Category: حیدرآباد

ٹھٹھہ (باغی ٹی وی،بلاول سموں)سماجی ادارے پی پی ای ایف کے تعاون سے سندھ کمیونٹی فاؤنڈیشن کی جانب سے بنیادی صحت مرکز گاڑھو کے سامنے تعمیر کی گئی جدید اور سہولیات سے آراستہ انتظار گاہ کا افتتاح پاکستان پیپلز پارٹی ضلع ٹھٹھہ کے صدر و رکنِ قومی اسمبلی صادق علی میمن نے کیا۔ افتتاحی تقریب میں ایڈیشنل ڈائریکٹر سوشل ویلفیئر خدا بخش بھرانی، ڈسٹرکٹ مینیجر پی پی ایچ آئی رحمان گل، سندھ کمیونٹی فاؤنڈیشن کے سی ای او جاوید سوز ہالائی، پروجیکٹ منیجر حمیرہ علی، چیئرمین ٹاؤن کمیٹی گاڑھو حاجی محمد صدیق خاصخیلی، چیئرمین گھوڑاباری محمد رمضان پھنور، رکن ضلع کونسل جہانگیر پالاری، اسسٹنٹ کمشنر گھوڑاباری فراز احمد عباسی، وائس چیئرمین گاڑھو غلام نبی میمن سمیت معزز شخصیات اور مقامی برادری کے افراد کی بڑی تعداد شریک ہوئی۔

تقریب سے خطاب کرتے ہوئے ایم این اے صادق علی میمن نے کہا کہ پی پی ای ایف اور سندھ کمیونٹی فاؤنڈیشن کی یہ کاوش عوامی فلاح و بہبود کی بہترین مثال ہے۔ انہوں نے کہا کہ صحت مراکز میں بنیادی سہولیات کی فراہمی حکومت سندھ کی ترجیح ہے تاکہ عوام کو علاج معالجے کے ساتھ انتظار کی معیاری سہولت بھی میسر ہو۔ صادق علی میمن نے کہا کہ سندھ حکومت عوامی مفاد کے منصوبوں میں سماجی اداروں کے اشتراک کو قدر کی نگاہ سے دیکھتی ہے کیونکہ اس سے سہولتوں میں اضافہ اور عوامی خدمت کے جذبے کو فروغ ملتا ہے۔

اس موقع پر سی ای او سندھ کمیونٹی فاؤنڈیشن جاوید سوز ہالائی نے بتایا کہ یہ منصوبہ مقامی آبادی کے لیے ایک سہولتی اقدام ہے جس کا مقصد مریضوں اور ان کے اہلِ خانہ کو آرام دہ ماحول فراہم کرنا ہے۔ بعد ازاں ایم این اے صادق علی میمن نے انتظار گاہ کے مختلف حصوں کا معائنہ کیا، تعمیراتی معیار اور صفائی کو سراہا۔ تقریب کے اختتام پر شرکاء نے ادارے کی عوامی خدمات کو خراجِ تحسین پیش کرتے ہوئے امید ظاہر کی کہ مستقبل میں بھی ایسے فلاحی منصوبے جاری رہیں گے۔

ٹھٹھہ (باغی ٹی وی، ڈسٹرکٹ رپورٹر بلاول سموں) صوبائی وزیر برائے ورکس سروسز و جیل خانہ جات حاجی علی حسن زرداری نے اپنے حلقے پی ایس 76 میرپور ساکرو اور کیٹی بندر کا دورہ کیا، جہاں انہوں نے نئی تعمیر شدہ سڑکوں کے منصوبوں کا افتتاح کیا اور بعد ازاں بگھان کے گاؤں کرمی سموں میں ظہرانے کی تقریب میں شرکت کی۔

صوبائی وزیر نے لیٹ اسٹاپ ساکرو سے غلام اللہ تک مختلف دیہات کو ملانے والی 17 کلومیٹر طویل سڑک کے منصوبے کا افتتاح کیا، جو 30 کروڑ روپے کی لاگت سے مکمل کیا گیا ہے۔

