Category: ڈیرہ غازی خان

ڈیرہ غازیخان (باغی ٹی وی ،سٹی رپورٹرجواداکبر)4 ماہ سے پریس کلب سیل، صحافیوں پر جھوٹے مقدمات، ظلم کا سلسلہ جاری

تفصیل کے مطابق ڈیرہ غازی خان پریس کلب کے صدر، شیر افگن بزدار نے کہا ہے کہ ضلع میں صحافیوں کو سنگین حالات کا سامنا ہے، جہاں ضلعی پریس کلب گزشتہ چار ماہ سے سیل ہے اور ورکنگ جرنلسٹس کو جھوٹے مقدمات اور دھمکیوں کا سامنا کرنا پڑ رہا ہے۔ انہوں نے یہ بات ہفتہ کو ٹرسٹ فار ڈیموکریٹک ایجوکیشن اینڈ اکاؤنٹبیلیٹی (ٹی ڈی ای اے) کے تعاون سے ہونے والی ایک اہم نشست میں کہی، جس کا مقصد صحافیوں کی حفاظت اور حقوق کے حوالے سے درپیش مسائل پر بات چیت کرنا تھا۔

شیر افگن بزدار نے کہا کہ صحافیوں کے پاس ڈائیلاگ اور پیشہ ورانہ تبادلہ خیال کے لیے پریس کلب کا پلیٹ فارم ہوتا ہے، لیکن اس کے تقدس کو پامال کیا گیا ہے، اور صحافیوں کو ریاست مخالف الزامات کے تحت مقدمات میں پھنسایا گیا، گرفتار کیا گیا اور ان پر تشدد کیا گیا۔

انہوں نے مزید کہا کہ صحافیوں کو نہ صرف یہ کہ سرکاری اداروں کی طرف سے دباؤ کا سامنا ہے بلکہ میڈیا ہاؤسز بھی صحافیوں کو کوئی تنخواہ یا اعزازیہ نہیں دیتے، جس سے ان کی مشکلات میں مزید اضافہ ہو رہا ہے۔ "صحافی مار کھاتے ہیں، جیل جاتے ہیں، لیکن کوئی ادارہ یا تنظیم ان کی مدد کے لیے آواز نہیں اٹھاتی،” انہوں نے افسوس کا اظہار کیا۔

نشست کے دوران سوال و جواب کے سیشن میں سینئر صحافی سید ریاض نے حکومت اور صحافتی اداروں کے درمیان بہتر رابطے نہ ہونے کو صحافیوں کی مشکلات کی بنیادی وجہ قرار دیا۔

سینئر صحافی بشیر احمد چوہان نے کہا کہ صحافیوں کی آپس کی تقسیم کی ایک بڑی وجہ ان کی سیاسی وابستگیاں یا کاروباری مفادات ہیں، جو ان کے اتحاد کو متاثر کرتے ہیں۔

ایک اور صحافی نے کہا کہ علاقائی صحافیوں کی حفاظت کے لیے قانون سازی کی ضرورت ہے اور ریجنل سطح پر ایک نیٹ ورک بنانے کی تجویز دی تاکہ ہر علاقے کے صحافیوں کی نمائندگی ہو اور ان کے مسائل کو مقامی سطح پر ہی حل کیا جا سکے۔

اس تقریب کا انعقاد ٹی ڈی ای اے کے سیف میڈیا پروگرام کا حصہ تھا، جس کا مقصد مقامی پریس کلبز اور صحافی یونینز کے تعاون سے صحافیوں کی پیشہ ورانہ صلاحیتوں کو بہتر بنانا اور ان کی سکیورٹی و پروٹیکشن کے مسائل کو حل کرنا ہے۔ اس پروگرام کے تحت صحافیوں کی اجتماعی ایڈووکیسی کو مضبوط بنانے اور انہیں بااختیار بنانے کے لیے سیمینار، ورکشاپس، اور کانفرنسز منعقد کی جائیں گی۔

تقریب میں پاکستان فیڈرل یونین آف جرنلسٹس (PFUJ) کے سینئر رہنما ناصر زیدی نے صحافیوں کے تحفظ کے حوالے سے حکومتی اقدامات اور ٹی ڈی ای اے کے کردار کو سراہا، اور زور دیا کہ تمام صحافتی تنظیموں کو مل کر اس مقصد کے لیے ایک مشترکہ حکمت عملی تیار کرنی ہوگی۔

