Category: گلگت بلتستان

گلگت۔ (اے پی پی) پاکستان تحریک انصاف خواتین ونگ گلگت کی سابق سیکرٹری اطلاعات و سینئر رہنماء نیک پروین نے کہا ہے کہ تحریک انصاف نے گلگت بلتستان میں عملی اقدامات اٹھانے کا سلسلہ شروع کیا ہے جس کہ وجہ سے سابقہ ادوار میں محکمہ ایجوکیشن جیسے مقدس محکمے میں نوکریوں کا جمعہ بازار لگانے والے اور آئی ایس سکیورٹی کے نام پر مال بنانے والوں کو شدید پریشانی کا سامنا ہے کیونکہ ان کو معلوم ہوچکا ہے کہ اب ان کا سابقہ دور لگایا گیا لوٹ مار کا بازار گرم اب بند ہوچکا ہے جس کہ وجہ سے ان کی نیندیں حرام ہوچکی ہیں۔ انہوں نے میڈیا کے نمائندوں سے گفتگو کرتے ہوئے کہا کہ گلگت بلتستان میں خواتین کی مخصوص اسمبلی کی سیٹوں پر خواتین کے حقوق کے لئے سیاست کرنے والوں نے آج تک گلگت بلتستان کی آبادی کی 60 فیصد حصہ خواتین کو کچھ نہیں دیا ہے بلکہ ان کے نام پر سیاست کرکے اپنا مال بنایا ہوا ہے۔انہوں نے کہا کہ ان خواتین سابقہ ممبران و موجودہ اسمبلی ممبران کی خواتین کو ڈرہے کہ اب تحریک انصاف کی حکومت آنے کے بعد ان کی بھی فریال تارپور اور مریم نواز کی طرح گلگت بلتستان میں احتساب ہو اور اس احتساب کے خوف سے اوٹ پٹانگ باتیں کرکے لوگوں کی ہمدردیاں حاصل کرنے کی کوشش کرتے ہیں۔ انہوں نے کہا کہ جب تحریک انصاف کی حکومت گلگت بلتستان میں قائم ہوگی تو سابقہ و موجودہ ادوار میں خواتین کی مخصوص نشستوں پر سیاست کرنے والے اور ممبران اسمبلی بن کر لوٹ مار کرنے والی ممبران اسمبلی کا بھی کڑا احتساب ہوگا جسے فریال تارلپور اور مریم نواز کا ہوا ہے، اسی طرح ان کا بھی کڑا احتساب ہوگا۔ انہوں نے کہا کہ تحریک انصاف کی گلگت بلتستان میں گزشتہ روز والا واٹر منجمنٹ کا پراجیکٹ کا فیز۔ٹو پر عملی کام جب شروع ہوجائے گا، تو گلگت بلتستان کی تقدیر بدل جائے گی۔ یہ منصوبہ تقریباً4ارب سے زیادہ کا ہے جس میں وقتاً فوقتاً اضافہ ہوتا رہے گا، اس سے گلگت بلتستان میں زرعی شعبہ میں انقلاب آئے گی اور بالخصوص خواتین کو گھر بیٹھے عزت سے کمانے کا موقع مل جائے گا۔ انہوں نے کہا کہ اس منصوبے کے تمام فنڈز وفاقی حکومت نے اپنے بجٹ سے دیئے ہیں۔ نیک پروین نے مزید کہا ہے کہ تحریک انصاف میں جہانگیر ترین جیسے قابل ترین اور دور اندیشن لیڈر موجود ہیں جو نہ صرف پاکستان بلکہ پوری دنیا سطح پر جانے جانی والی شخصیات ہیں۔ان کا گلگت بلتستان کا دورہ نیک شگون ثابت ہو گا اور انشاء اللہ وہ گلگت بلتستان کے زمینی حقائق اور یہاں کے وسائل اور مسائل پر عمران خان کو مکمل بریفنگ دینگے جس کے بعد وزیراعظم عمران خان اپنے دورے کے موقع پر گلگت بلتستان کے 20 لاکھ عوام کو تاریخ کا سب سے بڑا پیکج دینے کا اعلان کرینگے۔

