فیصل آباد(اے پی پی)حکومتی ہدایات کی روشنی میں محرم الحرام کے ۱ٓغاز کے باعث فیصل آباد میں سٹی ٹریفک پولیس کی جانب سے غیرقانونی نیلی بتی،ریوالونگ لائٹس اور رنگدار شیشوں کی حامل گاڑیوں کے خلاف کریک ڈاؤن کاآغاز کردیا گیاہے جبکہ درجنوں گاڑیوں کے خلاف کارروائی کے دوران ان سے بھاری جرمانہ بھی وصول کیاگیاہے اور انہیں وارننگ دی گئی ہے کہ اگر دوبارہ مذکور ہ گاڑیوں پر رنگدار شیشے، غیر قانونی نیلی بتیاں، ریوالونگ لائٹس یا ہوٹرز نصب کئے گئے تو ان گاڑیوں کو سرکاری تحویل میں لے لیاجائیگا اور ان کی رجسٹریشن منسوخ کرنے سمیت بھاری جرمانوں سے بھی گریز نہیں کیاجائیگا۔ سٹی ٹریفک پولیس فیصل آباد کے ترجمان نے بتایاکہ محرم الحرام کے ۱ٓغاز کے باعث کسی بھی ناخوشگوار واقعہ سے بچنے کیلئے ٹریفک رولز کی سختی سے پابندی کاحکم جاری کیا گیاہے جس کے تحت محرم الحرام کے حوالے سے سٹی ٹریفک پولیس نے غیرقانونی نیلی بتی،ریوالونگ لائیٹس اور رنگدار شیشوں کی حامل گاڑیوں کے خلاف کارروائی کو مزید تیز کر دیا ہے۔ انہوں نے بتایاکہ اس حوالے سے تما م ٹریفک وارڈنز کو سخت ہدایات بھی جاری کر دی گئی ہیں۔انہوں نے بتایاکہ کارروائی اور کارکردگی کا جائزہ ٹریفک سرکلز کی سطح ُپر لیاجارہاہے۔انہوں نے تما م شہریوں سے بھی اپیل کی کہ وہ اپنی گاڑیوں پر غیر قانونی نیلی بتی، ریوالونگ لائٹس اور رنگدار شیشوں کے استعمال سے گریز کر یں تاکہ وہ کسی بھی پریشانی یا قانونی کاروائی سے محفوظ رہ سکیں۔

فیصل آباد (اے پی پی)ضابطہ فوجداری کی دفعہ 144کے تحت فیصل آباد ڈویژن سمیت پنجاب بھر کے تمام 36 اضلاع میں عشرہ محرم اور یوم عاشور کے تعزیہ، ذوالجناح، علم اور دیگر ماتمی جلوسوں کے راستوں میں آنے والی عمارات میں اینٹ، روڑا، پتھر وغیرہ جمع کرنے پر فوری طور پر پابندی عائد کر دی گئی ہے جبکہ عزاداری کے جلو سوں کے راستوں میں سریا، ڈنڈے، سوٹے وغیرہ بھی سٹاک نہیں کئے جا سکیں گے۔فیصل آباد ڈویژنل انتظامیہ کے ترجمان نے بتایاکہ محکمہ داخلہ کی جانب سے تمام اضلاع کے ڈی سیز و ڈی پی اوز کو بھی حکم دیا گیا ہے کہ وہ اپنے اپنے اضلاع میں مذکورہ پابندی پر سختی سے عملدرآمد کروائیں اور اس ضمن میں کسی کوتاہی کا مظاہرہ نہ کیا جائے۔

