Category: حیدرآباد

ٹھٹھہ (باغی ٹی وی ،نامہ نگاربلاول سموں) ٹھٹھہ پولیس نے منشیات اور گٹکا فروشوں کے خلاف بڑی کارروائی کرتے ہوئے 16 ملزمان کو گرفتار کرلیا ہے۔ پولیس نے ملزمان کے قبضے سے بھاری مقدار میں منشیات، گٹکا اور دیگر سامان برآمد کیا ہے۔

ایس ایس پی ٹھٹھہ ڈاکٹر محمد عمران خان کے احکامات پر ٹھٹھہ، گھارو، کیٹی بندر، ساکرو، کینجھر اور جھرک پولیس نے مختلف مقامات پر کامیاب کارروائیاں کیں۔ پولیس نے 3 گٹکا فروشوں شھباز خاصخیلی، محبوب جاکھرو اور نیلو کولھی کو 20 کلو گٹکا مٹیریل، 1330 پیکٹ گٹکا ماوا اور ایک رکشہ سمیت گرفتار کیا۔

اسی طرح، پولیس نے 13 منشیات فروشوں انور چاندیو، قاسم چاندیو، ھارون کچھی، غلام دستگیر مگسی، سومار کھڈائی، سکندر عرف سکو سمیجو، حسین میربحر، انور عرف انو بلوچ، امیر حیدر عرف کدو جوکھیو، قادر بخش چوہان، خان محمد لاسی، احسان منگنھار اور گلزار جسکانی کو 1600 گرام چرس، 94 بیگز اور 30 لیٹر دیسی شراب سمیت گرفتار کیا۔

پولیس نے بتایا کہ یہ کارروائیاں آئی جی سندھ غلام نبی میمن اور ڈی آئی جی پی حیدرآباد رینج طارق رزاق دہاریجو کی ہدایات پر کی گئی ہیں۔ پولیس کا کہنا ہے کہ منشیات اور گٹکا کے خلاف کارروائیاں جاری رہیں گی اور کسی بھی صورت میں مجرموں کو نہیں بخشا جائے گا۔

ٹھٹھہ(باغی ٹی وی نامہ نگاربلاول سموں کی رپورٹ) گورنمنٹ گرلز کالج ٹھٹھہ کی فرسٹ ائیر کی طالبہ نجمہ ملاح، جو کہ مکلی حیدری چوک کی رہائشی غریب مزدور کی بیٹی ہے، پراسرار طور پر لاپتہ ہوگئی۔ نجمہ ملاح کی گمشدگی پر گھر میں کہرام مچا ہوا ہے، اور اس کے والدین پر غشی کے دورے پڑ رہے ہیں۔

نجمہ ملاح کے والد یوسف ملاح اور چچا رستم ملاح نے میڈیا کو بتایا کہ نجمہ پیر کے روز کالج گئی تھی لیکن گھر واپس نہیں آئی۔ کالج کے اوقات مکمل ہونے کے بعد، جب ہم نے کالج کی پرنسپل سے رابطہ کیا، تو انہوں نے بتایا کہ نجمہ کالج میں پڑھائی کے بعد روزانہ کی طرح گھر کے لئے نکل گئی تھی، اور اس کے بعد ہمیں اس کے بارے میں کوئی اطلاع نہیں ملی۔

نجمہ ملاح کے ورثاء نے الزام لگایا ہے کہ ان کی بیٹی کو کالج سے اغوا کیا گیا ہے۔ ان کا کہنا ہے کہ مکلی نرسری کے رہائشی کچھ مشتبہ افراد، بشمول حمزہ لاشاری، اشفاق درس، اللہ بخش لاشاری، سومار لاشاری، گل محمد، نظیر، یعقوب اور دیگر افراد نے پری پلاننگ کے تحت نجمہ کو اغوا کیا ہے، کیونکہ ان افراد نے کچھ عرصہ قبل نجمہ کو اغوا کرنے کی دھمکی دی تھی۔

نجمہ کے والد یوسف ملاح نے کہا کہ وہ ایک غریب انسان ہیں اور ٹھیلا چلا کر اپنے بچوں کا پیٹ پالتے ہیں، اور ان کی بیٹی کی جان کو بھی خطرہ لاحق ہو سکتا ہے۔ انہوں نے کالج انتظامیہ کو بھی تفتیش میں شامل کرنے کا مطالبہ کیا ہے۔ اس کے علاوہ، نجمہ کے ورثاء نے وزیر تعلیم سید سردار شاہ، ڈی سی ٹھٹھہ، اور ایس ایس پی ٹھٹھہ سے درخواست کی ہے کہ نجمہ کو جلد بازیاب کرایا جائے۔

