Category: گلگت بلتستان

گلگت۔ 19 ستمبر (اے پی پی) گلگت ایئر پورٹ کے رن وے کو توسیع دینے کا فیصلہ، پی سی ون پر کام شروع کر دیا گیا۔ ذمہ دار ذرائع کے مطابق گزشتہ ماہ گلگت ایئرپورٹ کے رن وے پر ایک اے ٹی آر طیارے کے پھسلنے کے بعد پی آئی اے اور سول ایوی ایشن اتھارٹی کے ماہرین نے یہ رپورٹ دی کہ اگر رن وے کی لمبائی زیادہ ہوتی تو یہ حادثہ نہ ہوتا۔ ذرائع کے مطابق مذکورہ طیارے کے حادثے اور موجودہ ملکی صورتحال کے پیش نظر گلگت ایئرپورٹ کے رن وے کو سٹی پارک تک توسیع دینے کا فیصلہ کرتے ہوئے باقاعدہ طور پر پی سی ون پر کام بھی شروع کر دیا گیا ہے۔ واضح رہے کہ کہ سابق صدر پرویز مشرف کے دور حکومت میں رن وے کی توسیع کیلئے سول ایوی ایشن اتھارٹی نے زمین بھی خریدی تھی مگر بعد ازاں رن وے کی توسیع کام نہ ہو سکا جس پر صوبائی حکومت نے رن وے کی توسیع کیلئے خریدی گئی اراضی پر سٹی پارک بنادیا اور موجودہ صوبائی حکومت نے حال ہی میں سٹی پارک کو مزید خوبصورت بنانے کیلئے تزئین و آرائش بھی کی ہے۔

گلگت۔ (اے پی پی) جی بی ڈی ایم اے کے ملازمین کی ہڑتال چوتھے روز میں داخل ہوگئی۔تمام اضلاع کے جی بی ڈی ایم اے کے اسسٹنٹ ڈائرکٹروں سمیت دیگر ملازمین دفاتروں پر تالے لگا کر گلگت میں دھرنا دیے ہوئے ہیں ملازمین کا کہنا ہے کہ حکومت کا جی بی ڈی ایم اے کے ملازمین کے ساتھ سوتیلی ماں جیسا سلوک ہورہا ہے صوبائی حکومت نے ڈاکٹروں کو ریگولرکرنے کا فیصلہ کرلیا ہے مگر ایمرجنسی اور قدرتی آفات میں اپنی جانوں پر کھیل کر دوسروں کی جان بچانے والے جی بی ڈی ایم اے کے ملازمین ریگولر نہ ہونے کی وجہ سے مشکلات کا شکار ہورہے ہیں۔ملازمیں کا کہنا ہے کہ گزشتہ روز وزیراعلی گلگت بلتستان نے جی بی ڈی ایم اے ملازمین کے ساتھ ملاقات کرنے اور ریگولر کرنے کی یقین دہانی کرائی تھی مگر وزیر اعلی کے ساتھ ملاقات نہ ہونے کی وجہ سے جی بی ڈی ایم اے کے ملازمین نے مستقلی کے لئے کورٹ سے رجوع کرنے کا فیصلہ کرلیا ہے اور جب تک ریگولر ہونے کے احکامات صادر نہیں ہوجاتے تب تک ہڑتال جاری رہے گی۔ جی بی ڈی ایم اے کے ملازمین کا کہنا ہے کہ وہ بھی مستقل ہونے کا اتنا ہی حق رکھتے ہیں جیسے کے دوسرے محکموں کے ملازمین اسلئے ان کو بھی ریگولر کیا جائے۔

