Category: ڈیرہ غازی خان

ڈیرہ غازیخان ،باغی ٹی وی( نیوز رپورٹر شاہد خان )ڈپٹی کمشنر ڈیرہ غازیخان مہر شاہد زمان لک کی زیرصدارت ڈیویلپمنٹ منصوبوں بارے اجلاس کمیٹی روم میں منعقد ہوا۔

اجلاس میں اے ڈی سی غلام مصطفی،ڈپٹی ڈائریکٹر ڈویلپمنٹ امیرمسلم،سی ای او عبدالرحمن،ایکسیئن محمد شفیق،ڈی ایس پی امتیاز چنگوانی،زرینہ بی بی،شہزاد نذیر،فخر حبیب،طاہر نقاش ودیگر افسران موجود تھے۔

اجلاس میں ہائی وے،بلڈنگز،پی ایچ ای،آئی ڈیپ،کے ایس ڈی اے،پی ایچ اے،انہار،سپورٹس،ہائر ایجوکیشن کی سکیموں کا جائزہ لیا گیا ڈپٹی کمشنر مہر شاہد زمان لک نے خطاب کرتے ہوئے کہا کہ ترقیاتی منصوبوں میں کوالٹی ورک کو یقینی بنایا جائے،ترقیاتی کاموں کی بروقت تکمیل کیلئے کنٹریکٹرز اور لیبر کو متحرک کیا جائے،بہتر پبلک سروس ڈیلیوری سے لوگوں کو ضرور ریلیف دلایا جائے،

مہر شاہد زمان لک نے کہا کہ ڈیرہ غازیخان میں لوگوں کا معیارِ زندگی بہتر بنانے کیلئے کام جاری رکھا جائے،ترقیاتی کاموں میں تعمیراتی معیار پر کوئی سمجھوتہ نہ کیا جائے۔

ڈیرہ غازی خان، باغی ٹی وی( نیوز رپورٹر شاہد خان)پنجاب فوڈ اتھارٹی کی اشیائے خوردنی میں ملاوٹ کرنے والوں کیخلاف کارروائیاں
ڈائریکٹر جنرل پنجاب فوڈ اتھارٹی کی خصوصی ہدایت پر ملاوٹی خوراک بیچنے والوں کیخلاف مسلسل کارروائیاں جاری ہیں۔

تفصیلات کے مطابق فوڈ سیفٹی ٹیم نے تونسہ بائی پاس ڈی جی خان میں سکول کنٹین کو آئل تبدیلی ریکارڈ نہ ہونے،پروڈکشن ایریا میں گندگی پائے جانے پر بھاری جرمانہ عائد کردیا گیا۔

اسی طرح 5 مرلہ سکیم،ریلوے روڈ کوٹ ادو مظفرگڑھ میں 2 ملک شاپس کو پانی ملا دودھ فروخت کرنے،ورکرز کے میڈیکلز سرٹیفکیٹس نہ ہونے پر 21 ہزارروپے کے جرمانے عائد کر دیے گئے۔

اس کے علاوہ صدر بازار پرانا پوسٹ آفس کوٹ مٹھن میں کریانہ سٹور کو ناقابلِ سراغ مصالحے فروخت کرنے جبکہ دبئی کالونی عاقل پور روڈ پر واقع گرائنڈگ یونٹ کو تیار اشیاء پر لیبلنگ نہ کرنے پر یکساں 10 ہزارروپے کے جرمانے عائد کیے گئے۔

اس موقع پر ڈی جی پنجاب فوڈ اتھارٹی محمد عاصم جاوید کا کہنا تھا کہ پنجاب بھر میں کارروائیاں جاری ہیں۔

ڈیرہ غازیخان ،باغی ٹی وی( نیوز رپورٹر شاہد خان ) سیوریج سسٹم تباہ،گندہ پانی سڑکوں اور گلیوں میں ٹھاٹھیں مارنے لگا
بلخ سرور سٹی،میڈیسن مارکیٹ،فرید آباد،مہتر کالونی،پیر قتال موڑ سمیت شہر کے بیشتر علاقوں میں سیوریج کے گندے بدبو دار پانی کا راج،تمام علاقے تعفن میں ڈوب گئے، میڈیسن مارکیٹ کے تاجروں کا احتجاج، علاقہ مکین نقل مکانی پر مجبور،