ڈیرہ غازی خان (باغی ٹی وی،سٹی رپورٹرجواد اکبر) کمانڈر بارڈر ملٹری پولیس، اسد خان چانڈیہ نے جرائم پیشہ افراد کے لیے سخت پیغام جاری کرتے ہوئے کہا ہے کہ وہ ٹرائبل ایریا میں مقیم عوام اور سیاحوں کو امن و امان کے حوالے سے پریشان کرنا فوراً بند کریں۔ انہوں نے خبردار کیا کہ اگر کوئی شخص ٹرائبل ایریا کے کسی بھی تھانے کی حدود میں چوری، ڈکیتی یا دیگر جرائم میں ملوث پایا گیا تو اس کو گرفتار کر کے سخت سزا دی جائے گی۔

کمانڈر اسد خان چانڈیہ نے مزید کہا کہ تھانہ لوپھانی دف کی حدود میں کسی دوکاندار یا شہری کی چوری کی صورت میں فوری طور پر متعلقہ تھانے میں ایف آئی آر درج کروائی جائے۔ اگر کوئی بارڈر ملٹری پولیس افسر تعاون نہیں کرتا، تو براہ راست مجھ سے رابطہ کریں، ہم چوروں، ان کے سہولت کاروں اور غیر فعال پولیس اہلکاروں کے خلاف سخت کارروائی کریں گے۔

انہوں نے مزید کہا کہ ٹرائبل ایریا کے شہریوں کے جان و مال کا تحفظ بارڈر ملٹری پولیس کی اولین ترجیح ہے اور علاقے میں امن و امان برقرار رکھنا ہماری ذمہ داری ہے۔ کسی کو بھی ٹرائبل ایریا کا امن بگاڑنے کی اجازت نہیں دی جائے گی۔

کمانڈر چانڈیہ نے شہریوں کو ہدایت دی کہ وہ اپنے اردگرد مشکوک افراد پر نظر رکھیں اور کسی بھی مشکوک سرگرمی کی اطلاع فوری طور پر متعلقہ حکام کو دیں تاکہ جرائم پیشہ عناصر کے خلاف بروقت کارروائی کی جا سکے۔

آخر میں انہوں نے متاثرہ شہریوں کو یقین دلایا کہ جن کا کوئی نقصان ہوا ہے وہ فوری طور پر تھانے میں رپورٹ درج کروائیں، چوروں کو پکڑ کر ان سے ریکوری کروائی جائے گی اور شہریوں کو انصاف فراہم کیا جائے گا۔

ڈیرہ غازیخان (باغی ٹی وی رپورٹ) ٹریفک پولیس نے نیند کی گولیاں کھالیں، شہریوں کی زندگی داؤ پر،سنگم چوک پر ہر روز موت کا رقص

تفصیل کے مطابق ڈیرہ غازیخان شہر کا معروف سنگم چوک جو چاروں صوبوں کو ملانے والا اہم ترین مقام ہے، روزانہ ہزاروں گاڑیوں کی آمد و رفت کا مرکز ہے۔ تاہم ٹریفک انتظامیہ کی مجرمانہ غفلت، ٹریفک سگنل کی عدم موجودگی اور ناقص قانون نافذ کرنے کی وجہ سے یہاں کی صورتحال بدترین ہوتی جا رہی ہے۔ ہر روز یہاں حادثات میں خطرناک اضافہ دیکھنے میں آ رہا ہے، جس کی بنیادی وجہ ٹریفک پولیس کا غیر سنجیدہ رویہ اور اپنی ذمہ داریوں سے چشم پوشی ہے۔

شہریوں کا کہنا ہے کہ سنگم چوک پر نہ تو ٹریفک قوانین کی پاسداری کی جاتی ہے اور نہ ہی ٹریفک اہلکاروں کی طرف سے کسی قسم کی سختی نظر آتی ہے۔ جو اہلکار یہاں تعینات ہیں وہ صرف ذاتی مفاد میں اپنی دیہاڑی بنانے میں مصروف رہتے ہیں اور عوام کی جان و مال کی کسی کو پروا نہیں۔

اطلاعات کے مطابق کچھ اہلکار بلوچستان اورسخی سرور سے آنے والے ٹرکوں کو روک کر مبینہ طور پر رشوت وصول کرتے ہیں اور ٹریفک کی بہتری کے لیے کوئی کردار ادا نہیں کرتے۔ ایسے میں سنگم چوک پر ٹریفک کا نظام درہم برہم ہے اور شہریوں کو شدید مشکلات کا سامنا ہے۔

