Category: فیصل آباد

فیصل آباد ( نمائندہ باغی ٹی وی )ڈویژنل کمشنر محمود جاوید بھٹی نے کہا ہے کہ وطن عزیز کو مستحکم بنانے کے لئے نوجوان طلباء کا کردار بڑی اہمیت کا حامل ہے جن میں عزم وہمت اور حب الوطنی کا جذبہ بیدار رہنا چاہئے تاکہ پاکستان کو درپیش مختلف نوعیت کے چیلنجز کا مقابلہ کرکے امن وترقی کی راہ میں رکاوٹوں کو دور کیا جاسکے۔انہوں نے یہ بات مرکزی علماء کونسل پنجاب کے زیراہتمام جامعہ قاسمیہ غلام محمد آباد میں منعقدہ”استحکام پاکستان طلباء سیمینار“سے خطاب کرتے ہوئے کہی۔آر پی او غلام محمود ڈوگر،ارکان صوبائی اسمبلی چوہدری لطیف نذر،میاں خیال کاسترو،اسسٹنٹ کمشنر(جنرل)مصور خاں نیازی،چیئرمین مرکزی علماء کونسل صاحبزادہ زاہد محمود قاسمی ودیگر قائدین مولانا شبیر احمد عثمانی،حافظ محمد امجد،میاں طیب ایڈووکیٹ،حافظ محمد طیب قاسمی،مولانا مشتاق لاہوری،حافظ مقبول،مولانا عمر قاسمی،مولانا اعظم فاروق،مولانا عابد فاروقی،مولانا یاسر علوی،مولانا نعیم طلحہ،مولانا قاسم فاروقی،مولانا ثاقب عزیز،قاری ممتاز احمد،مولانا عامر اشرف،مولانا اسحاق ڈھڈی،علامہ حفیظ الرحمن کشمیری،حافظ سعید میو،مولانا رسال الدین آزاد،پیر عبدالقیوم نقشبندی،مولانا قاسم عمار ودیگر کے علاوہ بڑی تعداد میں مدرسہ کے طلباء اس موقع پر موجود تھے۔ڈویژنل کمشنر نے دینی مدرسہ میں استحکام پاکستان طلباء سیمینار کے انعقاد کے سلسلے میں منتظمین کی عمدہ سوچ اور کاوشوں کو سراہتے ہوئے کہا کہ ہمیں عالمی سطح پر پاکستان کے سافٹ امیج کے لئے اعلیٰ اخلاقی اقدار کا مظاہرہ کرنا ہوگا۔انہوں نے کہا کہ دشمن کی ریشہ دوانیوں کا مقابلہ کرنے کے لئے اپنی صفوں میں اتحاد ویکجتہی کو برقرار رکھیں اور کسی بھی تعصب یا گروہ بندی کو بالائے طاق رکھتے ہوئے نفرتوں کو مٹا کر محبت ویگانگت کی فضاء کو تقویت دی جائے۔انہوں نے طلباء کو تاکید کی کہ وہ کسی بھی آلودہ باتوں کا اثر نہ لیں اور اپنی سوچ وکردار کی سمت درست رکھتے ہوئے حصول علم پر گہری توجہ مرکوزکریں۔آر پی او غلام محمود ڈوگر نے خطاب کرتے ہوئے کہا کہ پاکستان کلمہ طیبہ کی بنیاد پر قائم ہوا اور اللہ تعالیٰ اس کا حامی وناصر ہے لیکن ہمیں استحکام پاکستان کے لئے بھرپور محنت و قومی خدمت کا پختہ عزم کرنا چاہیے۔انہوں نے کہا کہ نوجوان طلباء اس ملک کی اندرونی اور نظریاتی سرحدوں کے محافظ ہیں لہذا انہیں منفی قوت کو منہ توڑ جواب دینا چاہیے۔انہوں نے کہا کہ دشمن ہمارے درمیان نفاق پیدا کرنے اور نظریاتی سرحدوں میں مداخلت کرکے سوچ بدلنے کی کوشش میں ہیں جن کو ناکام بنانے کے لئے مذہبی ہم آہنگی،ملی وحدت کا مظاہرہ کیا جائے۔