Category: حیدرآباد

میرپورخاص(باغی ٹی وی نامہ نگار سید شاہزیب شاہ کی رپورٹ) ایس ایس پی میرپورخاص شبیر احمد سیٹھار نے 1122 ڈسٹرکٹ ہیڈکوارٹر میرپورخاص کا دورہ کیا۔ ریسکیو 1122 کے CLO فیاض سموں نے ان کا استقبال کی جبکہ ایس ایس پی میرپورخاص کو اہلکاروں کی جانب سے سلامی دی گئی اور قومی ترانہ پڑھا گیا۔ اس موقع پر ریسکیو 1122 کے اہلکاروں نے پاکستان زندہ باد کے نعرے بھی لگائے۔

ایس ایس پی شبیر احمد سیٹھار نے ہیڈکوارٹر کا تفصیلی دورہ کیا جہاں انہیں ریسکیو آلات اور ہنگامی صورتحال میں استعمال ہونے والی جدید تکنیکی صلاحیتوں کے بارے میں بریفنگ دی گئی۔ انہوں نے ریسکیو اہلکاروں کی کارکردگی کا باریک بینی سے جائزہ لیتے ہوئے ان کی صلاحیتوں کو سراہا اور نیک خواہشات کا اظہار کیا۔

دورے کے دوران ڈی ایس پی (UT) طلال خان، انچارج ڈی آئی بی جواد دل اور متعلقہ ایس ایچ او بھی ایس ایس پی شبیر احمد سیٹھار کے ہمراہ موجود تھے۔ اس دورے کا مقصد ریسکیو 1122 کے اہلکاروں کی پیشہ ورانہ مہارت اور ان کے جدید آلات کی افادیت کا جائزہ لینا تھا۔

میرپورخاص (باغی ٹی وی، نامہ نگار سید شاہزیب شاہ): دنیا بھر کی طرح میرپورخاص میں بھی ذہنی صحت کا عالمی دن بھرپور طریقے سے منایا گیا۔ اس موقع پر ڈسٹرکٹ ہیڈ کوارٹر سول ہسپتال میرپورخاص اور پاکستان سائیکاٹرسٹ سوسائٹی کے باہمی تعاون سے ایک آگاہی سیمینار کا انعقاد کیا گیا، جس میں مختلف شعبہ ہائے زندگی سے تعلق رکھنے والے افراد، سول سوسائٹی کے نمائندے، نوجوان اور صحت کے ماہرین نے شرکت کی۔

سیمینار میں معروف ماہر نفسیات ڈاکٹر لکیش کمار کھتری نے ذہنی صحت کی اہمیت اور نفسیاتی بیماریوں کے اسباب پر روشنی ڈالی۔ انہوں نے کہا کہ دنیا بھر میں تقریباً 970 بلین افراد نفسیاتی بیماریوں کا شکار ہیں اور پاکستان جیسے ترقی پذیر ممالک میں یہ مسئلہ زیادہ سنگین ہے۔ اس کی بڑی وجوہات میں معاشرتی مسائل، بیروزگاری، اور نفسیاتی ماہرین کی کمی شامل ہیں۔ ڈاکٹر لکیش نے کہا کہ ذہنی بیماریوں کو سماجی عیب سمجھنے کی وجہ سے 90 فیصد سے زائد مریض ماہرین تک رسائی حاصل نہیں کر پاتے۔

اس سال کے عالمی دن کا موضوع "کام کی جگہ پر ذہنی صحت کو ترجیح دینا” تھا۔ اس موقع پر ڈاکٹر لکیش نے کہا کہ بہتر حکمت عملی کے ذریعے کام کی جگہ پر ذہنی دباؤ کو کم کیا جا سکتا ہے، جس سے کارکردگی میں چالیس فیصد بہتری آ سکتی ہے۔

ڈسٹرکٹ ہیلتھ آفیسر ڈاکٹر جیرام داس اور سول سرجن ڈاکٹر ہیمجی چوہان نے بھی ذہنی صحت کے موضوع پر بات کی اور کہا کہ میرپورخاص میں ماہر نفسیات کی شدید کمی ہے جس کے باعث عوام میں آگاہی کا فقدان ہے۔

اس موقع پر دیگر مقررین جن میں سماجی رہنما محمد بخش کپری، معروف صحافی شاہد حسین خاصخیلی، اور پروفیسر سکندر مری شامل تھے، نے بھی ذہنی صحت کی اہمیت پر زور دیا اور ایسے آگاہی پروگراموں کو مستقبل میں بھی جاری رکھنے کی ضرورت پر زور دیا۔

