Category: گلگت بلتستان

‎چلاس: گلگت بلتستان کے ضلع دیامر میں گزشتہ رات مختلف وادیوں میں آنے والے شدید سیلابی ریلوں نے بڑے پیمانے پر تباہی مچا دی، جس کے نتیجے میں مکانات، زرعی زمینیں، رابطہ پل، آبی گزرگاہیں اور دیگر بنیادی ڈھانچے کو شدید نقصان پہنچا، جبکہ شاہراہِ قراقرم مختلف مقامات پر لینڈ سلائیڈنگ کے باعث ٹریفک کے لیے بند ہو گئی۔
‎مقامی پولیس کے مطابق بارشوں کے بعد اچانک آنے والے سیلابی ریلوں نے متعدد دیہات کو متاثر کیا، جہاں کئی مکانات کو نقصان پہنچا، درخت جڑوں سے اکھڑ گئے، فصلیں تباہ ہو گئیں، پن چکیاں بہہ گئیں اور آبپاشی کے لیے استعمال ہونے والے واٹر چینلز بھی شدید متاثر ہوئے۔ مختلف علاقوں میں رابطہ پلوں کو بھی نقصان پہنچنے سے مقامی آبادی کو آمدورفت میں مشکلات کا سامنا ہے۔
‎چلاس میں گورنر فارم نرسری کے قریب سیلابی ریلے اور لینڈ سلائیڈنگ کے باعث شاہراہِ قراقرم گزشتہ رات سے ہر قسم کی ٹریفک کے لیے بند ہے۔ شاہراہ کی بندش کے نتیجے میں دونوں اطراف سینکڑوں گاڑیاں پھنس گئی ہیں، جبکہ مسافروں کو شدید مشکلات کا سامنا کرنا پڑ رہا ہے۔
‎رپورٹس کے مطابق پھنسے ہوئے مسافروں میں خواتین، بچے اور بزرگ بھی شامل ہیں، جو کئی گھنٹوں سے شاہراہ کھلنے کے منتظر ہیں۔ مسافروں نے حکومت اور متعلقہ اداروں سے مطالبہ کیا ہے کہ شاہراہِ قراقرم کو جلد از جلد بحال کیا جائے تاکہ وہ اپنی منزل کی جانب روانہ ہو سکیں۔
‎ضلعی انتظامیہ، پولیس، ریسکیو ادارے اور دیگر متعلقہ محکمے متاثرہ علاقوں میں امدادی سرگرمیوں میں مصروف ہیں۔ حکام کے مطابق نقصانات کا مکمل تخمینہ لگانے کا عمل جاری ہے، جبکہ سڑکوں کی صفائی، لینڈ سلائیڈنگ کا ملبہ ہٹانے اور متاثرہ پلوں کی بحالی کے لیے بھاری مشینری استعمال کی جا رہی ہے۔
‎انتظامیہ نے عوام سے اپیل کی ہے کہ خراب موسم کے دوران غیر ضروری سفر سے گریز کریں اور صرف سرکاری ذرائع سے جاری کردہ سفری ہدایات پر عمل کریں۔ حکام کا کہنا ہے کہ صورتحال پر مسلسل نظر رکھی جا رہی ہے اور شاہراہِ قراقرم کو محفوظ قرار دیے جانے کے بعد ہی ٹریفک کے لیے کھولا جائے گا۔

گلگت بلتستان کے ضلع ہنزہ میں مبینہ موبائل فراڈ میں ملوث سیاح کو دیامر پولیس نے بروقت کارروائی کرتے ہوئے گرفتار کر لیا۔ ملزم کے خلاف ہنزہ کے علی آباد تھانے میں مقدمہ درج کر لیا گیا ہے، جبکہ مزید قانونی کارروائی جاری ہے۔

پولیس کے مطابق ہنزہ میں دبئی موبائل شاپ کے مالک معیز نے پنجاب سے تعلق رکھنے والے سیاح محمد علی ولد محمد ایاز کے خلاف ایف آئی آر درج کرائی۔ درخواست میں مؤقف اختیار کیا گیا کہ ملزم نے دکان سے آئی فون 14 پرو خریدا اور آن لائن ادائیگی کرنے کا دعویٰ کرتے ہوئے ٹرانزیکشن کا اسکرین شاٹ دکھایا، تاہم کافی انتظار کے باوجود رقم دکاندار کے اکاؤنٹ میں منتقل نہ ہوئی۔شکایت کے مطابق ملزم نے بتایا تھا کہ وہ سرینا ہوٹل ہنزہ میں مقیم ہے، لیکن جب رقم موصول نہ ہونے پر دکاندار ہوٹل پہنچا تو معلوم ہوا کہ وہ وہاں سے جا چکا ہے۔ ہوٹل انتظامیہ کے مطابق ملزم نے وہاں بھی ادائیگی کے لیے مبینہ طور پر جعلی اسکرین شاٹ دکھایا تھا۔دکاندار کا کہنا ہے کہ اسی دوران ایک اور متاثرہ شخص بھی سامنے آیا، جس نے دعویٰ کیا کہ اسی سیاح نے اسے بھی 75 ہزار روپے کی مبینہ آن لائن ادائیگی کا جعلی ثبوت دکھا کر دھوکہ دیا۔

