Category: اسلام آباد


سربراہ پاک فوج فیلڈ مارشل سید عاصم منیر نے کہا ہے کہ کشمیر جلد آزادی کی نئی صبح دیکھے گا جو اہلِ کشمیر کی اجتماعی خواہش اور ان کا مقدر ہے۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے مظفرآباد کا دورہ کیا جہاں انہوں نے جموں و کشمیر یادگارِ شہدا پر حاضری دی، پھول رکھے اور کشمیر تحریک کے شہدا کی بہادری اور بے لوث قربانیوں کو خراجِ تحسین پیش کیا۔
آئی ایس پی آر کے مطابق ممتاز شخصیات اور سابق فوجیوں سے گفتگو کرتے ہوئے فیلڈ مارشل سید عاصم منیر نے کہا کہ بھارت کی ریاستی جارحیت اور انسانی حقوق کی سنگین خلاف ورزیاں کشمیری عوام کے حوصلے پست نہیں کر سکیں۔ ان کا کہنا تھا کہ ہندوتوا پر مبنی پالیسیوں کے باوجود کشمیری عوام کی جدوجہد مزید مضبوط ہوئی ہے۔
‎فیلڈ مارشل نے واضح کیا کہ پاکستان کشمیریوں کی سیاسی، اخلاقی اور سفارتی حمایت جاری رکھے گا اور عالمی فورمز پر مسئلہ کشمیر کو بھرپور انداز میں اجاگر کرتا رہے گا۔ انہوں نے مسئلہ کشمیر کے اقوام متحدہ کی قراردادوں کے مطابق حل کی حمایت کا اعادہ بھی کیا۔
‎آئی ایس پی آر کے مطابق چیف آف ڈیفنس فورسز نے اگلی صفوں کا دورہ بھی کیا اور وہاں تعینات افسران اور جوانوں سے ملاقات کی۔ انہوں نے جوانوں کے بلند حوصلے، پیشہ ورانہ مہارت اور فرض شناسی کو سراہتے ہوئے آپریشنل تیاریوں اور ہر سطح پر ہم آہنگی برقرار رکھنے پر زور دیا۔
‎فیلڈ مارشل سید عاصم منیر نے کہا کہ مشکل آپریشنل حالات کے باوجود افسران اور جوانوں کا جذبہ قابلِ تحسین ہے، کسی بھی دشمنانہ اقدام کا فوری، مؤثر اور بھرپور جواب دیا جائے گا، اور پاکستان کی مسلح افواج روایتی اور ہائبرڈ دونوں طرح کے خطرات سے نمٹنے کے لیے مکمل طور پر تیار ہیں۔

‎فیلڈ مارشل سید عاصم منیر سے ازبکستان کے صدر شوکت مرزائیوف کی ملاقات ہوئی ہے۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف نے مہمان صدر اور ان کے وفد کا پرتپاک استقبال کیا۔ چیف آف ڈیفنس فورسز نے دورے کے دوران خود معزز صدر کی رہنمائی کی اور انہیں گلوبل انڈسٹریل اینڈ ڈیفنس سلوشنز پر بریفنگ دی گئی۔
‎آئی ایس پی آر کے مطابق ملاقات میں پاکستان کی مقامی دفاعی پیداوار اور صنعتی ترقی پر بھی تفصیلی بریفنگ دی گئی۔ اس دوران دونوں ممالک نے دفاعی اور صنعتی تعاون بڑھانے پر اتفاق کیا۔ فریقین نے شراکت داری، علم کے تبادلے اور مشترکہ منصوبوں کو وسعت دینے کی اہمیت پر زور دیا۔

اڈیالا جیل میں قید منشیات کیس میں سزا یافتہ قیدی بابر سلیم دورانِ علاج انتقال کرگیا۔ جیل ذرائع کے مطابق قیدی کی طبیعت بگڑنے پر اسے فوری طور پر راولپنڈی انسٹی ٹیوٹ آف کارڈیالوجی (آر آئی سی) منتقل کیا گیا تھا، جہاں وہ جانبر نہ ہوسکا۔

جیل حکام کے مطابق بابر سلیم کو چند روز سے صحت کے مسائل لاحق تھے، جس کے باعث اس کی حالت تشویشناک ہوگئی۔ طبی معائنہ کے بعد ڈاکٹروں نے اسے خصوصی علاج کے لیے آر آئی سی منتقل کیا، تاہم دورانِ علاج وہ دم توڑ گیا۔ذرائع کا کہنا ہے کہ متوفی قیدی بابر سلیم کا تعلق ضلع چکوال سے تھا اور وہ تھانہ ڈوڈیال میں درج منشیات کے ایک مقدمے میں گرفتار ہو کر اڈیالا جیل میں سزا کاٹ رہا تھا۔جیل انتظامیہ کے مطابق قیدی کی موت کی اطلاع متعلقہ حکام اور لواحقین کو دے دی گئی ہے، جبکہ قانونی تقاضوں کے مطابق مزید کارروائی عمل میں لائی جارہی ہے۔ ذرائع کے مطابق ابتدائی طور پر موت کی وجہ طبعی بتائی جارہی ہے، تاہم حتمی تصدیق میڈیکل رپورٹ کے بعد کی جائے گی۔

مارگلہ انکلیو میں پہلی جنگ عظیم میں شمالی افریکہ کمپین کے ہیرو صوبیدار غلام علی سے منصوب ایک یادگار کے توڑے جانے کے متعلق سوشل میڈیا پر گردش کرنے والی حقائق کے منافی ہے۔ڈی ایچ اے نے سی ڈی اے کے ساتھ مل کر سب سے پہلے اس یادگار آثار قدیمہ کے محکمے کے چارج پر دلوایا۔اس کے بعد صوبیدار غلام علی کے وارث سے زلفقار علی سے ایفیڈیوٹ پر این او سی لی۔اس یادگار کو اپنی جگہ سے دو سو میٹر دور نادرن بائی پاس چوک میں خوبصورت انداز میں دوبارہ نصب کیا جائے گا