گلگت۔ (اے پی پی) ڈسٹر کٹ مجسٹریٹ / ڈپٹی کمشنرگلگت نوید احمد سے ضلع گلگت کے نمبرداران نے ملاقات کی اور انہیں اپنے اپنے علاقے کے مسائل سے آگاہ کیا۔ انہوں نے مطالبہ کیا کہ ہمارے علاقوں میں جاری ترقیاتی سکیموں کو جلد از جلد مکمل کیا جائے۔ جس پر ڈی سی گلگت نے تما م نمبرداران کو یقین دہانی کراتے ہوئے کہا کہ سال2019-20کی تمام ترقیاتی سکیموں بر وقت مکمل کیا گیا ہے۔ اِس حوالے سے ڈی سی گلگت نے ڈی ڈی ایل جی اینڈ آر ڈی اور چیف آفیسر ڈسٹرکٹ کونسل کو ہدایات جاری کرتے ہوئے کہا ہے کہ ترقیاتی سکیموں کی حتمی فہرست تینوں سب ڈویژنوں اسسٹنٹ کمشنرز آفس اور ڈی سی آفس کے نوٹس بورڈز پر آویزاں کریں۔ اس کے علاوہ تمام ترقیاتی سکیموں کے کام جلد سے جلد شروع کئے جائیں گے۔ اِ سکے ساتھ ساتھ آئندہ ہونے والے اجلاس میں ضلع گلگت کے تمام نمبرداران بھی شرکت کرینگے۔ اجلاس میں تمام مسائل زیر بحث لاکر اْن کو بھر وقت پایہ تکمیل تک پہنچایا جائے گااور کمشنر گلگت ڈویڑن عثمان احمد کی زیر صدارت اجلاس منعقد ہوگی۔

سکردو سے راولپنڈی جانے والی بس کو پیش آنے والے حادثہ میں 27 افراد جاں بحق 13 زخمی ہوئے ہیں اس پر پوری پاکستانی قوم غم سے دوچار ہے، اس دوران پاک فوج کی جانب سے فوری ریسکیو آپریشن کیا گیا،

باغی ٹی وی کی رپورٹ کے مطابق ریسکیو آپریشن کے دوران ایف سی این اے کے کمانڈر کی تصاویر بھی منظر عام پر آئی ہیں جن میں وہ زخمیوں کو طبی امداد کی فراہمی میں پیش پیش ہیں، ایک تصویر میں انہوں نے ایک زخمی کا سر اپنی گود میں رکھا ہوا ہے اور طبی امداد فراہم کر رہے ہیں، سوشل میڈیا پر وائرل ہونے والی تصویر میں میجر جنرل ڈاکٹر احسان محمود خان خاص طور پر سانحہ بابو سر ٹاپ کے ریسکیو مشن میں پیش پیش نظر آرہے ہیں اور زندگی اور موت سے لڑتے ایک مسافر کا سر جنرل احسان محمود نے اپنی گود میں رکھا ہوا ہے جس کو جائے حادثہ سے ہسپتال منتقل کیا جارہا ہے،

پاک فوج کے اس کردار پر ٹویٹر، فیس بک اور سوشل میڈیا کے دیگر ذرائع پر زبردست خراج تحسین پیش کیا جارہا ہے، صارفین کا کہنا ہے کہ مصیبتیں آفتیں زلزلے حادثے اور سیلاب میں پاک فوج کے چاک و چوبند جوان سب سے پہلے امداد کے لئے پہنچ ہی جاتے ہیں لیکن اب کے فورس کمانڈر گلگت بلتستان میجر جنرل احسان محمود نے لوگوں کے دل جیت لیے، یہ محبت ہے،خلوص ہے مسیحائی ہے اور پاک فوج کا عوام سے مضبوط رشتے کی عکاس سچائی ہے، ہم پاک فوج سے محبت کرتے ہیں،