واقعے کے بعد معیز نے علی آباد تھانے میں مقدمہ درج کرا دیا اور آئی جی پولیس گلگت بلتستان سے اپیل کی کہ ملزم کو فوری گرفتار کر کے صوبے کی حدود سے باہر جانے سے روکا جائے تاکہ متاثرین کا نقصان پورا کیا جا سکے۔ادھر اطلاع ملتے ہی دیامر پولیس نے فوری کارروائی کرتے ہوئے ہنزہ فراڈ کیس میں ملوث سیاح کو شاہراہِ بابوسر ناران پر جل کے مقام سے گرفتار کر لیا۔ ایس پی دیامر کیپٹن (ر) شہریار خان کے مطابق ملزم کو حراست میں لے لیا گیا ہے اور اسے مزید قانونی کارروائی کے لیے متعلقہ حکام کے حوالے کیا جا رہا ہے۔پولیس کا کہنا ہے کہ واقعے کی مختلف پہلوؤں سے تحقیقات جاری ہیں، جبکہ یہ بھی جانچا جا رہا ہے کہ آیا ملزم نے اسی نوعیت کی وارداتیں دیگر علاقوں میں بھی کی ہیں یا نہیں۔

گلگت: پاکستان پیپلز پارٹی کے چیئرمین بلاول بھٹو زرداری کی سربراہی میں وزیراعلیٰ ہاؤس گلگت میں پاکستان پیپلز پارٹی گلگت بلتستان کا ایک اہم اجلاس منعقد ہوا، جس میں صوبے کی سیاسی، انتظامی اور ترقیاتی صورتحال کا تفصیلی جائزہ لیا گیا۔

اجلاس میں چیئرمین بلاول بھٹو زرداری کے ہمراہ گلگت بلتستان کے پہلے گورنر قمر زمان کائرہ اور وزیراعلیٰ گلگت بلتستان امجد حسین ایڈووکیٹ بھی شریک تھے، جبکہ پارٹی کے سینئر رہنماؤں اور عہدیداران نے بھی اجلاس میں شرکت کی۔اجلاس کے دوران پیپلز پارٹی گلگت بلتستان کے عہدیداران نے چیئرمین بلاول بھٹو زرداری کو حالیہ انتخابات سے متعلق اپنی تفصیلی رپورٹ پیش کی اور پارٹی کی تنظیمی سرگرمیوں سمیت انتظامی معاملات میں بہتری کے لیے مختلف تجاویز سے آگاہ کیا۔

اس موقع پر بلاول بھٹو زرداری نے پارٹی رہنماؤں کو ہدایت دیتے ہوئے کہا کہ وہ بند کمروں میں بیٹھنے کے بجائے عوام کے درمیان رہ کر حکومت چلائیں، عوامی مسائل کو براہِ راست سنیں اور ان کے حل کو اولین ترجیح دیں۔
چیئرمین پیپلز پارٹی نے گلگت بلتستان کی ترقی اور عوامی فلاح کے لیے 100 روزہ جامع منصوبہ تیار کرنے کی ہدایت دیتے ہوئے کہا کہ مقررہ مدت مکمل ہونے پر انہیں کارکردگی رپورٹ پیش کی جائے تاکہ ترقیاتی اقدامات کا جائزہ لیا جا سکے۔بلاول بھٹو زرداری نے مزید ہدایت کی کہ حقِ ملکیت سے متعلق قانون سازی پر مؤثر عملدرآمد یقینی بنایا جائے، جبکہ حقِ حاکمیت کے حوالے سے گلگت بلتستان اسمبلی کے پہلے اجلاس میں قرارداد پیش کی جائے تاکہ عوامی حقوق کے تحفظ کے لیے عملی پیش رفت ممکن ہو سکے۔انہوں نے بلدیاتی انتخابات کے انعقاد کے حوالے سے بھی فوری گراؤنڈ ورک مکمل کرنے کی ہدایت کرتے ہوئے کہا کہ مقامی حکومتوں کا مضبوط نظام عوامی مسائل کے حل اور اختیارات کی نچلی سطح تک منتقلی کے لیے ناگزیر ہے۔

