Category: حیدرآباد

ٹھٹھہ (باغی ٹی وی،نامہ نگاربلاول سموں) آئی جی سندھ غلام نبی میمن اور ڈی آئی جی حیدرآباد رینج طارق رزاق دھاریجو کی ہدایات پر ایس ایس پی ٹھٹھہ ڈاکٹر محمد عمران خان کے احکامات کے تحت ضلع میں امن و امان کی بحالی کے لیے سنیپ چیکنگ کا سلسلہ تیزی سے جاری ہے۔

پولیس کی جانب سے مختلف داخلی و خارجی راستوں اور اہم مقامات پر موٹرسائیکلوں، رکشوں، مسافر وینز، بسوں اور دیگر گاڑیوں کی چیکنگ کی گئی۔ اس دوران متعدد گاڑیوں سے ٹنٹڈ گلاسز اور فینسی نمبر پلیٹس بھی ہٹائی گئیں۔

تمام ایس ڈی پی اوز نے اپنے علاقوں کے ایس ایچ اوز کے ہمراہ مختلف مقامات پر سنیپ چیکنگ کی نگرانی کی۔ پولیس اہلکار شہر کے داخلی اور خارجی راستوں پر تعینات رہے تاکہ ہر مشکوک شخص اور بغیر نمبر پلیٹ کے موٹرسائیکلز کی جانچ کی جا سکے۔

چیکنگ کے دوران متعدد مشکوک افراد اور گاڑیاں تحویل میں لی گئیں اور ان کی تصدیقی عمل (ویری فکیشن) جاری ہے۔

پولیس حکام کا کہنا ہے کہ سنیپ چیکنگ کا بنیادی مقصد ضلع میں امن و امان کی فضا کو برقرار رکھنا ہے اور کسی بھی ناخوشگوار واقعے کو پیش آنے سے قبل ہی روکا جا سکے۔

میرپورخاص(باغی ٹی وی، نامہ نگار سید شاہزیب شاہ)چاندنی چوک پر قائم دکانوں اور مکانات کے آگے موجود غیر قانونی تجاوزات کے خلاف بڑا آپریشن کیا گیا جس میں بھاری مشینری استعمال کرتے ہوئے تجاوزات کو مسمار کیا گیا۔

تفصیلات کے مطابق چاندنی چوک میں طویل عرصے سے انکروچمنٹ کی شکایات موصول ہو رہی تھیں جس پر انتظامیہ نے فیصلہ کن کارروائی کرتے ہوئے تمام غیر قانونی قبضوں کو ختم کر دیا۔ بھاری مشینری کے ذریعے دکانوں اور مکانات کے آگے بنائی گئی تجاوزات کو ہٹایا گیا۔

ان کارروائیوں کی نگرانی ڈائریکٹر انکروچمنٹ اورنگزیب مغل نے کی، جنہوں نے موقع پر موجود انکروچمنٹ آفیسر عدنان مغل اور خانزادہ کے ساتھ مل کر آپریشن کی قیادت کی۔ ایس ایچ او غازی خان راجڑ اور پولیس کی بھاری نفری بھی موقع پر موجود رہی تاکہ کسی بھی مزاحمت یا ناخوشگوار صورتحال سے نمٹا جا سکے۔

ڈائریکٹر انکروچمنٹ اورنگزیب مغل کا کہنا تھا کہ چاندنی چوک میں بارہا غیر قانونی تجاوزات کی شکایات موصول ہو رہی تھیں، جس کے بعد یہ فیصلہ کیا گیا کہ فوری طور پر کارروائی کی جائے۔ ان کا کہنا تھا کہ شہر کو تجاوزات سے پاک کرنا انتظامیہ کی اولین ترجیح ہے۔

آپریشن کے دوران کسی قسم کی مزاحمت کی اطلاع نہیں ملی اور تمام قبضہ شدہ جگہوں کو خالی کرا لیا گیا۔

میرپورخاص (باغی ٹی وی،نامہ نگارسیدشاہزیب شاہ کی رپورٹ) شہری کا پولیس پر منشیات فروشی کے لیے دباؤ ڈالنے کا الزام

تفصیل کے مطابق تحصیل میرواہ گورچانی شجاع آباد کے رہائشی دانیال ولد تاج محمد رنگھڑ نے پولیس پر سنگین الزامات عائد کرتے ہوئے کہا ہے کہ ایس ایچ او میرواہ، جنید قمر میمن اور تھانہ میرواہ کے منشی رفیق لغاری نے اسے منشیات فروشی پر مجبور کیا۔

دانیال نے میڈیا سے گفتگو میں بتایا کہ جب اس نے منشیات کے کاروبار میں ملوث ہونے سے انکار کیا تو ایس ایچ او جنید میمن اور پولیس اہلکاروں نے اسے ہوٹل سے گرفتار کر لیا اور پولیس گاڑی میں بٹھا کر تھانے لے گئے۔ اسی رات پولیس اہلکار اس کے گھر بھی پہنچے اور مبینہ طور پر زبردستی اسے ساتھ لے جانے کی کوشش کی۔