ٹھٹھہ (باغی ٹی وی ،نامہ نگاربلاول سموں کی رپورٹ)ڈی آئی جی پی حیدرآباد طارق رزاق دھاریجو کی ہدایات اور ایس ایس پی ٹھٹھہ ڈاکٹر محمد عمران خان کے احکامات پر، ضلع ٹھٹھہ میں امن و امان برقرار رکھنے کے لیے پولیس نے سنیپ چیکنگ کا سلسلہ جاری رکھا ہے۔

سنیپ چیکنگ کے دوران تمام موٹر سائیکلوں، رکشوں، مسافر وین، بسوں اور دیگر چھوٹی بڑی گاڑیوں کو چیک کیا گیا۔ اس کے علاوہ، متعدد گاڑیوں سے ٹنٹڈ گلاسز اور فینسی نمبر پلیٹس بھی اتارے گئے۔

پولیس نے اپنے دائرہ کار میں سنیپ چیکنگ کو تیز کر دیا ہے، جس میں ایس ڈی پی اوز اپنے متعلقہ ایس ایچ اوز کے ہمراہ چیکنگ کر رہے ہیں۔ شہر کے اہم علاقوں، خاص طور پر داخلی اور خارجی راستوں پر بھی سنیپ چیکنگ جاری ہے۔ چیکنگ کے دوران متعدد مشکوک افراد اور بغیر نمبر پلیٹ والے موٹر سائیکلوں کو تحویل میں لے کر ویریفیکیشن کا عمل جاری ہے۔

یہ سنیپ چیکنگ 12 ربیع الاول کے موقع پر ضلع بھر میں امن و امان کی صورتحال کو برقرار رکھنے کے لیے کی جا رہی ہے تاکہ کوئی ناخوشگوار واقعہ پیش نہ آ سکے۔ آئی جی سندھ غلام نبی میمن، ڈی آئی جی پی حیدرآباد طارق رزاق دھاریجو، اور ایس ایس پی ٹھٹھہ ڈاکٹر محمد عمران خان کے اقدامات سے عوام میں تحفظ کا احساس بڑھ رہا ہے۔

ٹھٹھہ (باغی ٹی وی ،نامہ نگاربلاول سموں) ضلع ٹھٹھہ کے مکلی کے قریب گذشتہ رات دیر سے موٹرسائیکل پر سوار مسلح افراد کی فائرنگ سے برانچ موری کے گاؤں خمیسو خان سموں کا رہائشی رضوان سموں شدید زخمی ہوگیا۔ زخمی نوجوان کو سول اسپتال مکلی منتقل کیا گیا، جہاں سے اسے تشویشناک حالت میں کراچی بھیجا گیا، لیکن وہ زخموں کی تاب نہ لاتے ہوئے راستے میں انتقال کر گیا۔

رضوان سموں کے قتل کے بعد اس کے ورثاء نے مکلی بائی پاس ٹھٹھہ/کراچی قومی شاہراہ پر دھرنا دے کر روڈ بند کر دیا اور قاتل ملزمان کی گرفتاری کا مطالبہ کیا۔

پولیس کے اعلیٰ افسران، بشمول ڈی ایس پی ٹھٹھہ، ایس ایچ او ٹھٹھہ اطہر چنا، اور ایس ایچ او مکلی منیر ہکڑو، مقتول کے ورثاء کے پاس پہنچے اور انصاف کی یقین دہانی کرائی، جس کے بعد احتجاج ختم کروا کر روڈ کھول دیا گیا۔ مقتول کی لاش سول اسپتال مکلی سے پوسٹ مارٹم کے بعد ورثاء کے حوالے کر دی گئی۔ لاش ٹھٹھہ کے قریب سموں گاؤں میں پہنچنے پر گھر میں کہرام مچ گیا۔

ابتدائی پوسٹ مارٹم رپورٹ میں ڈاکٹرز نے مقتول کے سینے میں دل کی جانب دو گولیاں لگنے کی وجہ سے موت کی تصدیق کی ہے۔ ایم ایل او ڈاکٹر مزمل میمن کے مطابق، گولیاں قریب سے لگنے کی وجہ سے مقتول کا دل اور پھیپھڑے بھی متاثر ہوئے، اور زیادہ خون بہنے کے باعث نوجوان کی موت واقع ہوئی۔