اجلاس میں گلگت بلتستان میں پارٹی کی تنظیمی فعالیت، عوامی رابطہ مہم، ترقیاتی ترجیحات اور آئندہ سیاسی حکمت عملی پر بھی تفصیلی غور کیا گیا، جبکہ چیئرمین بلاول بھٹو زرداری نے پارٹی رہنماؤں پر زور دیا کہ وہ عوام کی توقعات پر پورا اترنے کے لیے مؤثر، شفاف اور خدمت پر مبنی طرزِ حکمرانی کو فروغ دیں۔

‎غذر: گلگت بلتستان کے ضلع غذر کے مرکزی علاقے گاہ کوچ کے نواحی گاؤں دماس میں طوفانی بارشوں کے بعد آنے والے سیلابی ریلوں نے بڑے پیمانے پر تباہی مچا دی۔ تیز بارش کے باعث پانی آبادی، بازاروں اور زرعی علاقوں میں داخل ہوگیا، جس سے معمولات زندگی بری طرح متاثر ہوئے۔
‎مقامی ذرائع کے مطابق اچانک آنے والے سیلابی ریلوں نے متعدد گھروں اور دکانوں کو اپنی لپیٹ میں لے لیا، جبکہ نشیبی علاقوں میں پانی جمع ہونے سے شہریوں کو شدید مشکلات کا سامنا کرنا پڑا۔ کئی مقامات پر آمد و رفت بھی متاثر ہوئی۔
‎شدید بارشوں کے باعث کھڑی فصلوں، باغات اور زرعی زمینوں کو بھی نمایاں نقصان پہنچا ہے، جس سے مقامی کاشتکاروں کو بھاری مالی خسارے کا خدشہ ہے۔ متاثرین نے حکومت سے فوری امداد اور نقصانات کے ازالے کا مطالبہ کیا ہے۔
‎انتظامیہ اور متعلقہ اداروں نے متاثرہ علاقوں کی صورتحال کا جائزہ لینا شروع کر دیا ہے، جبکہ ممکنہ مزید بارشوں کے پیش نظر شہریوں کو احتیاط برتنے اور غیر ضروری سفر سے گریز کرنے کی ہدایت کی گئی ہے۔
‎مقامی افراد کا کہنا ہے کہ اگر بروقت حفاظتی اقدامات اور نکاسی آب کے مؤثر انتظامات نہ کیے گئے تو مزید بارشوں کی صورت میں صورتحال مزید سنگین ہو سکتی ہے۔

گلگت: نو منتخب وزیرِ اعلیٰ گلگت بلتستان امجد حسین ایڈووکیٹ نے اپنے عہدے کا باقاعدہ حلف اٹھا لیا۔ حلف برداری کی تقریب میں پاکستان پیپلز پارٹی کے چیئرمین بلاول بھٹو زرداری سمیت پارٹی رہنماؤں، سرکاری حکام اور مختلف شعبہ ہائے زندگی سے تعلق رکھنے والی شخصیات نے شرکت کی۔

حلف اٹھانے کے بعد اپنے خطاب میں وزیرِ اعلیٰ امجد حسین ایڈووکیٹ نے کہا کہ 7 جون کو ہونے والے انتخابات میں پاکستان پیپلز پارٹی گلگت بلتستان کی سب سے بڑی سیاسی جماعت بن کر سامنے آئی، جو عوام کے اعتماد کا واضح اظہار ہے۔انہوں نے کہا کہ 2026ء کے انتخابات میں نوجوانوں اور خواتین نے بھرپور کردار ادا کیا، جس سے جمہوری عمل مزید مضبوط ہوا۔ ان کا کہنا تھا کہ نئی حکومت عوامی توقعات پر پورا اترنے، ترقیاتی منصوبوں کو آگے بڑھانے اور خطے کی خوشحالی کے لیے بھرپور اقدامات کرے گی۔

اس سے قبل چیئرمین پیپلز پارٹی بلاول بھٹو زرداری نے یادگارِ شہداء پر حاضری دی، پھول چڑھائے اور شہداء کے درجات کی بلندی کے لیے فاتحہ خوانی کی۔ بعد ازاں وہ حلف برداری کی تقریب میں شریک ہوئے۔سیاسی مبصرین کے مطابق نئی حکومت کو گلگت بلتستان میں ترقیاتی منصوبوں، روزگار، سیاحت کے فروغ اور بنیادی سہولیات کی فراہمی جیسے اہم چیلنجز کا سامنا ہوگا، جبکہ عوام نئی قیادت سے بہتر طرزِ حکمرانی اور عوامی مسائل کے حل کی توقعات وابستہ کیے ہوئے ہیں۔