میڈیا سے گفتگو کرتے ہوئے حاجی علی حسن زرداری نے کہا کہ سڑکیں، پانی، تعلیم اور صحت عوام کی بنیادی سہولیات ہیں، جنہیں فراہم کرنا میرا فرض ہے۔ انہوں نے کہا کہ پیپلز پارٹی کی قیادت نے ٹھٹھہ کے عوام کے لیے کئی ترقیاتی منصوبے دیے ہیں، جن پر وہ قیادت کے شکر گزار ہیں۔ ان کا کہنا تھا کہ وہ عوام کے دکھ سکھ میں ہمیشہ شریک رہیں گے اور ٹھٹھہ نے ثابت کر دیا ہے کہ یہ پیپلز پارٹی کا مضبوط قلعہ ہے۔

صوبائی وزیر نے مزید کہا کہ عوام کے کام ان کا حق ہیں، کوئی احسان نہیں۔ سوشل میڈیا پر تنقید کا خیر مقدم کرتے ہوئے کہا کہ جائز تنقید ہونی چاہیے مگر بغض پر مبنی تنقید قبول نہیں۔ اگر ان سے کسی کے ساتھ زیادتی ہوئی تو وہ خود کو ذمہ دار سمجھتے ہیں۔

ان کا کہنا تھا کہ پارٹی کی ٹکٹ ایک امانت ہے، میراث نہیں۔ اگر قیادت نے دوبارہ ذمہ داری دی تو اسے احسن طریقے سے نبھائیں گے۔ ٹھٹھہ کو وہ اپنا گھر سمجھتے ہیں اور یہاں کے عوام کی خدمت گھر کے فرد کی طرح کر رہے ہیں۔ ان کا کہنا تھا کہ ان کا کسی سے کوئی جھگڑا نہیں، وہ ٹھٹھہ کو فتح کرنے نہیں بلکہ خدمت کرنے آئے ہیں۔

بعد ازاں صوبائی وزیر نے بگھان کے گاؤں کرمی سموں میں ظہرانے کی تقریب میں شرکت کی۔ تقریب میں ضلع ٹھٹھہ کے چیئرمین عبدالحمید پنہور، وائس چیئرمین ممتاز جلبانی، وڈیرے احمد سموں، ترجمان محسن ہاؤس شاہنواز لوہار، یو سی چیئرمین غلام نبی شیخ، پیر سکندر شاہ، ملک سلیم شورو، عوامی پریس کلب ٹھٹھہ کے صدر بلال سموں، جنرل سیکریٹری محمد عمر سرائی، سینئر صحافی اے بی شورو سمیت پیپلز پارٹی کے رہنماؤں، کارکنوں اور معزز شخصیات نے شرکت کی۔

ٹھٹھہ (بلاول سموں کی رپورٹ) گورنمنٹ ریٹائرڈ ایمپلائز ویلفیئر ایسوسی ایشن ٹھٹھہ (گریوا) کی جانب سے تنظیم کی تیسری سالگرہ عوامی پریس کلب ٹھٹھہ میں منائی گئی، جس میں مرکزی رہنماؤں نثار احمد راجپوت، زوار عبداللطیف بھٹی، محمد اقبال جوکھیو، سید نواز علی شاہ، غلام حسین خاصخیلی اور قاضی عبدالواحد سمیت بڑی تعداد میں تنظیمی ارکان نے شرکت کی۔

رہنماؤں نے خطاب کرتے ہوئے کہا کہ تنظیم 2022 میں اس مقصد کے تحت قائم کی گئی تھی کہ ریٹائرڈ سرکاری ملازمین کو درپیش اہم مسائل— جن میں گروپ انشورنس، بینیوولنٹ فنڈ، ہیلتھ کارڈ اور وفاقی حکومت کے 15 فیصد اضافے کے مقابلے میں سندھ حکومت کے صرف 5 فیصد اضافے کا معاملہ شامل ہے— کے حل کے لیے مؤثر آواز بلند کی جا سکے۔