میجر جنرل ڈاکٹر احسان محمود خان فورس کمانڈ ناردرن ایریاز گلگت کے کمانڈر ہیں، وہ پاک فوج کے 108 ویں سینئر جنرل ہیں، واضح رہے کہ اتوار کے روز سکردو سے راولپنڈی جانے والی مسافر بس بابو سر ٹاپ پر حادثے کا شکار ہو گئی تھی جس میں پاک فوج 10 جوانوں سمیت 27 افراد جاں بحق ہو گئے تھے، پاک فوج نے ریسکیو آپریشن کرتے ہوئے زخمیوں کو ہیلی کاپٹرز کی مدد سے سی ایم ایچ گلگت منتقل کردیا ہے، افواج پاکستان کی طرف سے فی الفور امدادی سرگرمیوں‌ پر پوری قوم کی طرف سے خراج تحسین پیش کیا جارہا ہے،

گلگت۔ (اے پی پی) گلگت شہر کے مضافاتی علاقے سکوار میں پانی کی طویل بندش کے خلاف خواتین اور مرد وں نے شاہراہ قراقرم پر دھرنا دے دیا اور ہر قسم کی ٹریفک کے لیئے مصروف ترین شاہراہ کو بند کر کے محکمہ واسا کے خلاف شدید نعرے بازی کی۔مظاہرین نے پانی کی بندش کومحکمہ واسا کی غفلت قرار دیتے ہوئے کہا کہ محکمہ واسا کی نا اہلی سے ہم ذہنی مریض بن گئے ہیں جب تک پانی کے حوالے سے یقین دہانی نہیں کرائی جا تی ہے ہم دھرنا ختم نہیں کرینگے خواتین اور مردوں نے سکوار چونگی کے مقام پر کئی گھنٹوں تک احتجاج کیا اور اس دوران محکمہ واسا کو دہائی دیتے رہے۔شاہراہ قراقرم کی بندش کے بدولت مسافروں کو مشکلات کا سامنا کرنا پڑا بعد ازاں ذمہ داران کی جانب سے پانی فراہم کرنے کی یقین دہانی کرانے پر دھرنا ختم کر دیا۔

گلگت۔ 19 ستمبر (اے پی پی) گلگت ایئر پورٹ کے رن وے کو توسیع دینے کا فیصلہ، پی سی ون پر کام شروع کر دیا گیا۔ ذمہ دار ذرائع کے مطابق گزشتہ ماہ گلگت ایئرپورٹ کے رن وے پر ایک اے ٹی آر طیارے کے پھسلنے کے بعد پی آئی اے اور سول ایوی ایشن اتھارٹی کے ماہرین نے یہ رپورٹ دی کہ اگر رن وے کی لمبائی زیادہ ہوتی تو یہ حادثہ نہ ہوتا۔ ذرائع کے مطابق مذکورہ طیارے کے حادثے اور موجودہ ملکی صورتحال کے پیش نظر گلگت ایئرپورٹ کے رن وے کو سٹی پارک تک توسیع دینے کا فیصلہ کرتے ہوئے باقاعدہ طور پر پی سی ون پر کام بھی شروع کر دیا گیا ہے۔ واضح رہے کہ کہ سابق صدر پرویز مشرف کے دور حکومت میں رن وے کی توسیع کیلئے سول ایوی ایشن اتھارٹی نے زمین بھی خریدی تھی مگر بعد ازاں رن وے کی توسیع کام نہ ہو سکا جس پر صوبائی حکومت نے رن وے کی توسیع کیلئے خریدی گئی اراضی پر سٹی پارک بنادیا اور موجودہ صوبائی حکومت نے حال ہی میں سٹی پارک کو مزید خوبصورت بنانے کیلئے تزئین و آرائش بھی کی ہے۔