گلگت۔ (اے پی پی) راولپنڈی سے گلگت آنے والی مزدا گاڑی قراقرم ہائی وے پر چھموگڑھ کے قریب سڑک سے پھسل کر دریا میں گرگئی، ڈرائیور لاپتہ ہو گیا۔ریسکیوذرائع کے مطابق مزدا گاڑ ی گہری کھائی سے گرکر دریا برد ہوئی۔ جائے حادثہ پردودھ کے ڈبے پڑے ہو ئے تھے جس پر مقامی لوگوں کی نشاندہی پر ریسکیو 1122موقع پر پہنچ گئی اور مزدا گاڑی کو دریا سے نکال کر کنارے پر لایا گیا، مزدا گاڑی مقامی کمپنی کی تھی جس میں دودھ لایاجارہا تھا گاڑی میں ڈارئیور اکیلا تھا جو پنڈی سے گلگت کے لئے دودھ لیکر آرہا تھا۔مقامی لوگوں کی اطلاع پر ریسکیو1122کی ٹیمیں جائے حادثہ پہنچیں اور ریسکیو ذرائع کے مطابق گاڑی کا ڈرائیور دریا میں گر نے کے بعد سے لاپتہ ہے اور اس کی تلاش جاری ہے۔

گلگت(اے پی پی) سپیکر گلگت بلتستان اسمبلی حاجی فدا محمد ناشاد نے محرم الحرام کے حوالے سے اپنے بیان میں کہا ہے کہ یہ مقدس مہینہ اقوام عالم کو سید الشہدا حضرت امام حسین علیہ السلام اور ان کے جان نثار ساتھیوں کی اسلام کی بقا، حق کی سر بلندی اور باطل کے عزائم کو خاک میں ملانے کی خاطر دی ہوئی قربانیوں کی یاد دلا رہا ہے۔ کربلا کے اس مختصر لیکن بہادر قافلے کا درس، ظلم کا مقابلہ صبر و شجاعت سے کرنا ہے، چاہے ظالم کتناہی طاقتور کیوں نہ ہو۔ اس درس کربلا پر عمل پیرا ہوتے ہوئے اور کربلا والوں کے نقش قدم پر چلتے ہوئے کشمیری مجاہدین جد و جہد آزادی میں مصروف ہیں۔بھارتی درندہ صفت افواج کشمیر کو ہڑپ کرنے کے لئے اور کشمیریوں کے لبوں سے”کشمیر بنے گا پاکستان”کا نعرہ چھیننے کے لئے ہر قسم کے ناجائز ہتھکنڈے استعمال کر رہے ہیں۔ اس وقت جنت نظیر کشمیر کو بھارت نے عقوبت خانہ بنا دیا ہے، جہاں نسل کشی، قتل و اغوا، انسانی حقوق کی پا مالی اور بربریت سے ایک خونی تاریخ رقم کی جا رہی ہے۔لیکن”اتنا ہی یہ ابھرے گا جتنا کہ دبا دیں گے”کا نعرہ بلند کرتے ہوئے کشمیری مجاہدین ان مظالم کو روکنے کے لئے سینہ سپر ہیں۔ اس موقع پر عالم اسلام اور اسلامی یکجہتی کا نعرہ بلند کرنے والے کئی اسلامی ممالک اور اقوام متحدہ کی جانب سے خاموش تماشائی کا کردار قابل صد افسوس ہے۔ کشمیری عوام کیساتھ یکجہتی کا مظاہرہ کرتے ہوئے گلگت بلتستان میں جگہ جگہ جلسے جلوس میں مصروف رہتے ہوئے ان مظالم کی پر زور مذمت کا سلسلہ جاری ہے۔ سپیکر نے کہا ہے کہ محرم کا یہ مقدس مہینہ ہمیں امن و آشتی، صبر و تحمل اور ایثار و قربانی کا درس دے رہا ہے۔ الحمدللہ گزشتہ کئی سالوں سے گلگت بلتستان امن کا گہوارہ بنا ہوا ہے۔ اس ماحول کو قائم کرنے میں صوبائی حکومت کی کاوشیں اور عوام کی جانب سے تعاون قابل قدر ہے۔ جسے جاری رکھنے کے لئے اب بھی حکومت اور عوام کا تعاون درکار ہے۔ سپیکر نے امید ظاہر کی ہے کہ انشااللہ اب بھی حکومت اور عوام اس مقدس ماہ کے دوران قیام امن کو یقینی بنانے کے لئے باہمی تعاون سے کام لیتے ہوئے آگے بڑھیں گے۔