کارپوریشن افسران اور عملہ بے حس،اہل علاقہ کو کئی خطرناک اور جان لیوا بیماریوں نے گھیر لیا،بار ہا شکایات درج کرانے کے باوجود بھی کارپوریشن کا عملہ ٹس سے مس نہ ہوا،بلخ سرور سٹی،میڈیسن مارکیٹ،فرید آباد،مہتر کالونی،پیر قتال موڑ سمیت شہر کے بیشتر علاقوں کے مکینوں امجد امین،الٰہی بخش،محمد سہیل،شیخ شہزاد،مبین احمد،سلیم،نعیم لطیف،اختر،ظہیر،نوازو دیگر نے شدید احتجاج کرتے ہو ئے بتایا کہ سیوریج کی بندش کی وجہ سے کاروبارٹھپ ہو کر رہ گئے ہیں،

چوک اور گلیاں جھیل کے مناظر پیش کر رہی ہیں گندے پانی کی وجہ سے مکینوں کی قیمتی سکنی و کمرشل املاک کو شدید نقصان پہنچ رہا ہے، گلیوں اور گھروں میں سیوریج کے پانی کی موجودگی سے جہاں آمدورفت میں شدید دشواری کا سامنا کرنا پڑتا ہے وہاں سکول جانے والے طلبا و طالبات بھی مشکلات کا شکار ہیں مکینوں کے مطابق گلیوں میں سیوریج کا گندہ پانی بھر جانے سے بازار اور دکانوں سے اشیاء خوردونوش کی خریداری کیلئے بھی مشکلات در پیش ہیں

کارپوریشن کے افسران کی دانستہ مجرمانہ غفلت کے باعث شہر غلاظت اور گندگی کی تصویر بن چکا ہے اور سیوریج کے پانی میں ڈوبا ہوا ہے علاقہ مکینوں نے مزید بتایا کہ سیوریج کے گندے پانی پر پیدا ہونے والے زہریلے مچھر خطرناک بیماریوں کا باعث بن رہے ہیں جبکہ صفائی ستھرائی نہ ہونے سے تعفن کے باعث سانس لینے میں بھی دشواری پیدا ہو چکی ہے

میٹروپولیٹن کارپوریشن کے عملہ کو بارہا شکایات درج کرائی گئیں لیکن کوئی شنوائی نہیں ہو ئی، علاقہ مکینوں نے کمشنر ڈیرہ وایڈمنسٹریٹر کارپوریشن ڈاکٹر ناصر محمود بشیر،سی او مسرت عباس سے مطالبہ کیا ہے کہ بلخ سرور سٹی،میڈیسن مارکیٹ،فرید آباد،مہتر کالونی،پیر قتال موڑ سمیت شہر کے بیشتر علاقوں میں سیوریج سسٹم فوری بحال کیا جائے۔

ڈیرہ غازیخان(باغی ٹی وی ) انسداد پولیو کی قومی مہم26فروری تا یکم مارچ تک جاری رہیگی
حکومت پنجاب کے احکامات کے مطابق ڈیرہ غازیخان انتظامیہ انسداد پولیو کیلئے الرٹ ہے۔ڈسٹرکٹ ڈیرہ غازی خان میں پونے آٹھ لاکھ بچوں کو پولیو کے حفاظتی قطرے پلائےجائیں گے۔

انسداد پولیو مہم بارے اجلاس ڈپٹی کمشنر مہر شاہد زمان لک کی زیرصدارت کمیٹی روم میں منعقد ہوا۔اجلاس میں ایڈیشنل ڈپٹی کمشنر غلام مصطفیٰ،سی ای اوہیلتھ ڈاکٹر ادریس لغاری،ڈی ایچ او ڈاکٹر علی ہاشم،ڈی ایس وی عطاء اللہ ساجد،ڈبلیو ایچ او،یونیسیف کے نمائندوں سمیت متعلقہ افسران شریک تھے۔