ٹھٹھہ میں صورتحال کشیدہ ہے، اور پولیس نے چھاپے مار کر کچھ مشتبہ افراد کو بھی گرفتار کر لیا ہے۔ معلوم ہوا ہے کہ رضوان سموں اپنے دوست عبداللہ میمن کے ساتھ مویشی فروخت کر کے سوزوکی میں ٹھٹھہ واپس آ رہا تھا، جب دو موٹرسائیکلوں پر سوار مسلح افراد نے رات دیر سے مکلی تھانے کے قریب بخاری چڑھائی پر ان کی سوزوکی کو روک کر سیدھی فائرنگ کی، جس سے رضوان سموں جاں بحق ہوگیا۔

ایس ایس پی ٹھٹھہ ڈاکٹر عمران خان نے ایک پریس ریلیز جاری کرتے ہوئے کہا کہ ملزمان کی گرفتاری کے لیے چھاپے مارے جا رہے ہیں۔ رضوان سموں کے قتل کے واقعے کے بعد ٹھٹھہ میں سموں برادری کے نوجوانوں میں غم و غصہ برقرار ہے۔ رضوان سموں کی نماز جنازہ ٹھٹھہ کے قریب گاؤں خمیسو سموں میں ادا کی گئی، اور انہیں آبائی قبرستان میں سپرد خاک کیا گیا۔ نماز جنازہ میں صوبائی وزیر سید ریاض حسین شاہ شیرازی سمیت سموں برادری کے سیکڑوں افراد اور سیاسی و سماجی شخصیات نے شرکت کی۔

مقتول کے کزن نواز سموں نے کہا کہ رضوان سموں کو ٹارگٹ کر کے قتل کیا گیا ہے۔ پولیس ہماری نشاندہی اور سی سی ٹی وی کیمروں کی مدد سے ملزمان تک پہنچ چکی ہے، لیکن فی الحال نام ظاہر نہیں کیے جا سکتے۔ انہوں نے انصاف کا مطالبہ کیا ہے۔

ٹھٹھہ(باغی ٹی وی نامہ نگاربلاول سموں) ایک دل دہلا دینے والے واقعے میں، ٹک ٹاک ویڈیو بناتے ہوئے ایک نوجوان کی حادثاتی طور پر گولی لگنے سے موت واقع ہوگئی۔

یہ افسوسناک واقعہ مری محلہ میں پیش آیا جہاں نوجوان نے پسٹل کے ساتھ ٹک ٹاک ویڈیو بنانے کی کوشش کی۔ اس دوران حادثاتی طور پر گولی چلنے سے نوجوان کے سر میں گولی لگ گئی جس کے باعث وہ موقع پر ہی جاں بحق ہوگیا۔

پولیس ذرائع کے مطابق متوفی نوجوان 22 سال کا تھا اور پیشے کے لحاظ سے زراعت سے وابستہ تھا۔ ابتدائی تحقیقات کے مطابق یہ واقعہ حادثاتی طور پر پیش آیا ہے۔ زخمی نوجوان کو فوری طور پر کراچی منتقل کرنے کی کوشش کی گئی لیکن راستے میں ہی اس نے دم توڑ دیا۔

ٹھٹھہ،باغی ٹی وی (نامہ نگاربلاول سموں): ٹھٹھہ پولیس نے منشیات فروشوں اور ایک روپوش ملزم کے خلاف کریک ڈاؤن جاری رکھتے ہوئے 6 ملزمان کو گرفتار کرلیا ہے۔ پولیس نے ملزمان کے قبضے سے 60 لیٹر اور 30 بیگز دیسی شراب بھی برآمد کی ہے۔

ایس ایس پی ٹھٹہ ڈاکٹر محمد عمران خان کے احکامات پر تھانہ ٹھٹہ کے انسپیکٹر عطر چنہ نے اپنی ٹیم کے ساتھ مشترکہ کارروائی کرتے ہوئے فراز جوکھیو، عمیر گندرو، بلاول کھڈائی، نعیم علی میمن اور دلبر ملاح نامی 5 منشیات فروشوں کو گرفتار کیا۔ ملزمان کے قبضے سے بڑی مقدار میں دیسی شراب برآمد ہوئی جس کے خلاف تھانہ ٹھٹہ پر منشیات آرڈیننس کے تحت مقدمہ درج کرلیا گیا ہے۔

