Category: ڈیرہ غازی خان

لاہور (باغی ٹی وی انویسٹی گیشن سیل)ڈیرہ غازی خان، ٹیچنگ ہسپتال ،کرپشن کیس تحقیقات کی فائلیں چمک کی وجہ سے گم ہوگئیں

تفصیلات کے مطابق ڈیرہ غازی خان میں قومی احتساب بیورو (نیب) ملتان کی جانب سے ٹیچنگ ہسپتال میں بدعنوانی اور مالی بے ضابطگیوں کے الزامات پر کی گئی تحقیقات ایک بار پھر متعلقہ حکام کی غفلت اور کرپٹ مافیا کی چالاکیوں کی بھینٹ چڑھ گئی۔22 فروری 2024 کو نیب ملتان نے ایک لیٹرنمبر No NABM20211101256069) چیف سیکرٹری پنجاب کو ارسال کیا، جس میں ٹیچنگ ہسپتال و میڈیکل کالج ڈی جی خان میں الیکٹرو میڈیکل آلات کی خریداری کے دوران ہونے والی بے ضابطگیوں کی تفصیلات فراہم کی گئیں۔ نیب نے اپنی رپورٹ مزید کارروائی کے لیے محکمہ صحت پنجاب کو بھیج دی۔

نیب کی تحقیقات کے مطابق لیٹر آف کریڈٹ (ایل سی)کی میچورٹی کے وقت ایکسچینج ریٹ کی تبدیلی کے باعث وینڈرز کو 30 کروڑ روپے زائد ادائیگی کی گئی۔ فرنیچر کی خریداری میں جی ایس ٹی کی کٹوتی نہیں کی گئی، حالانکہ یہ ٹیکس لازمی تھا۔ خریدے گئے آلات کی اصل ماخذ کی تصدیق بھی نہیں کی گئی، جس سے شفافیت پر سوالیہ نشان اٹھتا ہے۔

نیب ملتان کی سفارشات پر پنجاب حکومت کے اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ نے 12 مارچ 2024 کو ایک تحقیقاتی کمیٹی تشکیل دی۔ یہ کمیٹی محکمے کے سینئر افسران پر مشتمل تھی اور اسے سات دن کے اندر اپنی سفارشات پیش کرنے کی ہدایت دی گئی تھی۔
حیران کن طور پر سات دن میں مکمل ہونے والی تحقیقات آج تک منظرِ عام پر نہ آسکیں۔

اطلاعات کے مطابق کرپٹ عناصر نے تحقیقات کو دبانے کی کوشش کی اور متعلقہ فائلیں ہی غائب کر دی گئیں۔ اس عمل نے نہ صرف انصاف کی فراہمی میں رکاوٹ ڈالی بلکہ حکومتی نظام کی شفافیت پر بھی سوال کھڑے کیے۔

عوامی اور سماجی حلقے اس معاملے میں حکومت سے فوری ایکشن لینے کا مطالبہ کر رہے ہیں۔ ان کا کہنا ہے کہ نیب کی کاوشوں کو نظرانداز کرنا عوام کے اعتماد کو ٹھیس پہنچانے کے مترادف ہے۔حکومت اور متعلقہ اداروں کو فوری طور پر اس معاملے کی شفاف تحقیقات کر کے ذمہ داروں کے خلاف کارروائی کرنی چاہیے تاکہ عوام کا اعتماد بحال ہو اور مستقبل میں ایسے واقعات کی روک تھام ممکن ہو۔

ڈیرہ غازی خان (سٹی رپورٹر جواد اکبر)وزیر اعلیٰ پنجاب مریم نواز کی آمد،ہر طرف ناکہ بندی ،عوام کو مشکلات کا سامنا،انتظامیہ ناکا،