ڈپٹی کمشنر مہر شاہد زمان لک نے خطاب کرتے ہوئے کہا کہ ضلع سے پولیو خاتمے کیلئے بھرپور جدوجہد کی جائے،مہم کو سنجیدہ لیا،کمی کوتاہیوں کو دور کیا جائے،مطلوبہ رزلٹ کا حصول لازمی ہے،کسی قسم کی کوتاہی برداشت نہیں کروں گا،مہر شاہد زمان لک نے کہا کہ موقع پر کام کی چیکنگ ہوگی، میں خود بھی فیلڈ وزٹس کروں گا،مائیکرو پلان کے تحت پولیو ورکرز کو ایکٹیو کیا اورغلطیوں کا اعادہ نہ کیا جائے،

مہم میں کوتاہیاں سامنے آئیں تو ذمہ داروں کو سخت تادیبی کارروائیوں کا سامنا کرنا پڑے گا،الائیڈ محکمے انسداد پولیو مہم کی آگاہی کا عمل جاری رکھیں۔

ڈیرہ غازیخان،باغی ٹی وی (نامہ نگارشہزادخان یوسفزئی)حکومت کی ہدایت کے مطابق ڈیرہ غازیخان میں میٹ ایکسپورٹ زون بنایا جائے گاجس سے چھوٹے جانوروں کا گوشت دیگر ممالک کو بھیجا جائے گا اور اس سے یہاں کے لوگوں کی آمدنی میں نہ صرف اضافہ ہو گا بلکہ کثیر زرمبادلہ بھی حاصل ہو گا .

یہ بات ڈویژنل ڈائریکٹر لائیو سٹاک ڈیرہ غازیخان محمود اعجاز نے یہاں چارج سنبھالنے کے بعد افسروں کے اجلاس سے خطاب کرتے ہوئے بتائی . انہوں نے کہاکہ لائیو سٹاک ملکی معیشت میں ریڑھ کی ہڈی کی حیثیت رکھتا ہے اس لیے حکومت نے ہر قسم کے جانوروں کی افزائش اور ان کو بیماریوں سے محفوظ رکھنے کیلئے خصوصی اقدامات کیے ہیں .

ڈویژنل ڈائریکٹر لائیو سٹاک نے کہا کہ جانور پال حضرات کی مکمل حوصلہ افزائی کی جائے گی اور ان کے جانوروں کی دیکھ بھال کیلئے محکمہ لائیو سٹاک کی تمام سروسز ان کی دہلیز پر پہنچائی جائیں گی .

انہوں نے بتایا کہ جانورو ں کی ادویات اور حفاظتی ٹیکہ جات وافر مقدار میں موجود ہیں اور ڈویژن بھر میں 24موبائل ڈسپنسریاں جانوروں کو حفاظتی ٹیکے لگانے میں مصروف ہیں .

انہوں نے کہاکہ یہاں پر جانوروں میں کسی قسم کی وبائی امراض کا کوئی خطرہ نہیں اور اس بات کو یقینی بنایاگیا ہے کہ جانوروں کی افزائش نسل بہتر طریقے سے ہو .

انہوں نے محکمہ کے افسران اور ملازمین کو ہدایت کی کہ وہ فیلڈ میں جا کر اپنے فرائض منصبی دیانتداری سے سرانجام دیں اور آئندہ بہترین کارکردگی کا مظاہرہ کرنے والے ملازمین کو انعامات بھی دیئے جائیں گے.

ڈائریکٹر لائیو سٹاک نے مزیدکہاکہ غیر حاضر ، کام چور اور نااہل ملازمین کے خلاف سخت انضباطی کارروائی عمل میں لائی جائے گی .

انہوں نے کہا کہ ڈویژن بھر میں جانوروں کی بیماریوں کی تشخیص کیلئے چار جدید لیبارٹریاں کام کررہی ہیں . اس کے علاوہ جانور پال حضرات کیلئے 16سہولت مراکز بھی قائم کیے گئے ہیں.

انہوں نے بتایاکہ ڈویژن کے 316 ویٹرنری ہسپتالوں اور موبائل ڈسپنسریوں کے ذریعے لاکھوں چھوٹے بڑے جانوروں کو حفاظتی ٹیکہ جات لگائے گئے ہیں .