دوسری جانب، انچارج سی آئی اے پولیس ٹھٹہ انسپیکٹر ممتاز علی بروہی نے اپنی ٹیم کے ساتھ کارروائی کرتے ہوئے تھانہ ٹھٹہ پر قتل اور دہشتگردی کے مقدمے میں ملوث روپوش ملزم قادر بخش نوتیار کو گرفتار کرلیا۔

واضح رہے کہ یہ کارروائیاں آئی جی سندھ غلام نبی میمن اور ڈی آئی جی پی حیدرآباد رینج طارق رزاق دہاریجو کی ہدایات پر کی گئی ہیں۔

جامشورو،باغی ٹی وی (نامہ نگار اللہ وسایا پالاری) لیاقت میڈیکل یونیورسٹی کی انتظامیہ کی جانب سے قدیم گاؤں کی مرکزی سڑک بند کرنے اور احتجاج کرنے والے گاؤں والوں اور صحافیوں پر مقدمے درج کرنے کے خلاف رہائشیوں نے یونیورسٹی کے مرکزی گیٹ کے سامنے احتجاجی کیمپ لگانے اور مرنے تک بھوک ہڑتال کرنے کا فیصلہ کیا ہے۔

گاؤں مصری کوسو اور یوسف کوسو عوامی اتحاد کی اجلاس صدر پپن کوسو کی صدارت میں ہوئی، جس میں علی مردان جمالی، محمد سچل چانڈیو، کامریڈ سلمان بھلائی، علی بحر بلیڈی، رئیس عثمان چانڈیو، ولید بلیڈی، حاکم پنهور، زاہد بلیڈی اور دیگر نے شرکت کی۔

اجلاس میں لیاقت میڈیکل یونیورسٹی کے وائس چانسلر ڈاکٹر اکرام الدین اجن نے گاؤں والوں اور صحافیوں پر جھوٹے مقدمات درج کرنے اور ان کے ساتھ مسلسل ناانصافیوں کی مذمت کی۔ اس موقع پر فیصلہ کیا گیا کہ ڈپٹی کمشنر جامشورو ریاض حسین وسان سے ملاقات کرکے سڑک کے بارے میں رپورٹ تحریری طور پر حاصل کی جائے گی، جس کے ذریعے عدالت میں پٹیشن دائر کی جائے گی۔

اس کے بعد پریس کانفرنس کرکے لیاقت میڈیکل یونیورسٹی کے مرکزی گیٹ کے سامنے احتجاجی کیمپ اور مرنے تک بھوک ہڑتال شروع کرنے کی تاریخ کا اعلان کیا جائے گا۔

نوری آباد،باغی ٹی وی (نامہ نگاراللہ وسایا پالاری) نوری آباد کے قریب مقامی لوگوں کی زمینوں پر بااثر افراد کے قبضے کے خلاف علاقے کے لوگوں نے پریس کلب نوری آباد میں شدید احتجاج کیا ہے۔ احتجاج کرنے والوں میں اختیار پالاری، گل زمان پالاری، دوست علی پالاری اور دیگر شامل تھے۔

احتجاج کرنے والوں کا کہنا ہے کہ مزمل بھٹی، نبیلان بھٹی اور ایک لینڈ مافیا گروپ نے محکمہ ریونیو کے ساتھ مل کر مقامی لوگوں کی زمینوں پر جعلی لائسنس بنا کر قبضہ کر لیا ہے۔ انہوں نے کہا کہ یہ افراد کروڑوں روپے کی مالیت کے پتھر، کرش اور شیل غیر قانونی طور پر فروخت کر رہے ہیں اور علاقے کے جانوروں کے لیے چراگاہ کو ختم کر رہے ہیں۔

احتجاج کرنے والوں نے مزید بتایا کہ قبضہ مافیا علاقے کے لوگوں کو زمین اور پانی کے تالابوں میں آنے سے روک رہا ہے اور وہاں پر سٹون کریشر پلانٹ لگا کر ماحول کو آلودہ کر رہے ہیں۔

احتجاج کرنے والوں نے اعلیٰ عدالتوں سے اپیل کی ہے کہ ان کے ساتھ انصاف کیا جائے اور لینڈ مافیا اور ملوث افراد کے خلاف قانونی کارروائی کی جائے۔