انہوں نے یوم آزادی کی تقریبات کے سلسلے میں استحکام پاکستان کے اہم موضوع پر سیمینار کے انعقاد کو سراہا۔ایم پی اے چوہدری لطیف نذر نے کہا کہ پاکستان مشکل دور سے گزر رہا ہے لہذا استحکام پاکستان کے لئے اتحاد واتفاق وقت کا اہم ترین تقاضا ہے۔انہوں نے کہا کہ آزادی کی تقریبات مناتے وقت اپنی سوچ کو صرف جھنڈیوں تک محدود نہیں رکھنا چاہیے بلکہ پاکستان کو مستحکم بنانے کے لئے اپنے حصے کے کردار کو عملی طور پر ثابت کرنا ہے۔انہوں نے وزیراعظم عمران خان کے امریکہ کے کامیاب دورہ کو خراج تحسین پیش کرتے ہوئے قوم کو مبارکباد دی اور کہا کہ پاکستانیوں کو اقوام عالم میں سر اٹھا کر بات کرنے پر فخر حاصل ہواہے۔انہوں نے امن وآشتی ومذہبی رواداری کے فروغ کے سلسلے میں مرکزی علماء کونسل کے کردار کو سراہا۔ایم پی اے میاں خیال کاسترونے کہا کہ قیام پاکستان اور تعمیر پاکستان میں علماء کرام کے کردار کو فراموش نہیں کیا جاسکتا جنہوں نے قوم کی رہنمائی کرتے ہوئے ہمیشہ امن وسلامتی اور بھائی چارے کو مقدم رکھا تاہم استحکام پاکستان کی راہ میں حائل رکاوٹوں کو دور کرنے کے لئے کالی بھیڑوں کا صفایا کرنا ہوگا۔انہوں نے طلباء کی ذہنی آبیاری کے لئے سیمینار کے انعقاد کو خوش آئند قرار دیا۔صاحبزادہ زاہد محمود قاسمی نے سیمینار میں شرکت کرنے پر تمام مہمانوں کا شکریہ ادا کیا اور بتایا کہ مرکزی علماء کونسل پنجاب کے زیر اہتمام قومی وحدت کے فروغ اور قیام پاکستان میں جانوں کا نذرانہ پیش کرنے والے اکابرین کو خراج عقیدت پیش کرنے کیلئے یکم سے 14،اگست تک مختلف شہروں میں استحکام پاکستان سیمینارز کا انعقاد کیا جارہا ہے۔انہوں نے اپنے اس عزم کو دہرایا کہ پاکستان کی سلامتی،عزت وتوقیر پر آنچ نہیں آنے دی جائے گی اور مرکزی علماء کونسل فرقہ واریت،انتہاپسندری اور دہشت گردی کے خاتمے کے لئے حکومت کے شانہ بشانہ کردار ادا کرے گی۔انہوں نے بتایا کہ پیغام پاکستان اعلامیہ کے تحت تمام مکاتب فکر کے 18سو سے زائد علماء کرام و مشائخ عظام کے متفقہ فتوی کے مطابق ریاست کے خلاف ہتھیار اٹھانا اور خود کش حملوں کو حرام قرار دیا گیا ہے۔اس سلسلے میں علماء کرام اتحاد بین المسلمین اوراتحاد وملت کے لئے ہمہ تن سرگرم عمل ہیں۔سیمینار سے میاں محمد طیب ایڈووکیٹ ودیگر مقررین نے بھی خطاب کیا اور کہا کہ پاکستان بے شمار قربانیوں سے حاصل کیاگیا تھا جس کے تحفظ کے لئے پوری قوم متحد ہے۔ قبل ازیں جامعہ قاسمیہ میں زیر تعلیم طلباء کے گروپ نے خوش الحانی سے ملی نغمہ پیش کیا اور بعدازاں ملک وقوم کی ترقی وخوشحالی‘قومی یکجہتی اور امن وآشتی کے لئے دعا اور شہدائے پاکستان کی ارواح کے ایصال ثواب کے لئے فاتحہ خوانی کی گئی۔