میرپورخاص (باغی ٹی وی، نامہ نگار سید شاہزیب شاہ): پاکستان سنی تحریک کے سربراہ انجینئر محمد ثروت اعجاز قادری نے کہا ہے کہ تحریک ختم نبوت ﷺ اور شان صحابہ کرام رضی اللہ عنہ کے تحفظ اور وطن عزیز کی سلامتی کے لئے کسی بھی قربانی سے دریغ نہیں کرے گی۔ انہوں نے کہا کہ سنی تحریک ایک نظریاتی جماعت ہے جو بے شمار قربانیوں کے باوجود اپنے مشن اور نظریے پر ثابت قدمی سے گامزن ہے۔ ان خیالات کا اظہار انہوں نے تاجدار ختم نبوت امن مارچ عمرکوٹ سے واپسی پر میرپورخاص میں ضلعی جنرل سیکریٹری سلمان راجپوت کے گھر پر ذمہ داران سے گفتگو کرتے ہوئے کیا۔

ثروت اعجاز قادری نے اس موقع پر واضح کیا کہ ختم نبوت ﷺ اور صحابہ کرام کی شان ان کی جماعت کی ریڈ لائن ہے اور اس کا تحفظ کرنا ان کے لیے ایک ورثہ ہے۔ انہوں نے مزید کہا کہ ملک دشمن قوتیں متحد ہو کر اسلام اور پاکستان کے خلاف سازشیں کر رہی ہیں، لہٰذا ہمیں ہر لمحہ اپنی آنکھیں کھلی رکھنی چاہئیں۔

ثروت اعجاز قادری نے ملک میں جاری سیاسی بحران پر بات کرتے ہوئے کہا کہ حکمران اقتدار کے حصول کے لئے آپس میں دست گریبان ہیں اور آئین و قانون کا مذاق بنا رہے ہیں جو کہ ملکی معیشت کے لیے نقصان دہ ہے۔ انہوں نے کارکنان پر زور دیا کہ وہ اپنی صفوں میں اتحاد پیدا کریں اور تنظیمی پیغام کو گھر گھر پہنچائیں۔

اس موقع پر پاکستان سنی تحریک کے صوبائی رہنما محمد علی چشتی، ڈویژنل صدر حافظ محمد طارق قادری، ضلعی صدر ملک ساجد قادری، جنرل سیکریٹری محمد سلمان راجپوت، جاوید جعفری، عمران سراج سمیت مختلف علاقوں کے سیکٹر اور یونٹ انچارج بھی موجود تھے، جنہوں نے جماعت کے نظریے اور مشن کے لیے اپنے عزم کا اظہار کیا۔

میرپورخاص(باغی ٹی وی، سید شاہزیب شاہ کی رپورٹ) ایڈیشنل ڈائریکٹر ایگریکلچر ایکسٹینشن میرپور خاص،ذوالفقار علی جاگیرانی نے ربیع پلان-25 2024 کے تحت ضلع، تحصیل اور یونین کونسل کی سطح پر گندم کی وافر مقدار میں کاشت کے لئے زرعی سیمینار منعقد کرانے کا شیڈول جاری کر دیا ہے۔

سیمینارز کے انعقاد کا مقصد کاشتکاروں کو گندم کی بہتر پیداوار کے لئے آگاہی فراہم کرنا ہے۔ اس سلسلے میں مندرجہ ذیل تاریخوں اور مقامات پر سیمینارز کا انعقاد کیا جائے گا,14 اکتوبر ٹاؤن ہال جھڈو,15 اکتوبر یو سی آہوری، علاقے ٹنڈو کولاچی,16 اکتوبرایگریکلچر آفس کوٹ غلام محمد، یو سی روشن آباد,17 اکتوبر ایگریکلچر آفس ڈگری، یو سی فضل بھمبروں، یو سی میر امام بخش,18 اکتوبر یو سی میر غلام حسین، گاؤں میر خالد تالپور، یو سی کنگورو,19 اکتوبر یو سی جواریہ سر، گاؤں نواب یوسف تالپور,21 اکتوبر یو سی آفس بیلاڑو شاخ، یو سی نوکوٹ، یو سی خداداد، علاقے سکریاری، یو سی پبن، گاؤں ناگن,22 اکتوبریو سی آفس دلاور حسین، یو سی حاجی ہادی بخش، ڈھونکائی کے علاقے ڈینگان رستی، یو سی صوفن شاہ، گاؤں 170 سی

اسی طرح 23 اکتوبر یو سی آفس میروا، یو سی رئیس خیر محمد بھرگڑی، گاؤں ہاشم بھرگڑی،24 اکتوبریو سی ٹنڈو جان محمد،25 اکتوبر ٹاؤن ہال کھان، یو سی میرخدا بخش، گاؤں حاجی عبداللہ جروار،28 اکتوبر 12 میل اسٹاپ سندھڑی، گاؤں دولت لغاری، یو سی آفس پرانا میرپور،29 اکتوبر یو سی مکھن سموں، سمن گوٹ، یو سی آفس کھان، یو سی آفس کھیراو، گاؤں جھلوری، یو سی آفس ترک علی مری، یو سی آفس بلوچ آباد،30 اکتوبر یو سی آفس میروا گورچانی، یو سی آفس جھڑبی،31 اکتوبر یو سی آفس چٹوڑی