گلگت بلتستان کے نو منتخب وزیراعلیٰ امجد ایڈووکیٹ کل وزیراعلیٰ سیکرٹریٹ گلگت میں منعقد ہونے والی ایک پروقار تقریب میں اپنے عہدے کا حلف اٹھائیں گے۔ حالیہ عام انتخابات کے بعد حکومت سازی کا عمل تیزی سے مکمل کیا گیا، جس کے تحت وزیراعلیٰ، اسپیکر اور ڈپٹی اسپیکر کے انتخاب کے مراحل کامیابی سے انجام پائے۔
امجد ایڈووکیٹ نے وزیراعلیٰ کے انتخاب میں ایوان کی اکثریت کا اعتماد حاصل کیا، جس کے بعد اب وہ باقاعدہ طور پر گلگت بلتستان کے نئے وزیراعلیٰ کی حیثیت سے اپنی ذمہ داریاں سنبھالیں گے۔ سیاسی حلقوں کے مطابق نئی حکومت سے عوام کو ترقیاتی منصوبوں، بہتر طرز حکمرانی اور عوامی مسائل کے حل کے حوالے سے مثبت توقعات وابستہ ہیں۔
‎تقریب حلف برداری میں شرکت کے لیے پاکستان پیپلز پارٹی کے چیئرمین بلاول بھٹو زرداری مرکزی قیادت کے ہمراہ گلگت پہنچ چکے ہیں۔ اس موقع پر پارٹی کے سینئر رہنما، منتخب اراکین اسمبلی، کارکنان اور مختلف سیاسی، سماجی اور سرکاری شخصیات کی بڑی تعداد کی شرکت بھی متوقع ہے۔
‎حکام کے مطابق تقریب کے پرامن انعقاد کو یقینی بنانے کے لیے سخت سیکیورٹی انتظامات کیے گئے ہیں۔ وزیراعلیٰ سیکرٹریٹ اور اس کے اطراف میں پولیس، قانون نافذ کرنے والے اداروں اور دیگر سیکیورٹی فورسز کی اضافی نفری تعینات کی گئی ہے، جبکہ داخلی اور خارجی راستوں پر بھی نگرانی مزید سخت کر دی گئی ہے۔
‎سیاسی تجزیہ کاروں کا کہنا ہے کہ نئی حکومت کے قیام کے بعد کابینہ کی تشکیل، اہم انتظامی تقرریوں، ترقیاتی منصوبوں، عوامی فلاحی پروگراموں اور آئندہ حکومتی ترجیحات سے متعلق اہم فیصلوں کا آغاز متوقع ہے۔ اس کے علاوہ وفاق اور گلگت بلتستان حکومت کے درمیان تعاون، سیاحت، بنیادی ڈھانچے، تعلیم، صحت اور روزگار کے شعبوں میں بھی پیش رفت کی توقع کی جا رہی ہے۔

چلاس: گلگت بلتستان کے ضلع چلاس کی تھور ویلی میں اچانک ہونے والے کلاؤڈ برسٹ کے بعد آنے والے شدید سیلابی ریلوں نے مختلف علاقوں میں بڑے پیمانے پر تباہی مچا دی، جس کے نتیجے میں مکانات، باغات، فصلیں، رابطہ پل، گاڑیاں اور قیمتی سامان سیلابی پانی میں بہہ گئے۔

پولیس حکام کے مطابق کلاؤڈ برسٹ کے فوراً بعد آنے والے سیلابی ریلوں نے اپنے راستے میں آنے والی ہر چیز کو شدید نقصان پہنچایا۔ متاثرہ علاقوں میں متعدد رہائشی مکانات، زرعی اراضی، باغات، تیار فصلیں اور بنیادی انفراسٹرکچر تباہ ہو گیا۔سیلابی پانی واپڈا کالونی میں بھی داخل ہوگیا، جس سے کالونی اور اس سے ملحقہ سڑکوں کو شدید نقصان پہنچا، جبکہ تھور میک کے مقام پر واقع ایک مسجد بھی سیلابی ریلے کی زد میں آ گئی۔ادھر تھور شیتن کے علاقے میں وسیع پیمانے پر زرعی زمینیں اور کھڑی فصلیں تباہ ہو گئیں۔ مقامی افراد کے مال مویشی، نقدی اور دیگر قیمتی سامان بھی سیلاب کی نذر ہو گئے، جس سے متاثرین کو بھاری مالی نقصان اٹھانا پڑا۔

پولیس کے مطابق کلاؤڈ برسٹ کے فوراً بعد ریسکیو اور بحالی کی کارروائیاں شروع کر دی گئی تھیں۔ امدادی ٹیموں کی کوششوں سے متاثرہ تھور کے دو اہم مقامات پر رابطہ سڑکیں بحال کر کے ٹریفک کی آمدورفت جزوی طور پر بحال کر دی گئی ہے، جبکہ دیگر متاثرہ علاقوں میں بھی امدادی سرگرمیاں جاری ہیں۔