وزیر اعلیٰ پنجاب مریم نواز شریف کی شہر آمد کے موقع پر انتظامات کے دوران عوام کو شدید مشکلات کا سامنا کرنا پڑا۔ پاکستان چوک اور دیگر اہم مقامات پر گاڑیوں کی لمبی قطاریں لگ گئیں، جس کی وجہ سے شہریوں کی آمدورفت متاثر ہوئی۔ خاص طور پر بلوچستان جانے والے افراد اور کاروباری لوگ پریشانی کا شکار ہوئے، جب کہ مریض بھی گاڑیوں میں روکے گئے۔

یہ صورتحال اس بات کی عکاسی کرتی ہے کہ وزیر اعلیٰ کی آمد کے دوران عوامی سہولت کے لئے مکمل انتظامات نہ کیے گئے، جس کی وجہ سے شہریوں کو شدید مشکلات کا سامنا کرنا پڑا۔ عوام کا کہنا ہے کہ حکومت کے اعلیٰ عہدیداران کی آمد کے دوران ان کے وعدے پورے نہیں ہوتے اور اس طرح کی ناکہ بندیوں کی وجہ سے ان کی روزمرہ زندگی متاثر ہوتی ہے۔

ڈیرہ غازی خان(باغی ٹی وی رپورٹ) وزیراعلیٰ پنجاب مریم نواز نے کہا ہے کہ ہم 9 مئی والے نہیں، بلکہ 28 مئی والے ہیں، ہم پاکستان کے عزت کے رکھوالے ہیں۔

ڈیرہ غازی خان میں اسکالر شپ پروگرام کی تقریب سے خطاب کرتے ہوئے انہوں نے کہا کہ آج اسکالر شپس کی تقسیم کا آخری دن ہے، بہت جلد لیپ ٹاپس اور ای بائیکس لے کر طلبہ کے پاس آؤں گی تاکہ وہ بہتر سفری سہولیات کے ساتھ تعلیم حاصل کرسکیں۔

انہوں نے کہا کہ مخالفین نے ہمیشہ جھوٹ کا سہارا لیا، مگر عوام کے دلوں میں ہمارے لیے جو محبت ہے، اسے کوئی مٹانہیں سکتا۔ مریم نواز نے یقین دہانی کرائی کہ ہر اسکالر شپ میرٹ پر دی گئی ہے اور کسی قسم کی سفارش پر کوئی اسکالر شپ نہیں دیا گیا۔

انہوں نے طلبہ کو ملک کا مستقبل قرار دیتے ہوئے کہا کہ اگلے چند سالوں میں یہی نوجوان پاکستان کا جھنڈا تھامیں گے اور ملک کی ترقی میں کردار ادا کریں گے۔ وزیراعلیٰ نے مزید کہا کہ اس سال 30 ہزار اسکالر شپس دی جا رہی ہیں، جنہیں اگلے سال 50 ہزار تک بڑھا دیا جائے گا، اور خیبرپختونخوا اور بلوچستان کے طلبہ کے لیے بھی منصوبے زیر غور ہیں۔

تحریک انصاف پر تنقید کرتے ہوئے انہوں نے کہا کہ جنہوں نے بچوں کے ہاتھوں میں لیپ ٹاپ دینے کے بجائے جھوٹ اور پروپیگنڈا کو فروغ دیا، وہ آج نوجوانوں کے مستقبل کے دشمن بنے ہوئے ہیں۔ مریم نواز نے کہا کہ پاکستان ہماری ریڈ لائن ہے، اور ہماری فورسز ہماری حفاظت کے لیے اپنی جانوں کا نذرانہ پیش کرتی ہیں۔

انہوں نے کہا کہ نواز شریف نے ملک میں موٹرویز کا جال بچھا کر عوام کو سہولت فراہم کی، مگر مخالفین صرف تخریب کاری میں مصروف رہے۔ جیلوں میں موجود بچوں کے والدین سے بات کرتے ہوئے انہوں نے کہا کہ نوجوانوں کو کسی کے بہکاوے میں نہیں آنا چاہیے، کیوں کہ ورغلانے والے تو سکون سے بیٹھے ہیں اور نقصان عام لوگوں کا ہو رہا ہے۔

