Category: ڈیرہ غازی خان

ڈیرہ غازی خان (سٹی رپورٹر جواد اکبر)ڈپٹی کمشنر ڈیرہ غازی خان محمد عثمان خالد کی زیرِ صدارت ایک اہم اجلاس منعقد ہوا جس میں ستھرا پنجاب پروگرام اور انسدادِ سموگ مہم کے تحت جاری سرگرمیوں کا تفصیلی جائزہ لیا گیا۔ اجلاس میں مختلف محکموں کے افسران، اینٹی سموگ اسکواڈز، ماحولیاتی تحفظ، ٹریفک پولیس، زراعت، لوکل گورنمنٹ اور انڈسٹریز ڈیپارٹمنٹ کے نمائندوں نے شرکت کی۔

ڈپٹی کمشنر محمد عثمان خالد نے اجلاس سے خطاب کرتے ہوئے کہا کہ ماحولیاتی آلودگی کے خاتمے اور شہریوں کے تحفظ کے لیے تمام محکمے مؤثر اور مربوط انداز میں کام کریں۔ انہوں نے واضح ہدایت کی کہ سموگ کا باعث بننے والے صنعتی اداروں، اینٹوں کے بھٹوں اور دھواں چھوڑنے والی گاڑیوں کے خلاف روزانہ کی بنیاد پر سخت کارروائیاں کی جائیں اور ان کی رپورٹ باقاعدگی سے جمع کرائی جائے۔

انہوں نے کہا کہ آئندہ دو ماہ سموگ کے حوالے سے نہایت اہم ہیں، لہٰذا تمام ادارے اپنی ذمہ داریاں بھرپور طریقے سے ادا کریں تاکہ شہریوں کو آلودہ فضا کے مضر اثرات سے محفوظ رکھا جا سکے۔ ان کا کہنا تھا کہ صرف کارروائیاں کافی نہیں، بلکہ عوامی آگاہی مہم بھی یکساں اہمیت رکھتی ہے۔ شہریوں کو چاہیے کہ وہ فصلوں کی باقیات نہ جلائیں، گاڑیوں کی بروقت ٹیو ننگ کروائیں، دھواں چھوڑنے والے ذرائع سے اجتناب کریں، ماسک پہنیں اور سانس و آنکھوں کے امراض سے بچاؤ کے لیے احتیاطی تدابیر اختیار کریں۔

ڈپٹی کمشنر نے محکموں کو ہدایت کی کہ روزانہ کی بنیاد پر اینٹوں کے بھٹوں، صنعتی یونٹس اور ٹریفک کے دھوئیں کی مانیٹرنگ کی جائے۔ ضلعی انتظامیہ اور پولیس غیر قانونی طور پر چلنے والے بھٹوں کے خلاف فوری کارروائی کریں۔

انہوں نے کہا کہ ستھرا پنجاب مہم کے تحت شہری علاقوں میں صفائی ستھرائی کے نظام کو مزید بہتر بنایا جائے، کوڑا کرکٹ بروقت اٹھایا جائے، نالیوں کی صفائی کی جائے اور غیر قانونی فضلہ جلانے کے خلاف اقدامات کو تیز کیا جائے تاکہ ماحول کو صحت مند اور صاف رکھا جا سکے۔

محمد عثمان خالد نے تمام اداروں پر زور دیا کہ وہ سموگ سے بچاؤ کے لیے ہنگامی بنیادوں پر مربوط پلان تیار کریں اور عوام کو روزانہ کی بنیاد پر آگاہی فراہم کریں۔ انہوں نے کہا کہ صاف ماحول ہر شہری کا بنیادی حق ہے اور اس کے لیے حکومتِ پنجاب تمام ممکنہ اقدامات کر رہی ہے۔

ڈپٹی کمشنر نے شہریوں سے اپیل کی کہ وہ انتظامیہ کے ساتھ تعاون کریں، کیونکہ عوامی شمولیت کے بغیر یہ مہم کامیاب نہیں ہو سکتی۔ انہوں نے کہا، “ہر شہری کو اپنا کردار ادا کرنا ہوگا تاکہ ڈیرہ غازی خان کو ایک صاف، محفوظ اور صحت مند شہر بنایا جا سکے۔”

