Category: گوجرانوالہ

گوجرانوالہ میں ڈاکوؤں‌ کا بڑا ڈاکہ ، پوش علاقے کے کئی گھر لوٹ‌ لیے

باغی ٹی وی : گوجرانوالہ کے پوش علاقے میں شادی والے گھر سمیت 4 کوٹھیاں لوٹ لی گئیں، متاثرین کا کہنا ہے کہ لٹیرے 100 تولے زیور اور 3 کروڑ روپے لوٹ کر لے گئے، اروپ کے علاقے سے لوگ پہلے ہی نقل مکانی شروع کرچکے ہیں۔

پنجاب کا بڑا شہر ڈاکوؤں کے رحم و کرم پر ہے، لوگ لٹتے رہے مگر پولیس تماشا دیکھتی رہی، فورس شہریوں کو تحفظ فراہم کرنے میں ناکام ہو گئی۔
گوجرانوالہ کے علاقے اروپ میں ڈاکوؤں نے پوش کالونی کو بھی نہ چھوڑا، گارڈن ٹاؤن میں چار کوٹھیوں میں لوٹ مار کی گئی، شادی والے گھر کا بھی صفایا، دلہن کے زیور چھین لئے گئے۔

متاثرین کا مؤقف ہے کہ ڈاکو 100 تولے زیور اور 3 کروڑ روپے لوٹ کر فرار ہوئے، ڈاکو سفید رنگ کی گاڑی پر سوار تھے جس کی سی سی ٹی وی فوٹیج منظرعام پر آ گئی۔

ویڈیو میں ملزم گاڑی میں آزادانہ سامان رکھتے نظر آرہے ہیں، ڈاکو چلے گئے تو پولیس چلی آئی، تھانہ اروپ کے اہلکاروں نے آ کر روایتی تفتیش شروع کردی۔گوجرانوالہ میں ڈکیتی کی بڑھتی ہوئی وارداتوں کے بعد علاقہ مکین خوف میں مبتلا ہیں، اروپ کے علاقے سے لوگ پہلے ہی نقل مکانی شروع کرچکے ہیں

پولیس میں کرپشن،8 تھانیداروں سمیت 17 اہلکار معطل

باغی ٹی وی کی رپورٹ کے مطابق گوجرانوالہ کے مختلف تھانوں میں تعینات 8تھانیداروں سمیت 17پولیس اہلکاروں کو کرپشن، اور بری شہرت پر معطل کر کے لائن حاضر کر دیا گیا،

ایس ایس پی آپریشنز گوجرانوالہ ڈاکٹر فہد احمدنے تمام تھانوں سے معلومات کے بعد ان ملاززمین کو معطل کرنے کے احکامات جاری کئے ہیں ،معطل ہونے والوں میں سب انسپکٹر عبدالرزاق، سب انسپکٹر علی شبیر، اے ایس آئی محمد رزاق، اے ایس آئی فاروق احمد، اے ایس آئی عباس علی، اے ایس آئی محمود علی، اے ایس آئی محمود احمد، اے ایس آئی سابق چوکی انچارج رانا اقبال شامل ہیں

معطل ہونے والوں میں کانسٹیبلان میں محمد اشرف، ظفر اقبال ، گلناز احمد، عبدالجبار، عتیق الرحمان، مبشر علی، کاشف اسد اللہ اور کانسٹیبل وارث علی شامل ہیں۔

ایس ایس پی آپریشنز نے کہا ہے کہ کرپشن کسی صورت برداشت نہیں کی جائے گی اور جو پولیس افسراور اہلکار فرائض میں غفلت برتے گا ، جرائم پیشہ عناصر یا منشیات فروشوں سے رابطہ رکھے گا وہ محکمہ میں نہیں رہے گا، انہوں نے کہا کہ محکمہ پولیس کو کرپٹ عناصر سے پاک کرینگے، ملازمین اپنا قبلہ درست کر لیں شکایت پر معافی نہیں ملے گی۔

سابق یو سی چیرمین کا معذور امام مسجد پر تشدد، داڑھی کھینچ کر جان سے مارنے کی دھمکیاں، ایس ایچ او پرچہ کاٹنے سے انکاری

