹ کی نامکمل عمارت عوام کے لیے مایوسی اور کرپشن کی علامت بن چکی ہے۔ اگر اس منصوبے کو مکمل نہ کیا گیا تو عوام کا اعتماد حکومتی اداروں پر مزید کمزور ہو جائے گا۔

ڈیرہ غازی خان،باغی ٹی وی (سٹی رپورٹر جواد اکبر)پاکستان جرنلسٹ ایسوسی ایشن کے ضلعی عہدیداران کے نوٹیفکیشن جاری

تفصیل کے مطابق پاکستان جرنلسٹ ایسوسی ایشن (PJA) ضلع ڈیرہ غازی خان کے ضلعی عہدیداران کے نوٹیفکیشن برائے سال 2025 جاری کر دیے گئے ہیں۔ صدر جنوبی پنجاب شیخ رمضان ندیم کی مشاورت سے مرکزی چیئرمین میاں اشتیاق علی نے ان تقرریوں کی منظوری دی۔

جاری کئے گئے نوٹیفکیشن کے مطابق کوآرڈینیٹر: ڈاکٹر ملک طارق جمعہ،ڈپٹی کوآرڈینیٹر: محمد سلیم چوہان،ضلعی صدر: آصف رزاق،سینئر نائب صدر: ڈاکٹر نواز بھٹہ،نائب صدر: شہزاد خان،نائب صدر: شیخ احتشام زاہد،جنرل سیکرٹری: اسرار احمد،ایڈیشنل سیکرٹری: ڈاکٹر عمران حیدر جعفری،فنانس سیکرٹری: محمد عمران انیس،سیکرٹری اطلاعات: زبیر خان لودھی شامل ہیں

یہ نوٹیفکیشن ضلع ڈیرہ غازی خان میں صحافتی تنظیم کی سرگرمیوں اور تنظیمی معاملات کو مزید فعال بنانے کے لیے جاری کیا گیا ہے۔

ڈیرہ غازی خان،باغی ٹی وی (سٹی رپورٹر جواد اکبر) پروبیشنل ریلیز ایکٹ کے تحت قیدیوں کی رہائی کے لیے اقدامات، اسسٹنٹ ڈائریکٹر پروبیشن کا دورہ

تفصیل کے مطابق اسسٹنٹ ڈائریکٹر پروبیشن اینڈ پیرول شاہد اسماعیل نے پنجاب پروبیشن اینڈ پیرول سروس کے تحت ڈی جی خان سینٹرل جیل کا دورہ کیا۔ دورے کے دوران انہوں نے سپرنٹنڈنٹ جیل سید بابر علی شاہ کے ساتھ اہم ملاقات کی، جس میں اچھے کردار کے حامل قیدیوں کو پروبیشنل ریلیز ایکٹ کے تحت پیرول پر رہا کرنے کے لیے اہل قیدیوں کے انتخاب پر تبادلہ خیال کیا گیا۔

بعد ازاں اسسٹنٹ ڈائریکٹر نے "کھلی کچہری” کا دورہ کیا، جہاں انہوں نے قیدیوں کے مسائل سنے اور ان کی شکایات کا جائزہ لیا۔ مزید برآں، جیل کے اندر قائم یوٹیلیٹی اسٹور کا معائنہ کرتے ہوئے سروس کی فراہمی اور کارکردگی کا بھی جائزہ لیا۔

یہ دورہ قیدیوں کی اصلاح اور معاشرتی بحالی کے اقدامات کو مؤثر بنانے کے لیے جیل انتظامیہ اور پروبیشن سروس کے مابین تعاون کو مزید مستحکم کرنے میں معاون ثابت ہوا۔