ڈیرہ غازیخان (باغی ٹی وی، سٹی رپورٹر جواد اکبر) سمگلنگ اور جرائم پیشہ عناصر کے خلاف بھرپور کریک ڈاؤن میں نمایاں کارکردگی دکھانے پر بارڈر ملٹری پولیس کے سربراہ کمانڈنٹ امیر تیمور خان کی جانب سے پروقار تقریب کا انعقاد کیا گیا۔

تقریب میں کمانڈنٹ امیر تیمور خان نے ایس ایچ او تھانہ کھر اشفاق احمد لغاری کو کرائم کنٹرول، سمگلنگ اور سماج دشمن عناصر کے خلاف شاندار کارکردگی پر تعریفی اسناد اور نقد انعام سے نوازا۔ اس موقع پر رسالدار تمن لغاری، سردار عبداللہ خان لغاری سمیت تھانہ کھر کا عملہ بھی موجود تھا۔

کمانڈنٹ امیر تیمور خان نے کہا کہ ایس ایچ او اشفاق احمد لغاری جیسے فرض شناس افسر فورس کے لیے ماتھے کا جھومر ہیں۔ انہوں نے مزید کہا کہ سینئر کمانڈنٹ ڈپٹی کمشنر محمد عثمان خالد کی ہدایات کی روشنی میں نمایاں کارکردگی دکھانے والے افسران کی حوصلہ افزائی جبکہ ناقص کارکردگی کے حامل اہلکاروں کے خلاف محکمانہ کارروائی عمل میں لائی جائے گی۔

ڈیرہ غازی خان (سٹی رپورٹر جواد اکبر) وزیر اعلیٰ پنجاب مریم نواز شریف کے گرین الیکٹرک بس منصوبے کے تحت ضلع ڈیرہ غازی خان میں 80 جدید بس اسٹاپ تعمیر کرنے کا فیصلہ کیا گیا ہے، جن کے ٹینڈرز جلد جاری ہوں گے۔ ڈپٹی کمشنر محمد عثمان خالد نے سخی سرور میں الیکٹرک بس میں سفر کے دوران اہلِ علاقہ سے گفتگو کرتے ہوئے یہ خوشخبری سنائی۔ وہ کمانڈنٹ بارڈر ملٹری پولیس امیر تیمور خان کے ہمراہ سخی سرور کے دورے پر تھے جہاں سابق چیئرمین سخی سرور چیف کھلنگ حاجی ملک ارشاد حسین، منتخب نمائندگان اور مقامی عمائدین نے ان کا پرتپاک استقبال کیا۔

ڈپٹی کمشنر اور کمانڈنٹ بی ایم پی نے گرین الیکٹرک بس اسٹینڈ کا معائنہ کیا، مسافروں سے ملاقات کی اور سہولیات کے بارے میں استفسار کیا۔ ڈپٹی کمشنر نے شہریوں کے ساتھ بس میں سفر کیا اور ایک معمر قبائلی خاتون کو منزل پر پہنچنے پر اپنے اسکواڈ کے ہمراہ احتراماً بس سے اتارا۔ بزرگ خاتون نے محفوظ، آرام دہ اور ماحول دوست مفت سفری سہولت پر وزیر اعلیٰ پنجاب مریم نواز شریف کے لیے نیک تمناؤں کا اظہار کیا۔

ڈپٹی کمشنر محمد عثمان خالد نے کہا کہ یہ منصوبہ عوامی فلاح کا سنگِ میل ثابت ہو رہا ہے، خاص طور پر کوہ سلیمان کے پسماندہ علاقوں کی خواتین کو براہِ راست فائدہ مل رہا ہے۔ انہوں نے بتایا کہ زیرِ تعمیر بس اسٹاپس میں سایہ دار نشستیں، روشنی اور دیگر معیاری سہولیات فراہم کی جائیں گی۔ شہریوں نے وزیر اعلیٰ مریم نواز شریف اور ضلعی انتظامیہ کے اقدامات کو عوام دوست اور انقلابی قرار دیتے ہوئے خراجِ تحسین پیش کیا۔