دانیال نے آئی جی سندھ، ڈی آئی جی میرپورخاص اور ایس ایس پی میرپورخاص سے مطالبہ کیا ہے کہ واقعے کا فوری نوٹس لیا جائے اور ایس ایچ او جنید میمن کو عہدے سے ہٹایا جائے۔ انہوں نے درخواست کی کہ میرواہ تھانے میں کسی ایماندار افسر کو تعینات کیا جائے تاکہ انصاف فراہم ہو۔

دانیال نے مزید کہا کہ اسے جھوٹے مقدمے میں پھنسایا جا رہا ہے اور اسے ایس ایچ او جنید قمر میمن اور ان کے عملے سے جان کا خطرہ ہے۔ اس نے اعلیٰ حکام سے درخواست کی ہے کہ اسے اور اس کے خاندان کو مکمل تحفظ فراہم کیا جائے تاکہ وہ بلا خوف زندگی گزار سکے۔

یہ واقعہ میرپورخاص میں قانون نافذ کرنے والے اداروں کے رویے اور اختیارات کے ناجائز استعمال کے حوالے سے سوالات کو جنم دیتا ہے۔ عوامی حلقوں نے بھی واقعے کی آزادانہ تحقیقات اور پولیس اصلاحات کا مطالبہ کیا ہے۔

میرپور خاص (باغی ٹی وی،نامہ نگارسیدشاہزیب شاہ کی رپورٹ) 13 سالہ لڑکی اور 21 سالہ لڑکے کی مشکوک ہلاکت، ورثاء کا معاملہ دبانے کی کوشش

تفصیلات کے مطابق میرپورخاص کے تعلقہ کوٹ غلام محمد کے گاؤں سانولو کمدار میں ایک انتہائی مشکوک واقعہ پیش آیا جہاں رانا میگھواڑ کی دکان کے گاڈر سے 13 سالہ لڑکی کویتا بنت رانا گلوگار اور 21 سالہ لڑکے ہنس راج ولد سرون بھیل کی لاشیں لٹکی ہوئی پائی گئیں۔ اس واقعے کو بظاہر خودکشی قرار دیا جا رہا ہے مگر شواہد اور حالات سے یہ معاملہ مشتبہ دکھائی دیتا ہے۔

ذرائع کے مطابق واقعے کے بعد ورثاء کی جانب سے اس معاملے کو دبانے کی بھرپور کوشش کی جا رہی ہے۔ انہوں نے صحافیوں کو مؤقف دینے سے انکار کر دیا اور کہا کہ اس واقعے کو ذہنی توازن کی خرابی کا نتیجہ قرار دے کر اسے خودکشی کے طور پر پیش کیا جائے۔

تعلقہ ہیڈکوارٹر اسپتال میں بھی بااثر افراد نے اپنا اثر و رسوخ استعمال کرتے ہوئے پوسٹ مارٹم کی کارروائی کو رکوا دیا۔ اس وجہ سے لاشوں کی درست وجوہات جاننے کا عمل تعطل کا شکار ہے اور اس بات کا خدشہ ہے کہ واقعے کی اصل حقیقت دبانے کی کوشش کی جا رہی ہے۔

مقامی لوگوں کا کہنا ہے کہ اس واقعے کی آزادانہ اور اعلیٰ سطحی تحقیقات ضروری ہیں تاکہ یہ معلوم کیا جا سکے کہ آیا یہ واقعی خودکشی ہے یا معاملہ کچھ اور ہے جو جان بوجھ کر چھپایا جا رہا ہے۔

یہ افسوسناک واقعہ کئی سوالات کو جنم دے رہا ہے۔ عوامی حلقوں کا مطالبہ ہے کہ حکام فوری طور پر غیر جانبدارانہ تحقیقات کریں اور متاثرین کو انصاف فراہم کیا جائے۔

میرپورخاص(باغی ٹی وی، نامہ نگار سید شاہزیب شاہ) میرپورخاص میں پولیس کی جانب سے منشیات فروش عناصر اور دیگر مجرمانہ سرگرمیوں کے خلاف تابڑ توڑ کارروائیاں جاری ہیں۔ ڈی آئی جی میرپورخاص رینج زبیر دریشک اور ایس ایس پی میرپورخاص شبیر احمد سیٹھار کی ہدایت پر انچارج سی آئی اے رحیم کھوسو کی سربراہی میں مختلف پولیس ٹیمیں متحرک ہیں۔

