Category: گوجرانوالہ

گوجرانوالہ (باغی ٹی وی، نامہ نگار محمد رمضان نوشاہی)گوجرانوالہ کے علاقہ قلعہ دیدار سنگھ میں ڈاکٹر محمد کاشف کو سما نیوز کا بیورو چیف مقرر کیے جانے پر مقامی صحافتی و سماجی شخصیات نے انہیں مبارکباد پیش کی۔

اس موقع پر صدر پریس کلب عالم چوک رجسٹرڈ چوہدری عظمت اللہ مہر، چیئرمین طارق عزیز چوہان، سرپرستِ اعلیٰ طارق اشرف خان، سرپرستِ اعلیٰ چوہدری حسیب اصغر پندھیر، مسلم لیگ ن پی پی 70 کے صدر رانا محمد اعظم خان، نائب صدر ہارون جٹ سمیت دیگر معززین نے ڈاکٹر محمد کاشف کو پھولوں کی مالا پہنائی اور ان کی نئی ذمہ داری پر خوشی کا اظہار کیا۔

آخر میں تمام شرکا نے دعا کی کہ اللہ تعالیٰ ڈاکٹر محمد کاشف کو مزید کامیابیاں، عزتیں اور ترقی عطا فرمائے اور وہ عوام کی خدمت کا فریضہ بہترین طریقے سے انجام دیں۔ آمین۔

گجرانوالہ باغی ٹی وی (نامہ نگار محمد رمضان نوشاہی)ڈپٹی کمشنر گوجرانوالہ نوید احمد نے چلڈرن ہسپتال گوجرانوالہ میں قومی انسدادِ خسرہ و روبیلا مہم کا باقاعدہ افتتاح کر دیا۔

ضلع گوجرانوالہ میں خسرہ اور روبیلا سے بچاؤ کی یہ قومی ویکسینیشن مہم 17 نومبر 2025 سے 29 نومبر 2025 تک جاری رہے گی۔
سی ای او ہیلتھ کے مطابق مہم کے دوران 6 ماہ سے 59 ماہ تک کے تقریباً 7 لاکھ 97 ہزار بچوں کو خسرہ و روبیلا سے بچاؤ کی ویکسین (MR) لگائی جائے گی۔

مزید بتایا گیا کہ گوجرانوالہ کی 08 مخصوص یونین کونسلوں میں پیدائش سے لے کر 5 سال تک کے بچوں کو پولیو کے قطرے بھی پلائے جائیں گے۔

محکمہ صحت نے مہم کو کامیاب بنانے کے لیے 470 آؤٹ ریچ ٹیمیں اور 215 فکسڈ ٹیمیں تشکیل دے دی ہیں۔
12 روزہ مہم کے دوران پیر تا ہفتہ صبح 9 بجے سے شام 4 بجے تک ویکسینیشن سرکاری و نجی اسکولوں، مذہبی مدارس، تمام مراکز صحت اور مخصوص ویکسینیشن پوائنٹس پر لگائی جائے گی، جہاں تربیت یافتہ ویکسینیٹرز (لیڈی ہیلتھ وزیٹرز، نرسیں اور طبی عملہ) خدمات سرانجام دیں گے۔

ڈپٹی کمشنر نوید احمد کا کہنا ہے کہ خسرہ اور روبیلا سے بچاؤ کی ویکسین مکمل طور پر محفوظ ہے۔
انہوں نے شہریوں سے اپیل کی کہ اپنے 6 سے 59 ماہ کے تمام بچوں کو MR ویکسین لازمی لگوائیں تاکہ انہیں زندگی بھر کے لیے ان خطرناک بیماریوں سے تحفظ فراہم کیا جا سکے۔

