Category: حیدرآباد

میرپورخاص (باغی ٹی وی ،نامہ نگارشاہ زیب شاہ کی رپورٹ)ایس ایس پی کی ماہانہ کرائم میٹنگ، منشیات اور جرائم کے خلاف کریک ڈاؤن کاحکم

تفصیلات کے مطابق ایس ایس پی میرپورخاص شبیر احمد سیٹھار کی قیادت میں ایس ایس پی آفس میرپورخاص میں ماہانہ کرائم میٹنگ کا انعقاد ہوا، جس میں ضلع کے تمام ایس ڈی پی اوز، ایس ایچ اوز اور انچارجز نے شرکت کی۔ میٹنگ میں سماج دشمن عناصر کے خلاف جاری کارروائیوں اور پولیس کی کارکردگی کا جائزہ لیا گیا۔

ایس ایس پی میرپورخاص نے جناب آئی جی پی سندھ غلام نبی میمن اور ڈی آئی جی میرپورخاص ذبیر دریشک کے احکامات سے آگاہ کرتے ہوئے جرائم پیشہ افراد اور منشیات فروشوں کے خلاف کارروائیاں تیز کرنے کی ہدایت کی۔

انہوں نے تمام ایس ڈی پی اوز اور ایس ایچ اوز کو اپنے علاقوں کو منشیات سے پاک کرنے کے احکامات دیے اور غیر تسلی بخش کارکردگی دکھانے والے افسران پر سخت برہمی کا اظہار کرتے ہوئے شوکاز نوٹسز جاری کرنے کا حکم دیا۔

مزید برآں انہوں نے خبردار کیا کہ کوئی بھی اہلکار غیر قانونی سرگرمیوں میں ملوث پایا گیا تو اس کے خلاف قانونی کارروائی کی جائے گی۔ ایس ایس پی شبیر احمد سیٹھار نے خاص طور پر چوری، ڈکیتی، موٹرسائیکل چھیننے اور منشیات فروشوں کے خلاف فوری کارروائی کرنے کے احکامات دیے۔

ٹھٹھہ (باغی ٹی وی ،نامہ نگاربلاول سموں)پولیس کی ضلع بھر میں سنیپ چیکنگ جاری، امن و امان کی بحالی پر توجہ مرکوز

تفصیلات کے مطابق ٹھٹھہ پولیس کی جاری کردہ پریس ریلیز کے مطابق ایس ایس پی ڈاکٹر محمد عمران خان کی ہدایات پر ضلع بھر میں امن و امان کو برقرار رکھنے کے لیے سنیپ چیکنگ کا سلسلہ جاری ہے۔

اس چیکنگ میں موٹرسائیکلیں، رکشے، مسافر وین، بس اور دیگر چھوٹی بڑی گاڑیوں کی جانچ پڑتال کی جا رہی ہے۔ مختلف گاڑیوں سے کالے شیشے اور فینسی نمبر پلیٹس بھی اتاری گئیں۔

ہر علاقے میں ایس ڈی پی اوز اپنے متعلقہ ایس ایچ اوز کے ساتھ مل کر چیکنگ کر رہے ہیں خاص طور پر شہر کے داخلی اور خارجی راستوں پر سخت نگرانی کی جا رہی ہے۔

اس دوران متعدد مشکوک افراد اور بغیر نمبر پلیٹ والی موٹرسائیکلوں کو تحویل میں لے کر ان کی تصدیق کا عمل جاری ہے۔ اس مہم کا بنیادی مقصد ضلع میں امن و امان کی صورتحال کو بہتر بنانا اور کسی ناخوشگوار واقعے سے بچاؤ کرنا ہے۔

ٹھٹھہ (باغی ٹی وی ،نامہ نگار بلاول سموں)ایس ایس پی ٹھٹھہ ڈاکٹر محمد عمران خان کے احکامات کے تحت ٹھٹھہ پولیس کی جانب سے ضلع بھر میں امن و امان برقرار رکھنے کے لیے سنیپ چیکنگ کا سلسلہ تیزی سے جاری ہے۔ ضلع کے مختلف علاقوں میں موٹرسائیکلوں، رکشوں، مسافر وینوں، بسوں، اور دیگر گاڑیوں کو تفصیلی طور پر چیک کیا جا رہا ہے۔ اس کے علاوہ، چیکنگ کے دوران متعدد گاڑیوں سے ٹنٹڈ گلاسز اور فینسی نمبر پلیٹس بھی اتاری جا رہی ہیں۔

ضلع بھر میں ایس ڈی پی اوز اپنی حدود میں ایس ایچ اوز کے ہمراہ سنیپ چیکنگ کر رہے ہیں۔ پولیس کی جانب سے داخلی اور خارجی راستوں پر خصوصی توجہ دی جا رہی ہے تاکہ کسی بھی مشکوک حرکت کو فوری طور پر روکا جا سکے۔ اس دوران بغیر نمبر پلیٹ کی موٹرسائیکلز کو تحویل میں لے کر ویریفیکیشن کا عمل جاری ہے۔