باغی ٹی وی رپورٹ‌ کے مطابق سابق یو سی چیرمین کا معذور امام مسجد پر تشدد، داڑھی کھینچ کر جان سے مارنے کی دھمکیاں، ایس ایچ او پرچہ کاٹنے سے انکاری ہے . اپنے ایک بیان امام مسجد نے کہا ہےکہ میں مضروب حافظ حماد الرحمن ابوبکر امام جامع مسجد توحید ہری پور بیلہ وزیرآباد ضلع گوجرانوالہ نامور چوہدری عادل چیمہ سابق چیرمین یو سی ونجووالی کے ڈیرے پر نا جانے کی سزا دوپہر 12بجے تشدد کیا اور داڑھی پکڑ کر خوب کھینچی اور گن تان کر جان سے مارنے کی کوشش کی لوگوں کے بر وقت پہنچ کر چھڑانے سے جان بخشی ہوئی ۔ سوہدر تھانہ میں SHOکے سامنے اقبال جرم کیا اور اسکے باوجود تھانے میں میری سنوائی نہیں ہو رہی۔وزیراعظم،وزیر اعلی اور چیف جسٹس سے اپیل ہے کہ میری داد رسی کی جائے ۔SHOکاروائی کرنے سے گریزاں ہے ۔

گوجرانوالہ میں کرونا وائرس کا پہلا کیس سامنے آگیا

باغی ٹی وی :گوجرانوالہ میں کرونا وائرس کا پہلا کیس سامنے آگیا ۔دھلےچوک کے رہائشی نوجوان قمرالزمان کو ڈی ایچ کیو ہسپتال کے آئسولیشن وارڈ میں منتقل قمر الزمان کچھ روز پہلے ایران سے واپس آیا تھا.واضح رہےکہ اس پہلے پانچویں شخص کے طور پر بھی شناخت ہو چکی ہے. معاون خصوصی برائے صحت ڈاکٹر طفر مرزا نے کورونا وائرس کے پانچویں مریض کی تصدیق کرتے ہوئے کہا کہ مریض کا تعلق فیڈرل ایریا سے ہے تاہم اس کی حالت بہتر ہے اور اُس کی بہترین نگہداشت ہو رہی ہے۔

ڈاکٹر ظفر مرزا نے میڈیا سے گزارش کی کہ وہ مریض کا نام اور اس کے خاندان کے بارے میں معلومات نہ دیں۔ حکومت کورونا وائرس سے نمٹنے کے لیے تیار ہے اور عوام کے تحفظ کے لیے تمام وسائل بروئے کار لائے جا رہے ہیں۔نیا بھر میں کورونا وائرس سے ہلاک ہونے والوں کی تعداد تین ہزار53 ہو گئی جب کہ88 ہزار متاثر ہیں۔

جنوبی کوریا میں خطرناک وائرس کے مزید 500 کیسز رجسٹرڈ ہوئے جس کے بعد مجموعی تعداد 4 ہزار 2012 ہو گئی ہے جب کہ 22 افراد ہلاک ہوئے ہیں۔ایران میں وائرس سے 11 مزید ہلاکتوں کے بعد تعداد 54 تک پہنچ گئی۔ فرانس میں 130 متاثر جبکہ جبکہ پورے برطانیہ میں 1 ہزار 694 کیس رجسٹر ہوئے ہیں۔ امریکی ریاست واشنگٹن میں کورونا سے مرنے والوں کی تعداد 2 ہو گئی جب کہ نیویارک میں بھی مہلک وائرس کا ایک کیس سامنے آیا ہے۔ورونا وائرس کا سے متاثر ہونے والوں کی سب سے زیادہ تعداد چین میں ہے جہاں 2912 افراد ہلاک ہوئے اور سات ہزار سے زائد کی حالت نازک ہے۔چینی حکام کے مطابق اسپتال سے ڈسچارج ہونے والے مریضوں کی شرح52 فیصد سےزائد رہی اور گزشتہ ہفتے سے صحت یاب مریضوں کی شرح میں اضافہ ہو رہا ہے۔

چین میں کورونا وائرس سے صحت یاب افرادکی تعداد41 ہزار 625ہوگئی ہے اور زیرعلاج افراد کی تعداد کم ہو کر 35ہزار رہ گئی۔فرانس میں 130 افراد میں کرونا وائرس کی تصدیق ہو چکی ہے، 2 بچوں میں بھی وائرس کی تصدیق کی گئی ہے جن کی عمریں ایک اور 5 سال ہیں، بچوں کی ماں میں بھی وائرس کی تصدیق کی گئی تھی

مسلم لیگ ق کے اہم رہنما کو گولیاں مار کر قتل کر دیا گیا
باغی ٹی وی کی رپورٹ کے مطابق مسلم لیگ ق شکایات سیل کے سٹی چیئرمین شیخ عثمان کو قتل کر دیا گیا،

شیخ عثمان کو پنجاب کے شہر گوجرانوالہ کے علاقے کوٹلی رستم میں قتل کیا گیا،عینی شاہدین کا کہنا ہے کہ شیخ عثمان فیکٹری کے باہر کھڑے تھے کہ ان پر فائرنک کی گئی، مسلم لیگ ق کے سیکرٹری جنرل کا کہنا ہے کہ شیخ عثمان نے پولیس کو منشیات فروشوں کی نشاندہی کی تھی،

مسلم لیگ ق کے رہنما رہنما کے قتل کی اطلاع پر پولیس موقع پر پہنچ گئی اور ملزمان کی گرفتاری کے لئے چھاپے شروع کر دیئے.