گوجرانوالہ (باغی ٹی وی نامہ نگار محمد رمضان نوشاہی)معاونِ خصوصی وزیراعلیٰ پنجاب برائے پرائس کنٹرول ٹاسک فورس سلمیٰ بٹ نے گوجرانوالہ کے مختلف بازاروں اور مارکیٹوں کا اچانک دورہ کیا۔ اس موقع پر ڈپٹی کمشنر گوجرانوالہ نوید احمد اور اسسٹنٹ کمشنر سٹی اقراء مبین بھی ان کے ہمراہ تھے۔

دورے کے دوران سلمیٰ بٹ نے اشیائے ضروریہ کی قیمتوں کا تفصیلی جائزہ لیا، ریٹ لسٹیں چیک کیں اور دکانداروں سے قیمتوں کے حوالے سے استفسار کیا۔

انہوں نے اس موقع پر واضح کیا کہ ناجائز منافع خوری اور گراں فروشی کسی صورت برداشت نہیں کی جائے گی۔ حکومتِ پنجاب کی اولین ترجیح عوام کو مقررہ نرخوں پر روزمرہ اشیاء کی فراہمی یقینی بنانا ہے۔

سلمیٰ بٹ نے مزید کہا کہ مارکیٹ مانیٹرنگ میکانزم نافذ کر دیا گیا ہے تاکہ قیمتوں پر مکمل کنٹرول برقرار رکھا جا سکے اور عوام کو ریلیف فراہم ہو۔

گوجرانوالہ (باغی ٹی وی نامہ نگار محمد رمضان نوشاہی)وزیراعلیٰ پنجاب کی معاونِ خصوصی سلمی بٹ نے میڈیا سے گفتگو کرتے ہوئے کہا کہ سال 2024 کی نسبت اب مہنگائی میں واضح کمی آئی ہے، خصوصاً دالوں اور سبزیوں کی قیمتوں میں نمایاں کمی دیکھنے میں آئی ہے۔

انہوں نے بتایا کہ گزشتہ دو ماہ کے دوران کالے چنے کی قیمت میں 38 روپے اور بیسن کی قیمت میں 34 روپے فی کلو تک کمی ہوئی ہے، جبکہ مختلف سبزیوں کی قیمتیں بھی 100 سے 150 روپے تک کم ہو چکی ہیں۔

سلمی بٹ نے کہا کہ رمضان بازاروں کی بھرپور تیاری کی جا رہی ہے اور اس بار گزشتہ سال کے مقابلے میں زیادہ سستے بازار قائم کیے جائیں گے تاکہ عوام کو زیادہ سے زیادہ ریلیف دیا جا سکے۔

ان کا کہنا تھا کہ متوسط طبقے کو ریلیف دینے کے لیے حکومت مسلسل اقدامات کر رہی ہے۔
انہوں نے کہا کہ ٹماٹر کی قیمت میں اضافے کی بنیادی وجہ افغانستان کا بارڈر بند ہونا تھا، تاہم اب ٹماٹر دیگر علاقوں سے آرہے ہیں اور ریٹ میں واضح کمی ہو چکی ہے۔

سلمی بٹ کے مطابق پیاز اور ٹماٹر سیزنل آئٹمز ہیں جن کی قیمتیں آف سیزن میں بڑھ جاتی ہیں، مگر حکومت فارمنگ کے فروغ کے ذریعے ان اشیاء کی مقامی پیداوار میں اضافہ کرنے کی کوشش کر رہی ہے۔

انہوں نے مزید بتایا کہ سیف سٹی کیمروں کی مدد سے اشیائے خوردونوش کے ٹرکوں کی نقل و حرکت کو مانیٹر کیا جا رہا ہے تاکہ کسی بھی قسم کی ذخیرہ اندوزی یا ناجائز منافع خوری کو روکا جا سکے۔

سلمی بٹ نے واضح کیا کہ سبزی منڈی میں آنے والے تمام ٹرکوں کی نیلامی شفاف طریقے سے ہوگی، اور ذخیرہ اندوزوں کے خلاف سخت کارروائی عمل میں لائی جائے گی۔
ان کے مطابق، پنجاب بھر میں انتظامیہ پرائس کنٹرول کے لیے متحرک ہے اور عوام کو ریلیف فراہم کرنے کے لیے مؤثر اقدامات جاری ہیں۔