آخر میں انہوں نے کہا کہ ہم 9 مئی والے نہیں، 28 مئی والے ہیں۔ ہم تدریس اور ترقی کی زبان بولتے ہیں اور علم کے علمبردار ہیں، ڈنڈا بردار نہیں۔

ڈیرہ غازیخان (باغی ٹی وی رپورٹ) وزیراعلیٰ پنجاب مریم نواز شریف آج ڈیرہ غازیخان پہنچیں گی۔ دورے کے سلسلے میں شہر بھر میں انتظامات مکمل کر لیے گئے ہیں۔ اہم شاہراہوں اور چوکوں پر استقبالیہ پوسٹرز اور بینرز لگا دیے گئے، جبکہ صفائی ستھرائی کا کام زور و شور سے جاری رہا۔

ذرائع کے مطابق وزیراعلیٰ پنجاب طلباء و طالبات میں لیپ ٹاپ تقسیم کریں گی، جاری ترقیاتی منصوبوں کا جائزہ لیں گی اور مختلف سیاسی وفود سے ملاقات کریں گی۔ استقبال کے لیے اعلیٰ سرکاری افسران، پارلیمنٹرین اور دیگر شخصیات موجود ہوں گی۔ شہر میں سیکیورٹی کے سخت انتظامات کیے گئے ہیں تاکہ دورہ پُرامن اور کامیاب بنایا جا سکے۔

ڈیرہ غازی خان،باغی ٹی وی(سٹی رپورٹرجواداکبر) میونسپل کارپوریشن کے ایم او آئی محمد شفیق کی جانب سے ملازمین کو تنگ کرنے اور گالیاں دینے کی شکایات، افسران بالا سے فوری کارروائی کا مطالبہ

تفصیل کے مطابق میونسپل کارپوریشن ڈیرہ غازیخان کے ایم او آئی محمد شفیق کا ملازمین کے ساتھ ناروا سلوک اور گالیاں دینے کا سلسلہ شدت اختیار کرگیا ہے جس سے ملازمین میں شدید غم و غصہ پایا جاتا ہے۔ محمد شفیق جو ضلع کونسل سے ٹرانسفر ہوکر میونسپل کارپوریشن آئے ہیں، روزانہ ملازمین کے ساتھ توہین آمیز رویہ اپناتے ہیں اور اختیارات کا ناجائز استعمال کرتے ہیں۔ اس کرپٹ آفیسر نے لاہورہائیکورٹ ملتان بنچ کے احکامات کے باوجود ملازمین کے کلوز ڈے الاؤنس دبا رکھے ہیں ،جب ملازمین اپنا حق مانگنے جاتے ہیں تو انہیں گالیاں دینا اور ان کی تذلیل کرنا معمول بنا لیا ہے۔

ملازمین نے شکایت کی ہے کہ محمد شفیق کا رویہ غیر مناسب ہے، جس کے باعث ان کا دفتر جانا مشکل ہوگیا ہے۔ علاوہ ازیں اس نےمحمد عامر نامی ٹیوب ویل آپریٹر کواپنافرنٹ مین بنارکھاہے جو تمام معاملات کو سنبھالتا ہے اور دونوں دیر رات گئے تک دفتر میں سرگرم رہتے ہیں جبکہ سائل کام نہ ہونے کی شکایات کس کے پاس لیکر جائیں، ملازمین کے ساتھ رویہ کی وجہ سے ملازمین بھی کام کے سلسلے میں اسکے دفتر جانے سے کتراتے ہیں

شہریوں اور ملازمین نے افسران بالا سے مطالبہ کیا ہے کہ اس افسر کے خلاف فوری کارروائی کی جائے اور اسے کسی دوسری جگہ پر تبدیل کیا جائے۔ جب متعلقہ افسر کے دفتر سے اس سلسلے میں موقف لینے کی کوشش کی گئی تو وہ دفتر سے غائب ہوگئے۔

ڈیرہ غازی خان ،باغی ٹی وی(سٹی رپورٹرجواداکبر) گورنر پنجاب نے ٹیچنگ ہسپتال کے اکاؤنٹنٹ عنایت احمدانی کی اپیل مسترد کردی، پیڈا ایکٹ کے تحت کارروائی کا حکم