ماضی میں ڈی ایس پی بخت النصر کا دور میں ڈیرہ غازیخان کی عوام کیلئے کافی بہتر تھا وہ خود بند کمر ے میں بیٹھنے کی بجائے فیلڈ میں نکل کر اپنی ڈیوٹی کرتے تھے۔ ان کی سختی اور نظم و ضبط کے باعث ٹریفک کا نظام بہتر تھا، مگر ان کے تبادلے کے بعد سے صورتحال بگڑ گئی ہے۔ موجودہ ٹریفک افسران اے سی کمروں تک محدود ہو کر رہ گئے ہیں، اور اہلکار اپنے فرائض سے غفلت برتتے ہوئے لوٹ مار میں مصروف ہیں۔

شہریوں کی جانب سے اعلیٰ حکام کمشنر، ڈپٹی کمشنر، آر پی او، اور ڈی پی او سے بھرپور مطالبہ کیا جا رہا ہے کہ وہ ٹریفک پولیس کے ناقص انتظامات پر فوری توجہ دیں۔ عوام کا کہنا ہے کہ شہر کے ہر چوک پر جدید ٹریفک سگنلز نصب کیے جائیں تاکہ بے ہنگم ٹریفک کو قابو کیا جا سکے۔ ٹریفک اہلکاروں کو بھی ملٹری پولیس کی طرح چوک کے وسط میں کھڑے ہو کر ٹریفک کنٹرول کرنے کی ہدایت دی جائے، اور جو اہلکار اپنی ڈیوٹی میں کوتاہی برتیں انہیں فوری طور پر معطل کیا جائے۔

اس کے علاوہ شہریوں کا یہ بھی مطالبہ ہے کہ ٹریفک پولیس کے فرائض کی نگرانی کے لیے ایک آزاد انکوائری کمیٹی تشکیل دی جائے، تاکہ کرپشن اور نااہلی کے خلاف موثر کارروائی کی جا سکے۔ شہر میں ٹریفک کا نظام بہتر بنانے کے لیے ضروری ہے کہ اہلکاروں کی سخت نگرانی کی جائے اور جو اہلکار اپنی ذمہ داریاں پوری نہ کریں انہیں نوکری سے برطرف کیا جائے۔

شہر میں گاڑیوں کی تعداد میں روزانہ اضافہ ہو رہا ہے، اور اگر فوری اقدامات نہ کیے گئے تو حادثات میں مزید اضافہ ہو سکتا ہے۔ عوام کا مطالبہ ہے کہ ٹریفک پولیس کے نظام میں اصلاحات کی جائیں تاکہ شہریوں کی زندگیوں کو محفوظ بنایا جا سکے۔

ڈیرہ غازیخان (باغی ٹی وی نیوزرپورٹرشاہدخان )کمشنر ڈی جی خان ڈاکٹر ناصر محمود بشیر نے بینظیر انکم سپورٹ پروگرام کی رقوم کی تقسیم میں بدانتظامی کا نوٹس لیتے ہوئے ڈویژن کے اضلاع کے ڈپٹی کمشنرز کو انتظامات کو یقینی بنانے کا حکم دیا ہے۔ انہوں نے بدانتظامی کی صورت میں متعلقہ سنٹرز پر آپریشن روکنے کی ہدایات بھی جاری کیں۔

ویڈیو لنک اجلاس کی صدارت کرتے ہوئے، ڈاکٹر ناصر محمود بشیر نے کہا کہ رقوم کی تقسیم میں شفافیت کو ہر صورت میں یقینی بنایا جائے۔ انہوں نے بینک انتظامیہ کو ہدایت کی کہ رقوم کی تقسیم کے دوران انتظامات کو مکمل طور پر یقینی بنائیں اور سنٹرز پر موجود مشینیں اور ڈیوائسز مکمل طور پر فعال ہونی چاہئیں۔

یہ خبر بھی پڑھیں
مظفرگڑھ: بے نظیر انکم سپورٹ سینٹر میں بھگدڑ، 50 سالہ خاتون جاں بحق