گوجرانوالہ (باغی ٹی وی، نامہ نگار محمد رمضان نوشاہی)ڈی ایچ کیو ٹیچنگ ہسپتال گوجرانوالہ میں ایم ایس ڈاکٹر عتیق احمد کی سربراہی میں ایک پروقار تقریب کا انعقاد کیا گیا، جس میں ایم ایس ایف (Médecins Sans Frontières) کے تعاون سے پنجاب ٹی بی کنٹرول پروگرام کے تحت علاج مکمل کرنے والے مریضوں میں سرٹیفکیٹس تقسیم کیے گئے۔

تقریب میں ڈپٹی ایم ایس ڈاکٹر میمونہ، ہیڈ آف پلمنالوجی ڈیپارٹمنٹ ڈاکٹر محبوب احمد، ڈپٹی ڈائریکٹر تعلقاتِ عامہ منور حسین، ڈاکٹر زین، علی ریحان چیمہ، زیشان احمد سمیت دیگر معزز ڈاکٹرز اور اسٹاف نے شرکت کی۔

ایم ایس ڈاکٹر عتیق احمد نے اپنے خطاب میں کہا کہ ٹی بی ایک قابلِ علاج مرض ہے بشرطیکہ مریض مکمل علاج کریں اور ادویات باقاعدگی سے استعمال کریں۔ انہوں نے ایم ایس ایف اور پنجاب ٹی بی کنٹرول پروگرام کے اشتراک کو سراہتے ہوئے کہا کہ ایسے پروگرام مریضوں میں شعور اجاگر کرنے اور علاج کے تسلسل کو یقینی بنانے میں مؤثر کردار ادا کر رہے ہیں۔

ڈاکٹر محبوب احمد نے بتایا کہ ڈی ایچ کیو ہسپتال میں پلمنالوجی ڈیپارٹمنٹ جدید سہولیات سے آراستہ ہے، جہاں مریضوں کی بروقت تشخیص اور علاج کو ممکن بنایا جا رہا ہے۔

تقریب کے اختتام پر علاج مکمل کرنے والے مریضوں میں سرٹیفکیٹس تقسیم کیے گئے اور انہیں صحت مند طرزِ زندگی اپنانے کی تلقین کی گئی۔ شرکاء نے اس عزم کا اظہار کیا کہ گوجرانوالہ کو ٹی بی سے پاک شہر بنانے کے لیے اجتماعی کوششیں اور عوامی آگاہی مہم جاری رکھی جائے گی۔

گوجرانوالہ باغی ٹی وی (نامہ نگار محمد رمضان نوشاہی)چیئرپرسن وزیراعلیٰ پنجاب انسپکشن، سرویلنس و مانیٹرنگ ڈائریکٹوریٹ بریگیڈیئر بابر علاؤالدین ستارہ امتیاز (ملٹری) (ر) نے رات گئے تھانہ صدر گوجرانوالہ کا اچانک دورہ کیا اور پولیس اسٹیشن کے مختلف حصوں کا تفصیلی معائنہ کیا۔

دورے کے دوران انہوں نے تھانے کی مجموعی صورتحال پر گہرے عدم اطمینان کا اظہار کرتے ہوئے متعدد خامیوں کی نشاندہی کی۔ لاک اپ میں ملزمان کی غیر معمولی تعداد کے باعث ہجوم اور بدنظمی کی کیفیت پائی گئی، جس پر چیئرپرسن نے ہدایت دی کہ زیرِ حراست افراد کی پراسیسنگ اور منتقلی میں غیر ضروری تاخیر ختم کی جائے اور تمام کارروائی قانونی ضابطوں کے مطابق مکمل کی جائے۔