تفصیلات کے مطابق گورنر پنجاب نے علامہ اقبال ٹیچنگ ہسپتال کے اکاؤنٹنٹ عنایت احمدانی کی جانب سے محتسب پنجاب کے فیصلے کے خلاف دائر اپیل مسترد کردی۔ گورنر نے حکم دیا ہے کہ اضافی تنخواہوں کی وصولی کے معاملے میں ذمہ دار افراد کے خلاف پیڈا ایکٹ 2006 کے تحت فوری کارروائی کی جائے اور اضافی رقم واپس سرکاری خزانے میں جمع کرائی جائے۔

محتسب پنجاب نے اپنی تحقیقات میں انکشاف کیا تھا کہ ہسپتال کی ایک چارج نرس، جو مسلسل غیر حاضر تھی، تنخواہ وصول کرتی رہی۔ یہ سلسلہ اکاؤنٹنٹ کی ملی بھگت سے جاری رہا، حالانکہ ہسپتال انتظامیہ اور میڈیکل سپرنٹنڈنٹ اس صورتحال سے باخبر تھے۔

محتسب نے حکم دیا تھا کہ میڈیکل سپرنٹنڈنٹ نہ صرف ذمہ دار افراد کی نشاندہی کریں بلکہ ان کے خلاف قانونی کارروائی کرتے ہوئے 30 دن کے اندر تعمیل رپورٹ پیش کریں۔

گورنر نے محتسب کے فیصلے کی توثیق کرتے ہوئے کہا کہ یہ حقائق اور شواہد کی بنیاد پر کیا گیا ہے اور اس میں کسی مداخلت کی ضرورت نہیں۔ اکاؤنٹنٹ عنایت احمدانی کی اپیل کو ناقابل سماعت قرار دے کر مسترد کردیا گیا۔

گورنر نے ہسپتال انتظامیہ کو محتسب کے حکم پر فوری عمل درآمد کا حکم دیا ہے تاکہ انتظامی بدعنوانی کا سدباب کیا جا سکے اور عوامی وسائل کا تحفظ یقینی بنایا جا سکے۔

ڈیرہ غازی خان (سٹی رپورٹر جواد اکبر بھٹی) باغی ٹی وی کی 13ویں سالگرہ کے موقع پر ایک پروقار تقریب منعقد کی گئی جس میں معروف ادبی اور دانشور شخصیت صاحبزادہ رحیم آصف مجددی، ملک محمد ایاز کھوکھر، ایڈوکیٹ انجینئر محمد ندیم لنگاہ، سید صدام گیلانی، شعیب قریشی اور دیگر صحافیوں نے شرکت کی۔

تقریب میں سٹی رپورٹر جواد اکبر بھٹی کے ہمراہ سالگرہ کا کیک کاٹا گیا۔ باغی ٹی وی کی سال بھر کی شاندار کارکردگی کے اعتراف میں جواد اکبر بھٹی کو باغی ٹی وی کی جانب سے سرٹیفکیٹ پیش کیا گیا۔

تقریب سے خطاب کرتے ہوئے صاحبزادہ رحیم آصف مجددی نے باغی ٹی وی کے سی ای او اور معروف اینکر مبشر لقمان، ایڈیٹر ممتاز حیدر اعوان، انچارج نمائندگان ڈاکٹر مصطفیٰ بڈانی اور ان کی پوری ٹیم کو مبارکباد پیش کی۔ انہوں نے کہا کہ باغی ٹی وی نے ہمیشہ عوامی مسائل اجاگر کرنے میں اہم کردار ادا کیا ہے اور صحافت کے میدان میں اپنی الگ پہچان بنائی ہے۔

تقریب کے اختتام پر باغی ٹی وی کی مزید کامیابیوں کے لیے خصوصی دعا کی گئی۔ شرکاء نے باغی ٹی وی کی ٹیم کے عزم اور محنت کو سراہتے ہوئے نیک تمناؤں کا اظہار کیا۔