Category: گوجرانوالہ

گوجرانوالہ (باغی ٹی وی، نامہ نگار محمد رمضان نوشاہی)آپریشن بنیان مرصوص کی کامیابی اور افواج پاکستان کی تاریخی فتوحات پر عوامی ریلیاں، پاک فوج سے اظہار یکجہتی

پاکستان کی عسکری تاریخ میں ایک اور سنہری باب رقم ہونے پر گوجرانوالہ بھر میں پاک فوج سے اظہارِ یکجہتی اور تاریخی فتوحات پر عوامی جوش و جذبہ دیدنی رہا۔ آپریشن بنیان مرصوص کی کامیاب تکمیل اور بھارت کی جدید ٹیکنالوجی کو شکست دینے پر مختلف علاقوں میں "پاک فوج زندہ باد” ریلیوں کا انعقاد کیا گیا، جن میں سول سوسائٹی، صحافیوں، سیاسی و انتظامی شخصیات اور شہریوں کی بڑی تعداد نے بھرپور شرکت کی۔

قلعہ دیدار سنگھ میں میونسپل کمیٹی کی جانب سے ایک پرجوش ریلی نکالی گئی جس کی قیادت اسسٹنٹ کمشنر ناصر شہزاد ڈوگر نے کی۔ ریلی میں سی او عثمان غنی، عاطف سلیم گل، عبدالحمید مغل، سرفراز راول و دیگر نے شرکت کی۔ شرکاء نے ہاتھوں میں وطن سے محبت اور افواج پاکستان کے حق میں نعرے درج پلے کارڈز اٹھا رکھے تھے۔ ریلی کے دوران فضا ’’پاک فوج زندہ باد‘‘، ’’قوم کو تم پر فخر ہے‘‘ اور ’’ہم سب ایک ہیں‘‘ کے نعروں سے گونجتی رہی۔ ریلی کے اختتام پر شرکاء نے شہداء کی قبروں پر حاضری دی اور دعائیں کی گئیں۔

دوسری جانب کشمیر کالونی، عالم چوک اور راہوالی میں بھی ملک توصیف احمد (نائب صدر PFUJ ورکرز) اور نعیم گل کی قیادت میں شاندار ریلیوں کا انعقاد کیا گیا۔ راہوالی شوگر مل اور راہوالی کینٹ گیٹ پر اختتام پذیر ہونے والی ریلیوں میں صحافی برادری، سول سوسائٹی اور سینکڑوں شہریوں نے شرکت کی۔ شرکاء نے جنرل عاصم منیر کی جرأت مندانہ قیادت کو خراج تحسین پیش کیا اور پاک فوج کے حق میں پرجوش نعرے لگائے۔

ریلیوں سے خطاب کرتے ہوئے ملک توصیف احمد نے کہا کہ افواج پاکستان نے بھارت کی جدید ٹیکنالوجی کو شکست دے کر قوم کا سر فخر سے بلند کر دیا ہے۔ انہوں نے جنرل عاصم منیر کی حکمت عملی کو ایٹمی پاکستان کی عالمی شناخت میں اہم قرار دیا۔ نعیم گل نے اپنے خطاب میں کہا کہ پوری قوم افواج پاکستان کے ساتھ سیسہ پلائی دیوار کی طرح کھڑی ہے، اور ہر پاکستانی فوج کا سپاہی ہے۔ چاچا زاہد ملک نے کہا کہ دشمن کے ناپاک عزائم خاک میں مل چکے ہیں، نریندر مودی کی نیندیں اڑ چکی ہیں اور دنیا پاکستان کے مؤقف کو تسلیم کر رہی ہے۔

ریلیوں میں افتخار علی بٹ، زاہد اقبال ملک، بشارت برہان، آصف رضا، جہانگیر مصطفائی، رانا ساجد، مشتاق نوری، خاور جرال، شکیل جرال، عرفان حیدری، جنید ملک، شیراز اسلم، چراغ بٹ، مون بھنڈر سمیت متعدد شخصیات شریک ہوئیں اور پاک فوج کے جوانوں پر گل پاشی کی گئی۔