گلگت۔ (اے پی پی) جی بی ڈی ایم اے کے ملازمین کی ہڑتال چوتھے روز میں داخل ہوگئی۔تمام اضلاع کے جی بی ڈی ایم اے کے اسسٹنٹ ڈائرکٹروں سمیت دیگر ملازمین دفاتروں پر تالے لگا کر گلگت میں دھرنا دیے ہوئے ہیں ملازمین کا کہنا ہے کہ حکومت کا جی بی ڈی ایم اے کے ملازمین کے ساتھ سوتیلی ماں جیسا سلوک ہورہا ہے صوبائی حکومت نے ڈاکٹروں کو ریگولرکرنے کا فیصلہ کرلیا ہے مگر ایمرجنسی اور قدرتی آفات میں اپنی جانوں پر کھیل کر دوسروں کی جان بچانے والے جی بی ڈی ایم اے کے ملازمین ریگولر نہ ہونے کی وجہ سے مشکلات کا شکار ہورہے ہیں۔ملازمیں کا کہنا ہے کہ گزشتہ روز وزیراعلی گلگت بلتستان نے جی بی ڈی ایم اے ملازمین کے ساتھ ملاقات کرنے اور ریگولر کرنے کی یقین دہانی کرائی تھی مگر وزیر اعلی کے ساتھ ملاقات نہ ہونے کی وجہ سے جی بی ڈی ایم اے کے ملازمین نے مستقلی کے لئے کورٹ سے رجوع کرنے کا فیصلہ کرلیا ہے اور جب تک ریگولر ہونے کے احکامات صادر نہیں ہوجاتے تب تک ہڑتال جاری رہے گی۔ جی بی ڈی ایم اے کے ملازمین کا کہنا ہے کہ وہ بھی مستقل ہونے کا اتنا ہی حق رکھتے ہیں جیسے کے دوسرے محکموں کے ملازمین اسلئے ان کو بھی ریگولر کیا جائے۔

گلگت۔ (اے پی پی) راولپنڈی سے گلگت آنے والی مزدا گاڑی قراقرم ہائی وے پر چھموگڑھ کے قریب سڑک سے پھسل کر دریا میں گرگئی، ڈرائیور لاپتہ ہو گیا۔ریسکیوذرائع کے مطابق مزدا گاڑ ی گہری کھائی سے گرکر دریا برد ہوئی۔ جائے حادثہ پردودھ کے ڈبے پڑے ہو ئے تھے جس پر مقامی لوگوں کی نشاندہی پر ریسکیو 1122موقع پر پہنچ گئی اور مزدا گاڑی کو دریا سے نکال کر کنارے پر لایا گیا، مزدا گاڑی مقامی کمپنی کی تھی جس میں دودھ لایاجارہا تھا گاڑی میں ڈارئیور اکیلا تھا جو پنڈی سے گلگت کے لئے دودھ لیکر آرہا تھا۔مقامی لوگوں کی اطلاع پر ریسکیو1122کی ٹیمیں جائے حادثہ پہنچیں اور ریسکیو ذرائع کے مطابق گاڑی کا ڈرائیور دریا میں گر نے کے بعد سے لاپتہ ہے اور اس کی تلاش جاری ہے۔

