Category: گوجرانوالہ

گوجرانوالہ (باغی ٹی وی، نامہ نگار محمد رمضان نوشاہی) صوبائی وزیر سوشل ویلفیئر و بیت المال سہیل شوکت بٹ نے وزیراعلیٰ پنجاب مریم نواز شریف کے دھی رانی پروگرام کے تحت منعقدہ اجتماعی شادی کی تقریب میں شرکت کی۔ وزیر سوشل ویلفیئر نے بتایا کہ اس پروگرام کے تحت رواں سال پنجاب بھر میں 5 ہزار سے زائد مستحق جوڑوں کی شادیاں کرائی جائیں گی۔ تیسرے مرحلے میں ضلع گوجرانوالہ کے 165 نوبیاہتا جوڑوں کی شادی کروائی گئی، جنہیں وزیراعلیٰ مریم نواز شریف کی جانب سے دو لاکھ روپے سلامی اور عروسی جوڑے تحفے میں دیے گئے۔

تقریب میں گوجرانوالہ سٹی کے 15، صدر کے 21، کامونکی کے 29، نوشہرہ ورکاں کے 46، وزیرآباد کے 54 اور 17 مسیحی جوڑے شامل تھے۔ اس موقع پر ممبران اسمبلی بلال فاروق تارڑ، وقار چیمہ، عدنان چٹھہ، قیصر اقبال سندھو، عمران خالد بٹ، عمر فاروق ڈار، محمد نواز چوہان، عمانوئل اطہر، مس سونیا عاشق، سیکرٹری سوشل ویلفیئر پنجاب جاوید اختر محمود، کمشنر سید نوید حیدر شیرازی، ڈپٹی کمشنر نوید احمد اور دیگر اہم شخصیات نے شرکت کی۔

صوبائی وزیر سہیل شوکت بٹ نے کہا کہ وزیراعلیٰ مریم نواز شریف کا پنجاب دھی رانی پروگرام ایک تاریخ ساز فلاحی اقدام ہے جس نے معاشرتی ناہمواریوں کے خاتمے میں کلیدی کردار ادا کیا ہے۔ حکومت پنجاب کی جانب سے نوبیاہتا جوڑوں کو تحائف اور اے ٹی ایم کارڈز کے ذریعے سلامی کی رقم بھی فراہم کی گئی۔ والدین اور نئے جوڑوں نے تقریب کے شاندار انتظامات پر وزیراعلیٰ پنجاب مریم نواز شریف اور صوبائی وزیر سہیل شوکت بٹ کا شکریہ ادا کیا۔

گوجرانوالہ (باغی ٹی وی، نامہ نگار محمد رمضان نوشاہی) شماریات کے عالمی دن کے موقع پر بیورو آف سٹیٹسٹکس ریجنل آفس گوجرانوالہ کی جانب سے آگاہی واک کا اہتمام کیا گیا۔ واک کا آغاز جناح اسٹیڈیم سے ہوا اور اختتام ڈپٹی کمشنر آفس پر کچہری روڈ کے راستے کیا گیا۔

آگاہی واک کی قیادت ڈپٹی کمشنر گوجرانوالہ نوید احمد نے کی، ان کے ہمراہ اراکین صوبائی اسمبلی عمران خالد بٹ، چوہدری قیصر اقبال سندھو، اور ایڈیشنل ڈپٹی کمشنر ریونیو شبیر حسین بٹ شریک تھے۔ چیف سٹیٹسٹیکل آفیسر سمیت بیورو آف سٹیٹسٹکس کے افسران و عملہ بھی بڑی تعداد میں موجود تھا۔

شرکاء نے اپنے خطاب میں کہا کہ منصوبہ بندی اور پالیسی سازی میں درست اور بروقت شماریاتی معلومات کلیدی حیثیت رکھتی ہیں۔ مستند اعداد و شمار کے بغیر پائیدار ترقی ممکن نہیں۔ واک کا مقصد عوام میں شماریات کی اہمیت اجاگر کرنا اور ہر سطح پر بہتر فیصلہ سازی کو فروغ دینا تھا۔

