Category: فیصل آباد

فیصل آباد ( نمائندہ باغی ٹی )ڈویژنل کمشنرمحمود جاوید بھٹی نے چاروں اضلاع کی انتظامیہ کو ہدایت کی ہے کہ اشیائے ضروریہ کی قیمتوں کو قابو میں رکھنے کے لئے موثر اقدامات کئے جائیں اس ضمن میں پرائس کنٹرول مجسٹریٹس بازاروں میں قیمتیں چیک کرنے کے لئے سرگرم عمل رہیں اور گرانفروشوں سے کوئی رعایت نہ کی جائے تاکہ صارفین کو بے جا مہنگائی سے بچایا جاسکے۔انہوں نے یہ ہدایت ایک اجلاس کی صدارت کرتے ہوئے پرائس کنٹرول میکنزم سمیت عوامی ریلیف کے لئے دیگر مختلف انتظامی امور کاجائزہ لیتے ہوئے کہی۔ڈپٹی کمشنر طارق خاں نیازی،ایڈیشنل کمشنر (کوآرڈینیشن)محبوب احمد،اسسٹنٹ کمشنر(جنرل)مصور خاں نیازی اوردیگر افسران اس موقع پر موجود تھے جبکہ دیگر اضلاع کے افسران نے ویڈیو لنک کے ذریعے اجلاس میں شرکت کی۔ڈویژنل کمشنر نے کہا کہ عیدالاضحی کی آمد پر اشیائے ضروریہ کی قیمتوں میں اضافے کا منفی رحجان قابل تشویش ہے لہذا سبزیوں،پھلوں،مصالحہ جات اور کچن کی دیگر اشیاء کی قیمتوں میں بلاجوازاضافے کو فوری روکا جائے اور عوام کا استحصال کرنے والوں کو قانون کی گرفت میں لائیں۔انہوں نے کہا کہ اشیائے ضروریہ کی تھوک قیمتوں پر بھی کڑی نظر رکھیں تاکہ بازاروں میں فروخت ہونے والی اشیاء میں جائز منافع کی تشخیص ہوسکے۔ڈویژنل کمشنر نے ضلعی انتظامیہ کے افسران کوہدایت کی کہ فروٹ و سبزی منڈیوں میں نیلامیوں کے عمل کو چیک کرنے کے لئے اپنے دوروں میں اضافہ کریں اور عیدالاضحی پر ناجائز منافع کمانے کے لئے کسی شے کی ذخیرہ اندوزی نہیں ہونی چاہیے۔ڈویژنل کمشنر نے ڈپٹی کمشنرز سے کہا کہ وہ اپنے اضلاع میں پرائس کنٹرول مجسٹریٹس کی کارکردگی کو باقاعدگی سے چیک کریں اور مہنگائی کے خلاف کارروائیوں میں تعطل نہییں آنا چاہیے۔اجلاس کے دوران بتایا کہ ڈویژن بھر میں رواں سال اب تک 12576مارکیٹوں،بازاروں میں 64ہزار546،انسپکشنز کرکے گرانفروشوں کو 2کروڑ 74لاکھ 86ہزار350روپے جرمانہ کیا گیا جبکہ پرائس کنٹرول ایکٹ کی سنگین خلاف ورزی پر 606،افراد کے خلاف مقدمات درج کرائے گئے۔اجلاس کے دوران پاکستان سٹیزن پورٹل پر موصول ہونے والی شکایات کے ازالہ کے اقدامات کا بھی جائزہ لیا گیا۔ڈویژنل کمشنر نے زیرالتواء شکایات پر برہمی کا اظہار کیا اور کہا کہ متعلقہ محکمے ذمہ داری کا مظاہرہ کریں اس ضمن میں تاخیر کی صورت میں متعلقہ افسران جواب دہ ہوں گے۔انہوں نے کہا کہ موجودہ حکومت کے اس سسٹم کے ذریعے مختلف محکموں سے متعلقہ عوام کے مسائل تیزی سے حل ہورہے ہیں تاہم کسی شکایت کے حل میں تاخیر کی وجہ سے آگاہ کریں اور محکمانہ رکاوٹ کو دور کرنے کیلئے اقدامات میں دیرنہ کی جائے۔