ڈیرہ غازی خان (باغی ٹی وی،سٹی رپورٹرجواداکبر) کمشنر ڈیرہ غازی خان اشفاق احمد چوہدری نے محکمہ سیاحت کے افسران کے ہمراہ پریس کانفرنس کرتے ہوئے اعلان کیا ہے کہ تھل جیپ ریلی 2025 کے تمام انتظامات مکمل کر لیے گئے ہیں۔

پریس کانفرنس میں منیجر ایونٹ نعمان خان اور ریجنل منیجر حیدر رضا بھی شریک تھے۔ کمشنر اشفاق احمد چوہدری نے بتایا کہ دسویں تھل جیپ ریلی 6 سے 9 نومبر 2025 تک منعقد ہوگی، جو وزیراعلیٰ پنجاب مریم نواز کے ویژن کی عکاس ہے۔

ایونٹ میں 100 سے زائد قومی و بین الاقوامی ریسرز حصہ لیں گے جبکہ 13 مختلف کیٹیگریز میں مقابلے ہوں گے جن میں ڈرٹ بائیک ریس بھی شامل ہے۔ 200 کلومیٹر طویل ٹریک کا مڈ پوائنٹ ضلع لیہ کا علاقہ چوبارہ ہوگا۔

اس موقع پر کمشنر نے بتایا کہ لیہ اور مظفرگڑھ میں ثقافتی شوز منعقد کیے جائیں گے جبکہ چوبارہ میں عوامی میلہ بھی ہوگا۔

انہوں نے کہا کہ سکیورٹی، ٹریفک، میڈیکل اور دیگر انتظامی سہولیات کے لیے متعلقہ محکموں کو ہدایات جاری کر دی گئی ہیں۔

منیجر ایونٹ نعمان خان کے مطابق گزشتہ سال ایک لاکھ سے زائد افراد نے تھل جیپ ریلی میں شرکت کی تھی جبکہ اس سال خواتین کے لیے دو الگ کیٹیگریز شامل کی گئی ہیں۔

نعمان خان نے مزید بتایا کہ ایونٹ میں بین الاقوامی ڈرائیورز کی شرکت بھی متوقع ہے۔

ڈیرہ غازیخان ،گوجرانوالہ (باغی ٹی وی،سٹی رپورٹر + نامہ نگار)ڈیرہ غازی خان اور گوجرانوالہ بورڈ آف انٹرمیڈیٹ اینڈ سیکنڈری ایجوکیشن کی جانب سے انٹرمیڈیٹ پارٹ ون (فرسٹ اینول) 2025ء کے نتائج کا باضابطہ اعلان کر دیا گیا۔ دونوں بورڈز میں امتحانی عمل کی شفافیت، جدید نظام اور طلبہ کی کارکردگی نمایاں رہی، جبکہ طالبات نے کامیابی کی شرح میں نمایاں برتری حاصل کی۔

ڈیرہ غازی خان بورڈ کے چیئرمین و کمشنر اشفاق احمد چوہدری نے انٹر پارٹ فرسٹ کے نتائج کا اعلان کرتے ہوئے لیپ ٹاپ پر کلک کر کے نتائج آن لائن جاری کیے۔ اس موقع پر کنٹرولر امتحانات پروفیسر مظفر حسین، سیکرٹری بورڈ عبدالرحمن چوہدری اور ٹیکنیکل افسر احمد علی قریشی موجود تھے۔ امتحان میں 54,954 طلبہ و طالبات شریک ہوئے، جن میں سے 34,277 کامیاب قرار پائے۔ مجموعی کامیابی کی شرح 62.37 فیصد رہی۔ طالبات نے میدان مار لیا جن کی کامیابی کی شرح 70.26 فیصد جبکہ طلباء کی 54.62 فیصد رہی۔ اضلاع کی کارکردگی میں مظفرگڑھ سرفہرست رہا جہاں کامیابی کی شرح 68 فیصد ریکارڈ کی گئی۔