مقررین نے بتایا کہ حالیہ 14 اکتوبر کو حکومتی وفد کے ساتھ ہونے والی ملاقات میں مثبت پیشرفت ہوئی ہے، اور خوشخبری یہ ہے کہ ریٹائرڈ ملازمین کے تین بڑے مطالبات— گروپ انشورنس، بینیوولنٹ فنڈ اور باقی ماندہ 10 فیصد تنخواہی اضافہ— حکومت نے تقریباً منظور کر لیے ہیں، جبکہ ہیلتھ کارڈ کا مسئلہ بھی جلد حل ہونے کی امید ہے۔

رہنماؤں نے ریٹائرڈ ملازمین سے اپیل کی کہ وہ بڑی تعداد میں تنظیم میں شمولیت اختیار کریں تاکہ اجتماعی قوت کے ذریعے اپنے حقوق کے لیے جدوجہد کو مزید مضبوط بنایا جا سکے۔ انہوں نے سندھ ایمپلائز الائنس کے ساتھ اظہارِ یکجہتی کرتے ہوئے کہا کہ اگرچہ الائنس زیادہ تر ڈی آر اے پر زور دے رہا ہے، لیکن ریٹائرڈ ملازمین کے مسائل کو نظرانداز کر کے کوئی بھی تحریک کامیاب نہیں ہو سکتی۔

رہنماؤں نے حکومت پر تنقید کرتے ہوئے کہا کہ ایک مذہبی تنظیم کے احتجاج کو بہانہ بنا کر ملک میں دفعہ 144 نافذ کر کے دراصل ملازمین کی جدوجہد کو کمزور کرنے کی کوشش کی گئی، لیکن ریٹائرڈ ملازمین اپنی جائز جدوجہد سے ایک قدم بھی پیچھے نہیں ہٹیں گے۔

انہوں نے حکومت سے مطالبہ کیا کہ ریٹائرڈ ملازمین کے تمام مسائل فوری طور پر حل کیے جائیں اور انہیں سرکاری مفت مکانات الاٹ کرنے کی اسکیم میں شامل کیا جائے۔ آخر میں تنظیم کی تیسری سالگرہ کا کیک کاٹا گیا اور اتحاد و یگانگت کے عزم کو دہرایا گیا۔

ٹھٹھہ/کندھ کوٹ (ڈسٹرکٹ رپورٹر بلاول سموں، نامہ نگار) سندھ ایمپلائز الائنس کی اپیل پر سرکاری ملازمین کا احتجاج تیسرے روز بھی جاری رہا، ٹھٹھہ اور کندھ کوٹ سمیت مختلف اضلاع میں دفاتر، اسکول اور اسپتالوں کی تالا بندی کی گئی۔

ٹھٹھہ میں سینکڑوں ملازمین نے مکلی پارک سے ڈی سی چوک تک احتجاجی ریلی نکالی اور قومی شاہراہ پر دھرنا دیا۔ ریلی میں مرد و خواتین ملازمین کے ساتھ وکلاء برادری نے بھی بھرپور شرکت کی۔ اس موقع پر یونین رہنماؤں غلام نبی خشک، گلاب خان، سلمان ھالو، لطیف کھتری، احمد نواز پٹھان اور محمد حسن سومرو نے خطاب کرتے ہوئے کہا کہ مہنگائی کے اس دور میں حکومت کی جانب سے پینشن میں کٹوتی اور تنخواہوں میں اضافہ نہ کرنا سراسر ظلم ہے، حکومت فی الفور ملازمین کے مطالبات تسلیم کرے۔

ادھر کندھ کوٹ میں بھی احتجاج کے تیسرے روز سول اسپتال کی او پی ڈی مکمل طور پر بند رہی اور ملازمین نے ایمرجنسی بلاک کے سامنے دھرنا دیا، جس کے باعث مریضوں کو شدید مشکلات کا سامنا کرنا پڑا۔ دھرنے میں علی حسن قمبراڻي، قاضی اعجاز احمد ڈومکی، صدر دین بھلکانی، عبدالصمد ڈومکی اور منصور اعواڻ سمیت دیگر رہنماؤں نے شرکت کی۔ مقررین نے خبردار کیا کہ اگر سندھ حکومت نے DRA اور پنشن کٹوتی ختم نہ کی تو 6 اکتوبر کو بلاول ہاؤس کراچی کے سامنے غیر معینہ مدت کا دھرنا دیا جائے گا۔