فیصل آباد (نمائندہ باغی ٹی وی )پلانٹ فار پاکستان مہم کے سلسلے میں زونل ایڈمنسٹریٹر اوقاف ایاز لاشاری نے عید گاہ ماڈل ٹاؤن میں پود لگایا۔ اس موقع پر زونل خطیب قاری فتح محمد راشدی‘ مینجر اوقاف محسن حسنین اور امام مسجد سمیت مقامی شہری بھی موجود تھے۔ زونل ایڈمنسٹریٹر اوقاف نے اظہار خیال کرتے ہوئے درختوں کی اہمیت پر روشنی ڈالی اور کہا کہ محکمہ اوقاف کے زیر اہتمام ڈویژن بھر میں مزارات اور محکمہ اوقاف کی دستیاب اراضی پر زیادہ سے زیادہ شجرکاری کی جائے گی۔ انہوں نے کہا کہ محکمہ اوقاف کے زیر اہتمام مساجد کے آئمہ حضرات سے کہا گیا ہے کہ وہ اپنے خطبات میں شجرکاری کا درس دیں کیونکہ درخت لگانا صدقہ جاریہ ہے۔ انہوں نے شہریوں سے کہا کہ وہ درخت لگانے کے کار ثواب میں ضرور حصہ لیں۔

فیصل آباد (نمائندہ باغی ٹی وی )وزیر اعظم عمران خان کے ویژن کے مطابق پلانٹ فار پاکستان مہم کے سلسلے میں ڈویژن بھر میں 8 لاکھ پودے لگائے جائیں گے جس کا افتتاح محکمہ جنگلات کے زیر اہتمام گٹ والا فاریسٹ پارک میں بیک وقت مختلف اقسام کے پانچ سو پودے لگا کر کیا گیا۔ ڈویژنل کمشنر جاوید محمود بھٹی نے اس موقع پر گاب کا پودا لگا کر مہم کا افتتاح کیا۔ ڈویژنل فاریسٹ آفیسر وجہیہ الدین احمد‘ ڈائریکٹر زراعت چوہدری عبدالحمید‘ اسسٹنٹ کمشنر (جنرل) مصور خان نیازی‘ کنزرویٹر فاریسٹ سردار فدا حسین‘ ڈائریکٹر فاریسٹ ریسرچ انسٹی ٹیوٹ گٹ والا سردار ثناء‘ ڈی ایف او ریسرچ انوار الحق اس موقع پر موجود تھے جنہوں نے اپنے سٹاف اور سول سوسائٹی کے افراد کے ہمراہ پودے لگائے۔ ڈویژنل کمشنر محمودجاوید بھٹی نے اظہار خیال کرتے ہوئے کہا کہ پلانٹ فار پاکستان مہم حکومت پنجاب کا انقلابی قدم ہے کیونکہ درختوں کی کمی پورا کرنے کے لئے وسیع بنیادوں پر شجرکاری کی ضرورت ہے لہذا ہر شہری کو پودا لگا کر اپنا قومی فرض ادا کرنا چاہئے۔ انہوں نے کہا کہ سر سبز پاکستان کی منزل حاصل کرنے کے لئے عزم و جذبے کے ساتھ پودے لگا کر ان کی بھر پور انداز میں آبیاری کی جائے۔ انہوں نے محکمہ جنگلات کے افسران سے کہا کہ وہ شجرکاری کے لئے شہریوں میں احساس و ترغیب پیدا کرنے کے لئے بھر پور آگاہی مہم پر عمل کریں اور درخت لگانے کے متعلق مکمل تکنیکی رہنمائی کی جائے۔ انہوں نے کہا کہ فیصل آباد ڈویژن میں چاروں اضلاع کی انتطامیہ پی ایچ اے‘ مختلف سرکاری محکموں‘ نجی اداروں کی طرف سے پودے لگا کر مقررہ اہداف حاصل کئے جائیں گے اس سلسلے میں شجرکاری تحریک شروع کر دی گئی ہے۔ ڈویژنل فاریسٹ آفیسر وجہیہ الدین احمد نے بتایا کہ رواں شجرکاری مہم کے دوران محکمہ جنگلات کے زیر اہتمام ضلع فیصل آباد میں ایک لاکھ 20 ہزار‘ٹوبہ ٹیک سنگھ میں دو لاکھ 80 ہزار‘ جھنگ میں دو لاکھ 75 ہزار اور ضلع چنیوٹ میں ایک لاکھ 25 ہزار پودے لگائے جائیں گے۔ انہوں نے بتایا کہ شہریوں کی معلومات کے لئے ڈویژن کے مختلف مقامات پر آگاہی کیمپس لگائے گئے ہیں۔ انہوں نے بتایا کہ شجرکاری کی معلومات پر مبنی شہریوں میں پمفلٹس بھی تقسیم کئے جارہے ہیں۔