فیصل آباد (اے پی پی)عشرہ محرم الحرام کے دورا ن امن و امان کی صورتحال قابو میں رکھنے کیلئے ضابطہ فوجداری کی دفعہ 144کے تحت فیصل ۱ٓباد سمیت صوبہ کے تمام اضلاع میں خوف وہراس اور سنسنی خیز بے بنیاد اور حقائق کے منافی افواہیں پھیلانے،امن وامان میں خلل ڈالنے والے قابل اعتراض تحریروں پر مبنی بینرز، پمفلٹس، پوسٹرز، ہینڈ بلز کی اشاعت،لٹریچر کی تقسیم اور وال چاکنگ کرنے پر فوری طور پر سختی سے پابندی عائد کر دی گئی ہے۔ فیصل آباد ڈویژنل انتظامیہ کے ترجمان نے بتایاکہ محکمہ داخلہ کے ان احکامات کے تحت کسی بھی ضلع کی ریونیو حدود میں محرم الحرام کے جلوسوں ومجالس کے علاوہ دیگر مقامات پر پانچ یا اس سے زائد افراد کے جمع ہونے،قابل اعتراض اور مذہبی منافرت پر مشتمل آڈیوو وڈیوکیسٹس کی ریکارڈنگ،فروخت اور چلانے، اشتعال انگیز تقاریر کرنے، نعرے لگانے اور آتشیں اسلحہ ودیگر ہتھیاروں کی نمائش و لیکرچلنے کی ممانعت ہوگی جبکہ محرم کے جلوسوں ومجالس وغیرہ دیکھنے کیلئے مکانوں ودکانوں اور دیگر عمارتوں کی چھتوں پر جمع ہونے اور محرم جلوسوں ومجالس کے راستوں پر ہر قسم کی تجاوزات کھڑی کرنے پر بھی پابندی عائد کی گئی ہے۔انہوں نے بتایاکہ کسی بھی قسم کی خلاف ورزی کی صورت میں متعلقہ افراد کیخلاف سخت قانونی کارروائی عمل میں لائی جائے گی اور بعدازاں کوئی عذر قابل قبول نہ ہوگا۔

فیصل آباد وزیر اعظم عمران خان کی ہدایت پر یوم یکجہتی کشمیر کے حوالے سے ایم سی گرلز ایلیمینٹری سکول ملت کالونی میں کشمیریوں سے اظہار یکجہتی کیا گیا۔پرنسپل ادارہ ثروت جبیں نے ریلی کی قیادت کی جبکہ اساتذہ کرام، طالبات بھی شریک تھیں۔اس موقع پر طالبات نے کشمیریوں سے اظہار یکجہتی کے لئے بینرز اور پلے کارڈز اٹھا رکھے تھے۔رئیس ادارہ نے مقبوضہ کشمیر میں بھارتی فوج کی دہشت گردی کی شدید مذمت کرتے ہوئے کہا کہ ایسے منفی ہتھکنڈوں سے بھارت کشمیریوں کی تحریک آزادی کا گلا نہیں گھونٹ سکتا۔انہوں نے کہا کہ بھارتی ظلم و ستم کے باوجود کشمیری عوام میں آزادی کی تڑپ مزید بڑھی ہے اور کشمیر کی آزادی کا سورج جلد طلوع ہو گا۔ انہوں نے کہا کہ تمام پاکستانی قوم کشمیری عوام کے ساتھ کھڑی ہے اور ان کی اخلاقی و سفارتی حمایت جاری رکھیں گے۔ انہوں نے کہا کہ وحشیانہ فعل سے بھارت کا مکروہ اور گھناؤنا چہرہ دنیا کے سامنے ایک بار پھر بے نقاب ہو گیا۔انہوں نے کہا کہ آزادی کشمیری عوام کا حق ہے جو انہیں ہر صورت ملے گا۔ انہوں نے کہا کہ کشمیریوں سے اظہار یکجہتی کے لئے پاکستانی قوم ان کے ساتھ ہے۔انہوں نے کہا کہ بھارتی مظالم مقبوضہ کشمیر کے غیور عوام کے دلوں میں جذبہ حریت کو ختم نہیں کر سکتے۔ انہوں نے بھارتی ظلم و ستم پر عالمی برادری کی خاموشی پر تشویش کا اظہار کیا اور زور دیا کہ وہ بھارتی فوج کی وحشیانہ کارروائیاں رکوانے میں اپنا کردار ادا کرے۔