ٹھٹھہ پولیس کا کہنا ہے کہ اس چیکنگ کا بنیادی مقصد ضلع میں امن و امان کی صورتحال کو بحال رکھنا اور کسی بھی ناخوشگوار واقعے سے بچاؤ کو یقینی بنانا ہے۔ مشکوک افراد کی شناخت اور گاڑیوں کی ویریفیکیشن کے ذریعے ٹھٹھہ میں قانون کی عملداری کو مضبوط بنایا جا رہا ہے۔

سنیپ چیکنگ کی یہ مہم ضلع بھر میں جرائم کی روک تھام اور عوام کی حفاظت کے لیے ایک اہم قدم ہے۔ پولیس کی جانب سے مسلسل نگرانی اور چیکنگ سے امن و امان کی صورتحال میں بہتری آ رہی ہے اور عوام کو تحفظ کا احساس دلایا جا رہا ہے۔

میرپورخاص (باغی ٹی وی ،نامہ نگار سید شاہزیب شاہ) ایس ایس پی میرپورخاص جناب شبیر احمد سیٹھار نے سی آئی اے سینٹر، 15 مددگار سینٹر، پولیس فیسلیٹیشن سینٹر، تھانہ ٹاؤن، تھانہ غریب آباد، تھانہ وومین، اور تھانہ سٹلائٹ ٹاؤن کا دورہ کیا۔ اس دورے کا مقصد پولیس اسٹیشنز اور متعلقہ سینٹرز کی کارکردگی کا جائزہ لینا اور ان کے محکمانہ امور کی تفصیل سے آگاہی حاصل کرنا تھا۔

ایس ایس پی شبیر احمد سیٹھار نے اپنے دورے کے دوران تمام پولیس اسٹیشنز کے مختلف امور کا تفصیلی معائنہ کیا اور پولیس کی تعیناتی کے حوالے سے بریفنگ لی۔ انہوں نے روزنامچہ عام، ایف آئی آر رجسٹرز اور دیگر اہم دستاویزات کا بھی جائزہ لیا تاکہ محکمہ پولیس کی کارکردگی کا صحیح اندازہ ہو سکے۔

ایس ایس پی میرپورخاص نے اس موقع پر تمام افسران اور جوانوں کو ہدایت کی کہ منشیات فروشوں کے خلاف فوری اور سخت کارروائیاں کی جائیں۔ انہوں نے کہا کہ عوام کی جان و مال کی حفاظت کے لیے پولیس اہلکاروں کو اپنی ذمہ داریاں انتہائی فرض شناسی کے ساتھ انجام دینی چاہیے۔ ایس ایس پی نے زور دیا کہ عوام کے ساتھ خوش اخلاقی سے پیش آئیں اور انصاف کے تقاضے پورے کیے جائیں، تاکہ عوام کا پولیس پر اعتماد بحال رہے۔

ایس ایس پی نے تمام ایس ایچ اوز کو سخت ہدایات جاری کیں کہ شہر میں پیٹرولنگ اور پکٹنگ کے عمل کو مؤثر بنایا جائے۔ انہوں نے کہا کہ مشتبہ افراد پر کڑی نظر رکھی جائے تاکہ کسی بھی قسم کے جرم کو روکا جا سکے۔ عوام کی حفاظت کو یقینی بنانے کے لیے پولیس کو دن رات مستعد رہنے اور ہر مشتبہ حرکت پر فوری کارروائی کرنے کا حکم دیا۔

ایس ایس پی شبیر احمد سیٹھارنے پولیس کی کارکردگی کو مزید بہتر بنانے کے لیے جامع ہدایات جاری کیں اور عوام کو یقین دلایا کہ ان کی حفاظت پولیس کی اولین ترجیح ہے۔

ٹھٹھہ (باغی ٹی وی،نامہ نگار بلاول سموں) گورنمنٹ پرائمری بوائز اسکول مکلی میں الیکشن کمیشن ضلع ٹھٹھہ کے افسران نے قبضہ کر لیا ہے، جس کی وجہ سے طلبہ کی تعلیم متاثر ہو رہی ہے۔ اسکول کے چھ کمروں پر الیکشن کمیشن نے اپنا سامان رکھ کر تالے لگا دیے ہیں، جس کے نتیجے میں طلبہ باہر کھلے میدان میں بیٹھ کر پڑھنے پر مجبور ہیں۔

تفصیلات کے مطابق ڈپٹی کمشنر ٹھٹھہ نے جی پی ایس بوائز مکلی کو الیکشن کمیشن کے گودام کے طور پر دیا ہے۔ اس فیصلے کے بعد طلبہ کو کلاس رومز کی عدم موجودگی کی وجہ سے کھلے میدان میں تعلیم حاصل کرنا پڑ رہا ہے جو کہ شدید مشکلات کا باعث بن رہا ہے۔ طلبہ کے لیے یہ صورتحال نہ صرف غیر آرام دہ ہے بلکہ ان کی تعلیمی کارکردگی پر بھی منفی اثر ڈال رہی ہے۔