گلگت (اے پی پی) دفعہ 144 کی خلاف ورزی کرنے پر سدپارہ کے 8 افراد کو پکڑ کر جیل بھیج دیا گیا جبکہ 3 ملزمان کی ضمانتیں ضبط کردی گئیں۔ سب ڈویڑنل مجسٹریٹ سکردو حافظ کریم داد چغتائی نے میڈیا کو جاری اپنے ایک بیان میں کہاہے کہ سدپارہ سے تعلق رکھنے والے 8 افراد کو دفعہ 144 کی خلاف ورزی کرنے پر جیل بھیج دیا گیا جبکہ 3 افراد کی زر ضمانت ضبط کر لیے گئے ہیں۔ سدپارہ سے تعلق رکھنے والے ان افراد نے گزشتہ دنوں سدپارہ روڈ کو بلاک کیا تھا اور عوام الناس کو تکلیف دی تھی۔ نیز ان کے خلاف دفعہ 151/107کی کارروائی کرتے ہوئے ملزمان کو عرصہ تین سال کے لیے پابند ضمانت کیا ہوا تھا اب پابند ضمانت کے خلاف ورزی کرنے پر 8 افراد کو جیل بھیج دیا گیا ہے کہ 3 افراد کا زر ضمانت منسوخ کرکے داخل خزانہ کردیا گیا ہے۔ انہوں نے مزید کہا کہ سرکاری روڈ بلاک کرنے والے اور دفعہ 144کی خلاف ورزی کرنے والے مزید 100 افراد کی تلاش جاری ہے اور ان کو بھی جلد گرفتار کر لیا جائے گا۔ انہوں نے مزید کہا کہ قانون کی خلاف ورزی کرنے والوں کو کسی صورت نہیں چھوڑیں گے اور سخت سے سخت کارروائی عمل میں لائی جائے گی۔ انہوں نے کہا کہ سدپارہ لوگوں نے سرکاری روڈ کو بلا وجہ بلاک کر کے عوام الناس اور سیاحوں کو تکلیف دی تھی اور دفعہ 144 کی خلاف ورزی بھی کی تھی۔

پاکستان پیپلز پارٹی کے چیئرمین بلاول بھٹو زرداری نے کہا ہے کہ مودی سرکارنےمقبوضہ کشمیرمیں ظلم کی انتہاکردی ہے،

باغی ٹی وی کی رپورٹ کے مطابق چیئرمین پیپلزپارٹی بلاول بھٹو نے گلگت بلتستان کے علاقے خپلو میں جلسے سے خطاب کرتے ہوئے کہا ہے کہ ملک میں غربت اور مہنگائی میں اضافہ ہورہا ہے، شہید بھٹو نے گلگت بلتستان سے جاگیردارانہ نظام کا خاتمہ کیا، ہمارےعلاوہ کسی حکومت نےگلگت بلتستان کانہیں سوچا،

بلاول بھٹو زرداری نے کہاکہ گلگت بلتستان کے لوگوں کوسلام پیش کرتاہوں ، پیپلزپارٹی نے گلگت بلتستان کومعاشی اورآئینی حقوق دئیے، گلگت بلتستان کے لوگوں نے جمہوریت کیلیے قربانیاں دیں ہیں، جیلوں میں گئے، ہمارے ملک کوجب بھی دفاع کی ضرورت پڑی گلگت بلتستان کے جوان سب سےآگے رہےہیں، آج بھی ملک کی سلامتی کیلیے جان دینے کو تیار ہیں، سوائےپیپلزپارٹی کے گلگت بلتستان کیلیے کسی حکومت نے کام نہیں کیا، ایک عوامی لیڈرتھا جس کا نام شہیدذوالفقارعلی بھٹو ،جس نےگلگت بلتستان کاتفصیلی دورہ کیا،