فیصل آباد ( نمائندہ باغی ٹی وی ) محکمہ لائیوسٹاک نے ڈویژن کے چاروں اضلاع کے داخلی و خارجی راستوں پر قائم عارضی چیک پوسٹ پر گزشتہ ایک ہفتے کے دوران 16 ہزار 784 جانوروں کو چچڑوں سے بچاؤ کا سپرے کیا جبکہ ممکنہ سیلابی علاقوں میں 32 لاکھ60ہزار235چھوٹے بڑے جانوروں کو منہ کھر، گل گھوٹو، چوڑے مار کے حفاظتی ٹیکہ جات لگائے جا چکے ہیں ۔ ڈائریکٹر لائیو سٹاک ڈاکٹر محمود اختر نے بتایا کہ 27لاکھ 753 بڑے اور 5لاکھ45ہزار482چھوٹے جانوروں کی ویکسینیشن کی گئی ہے۔ انہوں نے فیلڈ سٹاف کو ہدایت کی کہ وہ اپنے فرائض ذمہ داری سے انجام دیں۔انہوں نے ما ہا نہ کار کردگی رپور ٹس کا بھی جائزہ لیااور ہدایت کی کہ مویشی پال حضرات کو فراہم کی جا نے سہولیات میں تعطل نہیں آنا چاہئے۔

فیصل آباد ( نمائندہ باغی ٹی وی ) چائلڈ پروٹیکشن اینڈ ویلفیئر بیورو کے زیر اہتمام بچوں کے تحفظ کے حوالے سے شعور اجاگر کرنے کے لئے آگاہی واک منعقد ہوئی جو کوہ نور پلازہ جڑانوالہ روڈ سے شروع ہو کر مختلف راستوں سے ہوتی ہوئی واپس اسی مقام پر پہنچ کر اختتام پذیر ہوئی۔واک کی قیادت ڈسٹرکٹ آفیسر چائلڈ پروٹیکشن اعجاز اسلم ڈوگر نے کی جبکہ ڈی ایس پیز ٹریفک ساجدہ اعوان‘ زاہدہ پروین‘ سماجی رہنما ڈاکٹر جعفر حسن مبارک‘ چائلڈ پروٹیکشن آفیسر روبینہ اقبال چیمہ‘ وقاص وڑائچ‘ عبدالقیوم کے علاوہ این جی اوز کے نمائندے اور شہری بھی شریک تھے۔ واک کے شرکاء بچوں نے تعلیم ہمارا بنیادی حق ہے۔ چائلڈ لیبر نامنظور اور دیگر تحریروں پر مشتمل بینرز اور پلے کارڈز اٹھا رکھے تھے۔ اس موقع پر اظہار خیال کرتے ہوئے ڈسٹرکٹ آفیسر نے کہا کہ بچوں کا تحفظ ہم سب کی ذمہ داری ہے اس مقصد کے لئے چائلڈ پروٹیکشن اینڈ ویلفیئر بیورو متحرک ہے اور سڑکوں‘ چوراہوں پر بھیک مانگنے والے بچوں کو تحویل میں لے کر ان کے ورثاء کی کونسلنگ کی جارہی ہے۔ انہوں نے شہریوں سے کہا کہ وہ لاوارث‘ بے سہارا بچوں کے بارے میں ہیلپ لائن 1121 پر اطلاع کریں جنہیں ترجیحی بنیادوں پر ریسکیو کیا جارہا ہے۔ انہوں نے بتایا کہ بیورو میں مقیم بچوں کی تعلیم و تربیت پر خصوصی توجہ مرکوز ہے۔ اس موقع پر چائلڈ پروٹیکشن بیورو کی طرف سے ڈی گراؤنڈ‘ ستیانہ روڈ‘ ریلوے اسٹیشن چوک اور دیگر جگہوں پر شہریوں میں بچوں کے حقوق کے تحفظ کے حوالے سے معلوماتی پمفلٹس بھی تقسیم کئے گئے۔