کمشنر نے مزید کہا کہ سنٹرز پر بنیادی سہولیات فراہم کرنا بینک انتظامیہ کی اولین ترجیح ہونی چاہیے، اور صرف سو فیصد سہولیات دینے والے سنٹرز کو ہی فعال رکھا جائے گا۔ انہوں نے تاکید کی کہ ڈپٹی کمشنرز اور اسسٹنٹ کمشنرز سنٹرز پر سہولیات کی خود پڑتال کریں تاکہ عوامی خدمات میں کسی قسم کی بدنامی نہ ہو۔

اجلاس میں ڈویژن بھر کے ڈپٹی کمشنرز اور اسسٹنٹ کمشنرز بھی موجود تھے۔

ڈیرہ غازیخان(باغی ٹی وی ،نامہ نگار)چوٹی زیریں میں امام مسجدبچوں سے زیادتی کے الزام میں گرفتار

تفصیلات کے مطابق ڈیرہ غازیخان کے علاقہ چوٹی زیریں میں ایک دل دہلا دینے والا واقعہ رونما ہوا ہے جس میں بستی جام کے ایک امام مسجد پر تین کم عمر بچوں سے جنسی زیادتی کا الزام لگا ہے۔پولیس نے امام مسجدکوگرفتارکرکے مقدمہ درج کرلیا،

مدعی محمد یوسف ولد عبد العزیز قوم گاذر سکنہ بستی جام ڈی جی خان کے بیان کے مطابق پکوان کا کام کرتا ہوں۔ ہمارے قریب مسجد بلال میں محمد ارسلان ولد محمد اقبال قوم راناسکنہ جلوسہو جتوئی امام مسجد ہے۔ اور تدریس قرآن مجید بچوں کو دیتا ہے۔ امروز قریب 7.1/2 بجے شام میں معہ میسم عباس ولد غلام شبیر، محمد رمضان ولد غلام محمد اقوام گازر سکنائے بستی جام گھرمیں موجود تھے کہ محمد حسن برادرم ، محمد زمان ولد محمد رمضان ،رحمت اللہ ولد ارشاد حسین چچازادبھائی آگئے۔ اور رونے لگے وجہ پوچھی تو محمد حسن برادرم نے بتلایا کہ امام مسجد ارسلان نے میرے ساتھ بد فعلی کی ہے۔ اب بھی مجبور کر رہا ہے ۔

محمد زمان نے بتلایا کہ اس سے قبل مجھ بدفعلی کی ہے۔ اب مجبور کر رہا ہے۔ رحمت اللہ نے بتلایا کہ صبح میں اسے ناشتہ دینے گیا تو اس نے مجھ سے فعل وضع خلاف فطری کیا۔ امروز میں نے 15 پر کال کی آپ آگئے ہیں۔ وکٹم حسن ، زمان ، رحمت اللہ موجود ہیں۔ گواہان بھی موجودہیں بیان دیتا ہوں۔ میری قانونی کاروائی فرمائی جاوے,پولیس مقدمہ نمبر 502/24 زیر دفعہ 376iii ت پ درج کرکے ملزم کوگرفتار کرلیا ہے

اس واقعے نے علاقے میں شدید غم و غصہ پیدا کر دیا ہے۔

ڈیرہ غازی خان(باغی ٹی وی سٹی رپورٹ جواداکبر) تھانہ سٹی کے علاقے میں نامعلوم افراد کی فائرنگ سے ایک شخص جانبحق

ڈیرہ غازی خان کے علاقے تھانہ سٹی میں نامعلوم افراد کی فائرنگ سے ایک شخص ہلاک ہوگیا۔ پولیس کو اطلاع ملی کہ فورا چوک کے قریب ایک شخص کو فائرنگ کر کے قتل کر دیا گیا ہے۔

پولیس نے فوری طور پر موقع پر پہنچ کر قانونی کارروائی شروع کر دی۔ ہلاک ہونے والے شخص کی شناخت محمد یعقوب ولد اللہ ڈتہ قوم چکرانی جیانی لادی سکنہ درہ کشوبہ کے نام سے ہوئی۔

پولیس نے PFSA کرائم سین یونٹ کو بھی طلب کیا، جس نے موقع پر تحقیقات کا آغاز کر دیا۔ مقتول کی نعش کو پوسٹ مارٹم کے لیے ہسپتال منتقل کر دیا گیا ہے۔ پولیس نے واقعے کی تحقیقات شروع کر دی ہیں تاکہ ملزمان کا پتہ لگایا جا سکے۔