پہلی بڑی کارروائی میں ٹاؤن پولیس اسٹیشن کے ایس ایچ او کامران ہالیپوٹو اور سی آئی اے کے ایس آئی پی اقبال جٹ کی قیادت میں پولیس ٹیم نے PCB گراؤنڈ کے قریب خفیہ اطلاع پر کامیاب چھاپا مارا، جس میں عامر خان عرف سلیمان میرانی کو ٹیوٹا کرولا کار اور بڑی مقدار میں منشیات کے ساتھ گرفتار کیا گیا۔ ملزم کے قبضے سے 6600 سفینہ گٹکا ساشے اور 69000 آداب گٹکا پیکٹ برآمد ہوئے۔ اس کے خلاف گٹکا ممانعت ایکٹ کے تحت مقدمہ درج کیا گیا، جبکہ فرار ہونے والے ملزم نعیم عرف نما عباسی کی تلاش جاری ہے۔

دوسری کامیاب کارروائی میں پولیس ٹیم نے KFC موڑ کے قریب بھی کامیاب کارروائی کی، جس میں منشیات فروش محمد حسن کو 1400 رائل کنگ گٹکا ساشے اور اے پی وی وین سمیت گرفتار کیا گیا۔ اس کے خلاف بھی گٹکا ممانعت ایکٹ کے تحت مقدمہ درج کیا گیا ہے۔

تیسری کارروائی ،گزشتہ دنوں رتن آباد سیم نالہ کے قریب سے چھینی گئی 125 موٹرسائیکل کو برآمد کرنے میں پولیس نے شاندار کامیابی حاصل کی۔ ایس ایچ او اولڈ میرپور انسپکٹر اکبر چنہ نے انتھک محنت کے بعد موٹرسائیکل HEN-4895 برآمد کی اور اسے اصل مالک محمد متین کے حوالے کیا۔ اس موقع پر موٹر سائیکل مالک نے پولیس کی محنت کو سراہا اور ایس ایس پی میرپورخاص اور ایس ایچ او اولڈ میرپور کا شکریہ ادا کیا۔

پولیس کی جانب سے جاری ان کارروائیوں نے علاقے میں مجرمانہ سرگرمیوں کے خلاف سخت پیغام دیا ہے اور عوام نے بھی پولیس کے ان اقدامات کو سراہا ہے۔ مزید کارروائیاں جاری ہیں تاکہ علاقے کو منشیات اور جرائم سے پاک کیا جا سکے۔

میرپورخاص (باغی ٹی وی، نامہ نگار سید شاہزیب شاہ)حیسکو میرپورخاص میں مرمت اور ریپیئرنگ کے نام پر شہر بھر میں غیراعلانیہ لوڈشیڈنگ کی جا رہی ہے جس نے شہریوں کی زندگی کو شدید متاثر کر دیا ہے۔ شہریوں کا کہنا ہے کہ حیسکو کی افسر شاہی نے پورے شہر میں بجلی کی بندش کا راج قائم کر رکھا ہے، اور عوامی احتجاج کے باوجود لوڈشیڈنگ کا سلسلہ مسلسل جاری ہے۔

شہریوں کا کہنا ہے کہ حیسکو کی جانب سے صبح 9 بجے سے 12 بجے تک بجلی بند رکھنے کا شیڈول دیا جاتا ہے، مگر اکثر اوقات لائٹ 2:30 بجے تک واپس نہیں آتی۔ حیسکو کا اپنا شیڈول پر عمل نہ کرنا عوام کے لیے مزید مشکلات کا باعث بن رہا ہے۔ دفاتر، اسکول، مارکیٹ اور گھریلو صارفین سب اس غیر اعلانیہ لوڈشیڈنگ سے شدید متاثر ہیں۔

عوام کا کہنا ہے کہ حیسکو میں افسران کا مکمل راج چل رہا ہے اور لوڈشیڈنگ کے نظام کو من مانی کے طور پر چلایا جا رہا ہے۔ LS (لائن سپریٹنڈنٹ) کریڈٹ پر بجلی بند کروا دیتا ہے اور کھولنے کی ذمہ داری واضح نہیں ہوتی، جس سے شہریوں میں مزید بے چینی پھیل رہی ہے۔ اس کے علاوہ شہریوں نے الزام عائد کیا کہ میرپورخاص میں بجلی کے نظام کو بہتر کرنے کے لیے کروڑوں روپے خرچ کیے گئے لیکن ان اخراجات کا آڈٹ نہیں ہوا اور نہ ہی افسران سے کوئی بازپرس کی گئی۔

شہریوں نے حیسکو چیف سے مطالبہ کیا ہے کہ وہ غیراعلانیہ لوڈشیڈنگ کے خاتمے اور بجلی کی ترسیل کو یقینی بنانے کے لیے فوری اقدامات کریں اور کرپٹ افسران کا محاسبہ کیا جائے۔ عوام کا کہنا ہے کہ حکومت اور اداروں کو عوامی سہولت کو مدنظر رکھ کر فیصلے کرنے چاہئیں تاکہ شہریوں کو درپیش مشکلات کا ازالہ ہو سکے۔