شیخ عثمان کے قتل کے واقعہ پر مسلم لیگ ق کے رہنماؤں نے واقعہ کی مذمت کرتے ہوئے قاتلوں کی فوری گرفتاری کا مطالبہ کیا ہے.

گوجرانوالہ: سی ٹی ڈی اور حساس اداروں کی کامیاب کارروائی
کراچی سے حال ہی میں گوجرانوالہ منتقل ہونے والے القاعدہ کے 5 دہشت گرد گرفتار کر لیے. ان دہشتگردوں کے قبضے سے خودکش جیکٹیں، دھماکہ خیز مواد، لیپ ٹاپ، کمپیوٹرز اور نقد رقم برآمد کی گئی ہے
گرفتار شدہ دہشتگردان میں عاصم اکبر، عبداللہ عمیر، احمد، محمد یوسف، محمد یعقوب شامل ہیں. حساس ادارے مہینوں سے ان کی سرگرمیاں نوٹ کر رہے تھے.

چیف سیکرٹری پنجاب میجر (ریٹائرڈ) اعظم سلیمان کا آئی جی پنجاب شعیب دستگیر کے ہمراہ گوجرانوالہ کا دورہ

سر کٹ ہاوس گوجرانوالہ میں، کمشنر،آر پی او گوجرانوالہ، ڈپٹی کمشنرزاورڈی پی اوزکےساتھ اہم اجلاس
اجلاس میں امن وامان کی صورتحال، اشیاء خورونوش کے نرخوں اورانکی دستیابی،ہسپتالوں اورسکولوں میں سہولیات کی فراہمی، ترقیاتی سکیموں، آوارہ کتوں کی تلفی سے متعلق اقدامات کا جائزہ
قبرستانوں سے غیر قانونی قبضوں کے خاتمے، سرکاری اراضی کو واگزار کروانے کے حوالے سے اہم فیصلے
تمام سول اور پولیس افسران کو مکمل اختیارات دیئے گئے ہیں، اب لوگو ں کے مسائل کے حل کیلئے کمرکس لیں: چیف سیکرٹری
ڈویژن میں 102 نئی ترقیاتی سکیموں میں سے 80کی منظوری کا عمل مکمل ہو چکا ہے جبکہ باقی22 پر کام جاری ہے، اجلاس کو بریفنگ

چیف سیکرٹری پنجاب میجر (ریٹائرڈ) اعظم سلیمان خان جو ان دنوں تواتر کے ساتھ صوبے کے مختلف ڈویژنز اور اضلاع کے دوروں کا سلسلہ جاری رکھے ہوئے ہیں آج آئی جی پنجاب شعیب دستگیر کے ہمراہ گوجرانوالہ پہنچے اور سرکٹ ہاوس میں سول اور پولیس افسران کے اجلاس کی صدارت کی۔ اس موقع پر خطاب کرتے ہوئے چیف سیکرٹری نے کہا کہ افسران کو مکمل اختیارات دے دیئے گئے ہیں، اب آپ لوگوں پر یہ ذمہ داری عائد ہوتی ہے کہ عوامی مسائل کے حل کیلئے خود کو وقف کر دیں۔
میجر (ریٹائرڈ) اعظم سلیمان خان نے کہا کہ تمام کمشنرز، ڈپٹی کمشنرز اور ڈی پی اوز ملکر سبزی اور فروٹ منڈیوں کے دورے کریں اور اپنی نگرانی میں اشیاء خورونوش کی قیمتیں مقررکروائیں۔ اسی طرح انتظامی افسران اپنے دفاتر سے نکلیں اور سرکاری ہسپتالوں میں ڈاکٹروں، سٹاف کی حاضری کو یقینی بنائیں اور اس کے علاوہ ادویات کے سٹاک اور انکی فراہمی کو بھی مانیٹر کریں۔ سرکاری تعلیمی اداروں میں اساتذہ اور دیگر عملے کی حاضری کیساتھ ساتھ ان اداروں کے مسائل کو بر وقت حل کروائیں تاکہ ہماری موجودہ نسل بہترین ماحول میں زیور تعلیم سے آراستہ ہوسکے۔
انہوں نے کہا کہ انتظامی افسران گوجرانوالہ میں ماحولیاتی آلودگی کے خاتمے کیلئے مقامی سول سوسائٹی کے تعاون سے زیادہ سے زیادہ شجر کاری پر توجہ دیں اور شہروں کی صفائی ستھرائی اور زیرو ویسٹ پالیسی پر عملدرآمد کیلئے خصوصی اقدامات کئے جائیں۔ اجلاس میں تمام شہروں سے آوراہ کتوں کی تلفی، وال چاکنگ اور غیر قانونی تشہر کیخلاف شروع کئے جانیوالے آپریشنز کو حتمی شکل دی گئی۔ چیف سیکرٹری پنجاب نےقبرستانوں سےغیرقانونی قبضوں کے خاتمے، سرکاری اراضی کو واگزار کروانے سے متعلق بھی ہدایات جاری کیں۔ اجلاس میں گوجرانوالہ، گجرات، حافظ آباد، نارووال اور منڈی بہاولدین میں پی ایچ اے کے قیام کی تجویز کا جائزہ لیا گیا۔

