Category: ڈیرہ غازی خان

ڈیرہ غازی خان (باغی ٹی وی رپورٹ): ڈیرہ غازی خان انتظامیہ، پنجاب کونسل آف دی آرٹس اور محکمہ تعلیم کے زیر اہتمام یوم دفاع کی ایک شاندار تقریب آرٹس کونسل میں منعقد ہوئی۔ ضلع کی اس مرکزی تقریب میں ڈپٹی کمشنر مہر شاہد زمان لک مہمان خصوصی کے طور پر تشریف لائے۔

تقریب میں شہداء و غازیوں کو خراج تحسین پیش کیا گیا اور پاک افواج کے ساتھ بھرپور یکجہتی کا اظہار کیا گیا۔ سکولوں کے طلبا و طالبات نے مختلف ٹیبلوز کے ذریعے دفاع وطن کی بھرپور عکاسی کی۔

ڈپٹی کمشنر مہر شاہد زمان لک نے خطاب کرتے ہوئے کہا کہ پاکستان کا دفاع ناقابل تسخیر ہے۔ پوری قوم اپنی افواج کے شانہ بشانہ کھڑی ہے۔ 1965 کی جنگ میں ہمارے دلیر جوانوں نے دشمن کو منہ توڑ جواب دیا تھا۔ پاک افواج آہنی دیوار کی مانند ہیں، جسے کوئی پار نہیں کر سکتا۔

انہوں نے مزید کہا کہ ہمارے ادارے اور قوم مضبوط ہونگے تو ہمیں کوئی نقصان نہیں پہنچا سکتا۔ جدید دور میں ہمیں کئی چیلنجز کا سامنا ہے، جس کے لیے ہمیں اتفاق کی اشد ضرورت ہے۔ ڈیرہ غازی خان کی عوام اپنے اداروں اور پوری قوم کے ساتھ ہے۔ ہمیں اپنی نئی نسل کو ملک کے بیرونی اور اندرونی دشمنوں کی پہچان کرانے کی ضرورت ہے۔ ایمان، اتحاد اور تنظیم کی طاقت سے ہم نے اپنے دفاع کو مضبوط تر کرنا ہے۔

ڈپٹی کمشنر نے آرٹ گیلری میں 6 ستمبر کے حوالے سے ایک شاندار تصویری نمائش کا افتتاح بھی کیا۔

اس تقریب میں اے ڈی سی غلام مصطفیٰ سیہڑ، پولیٹیکل اسسٹنٹ محمد اسد چانڈیہ، اسسٹنٹ کمشنر تیمور عثمان، ڈائریکٹر آرٹس کونسل نعیم اللہ طفیل، سی ای او ریاض خان سمیت اساتذہ، طلبا و طالبات کی کثیر تعداد میں موجود تھی۔

یوم دفاع کی تقریب میں مختلف سکولوں کے بچوں نے تقاریر، ٹیبلوز اور ملی نغمے پیش کرکے سامعین کو مسحور کر دیا۔ گورنمنٹ گرلز سکول نمبرون، گورنمنٹ گرلز ماڈل سکول، دانش سکول، گورنمنٹ گرلز سکول ملا قائد شاہ جدید اور قدیم، ایسپائر کالج، گورنمنٹ گرلز سٹی سکول اور سنٹرل ماڈل سکول کے بچوں کی پرفارمنس قابل دید تھی۔

ڈیرہ غازیخان (باغی ٹی وی رپورٹ)مریم نواز نے اپنا گھر اپنی چھت پروگرام کی پہلی قرعہ اندازی کر دی

وزیر اعلیٰ پنجاب مریم نواز شریف نے اپنا گھر اپنی چھت پروگرام کی پہلی قرعہ اندازی کر دی ہے۔ انہوں نے کہا کہ اس پروگرام کے تحت بلاسود 15 لاکھ روپے کا قرضہ دیا جائے گا جسے 7 سال میں آسان اقساط میں ادا کیا جا سکتا ہے۔ ہر ماہ صرف 14 ہزار روپے کی قسط ادا کرنی ہوگی۔