دراہمہ(باغی ٹی وی نامہ نگارمحمدعلی) انچارج چیک پوسٹ غازی گھاٹ محمد ایوب خان نیازی کی قیادت میں سمنگلروں کے خلاف سخت کارروائیاں جاری ہیں۔ ڈی پی او سید علی کی ہدایت پر کی جانے والی ان کارروائیوں کے نتیجے میں کئی ملین روپے مالیت کی نان کسٹم پیڈ اشیاء قبضے میں لی گئی ہیں۔

ڈیرہ غازی خان میں انچارج چیک پوسٹ غازی گھاٹ، محمد ایوب خان نیازی، کی قیادت میں سمنگلروں کے خلاف بلاخوف و خطر کارروائیاں جاری ہیں۔ ڈی پی او سید علی کی ہدایت پر عمل کرتے ہوئے، نیازی اور ان کی ٹیم نے حالیہ دنوں میں کئی اہم کامیابیاں حاصل کی ہیں، جس میں متعدد ملین روپے مالیت کی نان کسٹم پیڈ اشیاء کو ضبط کیا گیا۔

تفصیلات کے مطابق، رواں ہفتے کے دوران، نیازی نے اپنی ٹیم کے ساتھ ایک لوڈر رکشہ کو روکا جس میں چائنیز نمک کے 17 بیگ موجود تھے۔ یہ بیگ 4 لاکھ 25 ہزار روپے کی مالیت کے تھے اور رکشہ کو محمد شعیب نامی نوجوان چلا رہا تھا جو کہ کیبر والا سے تعلق رکھتا ہے۔

اسی دوران ایک اور کارروائی میں بس نمبر KUT 1788 سے 3 لاکھ 60 ہزار روپے مالیت کے ٹائر بھی برآمد کیے گئے۔ اس کے علاوہ، 3 لاکھ روپے مالیت کے سولر پمپ بھی قبضے میں لیے گئے ہیں۔ مزید برآں، نان کسٹم سگریٹ پلاٹینم کی 57 ہزار روپے مالیت کی کھیپ بھی ضبط کی گئی۔

محمد ایوب خان نیازی نے بتایا کہ چیکنگ کے نظام کو مزید سخت بنایا جا رہا ہے کہ ہم کسی بھی قسم کی سمگلنگ کی اجازت نہیں دیں گے اور آئندہ بھی سمنگلروں کے خلاف کارروائیاں جاری رہیں گی۔” انہوں نے یہ بھی واضح کیا کہ ان کی تعیناتی کے دوران سمگلر یہ سوچ بھی نہیں سکتے کہ وہ اپنے مال کو یہاں سے کامیابی کے ساتھ گزار سکتے ہیں۔

نیازی نے اس عزم کا اظہار کیا کہ ان کی ٹیم سختی سے چیکنگ کے نظام کو اپنائے گی اور کسی بھی مشکوک سرگرمی پر فوری کارروائی کی جائے گی۔ منی کوسٹر نمبر LXP 3362 سے 10 ٹوکرے بیٹرے بھی پکڑ کر متعلقہ محکموں کے حوالے کیے گئے ہیں، جس سے سمگلروں کے نیٹ ورک کو مزید کمزور کرنے میں مدد ملے گی۔

حکام نے شہریوں سے بھی اپیل کی ہے کہ وہ کسی بھی مشکوک سرگرمی کی اطلاع فوری طور پر متعلقہ اداروں کو دیں تاکہ علاقے میں قانون کی پاسداری کو یقینی بنایا جا سکے۔

ڈیرہ غازی خان(باغی ٹی وی رپورٹ)پنجاب اور بلوچستان کوملانے والی قومی شاہراہ ٹرک الٹنے سے بند

تفصیل کے مطابق پنجاب اور بلوچستان کی سرحدی چیک پوسٹ بواٹہ کے مقام پر ایک ٹرک کے گرنے کے باعث بلوچستان اور پنجاب کو ملانے والی قومی شاہراہ گزشتہ رات سے بند ہے۔

اس حادثے کے بعد سے ٹریفک کی آمدورفت مکمل طور پر معطل ہے اور کوہ سلیمان میں گاڑیوں کی لمبی قطاریں لگ گئی ہیں۔

بارکھان اور ڈیرہ غازیخان کوہ سلیمان کی دونوں اطراف کی ٹریفک کو معطل کر دیا گیا ہے۔ اس سے مسافروں اور مریضوں کو شدید مشکلات کا سامنا ہے۔ عوام سے اپیل کی گئی ہے کہ وہ غیر ضروری سفر سے گریز کریں۔