دوسری جانب گوجرانوالہ بورڈ کے چیئرمین و کمشنر سید نوید حیدر شیرازی نے کانفرنس روم میں منعقدہ پریس کانفرنس میں نتائج کا اعلان کیا۔ امتحان میں 1,42,101 طلبہ و طالبات شریک ہوئے، جن میں سے 71,009 کامیاب قرار پائے۔ کامیابی کی مجموعی شرح 49.97 فیصد رہی۔
پری میڈیکل (گرلز) گروپ میں 62.90 فیصد، پری انجینئرنگ (گرلز) میں 72.61 فیصد، جبکہ جنرل سائنس (گرلز) میں 60.22 فیصد طلبات کامیاب رہیں۔ بوائز کی کامیابی کی شرح مختلف گروپس میں 21 سے 58 فیصد کے درمیان رہی۔

چیئرمین سید نوید حیدر شیرازی نے کہا کہ امتحانات کے انعقاد سے نتائج کی تیاری تک مکمل شفافیت کو یقینی بنایا گیا۔ آٹومیشن سسٹم کے تحت فارم جمع کرانے، رول نمبر الاٹمنٹ اور امتحانی مراکز کی تقسیم کی گئی۔ تمام زونز میں طلبہ کو مساوی مواقع فراہم کیے گئے اور مارکنگ کے معیار پر کوئی سمجھوتہ نہیں کیا گیا۔

دونوں بورڈز کے چیئرمینوں نے اس عزم کا اظہار کیا کہ امتحانی نظام کی شفافیت، غیر جانبداری اور تعلیمی معیار میں مزید بہتری کے لیے اقدامات جاری رکھے جائیں گے تاکہ طلبہ و طالبات کی محنت کا صحیح اور منصفانہ انداز میں اعتراف ممکن ہو سکے۔

ڈیرہ غازی خان(جواد اکبر کی رپورٹ)ڈیرہ غازی خان میں ڈویژنل شوگر کین سیس کمیٹی کا اہم اجلاس کمشنر اشفاق احمد چوہدری کی زیر صدارت منعقد ہوا۔ اجلاس میں گنے کے کاشتکاروں کی فلاح و بہبود اور ترقیاتی منصوبوں کا تفصیلی جائزہ لیا گیا۔

شوگر سیس فنڈز سے دیہی سڑکوں کی تعمیر و مرمت پر بریفنگ دی گئی۔ کمشنر نے کہا کہ کسانوں کو سہولیات فراہم کرنا وزیراعلیٰ پنجاب کی اولین ترجیح ہے۔ انہوں نے شوگر سیس فنڈز کے شفاف اور عوامی مفاد میں استعمال کو یقینی بنانے کی ہدایت کی۔

منظور شدہ اسکیموں پر فوری عملدرآمد اور دیہی ترقی کے عمل کو تیز کرنے پر زور دیا گیا۔ اجلاس میں ڈپٹی کمشنرز، متعلقہ محکمانہ افسران اور شوگر ملز کے نمائندے شریک ہوئے۔

کمشنر نے واضح کیا کہ ترقیاتی اسکیموں میں کسی قسم کی تاخیر برداشت نہیں کی جائے گی۔

ڈیرہ غازی خان (سٹی رپورٹر جواد اکبر بھٹی) پاکستان بیت المال کے تحت چلنے والے پروجیکٹس سویٹ ہوم، شیلٹر ہوم اور کھانا سب کے لیے کے ایڈمن اور پروجیکٹ ملازمین گزشتہ کئی برسوں سے تنخواہوں میں اضافے سے محروم ہیں۔ 2021-22ء میں بھرتی ہونے والے پروجیکٹ اسٹاف کی تنخواہوں میں اب تک کوئی اضافہ نہیں کیا گیا، جس پر ملازمین میں شدید مایوسی اور اضطراب پایا جا رہا ہے۔