یہ صورت حال اس وقت پیدا ہوئی ہے جب حکومت سندھ اور وزیر تعلیم سید سردار علی شاہ سرکاری اسکولوں میں بچوں کے داخلے کی تشہیر کر رہے ہیں۔ اس کے باوجود شہر مکلی کے مرکزی سکول پر ضلعی انتظامیہ اور الیکشن کمیشن نے زبردستی قبضہ کر کے وہاں گودام قائم کر لیا ہے، جس کی وجہ سے طلبہ تعلیم سے محروم ہو رہے ہیں۔

مقامی سیاسی اور سماجی رہنماؤں، عوامی ہیومن رائٹس فورم کے اراکین، سکول کے اساتذہ اور پرائمری ٹیچرز ایسوسی ایشن کے عہدیداران نے وزیر اعلیٰ سندھ سید مراد علی شاہ اور وزیر تعلیم سید سردار علی شاہ سے پرزور مطالبہ کیا ہے کہ الیکشن کمیشن کے اس گودام کو کسی اور جگہ منتقل کیا جائے۔ انہوں نے یہ بھی کہا کہ قبضے میں لیے گئے کمرے فوراً خالی کرائے جائیں تاکہ تعلیمی عمل کو بحال کیا جا سکے۔

طلبہ کے والدین نے بھی اس معاملے پر تشویش کا اظہار کرتے ہوئے کہا ہے کہ اس صورتحال کے باعث ان کے بچوں کی تعلیم متاثر ہو رہی ہے اور انہیں فوری طور پر مناسب تعلیم فراہم کی جانی چاہیے۔ یہ ایک بڑا ظلم ہے کہ حکومت کی جانب سے فراہم کردہ تعلیم کی جگہ کو گودام میں تبدیل کر دیا گیا ہے۔

مقامی رہنماؤں کا کہنا ہے کہ اگر اس مسئلے کو حل نہ کیا گیا تو وہ احتجاج پر مجبور ہوں گے۔ انہوں نے حکومت سے فوری مداخلت کی اپیل کی ہے تاکہ طلبہ کو ایک مناسب تعلیمی ماحول فراہم کیا جا سکے۔

میرپور خاص (باغی ٹی وی، نامہ نگار سید شاہزیب شاہ) یونین کونسل نمبر 08 کے چیئرمین حاجی محمد علی نے وارڈ نمبر 04 کے علاقے تھامس آباد اور ہیرا آباد میں سیوریج کے مسائل کے حل کے لیے فوری ایکشن لیا۔ علاقے میں نالہ بند ہونے کی وجہ سے سیوریج کا پانی سڑکوں پر آ گیا تھا، جس سے رہائشیوں کو شدید مشکلات کا سامنا تھا۔

علاقہ مکینوں کی شکایت پر چیئرمین حاجی محمد علی نے فوری کارروائی کرتے ہوئے اپنی سینٹری انسپکٹر اور ٹیم کو موقع پر روانہ کیا اور علاقے کو کلیئر کرنے کی ہدایت دی۔ چیئرمین خود بھی موقع پر موجود رہے اور کام کی نگرانی کی۔

علاقہ مکینوں نے چیئرمین حاجی محمد علی کی بروقت کاوشوں کو سراہا اور ان کا شکریہ ادا کیا۔ اس موقع پر یونین کونسل کے وائس چیئرمین محمد نعیم، کونسلر اور علاقے کے مکین بھی موجود تھے۔

حیدرآباد (باغی ٹی وی ،نامہ نگار) حیدرآباد کے تھانہ اے سیکشن کے معروف کرائم فائٹر، ایس ایچ او نیک محمد کھوسو کی شاندار کارروائی میں لوٹی گئی 15 لاکھ کی رقم برآمد کر لی گئی۔ متاثرہ مالکان نے ہجوم کے ساتھ تھانے کا رخ کیا اور ایس ایچ او نیک محمد کھوسو کے حق میں زبردست نعرے لگائے۔ تھانے کی فضاء "نیک محمد کھوسو زندہ باد” کے نعروں سے گونج اٹھی۔

تفصیلات کے مطابق ایس ایچ او نیک محمد کھوسو نے مستعدی اور پیشہ ورانہ مہارت کا مظاہرہ کرتے ہوئے اس پیچیدہ کیس کو حل کیا اور متاثرین کو ان کی کھوئی ہوئی رقم واپس لوٹا دی۔ اس کامیابی پر علاقے کے عوام نے نیک محمد کھوسو کی کارکردگی کو سراہا اور انہیں خراج تحسین پیش کیا۔

ایس ایچ او نیک محمد کھوسو کے خلاف پھیلائی جانے والی افواہوں اور غلط پروپیگنڈا کرنے والوں کو بھی خبردار کیا گیا ہے کہ وہ حقائق کو نظر انداز نہ کریں اور اپنی آنکھیں کھلی رکھیں، کیونکہ نیک محمد کھوسو اپنی بے مثال کارکردگی کے ذریعے عوام کے دلوں میں اپنی جگہ بنا چکے ہیں۔