فیصل آباد (اے پی پی):عید الاضحی کے سلسلہ میں قربانی کے جانوروں کی خرید و فروخت کیلئے شہریوں اور بیوپاریوں کو انتظامی لحاظ سے جامع و منظم اور محفوظ سہولیات فراہم کی جائیں جبکہ اس ضمن میں ماڈل مویشی منڈی میں مویشیوں کے رش کے پیش نظر تمام ترانتظامات ضروری تقاضوں کے مطابق ہونے چاہئیں۔ یہ بات کمشنر فیصل آباد ڈویژن محمود جاوید بھٹی نے کمشنر آفس میں ایک اجلاس کے دوران قربانی کے جانوروں کی خرید و فروخت کے حوالے سے ضروری انتظامات کا جائزہ لیتے ہوئے کہی۔اس موقع پر تمام متعلقہ حکام بھی موجود تھے۔انہوں نے ماڈل کیٹل مارکیٹ میں عید الاضحی کے حوالے سے دستیاب سہولیات کا جائزہ لیا اور ہدایت کی کہ نیاموآنہ ماڈل مارکیٹ جانوروں کی خرید و فروخت کے سلسلے میں بڑا مرکز ہے لہٰذ ا تمام تر ضروری انتظامات عیدالاضحی تک برقرار رہنے چاہئیں۔ انہوں نے کہا کہ مویشی منڈی نیاموآنہ میں بڑے چھوٹے جانوروں کیلئے جگہ کی مناسب ترتیب ہونی چاہئے تاکہ خریداروں کیلئے آسانی اور نظم و ضبط برقرار رہے۔ انہوں نے صفائی ستھرائی‘ لائٹنگ‘ سکیورٹی کے انتظامات‘ ڈسپنسری‘ بیوپاریوں کیلئے قیام گاہوں‘ کینٹین سمیت دیگر ضروری انتظامات کے بارے میں بریفنگ لی۔ انہوں نے کہا کہ جدید مویشی منڈیوں کا قیام شعبہ لائیو سٹاک کی ترقی و استحکام کیلئے خوش آئند اقدام ہے جس کو کامیابی سے ہمکنار کرنے کیلئے تمام تر انتظامی ڈھانچے کو مضبوط ہونا چاہئے۔ انہوں نے ڈویژن کی دیگر ماڈل مویشی منڈیوں کو بھی جلد جدید خطوط سے استوار کرنے کی ضرورت پر زور دیا۔ انہوں نے کہا کہ عیدالاضحی کے سلسلے میں ماڈل مویشی منڈی نیاموآنہ میں انتظامات کو تسلسل کے ساتھ چیک کیا جارہا ہے اور اس اہم آپریشن کو کامیابی سے ہمکنار کرنے میں ڈویژنل و ضلعی انتظامیہ کی طرف سے بھر پور معاونت فراہم کی جائے گی۔ انہوں نے بتایا کہ ڈویژن میں عیدالاضحی کے حوالے سے مویشی منڈی نیاموآنہ کے علاوہ دیگر عارضی سیل پوائنٹس کی بھی مکمل مانیٹرنگ کی جارہی ہے۔ انہوں نے کہا کہ لائیو سٹاک کی طرف سے شہر کے داخلی راستوں پر عارضی چوکیاں قائم کی گئی ہیں جہاں جانوروں کی چیچڑوں سے بچاؤ کیلئے ویکسی نیشن کی جارہی ہے تاکہ چیچڑ سے پاک جانور ہی مویشی منڈیوں میں فروخت ہوں۔ جی ایم ایڈمن نے بریفنگ کے دوران پارکنگ ایریاز‘ پینے کے پانی‘ فوڈ پوائنٹس‘ واش رومز‘ لائٹس‘ ٹریفک پلان‘ صفائی ستھرائی اور دیگر اقدامات سے آگاہ کیا جبکہ اجلاس کے دوران ماڈل مویشی منڈی ملوآنہ جھنگ اور تاندلیانوالہ کے معاملات بھی زیر بحث آئے۔

فیصل آباد (اے پی پی):ماہرین لائیو سٹاک اینڈ ڈیری ڈویلپمنٹ نے ملک میں گوشت اور اون کی بڑھتی ہوئی طلب کے باعث لائیو سٹاک فارمرز اور دیہاتیوں و کسانوں کو ہدائت کی ہے کہ وہ زیادہ گوشت اور اچھی اون کیلئے بھیڑوں کی علاقائی نسلیں پالنے کو ترجیح دیں اور اس سلسلہ میں محکمہ لائیو سٹاک کے فیلڈ سٹاف کی مشاورت کو بھی یقینی بنایا جائے تاکہ وہ زیادہ سے زیادہ مالی فائدہ حاصل کر سکیں۔ انہوں نے لائیو سٹاک فارمرز کو ہدائت کی کہ بھیڑوں کے باڑے کو سطح زمین سے 2فٹ اونچا رکھا جائے، بھیڑوں کو کرم کش ادویات ہر 4ماہ بعد پلوائی جائیں اور اون کی کترائی موسم بہار اور موسم خزاں میں سال میں 2بار کروائی جائے۔ا نہوں نے کہا کہ بھیڑوں بکریوں کو بیماریوں سے محفوظ رکھنے کیلئے محکمہ کی ہدایات کے مطابق حفاظتی ٹیکے لگوائیں جائیں اور حاملہ بھیڑوں کو آخری ماہ میں ریوڑ سے الگ کر کے انہیں زود ہضم غذا کی فراہمی کو بھی اولین ترجیح دی جائے۔انہوں نے کہا کہ اس ضمن میں حکومت کی جانب سے ایک فری ہیلپ لائن بھی قائم کی گئی ہے لہٰذا لائیو سٹاک فارمرز یا دیگر سٹیک ہولڈرز صبح 8سے رات 8بجے تک مذکورہ ہیلپ لائن 0800-78685 پر مفت رابطہ کر سکتے ہیں۔