مریم نواز نے مزید کہا کہ یہ اپنی نوعیت کی پہلی اسکیم ہے جس کا مقصد ان لوگوں کی مدد کرنا ہے جن کے پاس چھوٹا سا زمین کا ٹکڑا ہے لیکن گھر بنانے کے لیے ان کے پاس کافی پیسے نہیں ہیں۔

انہوں نے قرعہ اندازی میں نام نکالنے والوں کو مبارکباد دی اور بتایا کہ پورے پنجاب میں یہ قرعہ اندازی کا عمل شروع ہو چکا ہے۔ انہوں نے ڈیرہ غازی خان میں بیلیٹنگ کا آغاز بھی کیا۔

ڈیرہ غازی خان (باغی ٹی وی رپورٹ) وزیراعلیٰ پنجاب مریم نواز شریف نے ڈیرہ غازی خان کے گورنمنٹ پرائمری سکول ایم سی1 کا دورہ کیا اور پنجاب میں ملک کے پہلے اور سب سے بڑے سکول نیوٹریشن پروگرام کا افتتاح کیا۔ اس موقع پر، وزیراعلیٰ نے سکول کے ہر کلاس روم میں جا کر بچوں کو دودھ کے پیکٹ خود دیے اور ان کی نگرانی کی۔

مریم نواز شریف نے بچوں کے نام پوچھے اور ان کی تعریف کی۔ وہ سکول کے طلبہ کے درمیان جا کر بیٹھ گئیں اور ان کی صحت اور تعلیم کے بارے میں دریافت کیا، خاص طور پر پڑھائی میں درپیش مسائل کے بارے میں پوچھا۔ ایک اداس طالب علم نے اپنے والد کی بے روزگاری کا ذکر کیا، جس پر وزیراعلیٰ نے طالب علم کے والد کو روزگار فراہم کرنے کی ہدایت کی۔

صوبائی وزیر تعلیم رانا سکندر حیات نے اس موقع پر بریفنگ دیتے ہوئے کہا کہ "چیف منسٹر سکول نیوٹریشن پروگرام” کا پائلٹ پروجیکٹ جنوبی پنجاب کے تین اضلاع ڈیرہ غازی خان، راجن پور، اور مظفر گڑھ سے شروع کیا گیا ہے۔ اس پروگرام کے تحت غذائی قلت کے شکار 4 لاکھ سے زائد طلبہ کو روزانہ 175 ملی لیٹر دودھ کا پیک فراہم کیا جائے گا۔ بچے دودھ کے خالی پیکٹ سکول میں جمع کرائیں گے، جن کی ری سائیکلنگ سے حاصل شدہ آمدن متعلقہ سکول پر ہی خرچ کی جائے گی۔

وزیراعلیٰ مریم نواز شریف نے اس موقع پر طلبہ کے ساتھ تصاویر بنوائیں اور آٹوگراف دیے۔ تقریب میں صوبائی وزیر تعلیم رانا سکندر حیات نے بھی خطاب کیا۔

وزیراعلیٰ کی کمشنر آفس آمد پر باڈر ملٹری پولیس کے چاق و چوبند دستے نے سلامی دی۔ اس موقع پر سینئر منسٹر مریم اورنگزیب، صوبائی وزیر اطلاعات و ثقافت عظمیٰ زاہد بخاری، ایم پی اے حنیف پتافی، ثانیہ عاشق، نوشین عدنان، شیر علی گورچانی، معاون خصوصی ذیشان ملک، چیف سیکرٹری زاہد اختر زمان، سیکرٹری سکولز، کمشنر ڈاکٹر ناصر محمود بشیر، آر پی او سجاد حسن خان اور دیگر حکام بھی موجود تھے۔

ڈیرہ غازی خان،باغی ٹی وی (سٹی رپورٹرجواداکبر): بورڈ آف انٹرمیڈیٹ اینڈ سیکنڈری ایجوکیشن ڈیرہ غازی خان نے انٹرمیڈیٹ پارٹ-II اور کمبائنڈ کے نتائج کا اعلان کی تاریخ کا اعلان کر دیا ہے۔ کنٹرولر امتحانات مظفر حسین نے بتایا کہ پنجاب بھر کی طرح ڈیرہ غازی خان بورڈ بھی 4 ستمبر کو انٹرمیڈیٹ کے نتائج کا اعلان کرے گا۔