گوجرانوالہ (باغی ٹی وی، نامہ نگار محمد رمضان نوشاہی)محکمہ زراعت (توسیع) تحصیل گوجرانوالہ کے زیرِ اہتمام موضع پیپناکھہ میں کسانوں کے لیے "زیادہ گندم اگاؤ اور سموگ کنٹرول” کے سلسلے میں ایک بڑا آگاہی پروگرام منعقد کیا گیا۔ پرنسپل ایگریکلچر آفیسر و اسسٹنٹ ڈائریکٹر زراعت (توسیع) محمد اعظم مغل نے پروگرام کے دوران خطاب کرتے ہوئے کہا کہ سموگ کے تدارک کے لیے ضروری ہے کہ کسان کھیتوں میں فصلوں کی باقیات کو جلانے سے اجتناب کریں، کیونکہ یہ عمل ماحولیاتی آلودگی میں اضافہ کرنے کے ساتھ ساتھ زمین کی زرخیزی کو بھی نقصان پہنچاتا ہے۔

انہوں نے کہا کہ حکومتِ پنجاب کی ہدایات کے مطابق محکمہ زراعت کسانوں کو جدید زرعی مشینری اور آلات رعایتی نرخوں پر فراہم کر رہا ہے تاکہ وہ فصلوں کی باقیات کو جدید طریقے سے تلف کر سکیں۔ گندم اگاؤ مہم کے حوالے سے محمد اعظم مغل نے بتایا کہ اس سال زیادہ پیداوار کے لیے تصدیق شدہ بیج، متوازن کھادوں کا استعمال اور بروقت آبپاشی نہایت اہم ہے۔ انہوں نے کسانوں پر زور دیا کہ وہ محکمہ زراعت کی ٹیموں سے قریبی رابطہ رکھیں اور جدید زرعی سفارشات پر عمل کر کے زیادہ پیداوار حاصل کریں۔

ڈپٹی ڈائریکٹر زراعت (PWQCP) گوجرانوالہ غلام غوث نے اپنے خطاب میں کہا کہ سموگ کا خاتمہ ایک اجتماعی ذمہ داری ہے، جس کے لیے عوام، ادارے اور کسانوں کو مل کر کردار ادا کرنا ہوگا۔ انہوں نے یقین دلایا کہ محکمہ زراعت کسانوں کے ہر ممکن تعاون کے لیے ہمہ وقت دستیاب ہے۔ اس موقع پر زراعت آفیسر قلعہ دیدار سنگھ حافظ عنایت اللہ سمیت دیگر افسران اور کسانوں کی بڑی تعداد نے شرکت کی۔

گوجرانوالہ (باغی ٹی وی، نامہ نگار محمد رمضان نوشاہی) پنجاب فوڈ اتھارٹی گوجرانوالہ کے زیرِ اہتمام گورنمنٹ میاں رحمت علی گریجوایٹ کالج میں عالمی یوم خوراک کے موقع پر آگاہی سیمینار منعقد کیا گیا۔

تقریب میں ڈپٹی کمشنر گوجرانوالہ نوید احمد، ایڈیشنل ڈائریکٹر فوڈ اتھارٹی محمد سجاد گوندل، ڈپٹی ڈائریکٹر محمد عمیر ارشد اور ماہرینِ غذائیت نے شرکت کی۔ مقررین نے کہا کہ خوراک کی حفاظت ایک قومی اور اجتماعی ذمہ داری ہے، بچوں اور نوجوانوں کیلئے غذائیت سے بھرپور اشیاء کی فراہمی اور جنک فوڈ کے استعمال میں کمی وقت کی اہم ضرورت ہے۔

ڈپٹی کمشنر نوید احمد نے خطاب میں کہا کہ ملاوٹ کے خاتمے کیلئے پنجاب فوڈ اتھارٹی گوجرانوالہ کی کارکردگی قابلِ تعریف ہے، عوام کی صحت کے تحفظ کیلئے فوڈ اتھارٹی کی خدمات مثالی ہیں۔

ترجمان فوڈ اتھارٹی کے مطابق شرکاء کو غذائی تحفظ، غذائیت کی کمی سے بچاؤ اور صحت بخش خوراک کے متعلق آگاہی دی گئی۔ ترجمان نے کہا کہ ہم سب کو عہد کرنا ہوگا کہ اچھی اور صحت بخش خوراک کے حصول کیلئے پنجاب فوڈ اتھارٹی کا ساتھ دیں، کیونکہ خوراک صرف پیٹ بھرنے کا ذریعہ نہیں بلکہ قوموں کی صحت اور ترقی کی بنیاد ہے۔