ذرائع کے مطابق پاکستان بیت المال کی بیوروکریسی انتظامی امور کو مؤثر طور پر چلانے میں ناکام ہو چکی ہے، جس کے باعث ادارے میں تنخواہوں کے نظام میں واضح تضاد پیدا ہو گیا ہے۔ اعلیٰ افسران بھاری تنخواہیں اور مراعات لے رہے ہیں، جبکہ فیلڈ اور پروجیکٹ اسٹاف کو ہر بار یہ کہہ کر ٹال دیا جاتا ہے کہ تنخواہوں میں اضافہ بیت المال بورڈ کی میٹنگ میں طے کیا جائے گا۔ تاہم بورڈ میٹنگز طویل عرصے سے منعقد نہ ہونے کے باعث ملازمین کے مسائل حل نہیں ہو پا رہے۔

ملازمین نے اس صورتحال پر شدید تشویش کا اظہار کرتے ہوئے وزیراعظم شہباز شریف اور صدر آصف علی زرداری سے مطالبہ کیا ہے کہ وہ فوری طور پر پاکستان بیت المال کے معاملات کا نوٹس لیں اور پروجیکٹ اسٹاف کی تنخواہوں میں فوری اضافہ یقینی بنائیں تاکہ غریب اور فلاحی منصوبوں سے وابستہ عملے کا استحصال بند کیا جا سکے۔

ڈیرہ غازی خان (باغی ٹی وی نیوز رپورٹر شاہد خان)وزیرِ اعلیٰ پنجاب مریم نواز شریف کے وژن کے تحت "آسان کاروبار فنانس” پروگرام کے دوسرے مرحلے کا باقاعدہ آغاز کر دیا گیا۔ اس سلسلے میں پنجاب سمال انڈسٹریز کارپوریشن کے ریجنل آفس ڈیرہ غازی خان میں آگاہی سیمینار منعقد ہوا، جس میں محکمہ صنعت، تجارت و سرمایہ کاری کے عبدالباری ہاشمی، محمد احد، بینک آف پنجاب کے محمد اسماعیل سمیت چیمبر آف کامرس اینڈ انڈسٹری کے نائب صدر مرزا محمد آصف اقبال اور دیگر کاروباری شخصیات نے شرکت کی۔

سیمینار میں بتایا گیا کہ اس پروگرام کے تحت پنجاب بھر میں 25 سے 55 سال کی عمر کے مرد، خواتین، خصوصی افراد اور خواجہ سرا کو پہلے آئیے، پہلے پائیے کی بنیاد پر 90 ارب روپے کے زیرو مارک اپ قرضے فراہم کیے جائیں گے، جو پانچ سال میں آسان اقساط کے ذریعے واپس کیے جا سکیں گے۔ حکومتِ پنجاب بینک آف پنجاب کو پانچ سال کے لیے آٹھ ارب روپے مارک اپ ادا کرے گی تاکہ کاروباری طبقے پر کوئی سودی بوجھ نہ ہو۔

پروگرام کے تحت نئے یا جاری کاروبار کے لیے تین کروڑ روپے تک جبکہ برآمدات کے فروغ کے لیے پانچ کروڑ روپے تک کے قرضے دیے جائیں گے۔ اہلیت کے لیے درست قومی شناختی کارڈ، فعال ٹیکس فائلر سٹیٹس، مالیاتی اداروں کے نادہندہ نہ ہونا، اور کاروباری جگہ کی ملکیت یا کرایہ داری لازم قرار دی گئی ہے۔

درخواستیں akf.punjab.gov.pk ویب پورٹل پر جمع کروائی جا سکتی ہیں، جبکہ مزید معلومات کے لیے ہیلپ لائن 1786 پر رابطہ کیا جا سکتا ہے۔ ریجنل ڈائریکٹر عبدالباری ہاشمی نے کہا کہ یہ سکیم صوبے میں روزگار، سرمایہ کاری اور برآمدات کے فروغ کے لیے سنگِ میل ثابت ہوگی، اور پہلی بار جنوبی پنجاب کے لیے 26 ارب روپے کی خطیر رقم مختص کی گئی ہے۔