ایڈیشنل ڈائریکٹر ذوالفقار علی جاگیرانی نے تمام کاشتکاروں سے اپیل کی ہے کہ وہ ان سیمینارز میں شرکت کریں تاکہ وہ جدید زرعی تکنیکوں سے آگاہ ہو سکیں اور اپنی پیداوار کو بڑھانے کے لئے بہتر حکمت عملی اپنائیں۔ یہ اقدام علاقائی زراعت کی ترقی کے لئے ایک اہم سنگ میل ثابت ہوگا۔

میرپور خاص (باغی ٹی وی،نامہ نگار سید شاہزیب شاہ کی رپورٹ)18 اکتوبرکو پیپلزپارٹی کا جلسہ،شہداء کی قربانیوں کو زندہ رکھنے کا عزم

تفصیل کے مطابق پاکستان پیپلزپارٹی ضلع میرپورخاص کی ایگزیکیٹیو کمیٹی کا اہم اجلاس ضلعی جنرل سیکریٹری جنید بلند کی زیرِ صدارت ٹالپر ہاؤس جی ایم ٹاؤن میں منعقد ہوا۔ اجلاس کا آغاز تلاوت کلام پاک اور دعا سے کیا گیا۔

اجلاس میں ایم پی اے ہری رام کشوری لعل، نور احمد بھڑ گڑی، ضلع کونسل کے چیئرمین میر انور ٹالپر، میئر عبدالرؤف غوری، اور ڈپٹی میئر سمیرا بلوچ سمیت پارٹی کے دیگر عہدیداران نے شرکت کی۔ اس موقع پر شہید محترمہ بینظیر بھٹو اور پارٹی کے جیالوں کی جمہوریت کی بحالی کے لیے دی گئی قربانیوں کو خراجِ تحسین پیش کیا گیا۔

اجلاس میں 18 اکتوبر کو منعقد ہونے والے جلسے میں بھرپور شرکت کا عزم کیا گیا۔ ضلعی جنرل سیکریٹری جنید بلند نے کہا کہ ہم تمام شہداءِ جمہوریت کو سلام پیش کرتے ہیں اور شہید بی بی کی جدو جہد ہمارے لیے باعث فخر ہے۔ انہوں نے چیئرمین بلاول بھٹو کی قیادت کی تعریف کرتے ہوئے کہا کہ ہمیں ان کا بازو بن کر پارٹی کے لیے کام کرنا ہے۔

اجلاس میں ضلعی چیئرمین میر انور ٹالپر نے کہا کہ 18 اکتوبر کا دن ملکی تاریخ کا ایک بڑا سانحہ ہے اور ہم اس دن دہشتگردی کا شکار ہونے والے تمام شہداء کو خراج تحسین پیش کرتے ہیں۔

اجلاس میں پارٹی کے تمام عہدیداران، تعلقوں کے صدور، جنرل سیکریٹریز، اور پارٹی کی ذیلی تنظیموں کے نمائندگان نے بھی شرکت کی۔ شرکاء نے متحد ہو کر پارٹی کے لیے جدو جہد جاری رکھنے کے عزم کا اظہار کیا۔

میرپورخاص (باغی ٹی وی، نامہ نگار سید شاہزیب شاہ) تعلیمی بورڈ میرپورخاص کو سندھ حکومت کی جانب سے واجب الادا ایک ارب روپے سے زائد واجبات، ملازمین کی تنخواہوں کی ادائیگی، ریٹائرڈ ملازمین کے واجبات اور دیگر مسائل کا سامنا ہے۔

ان مسائل کے حل کے لئے میرپورخاص ڈسٹرکٹ کی حق پرست قیادت، رکن قومی اسمبلی پروفیسر انجینئر عبدالعلیم خانزادہ، اراکین صوبائی اسمبلی انجینئر صابر قائمخانی اور ایڈوکیٹ راشد خان نے اہم کردار ادا کیا ہے۔

حق پرست عوامی نمائندوں نے چیف سیکریٹری سندھ آصف حیدر شاہ سے ملاقات کی، جس دوران چیف سیکریٹری نے تمام مسائل کو مرحلہ وار حل کرنے کا یقین دلایا۔ اس ملاقات میں تعلیمی بورڈ کے مالی مسائل سمیت ملازمین کی تنخواہوں اور ریٹائرڈ افراد کے واجبات کے حوالے سے اہم امور پر بات چیت کی گئی۔

یہ ملاقات تعلیمی بورڈ میرپورخاص کے مسائل کو حل کرنے کے لئے ایک اہم قدم قرار دی جا رہی ہے، جس سے ملازمین اور ریٹائرڈ افراد کو اپنی واجبات کی ادائیگی اور دیگر مسائل کے حل کی امید ہو گئی ہے۔