گوجرانوالہ(باغی ٹی وی،نامہ نگار محمد رمضان نوشاہی کی رپورٹ) ڈسٹرکٹ پاپولیشن ویلفیئر آفس کے زیر اہتمام بریسٹ کینسر آگاہی سیمینار کا انعقاد کیا گیا۔

ڈسٹرکٹ آفیسر عدنان اشرف نے خطاب میں بتایا کہ پاکستان میں سالانہ 90 ہزار خواتین چھاتی کے کینسر سے جان کی بازی ہار جاتی ہیں، جن میں سے 40 سے 45 فیصد مریضوں کی تشخیص آخری مرحلے میں ہوتی ہے۔

ترقی یافتہ ممالک میں بروقت میموگرافی کی بدولت بچاؤ کی شرح 90 سے 95 فیصد ہے۔ انہوں نے عوام سے اپیل کی کہ وہ آگاہی پھیلائیں اور مریضوں سے ہمدردی کا رویہ اپنائیں۔

سیمینار میں دیگر مقررین نے بھی چھاتی کے کینسر، ذہنی صحت، ماں کے دودھ کی افادیت اور صنفی امتیاز کے خاتمے پر روشنی ڈالی۔ آگاہی سیشنز 10 سے 15 اکتوبر تک جاری رہیں گے۔

گوجرانوالہ(باغی ٹی وی ،نامہ نگارمحمدرمضان نوشاہی کی رپورٹ) کمشنر سید نوید حیدر شیرازی نے راہوالی کینٹ میں انسدادِ پولیو مہم کے مراکز کا دورہ کیا۔ انہوں نے عملے کی کارکردگی، ریکارڈ اور بچوں کو پولیو کے قطرے پلانے کے انتظامات کا جائزہ لیا۔

کمشنر نے والدین سے اپیل کی کہ پانچ سال سے کم عمر بچوں کو لازمی قطرے پلائیں تاکہ پاکستان کو پولیو فری بنایا جا سکے۔ انہوں نے پولیو ٹیموں کی خدمات کو سراہتے ہوئے ان کی حفاظت اور سہولیات پر زور دیا۔

محکمہ صحت کو ہدایت کی گئی کہ کوئی بچہ قطرے پلانے سے محروم نہ رہے اور نگرانی کا عمل مزید مؤثر بنایا جائے۔ کمشنر نے اجتماعی عزم اور عوامی تعاون کو پولیو کے خاتمے کی کنجی قرار دیا۔

گوجرانوالہ (باغی ٹی وی نامہ نگار محمد رمضان نوشاہی)9 اکتوبر 2025ء کو عالمی یومِ ڈاک کے موقع پر جنرل پوسٹ آفس گوجرانوالہ (جی پی او) میں پرچم کشائی کی پروقار تقریب منعقد ہوئی۔

تقریب کے مہمانِ خصوصی چیف پوسٹ ماسٹر گوجرانوالہ رضوان الحق قمر نے خطاب کرتے ہوئے کہا کہ محکمہ ڈاک ایک ایسا ادارہ ہے جو برسوں سے دلوں کو جوڑے ہوئے ہے، کبھی گھوڑوں، اونٹوں اور سائیکلوں کے ذریعے پیغام رسانی ہوتی تھی اور آج جدید ٹیکنالوجی نے اسے نئے دور میں داخل کر دیا ہے، مگر ڈاکیا آج بھی احساسات اور جذبات کا امین ہے۔

انہوں نے کہا کہ پاکستان پوسٹ پر فخر ہےکیونکہ یہ ادارہ عوامی خدمت، مالی اور ڈیجیٹل حل کی فراہمی میں نمایاں کردار ادا کر رہا ہے، جو اس سال کے عالمی موضوع "لوگوں کے لیے ڈاک: مقامی خدمت، عالمی رسائی” کی بہترین عکاسی کرتا ہے۔

تقریب کے آخر میں شاندار کارکردگی دکھانے والے ملازمین میں تعریفی اسناد بھی تقسیم کی گئیں۔