گوجرانوالہ کی فضا اس دن وطن سے محبت اور افواج پاکستان کے لیے عقیدت سے مہک اٹھی، عوامی جوش و جذبے نے واضح کر دیا کہ قوم ہر میدان میں اپنے محافظوں کے ساتھ کھڑی ہے۔

گوجرانوالہ،باغی ٹی وی (نامہ نگار محمد رمضان نوشاہی): پی ایف یو جے ورکرز کے زیر اہتمام آزادی صحافت کے عالمی دن کے موقع پر گوجرانوالہ پریس کلب میں ایک سیمینار کا انعقاد کیا گیا، جس کے بعد ایک ریلی نکالی گئی۔ اس سیمینار اور ریلی کی قیادت پریس کلب کے صدر حافظ شاہد منیر اور پی ایف یو جے ورکرز کے نائب صدر ملک توصیف احمد نے کی۔

سیمینار سے خطاب کرتے ہوئے صدر پریس کلب حافظ شاہد منیر نے کہا کہ وہ ہر مشکل وقت میں صحافیوں کے ساتھ شانہ بشانہ رہے ہیں۔ انہوں نے کہا کہ صحافیوں کے لیے بہتر سے بہترین کی جانب جانے کی ان کی جدوجہد میں رکاوٹیں ڈالی گئیں، لیکن ان کے حوصلے پست نہیں ہوئے۔ انہوں نے مزید کہا کہ صحافی برادری کے وسیع تر مفاد کے لیے بیوروکریسی سے ان کی ہمیشہ نہیں بن سکی۔

پی ایف یو جے ورکرز کے نائب صدر ملک توصیف احمد نے اپنے خطاب میں کہا کہ آزادی صحافت کے عالمی دن کے موقع پر حکومت صحافیوں پر پیکا کے تحت درج مقدمات اور پابند سلاسل صحافیوں کو رہا کرے، تاکہ آزادی اظہار رائے پر لگی قدغنیں ماضی کا قصہ بن جائیں۔ ان کا کہنا تھا کہ پیکا کا قانون صحافیوں پر نہیں، بلکہ ملکی دفاعی اداروں کے خلاف منفی پروپیگنڈہ کرنے والوں پر لگانا چاہیے۔

حافظ سکندر اعظم نے ملک توصیف احمد کو خراج تحسین پیش کرتے ہوئے صحافیوں کے اتحاد پر زور دیا اور پریس کلب اور شعبہ صحافت سے منسلک افراد کو مضبوط کرنے کی اپیل کی۔ سیمینار میں نقابت کے فرائض صدر ریجنل یونین آف جرنلسٹس ورکرز افتخار علی بٹ نے ادا کیے، جبکہ صحافی علی مہدی جھنڈوی نے خوبصورت آواز میں نعت رسول مقبولؐ اور مولا علی کی منقبت پیش کر کے خوب داد وصول کی۔

سیمینار کے اختتام کے بعد پریس کلب سے جی ٹی روڈ تک ایک ریلی نکالی گئی، جس میں شرکاء نے "زندہ ہیں صحافی زندہ ہیں” اور "پیکا ایکٹ نامنظور” کے شدید نعرے لگائے۔ ریلی کی حفاظت کے لیے سکیورٹی ادارے اور پولیس کا عملہ بھی تعینات تھا۔ یہ ریلی واپس پریس کلب پہنچ کر اختتام پذیر ہوئی۔ ریلی میں صدر پریس کلب حافظ شاہد منیر، ملک توصیف احمد (نائب صدر پی ایف یو جے ورکرز)، صدر ریجنل یونین آف جرنلسٹس ورکرز افتخار علی بٹ، ممبر ایف ای سی عشرت الماس چوہدری، چیئرمین ایونٹ کمیٹی جاوید اقبال بھٹی، چیئرمین راہوالی پریس کلب رانا عبدالغفار، ایڈیشنل سیکریٹری حافظ شاہد ملک، سیکریٹری فنانس رانا اظہر، طیب مہر، نوید سہیل، علی مہدی جھنڈوی اور دیگر بھی شریک تھے۔