پاکستان پیپلز پارٹی کے چیئرمین بلاول بھٹو زرداری نے کہا ہے کہ سلیکٹڈ نے اپنے ایک سال دور حکومت میں خارجہ پالیسی ، معیشت کو تباہ کردیا ہے،

باغی ٹی وی کی رپورٹ کے مطابق بلاول بھٹو زرداری نے کہاکہ آج ایک طرف ملک کی معیشت آئی ایم ایف کے پاس گروی رکھ دی گئی ہے، دوسری طرف پاکستان کو سفارتی سطح پر دنیا میں پاکستان کو تباہ کردیاہے، نئے پاکستان کا سلیکٹڈ بزدل عورتوں سے ٹکراتاہے ، عمران خان نے کوئی بھی وعدہ پورا نہیں کیا ، پشاور پر سو ارب لگ گئے کوئی پوچھنے والا نہیں ہے ، نیب گردی اور معیشت ساتھ ساتھ نہیں چل سکتی، ملک معیشت آئی ایم ایف کے پاس گروی رکھ دی گئی ہے ، ہر پاکستانی پریشان ہے کہ کہیں کشمیر پر سودے بازی تو نہیں ہورہی ، یہ کیسا یک طرفہ احتساب ہے کہ ساری اپوزیشن کوجیل میں ڈال دیا گیاہے،

بلاول بھٹو زرداری نے سکردو میں جلسے سے خطاب کرتے ہوئے کہاکہ ملک کا کسان پریشان ہے کہ اس کو اس کی فصل کی قیمت ملے گی یا نہیں، اقتدار میں آنے سے پہلے وعدے کرنے آسان ہیں، اگر وعدےجھوٹ پر مبنی ہوں تو نبھانے مشکل ہوتے ہیں، کہا کہ خود کشی کرلوں مگر کسی کے آگے ہاتھ نہیں پھیلاؤں گا، حکومت نے ہمارے پانچ سالہ دور سےزیادہ قرض ایک سال میں لیاہے، ایک کروڑ نوکریوں کا وعدہ کیاگیا، لیکن لوگوں سے روزگار تک چھین لیاہے،

انہوں نے کہاکہ گھردینےکاوعدہ کیالیکن ملک بھرمیں تجاوزات کےنام پرلوگوں سےگھر چھینے جا رہے ہیں، ڈالرز کی بارش تو دور کی بات ، آج ڈالر 160روپے کا ہے، واضح رہے کہ انہوں نے جلسہ کے دوران حکومت کی پالیسیوں‌ پر سخت تنقید کی اور کہا کہ عمران خان نے احتساب اور انصاف کاوعدہ کیاتھا لیکن یہ کیسا احتساب ہے کہ ساری اپوزیشن جیل میں اور تیس ارب کی پشاور میٹرو تین سو ارب کی ہوچکی ہے لیکن کوئی پوچھنے والا نہیں ہے؟یہ سیاسی انتقام ہے جس میں سیاسی خاندانوں کی عورتیں بھی نشانے پر ہیں، انہوں نے کہاکہ خان نےوعدہ کیاتھاحکومت میں آیاتوکرپشن ختم کردونگا،احتساب کرونگا،حساب کرونگا، کیسایکطرفہ احتساب ہے30ارب کی پشاورمیٹرو100ارب کی ہوگئی کوئی پوچھنے والا نہیں،

انہوں نے کہاکہ مودی تم کشمیر میں گھس کر دکھادو، تم نے کشمیر کو جیل بنا دیا ہے، مودی تمہیں تاریخ ایک ہی نام سے یاد رکھے گی، قاتل قاتل مودی قاتل، مودی کشمیرمیں جمہوریت پرکیسےبات کرسکتاہےجس نےبھارت میں جمہوریت کاجنازہ نکال دیاہے، صرف اور صرف جمہوری پاکستان کی جمہوری قیادت کشمیریوں کو حقوق دلوا سکتی ہے،