تھانے میں صفائی ستھرائی کے ناقص انتظامات پر بھی سخت برہمی کا اظہار کیا گیا۔ عمارت کے مختلف حصوں میں مکڑی کے جالے، گردوغبار اور کوڑا کرکٹ واضح طور پر نظر آیا جبکہ واش رومز کی حالت غیر اطمینان بخش قرار دی گئی۔

دورے کے دوران ریکارڈ کی دیکھ بھال میں غفلت بھی سامنے آئی۔ روزنامچہ اور سرکاری رجسٹرز مکمل طور پر اپ ڈیٹ نہیں کیے گئے تھے۔ مزید برآں، ڈیوٹی پر موجود بعض اہلکار بغیر وردی کے پائے گئے جبکہ کئی اہلکار ڈیوٹی کے اوقات میں تھانے سے غیر حاضر تھے، جس پر وضاحت طلب کی گئی کہ انہیں ریسٹ پر بتایا جا رہا ہے۔

بریگیڈیئر بابر علاؤالدین (ر) نے ایس ایچ او کو سختی سے ہدایت کی کہ تھانے کی صفائی، ریکارڈ کی درستگی، اور عمارت کی مرمت و دیکھ بھال کے کام فوری طور پر مکمل کیے جائیں۔ تمام اہلکاروں کو وردی میں رہتے ہوئے نظم و ضبط کے ساتھ فرائض کی انجام دہی کا پابند بنایا جائے۔

انہوں نے مزید ہدایت کی کہ غیر حاضر اہلکاروں کی لوکیشن اور مصروفیت کا ریکارڈ محرر اور ایس ایچ او کے پاس موجود ہونا لازمی ہے۔

چیئرپرسن نے اس موقع پر کہا کہ پولیس اسٹیشنز کی حالت بہتر بنانا عوامی خدمت کے معیار کو بلند کرنے کے لیے ناگزیر ہے۔ عوامی شکایات کے فوری ازالے، شفافیت، اور بہتر نظم و نسق کے لیے تمام ذمہ داران کو اپنے فرائض ایمانداری، اخلاقیات اور پیشہ ورانہ رویے کے ساتھ انجام دینے کی ہدایت کی گئی۔

انہوں نے مزید زور دیا کہ ایف آئی آر کے اندراج کو آئی جی آفس کے مقررہ ٹائم فریم کے مطابق یقینی بنایا جائے تاکہ عوام کا اعتماد پولیس کے ادارے پر بحال ہو اور قانون کی حکمرانی مضبوط بنیادوں پر قائم کی جا سکے۔

گوجرانوالہ (باغی ٹی وی، نامہ نگار محمد رمضان نوشاہی) پاکستان اٹامک انرجی کمیشن کے ذیلی ادارے جینم کینسر ہسپتال گوجرانوالہ میں کینسر آگہی کے سلسلے میں “ہوپ کارنیوال” اور فن فئیر کا انعقاد کیا گیا۔

تقریب میں قریبی دیہات کی خواتین اور مختلف سکولوں کے بچوں نے بڑی تعداد میں شرکت کی۔ ہسپتال کی جانب سے خواتین کے مفت طبی معائنے کے لیے موبائل وین کا خصوصی انتظام کیا گیا، جہاں ماہر ڈاکٹروں کی ٹیم نے خواتین کی میموگرافی سمیت دیگر ٹیسٹ کیے۔

کارنیوال میں جھولے، گیمز، ملبوسات، کھانے پینے اور فوٹو گرافی کے اسٹالز بھی لگائے گئے۔ ڈائریکٹر جینم کینسر ہسپتال ڈاکٹر عاصمہ سہیل کے مطابق پاکستان اٹامک انرجی کمیشن کے زیرِ انتظام ملک بھر میں کینسر کے 21 مراکز کام کر رہے ہیں۔

تقریب میں سابق ڈائریکٹر و کنسلٹنٹ ڈاکٹر سہیل مراد، ہیڈ آف انکالوجی ڈیپارٹمنٹ ڈاکٹر محسن رضا، محمد ارسلان اور دیگر لیڈی ڈاکٹرز بھی موجود تھیں۔