گوجرانوالہ،باغی ٹی وی (نامہ نگار محمد رمضان نوشاہی) وزیر اعلیٰ پنجاب معاون آلات سکیم کے تحت معذور افراد میں وہیل چیئرز تقسیم کرنے کی ایک پروقار تقریب ماڈل چلڈرن ہوم میں منعقد ہوئی۔

کمشنر گوجرانوالہ ڈویژن سید نوید حیدر شیرازی نے اس موقع پر خطاب کرتے ہوئے کہا کہ وزیر اعلیٰ پنجاب اسسٹیو ڈیوائسز اینڈ وہیل چیئرز پروگرام معاشرے کے پسماندہ اور خصوصی افراد کی خدمت اور انہیں بااختیار بنانے کے لیے ایک عظیم انسانی فریضہ ہے۔ آج کی یہ پروقار تقریب اسی سلسلے کی ایک کڑی ہے، جس میں معذور افراد کو مفت وہیل چیئرز فراہم کی گئیں۔ اس تقریب کا بنیادی مقصد معذور افراد کی زندگیوں میں سہولت پیدا کرنا اور ان کے لیے نقل و حرکت کو ممکن بنانا ہے، تاکہ وہ بھی معاشرتی سرگرمیوں میں بھرپور حصہ لے سکیں۔ اس موقع پر ڈپٹی کمشنر نوید احمد بھی کمشنر کے ہمراہ موجود تھے۔

تقریب میں ڈائریکٹر سوشل ویلفیئر ارشاد وحید، ڈپٹی ڈائریکٹر میڈم سمیرا اقبال، ڈپٹی ڈائریکٹر تعلقات عامہ منور حسین، اسسٹنٹ ڈائریکٹرز مس زیب النساء، میڈم رابعہ افضل، سوشل ویلفیئر آفیسر عبید رحمت، کامران حسین اور 50 سے زائد معذور افراد نے شرکت کی۔ کمشنر سید نوید حیدر شیرازی نے کہا کہ وزیر اعلیٰ پنجاب مریم نواز شریف کے وژن کے مطابق اسپیشل افراد کے لیے معاون آلات کے بڑے منصوبے کا آغاز گوجرانوالہ ضلع سے کر دیا گیا ہے۔ انہوں نے مزید بتایا کہ اس سکیم کے تحت وزیر اعلیٰ خودکار وہیل چیئر، پیڈز وہیل چیئر، ٹرائی وہیل سکوٹی اور دیگر معاون آلات بھی فراہم کیے جائیں گے۔ انہوں نے معذور افراد کے حوصلے اور عزم کو سراہا اور حکومت کے ایسے فلاحی اقدامات کو فروغ دینے کی ضرورت پر زور دیا تاکہ ہر ضرورت مند تک مدد پہنچ سکے۔ انہوں نے کہا کہ یہ تقریب نہ صرف مدد کا ذریعہ بنی بلکہ ایک پیغام بھی دے گئی کہ اگر نیت خالص ہو تو معاشرہ ہر فرد کے لیے آسان بن سکتا ہے۔

ڈپٹی ڈائریکٹر سوشل ویلفیئر میڈم سمیرا اقبال نے تقریب کے شرکاء کو بتایا کہ آج 30 معذور بچوں اور بڑوں میں وہیل چیئرز تقسیم کی گئی ہیں اور اب تک 300 درخواستیں موصول ہو چکی ہیں۔ انہوں نے مزید بتایا کہ 15 مئی تک ضلع بھر کے معذور افراد کی رجسٹریشن کے بعد قواعد و ضوابط پر پورا اترنے والے 215 معذور افراد میں وزیر اعلیٰ پنجاب معاون آلات تقسیم کیے جائیں گے۔