سوشل میڈیا پر گردش کرنے والی ان خبروں میں کوئی صداقت نہیں جن میں دعویٰ کیا جا رہا ہے کہ کیپیٹل ڈیولپمنٹ اتھارٹی (سی ڈی اے) نے اسلام آباد میں پہلی جنگِ عظیم کی یاد میں قائم صوبیدارغلام علی کی یادگار کو غیر قانونی طور پر مسمار کر دیا ہے۔ فیکٹ چیک کے مطابق یہ تمام دعوے جھوٹے، گمراہ کن اور حقائق کے برعکس ہیں۔

سوشل میڈیا اور بعض غیر مصدقہ پلیٹ فارمز پر یہ خبر پھیلائی گئی کہ سی ڈی اے نے ڈیفنس ہاؤسنگ اتھارٹی اسلام آباد ریجن کے ساتھ مل کر مارگلہ انکلیو ہاؤسنگ پروجیکٹ کے لیے اس تاریخی یادگار کو تباہ کر دیا۔ تاہم سی ڈی اے اور ڈی ایچ اے اعلیٰ حکام نے واضح طور پر ان الزامات کی تردید کرتے ہوئے کہا کہ یادگار کی منتقلی کا مارگلہ انکلیو ہاؤسنگ پروجیکٹ سے کوئی تعلق نہیں۔تحقیقات سے ثابت ہوا ہے کہ سی ڈی اے نے یادگار کو نہ تو مسمار کیا اور نہ ہی ختم کیا، بلکہ اسے قانونی تقاضے پورے کرتے ہوئے محفوظ مقام پر منتقل کیا گیا۔ سرکاری ریکارڈز اور متعلقہ اداروں کی تصدیق کے مطابق یہ اقدام یادگار کے تحفظ کے پیشِ نظر کیا گیا، جس میں تمام قانونی مراحل، متعلقہ اداروں کی منظوری اور خاندان کی رضامندی شامل تھی۔

صوبیدار غلام علی نے پہلی جنگِ عظیم کے دوران مشرقی افریقہ میں خدمات انجام دیں اور غیر معمولی بہادری کا مظاہرہ کیا۔ ان کی جرات مندی کے اعتراف میں انہیں اعزاز سے نوازا گیا۔ بعد ازاں برطانوی حکومت نے ان کی خدمات کے اعتراف میں یہ یادگار تعمیر کروائی۔سی ڈی اے حکام کے مطابق، ڈیفنس ہاؤسنگ اتھارٹی اسلام آباد ریجن نے سی ڈی اے کے اشتراک سے یادگار کی قانونی منتقلی کا باقاعدہ عمل شروع کیا تاکہ اسے محفوظ رکھا جا سکے۔ اس سلسلے میں محکمہ آثارِ قدیمہ سے رہنمائی حاصل کی گئی،سی ڈی اے کے ساتھ متعدد اجلاس منعقد ہوئے،محکمہ آثارِ قدیمہ نے واضح کیا کہ یہ یادگار اس کی سرکاری فہرست میں شامل نہیں، اس لیے
100 سے 200 میٹر کے اندر منتقلی کے لیے این او سی درکار نہیں،اس کے باوجود، ڈی ایچ اے نے صوبیدار غلام علی کے پوتے کے پوتے ذوالفقار (جو اس وقت آئیسکو میں سپرنٹنڈنٹ کے طور پر خدمات انجام دے رہے ہیں) سے رابطہ کیا۔ ذوالفقار نے یادگار کی منتقلی پر تحریری حلف نامے کے ذریعے رضامندی ظاہر کی۔ خاندان کے دیگر افراد بیرونِ ملک مقیم ہیں۔

یہ بات واضح ہو چکی ہے کہ سوشل میڈیا پر پھیلائی جانے والی خبریں من گھڑت اور بے بنیاد ہیں۔ سی ڈی اے نے تاریخی یادگار کو نقصان پہنچانے کے بجائے قانون کے مطابق محفوظ مقام پر منتقل کیا ہے۔ عوام سے گزارش ہے کہ ایسی خبروں پر یقین کرنے سے قبل مصدقہ ذرائع اور فیکٹ چیک کو ضرور مدنظر رکھیں۔

تحریک انصاف( پی ٹی آئی) کے بانی عمران خان کے بیٹے قاسم خان نے کہا ہے کہ میں اور بھائی اپنے والد عمران خان سے ملنے پاکستان آنا چاہتے ہیں لیکن حکومت ہماری ویزا درخواستوں پر کارروائی نہیں کر رہی۔

عمران خان کے بیٹے قاسم خان نےاپنے ایک بیان میں کہا ہے کہ میرے والد بانی پی ٹی آئی 914 دن سے قید تنہائی میں ہیں، میرے والد کی صحت بگڑ رہی ہے، انہیں آزاد طبی سہولت تک رسائی نہیں دی جا رہی، میں اور میرا بھائی اپنے والد عمران خان سے ملنے پاکستان آنا چاہتے ہیں، اب حکومت جان بوجھ کر ہماری ویزا درخواستوں پر کارروائی نہیں کر رہی،قیدی کو علاج سے محروم رکھنا ظلم ہے، بچوں کو والد سے ملنے سے روکنا اجتماعی طور پر سزا دینے کے مترادف ہے، انسانی حقوق کی بین الاقوامی تنظیموں اور حکومتوں سے مطالبہ کرتا ہوں کہ ناقابل تلافی نقصان سے پہلےاس معاملے پرآواز اٹھائیں۔