گلگت(اے پی پی) سپیکر گلگت بلتستان اسمبلی حاجی فدا محمد ناشاد نے محرم الحرام کے حوالے سے اپنے بیان میں کہا ہے کہ یہ مقدس مہینہ اقوام عالم کو سید الشہدا حضرت امام حسین علیہ السلام اور ان کے جان نثار ساتھیوں کی اسلام کی بقا، حق کی سر بلندی اور باطل کے عزائم کو خاک میں ملانے کی خاطر دی ہوئی قربانیوں کی یاد دلا رہا ہے۔ کربلا کے اس مختصر لیکن بہادر قافلے کا درس، ظلم کا مقابلہ صبر و شجاعت سے کرنا ہے، چاہے ظالم کتناہی طاقتور کیوں نہ ہو۔ اس درس کربلا پر عمل پیرا ہوتے ہوئے اور کربلا والوں کے نقش قدم پر چلتے ہوئے کشمیری مجاہدین جد و جہد آزادی میں مصروف ہیں۔بھارتی درندہ صفت افواج کشمیر کو ہڑپ کرنے کے لئے اور کشمیریوں کے لبوں سے”کشمیر بنے گا پاکستان”کا نعرہ چھیننے کے لئے ہر قسم کے ناجائز ہتھکنڈے استعمال کر رہے ہیں۔ اس وقت جنت نظیر کشمیر کو بھارت نے عقوبت خانہ بنا دیا ہے، جہاں نسل کشی، قتل و اغوا، انسانی حقوق کی پا مالی اور بربریت سے ایک خونی تاریخ رقم کی جا رہی ہے۔لیکن”اتنا ہی یہ ابھرے گا جتنا کہ دبا دیں گے”کا نعرہ بلند کرتے ہوئے کشمیری مجاہدین ان مظالم کو روکنے کے لئے سینہ سپر ہیں۔ اس موقع پر عالم اسلام اور اسلامی یکجہتی کا نعرہ بلند کرنے والے کئی اسلامی ممالک اور اقوام متحدہ کی جانب سے خاموش تماشائی کا کردار قابل صد افسوس ہے۔ کشمیری عوام کیساتھ یکجہتی کا مظاہرہ کرتے ہوئے گلگت بلتستان میں جگہ جگہ جلسے جلوس میں مصروف رہتے ہوئے ان مظالم کی پر زور مذمت کا سلسلہ جاری ہے۔ سپیکر نے کہا ہے کہ محرم کا یہ مقدس مہینہ ہمیں امن و آشتی، صبر و تحمل اور ایثار و قربانی کا درس دے رہا ہے۔ الحمدللہ گزشتہ کئی سالوں سے گلگت بلتستان امن کا گہوارہ بنا ہوا ہے۔ اس ماحول کو قائم کرنے میں صوبائی حکومت کی کاوشیں اور عوام کی جانب سے تعاون قابل قدر ہے۔ جسے جاری رکھنے کے لئے اب بھی حکومت اور عوام کا تعاون درکار ہے۔ سپیکر نے امید ظاہر کی ہے کہ انشااللہ اب بھی حکومت اور عوام اس مقدس ماہ کے دوران قیام امن کو یقینی بنانے کے لئے باہمی تعاون سے کام لیتے ہوئے آگے بڑھیں گے۔

گلگت (اے پی پی) دفعہ 144 کی خلاف ورزی کرنے پر سدپارہ کے 8 افراد کو پکڑ کر جیل بھیج دیا گیا جبکہ 3 ملزمان کی ضمانتیں ضبط کردی گئیں۔ سب ڈویڑنل مجسٹریٹ سکردو حافظ کریم داد چغتائی نے میڈیا کو جاری اپنے ایک بیان میں کہاہے کہ سدپارہ سے تعلق رکھنے والے 8 افراد کو دفعہ 144 کی خلاف ورزی کرنے پر جیل بھیج دیا گیا جبکہ 3 افراد کی زر ضمانت ضبط کر لیے گئے ہیں۔ سدپارہ سے تعلق رکھنے والے ان افراد نے گزشتہ دنوں سدپارہ روڈ کو بلاک کیا تھا اور عوام الناس کو تکلیف دی تھی۔ نیز ان کے خلاف دفعہ 151/107کی کارروائی کرتے ہوئے ملزمان کو عرصہ تین سال کے لیے پابند ضمانت کیا ہوا تھا اب پابند ضمانت کے خلاف ورزی کرنے پر 8 افراد کو جیل بھیج دیا گیا ہے کہ 3 افراد کا زر ضمانت منسوخ کرکے داخل خزانہ کردیا گیا ہے۔ انہوں نے مزید کہا کہ سرکاری روڈ بلاک کرنے والے اور دفعہ 144کی خلاف ورزی کرنے والے مزید 100 افراد کی تلاش جاری ہے اور ان کو بھی جلد گرفتار کر لیا جائے گا۔ انہوں نے مزید کہا کہ قانون کی خلاف ورزی کرنے والوں کو کسی صورت نہیں چھوڑیں گے اور سخت سے سخت کارروائی عمل میں لائی جائے گی۔ انہوں نے کہا کہ سدپارہ لوگوں نے سرکاری روڈ کو بلا وجہ بلاک کر کے عوام الناس اور سیاحوں کو تکلیف دی تھی اور دفعہ 144 کی خلاف ورزی بھی کی تھی۔