اس موقع پر چیف سیکرٹری پنجاب نے پولیس افسران کو ہدایات جاری کرتے ہوئے کہا کہ اضلاع میں کاروباری اور روز مرہ کی سرگرمیوں کیلئے لوگو ں کے تحفظ کو یقینی بنائیں تاکہ عوام روزمرہ کے معمولات زندگی پر سکون انداز میں انجام دے سکیں کیونکہ تمام تر کاروبار زندگی اور دیگر امور کا براہ راست امن و امان کی صورتحال سے منسلک ہیں۔
اجلاس میں گوجرانولہ ڈویژ ن میں عوامی فلاح کیلئے شروع کئے جانیوالے ترقیاتی منصوبوں کا بھی جائزہ لیا گیا اور چیف سیکرٹری کو بتایا گیا کہ ڈویژن میں 102 نئی ترقیاتی سکیموں میں سے 80کی منظوری کا عمل مکمل ہو چکا ہے جبکہ باقی22 پر کام جاری ہے۔ اجلاس میں سینئر ممبر بورڈ آف ریونیو، ایڈیشنل چیف سیکرٹری داخلہ، ڈویژنل کمشنر، آرپی اواور تمام ڈپٹی کمشنرز کے علاوہ تمام ڈی پی اوز نے بھی شرکت کی۔

ضلعی انتظامیہ کا کامونکی کے علاقہ دھوپ سڑی میں غیر قانونی قابضین کے خلاف کریک ڈائون
64کنال سرکاری اراضی واگزار،کاروائی کی قیادت اسسٹنٹ کمشنر کامونکے شاہد عباس جوتہ نے کی۔

ڈپٹی کمشنر لیفٹیننٹ (ر)سہیل اشرف کی ہدایت پرتجاوزات کے خلاف ضلع بھر کی طرح کامونکی میں بھی آپریشن جاری ہے۔ اسسٹنٹ کمشنر (کامونکے)شاہد عباس جوتہ نے غیر قانونی قابضین سے 64کنال سرکاری اراضی واگزار کروائی،آپریشن کے دوران 14کمرشل دوکانیں اور 93گھر بھی مسمار کیے گئے،واگزار کروائی گئی اراضی کی مالیت تقریباًساڑھے 6کروڑ سے زائد ہے۔

تفصیلات کے مطابق اسسٹنٹ کمشنر کامونکے شاہد عباس جوتہ نے غیر قانونی قابضین کے خلاف سخت ایکشن لیتے ہوئے موضع دھوپ سڑی (گونا عور)کامونکے میں 64کنال سرکاری اراضی واگزار کروا ئی جس کی کل مالت ساڑھے6کروڑ سے زائد ہے۔واگزار کروائی گئی کمرشل دوکانوں کی مالیت 41لاکھ سے زائد ہے،قابض شدہ اراضی پر 93گھر اور 14کرشل دوکانیں تعمیر تھیں جنہیں واگزار کرواتے ہوئے مسمار کر دیا گیا ہے۔
ڈپٹی کمشنر گوجرانوالہ لیفٹیننٹ (ر)سہیل اشرف نے اسسٹنٹ کمشنر (کامونکی)شاہد عباس جوتہ کے ناجائز قابضین کے خلاف ایکشن کو بھرپور سراہا اور کہا کہ آپریشن کو پوری شدت سے جاری رکھا جائے اور سرکاری املاک پر قابضین کی جہاں نشاندہی ہو ان کے خلاف کاروائی کرتے ہوئے سرکار کی قیمتی املاک کو واگزار کروایا جائے۔