انہوں نے مزید بتایا کہ پنجاب بورڈز کی کمیٹی آف چیئرمین کا ایک اجلاس منعقد ہوا جس میں انٹرمیڈیٹ کے نتائج کا شیڈول مرتب کیا گیا۔ اس کے مطابق پوزیشن ہولڈرز کی تفصیلات آج شام 4 بجے جاری کی جائیں گی۔

کنٹرولر امتحانات نے یہ بھی بتایا کہ میٹرک کے دوسرے سالانہ امتحان 2024 کو پر امن اور شفاف بنانے کے لیے ایک لائحہ عمل بھی تیار کیا گیا ہے۔

طلبہ اپنے نتائج بورڈ کی ویب سائیٹ www.bisedgkhan.edu.pk پر جا کر دیکھ سکتے ہیں۔ کسی بھی قسم کی پریشانی یا معلومات کے لیے بورڈ کی متعلقہ برانچ سے رابطہ کر سکتے ہیں۔

ڈیرہ غازی خان (باغی ٹی وی ،سٹاف رپورٹر) شہر میں آج ون لنک سسٹم میں خرابی کی وجہ سے شہریوں کو بینکوں سے رقم نکالنے میں شدید مشکلات کا سامنا رہا۔ متعدد شہریوں نے بتایا کہ وہ جب اپنے بینک کے اے ٹی ایم پر گئے تو مشین نے ان کے کارڈ قبول کرنے سے انکار کردیا اور سکرین پر خرابی کا پیغام آگیا۔

ایک شہری نے بتایا کہ جب اس نے بنک کے عملے سے اس بارے میں پوچھا تو انہوں نے بتایا کہ ون لنک کا سسٹم ڈاؤن ہے۔ اسی طرح شہر کی ایک اور برانچ میں بھی اے ٹی ایم کا دروازہ بند پایا گیا اور عملے نے بھی اسی طرح کا جواب دیا۔

دوسری جانب، ون لنک کے حکام کا کہنا ہے کہ کچھ بینکوں کے ساتھ کنکٹیویٹی کا مسئلہ ہے اور وہ اسے حل کرنے کی کوشش کر رہے ہیں۔

شہریوں نے سوشل میڈیا پر بھی اپنی شکایات کا اظہار کیا ہے اور بتایا ہے کہ وہ آن لائن پیمنٹ اور رقم کی منتقلی میں بھی مشکلات کا سامنا کر رہے ہیں۔

پیر عادل (باغی ٹی وی،نامہ نگار باسط علی) بنیادی مرکز صحت میں آج پولیو آگاہی سیمینار کا انعقاد کیا گیا۔ اس سیمینار میں پیر عادل میں کام کرنے والے تمام ہیلتھ ممبران نے شرکت کی۔

یو سی ایم او ڈاکٹر ملک اعجاز نے سیمینار کی صدارت کی اور پولیو مہم کی کامیابی کے لیے ہیلتھ ممبران کے تعاون کی اہمیت پر زور دیا۔ سیمینار میں موجودہ پولیو کی صورتحال پر تفصیلی گفتگو کی گئی اور ہیلتھ ممبران سے اپیل کی گئی کہ وہ پولیو کے خاتمے کے لیے 9 ستمبر سے شروع ہونے والی پولیو مہم کو کامیاب بنانے میں اپنا کردار ادا کریں۔

تمام ہیلتھ ممبران نے عہد کیا کہ وہ پولیو مہم کے پیغام کی ترسیل میں تعاون کریں گے اور علاقائی سطح پر آگاہی سرگرمیوں میں حصہ لیں گے۔ آخر میں، یو سی ایم او ڈاکٹر ملک اعجاز نے علاقے کی خدمت کرنے پر تمام ممبران کا شکریہ ادا کیا۔