Category: کراچی

تفصیلات کے مطابق کراچی میں 15مارچ کو اورنگی ٹاؤن میں رینجرز موبائل پر ہونے والے دھماکے کی تحقیقات سنسنی خیز انکشاف ہوا ہے، حکام کے مطابق دھماکا کالعدم تحریک طالبان سے تعلق رکھنے والے مطلوب ملزم نے کیا، تحقیقاتی حکام کے مطابق ملزم کبیر کا بنیادی تعلق سوات سے جبکہ کراچی میں وہ میٹروویل سائٹ کا رہائشی ہے،کالعدم تحریک طالبان کا مطلوب ملزم کبیر افغانستان بھی جاچکا ہے، تحقیقاتی حکام کے مطابق تحقیقات کے مطابق کبیر نے مبینہ طور پر یہ دھماکا سیکورٹی اداروں سے بدلہ لینے کیلئے کیا، کیونکہ کبیر کا ایک کزن پنجاب میں سیکورٹی اداروں سے مبینہ مقابلے میں مارا جاچکا ہے جو خود بھی کالعدم تنظیم کا حصہ تھا، مبینہ طور پر اپنے کزن کا بدلہ لینے کےلیے کبیر نے رینجرز اہلکاروں کو ٹارگٹ کرنے کا منصوبہ بنایا، کبیر اس واردات میں خود بھی دھماکا کرتے ہوئے زخمی ہوا تھا تاہم لفٹ لے کر فرار ہوگیا تھا، جس موٹرسائیکل پر لفٹ لے کر وہ فرار ہوا وہیں سے کیس کی اصل تحقیقات کا آغاز ہوا، کبیر کی موٹرسائیکل پر بیٹھ کر فرار ہونے کی سی سی ٹی وی ویڈیو سے تحقیقات میں مدد ملی، حکام کے مطابق حساس ادارے، رینجرز اور سی ٹی ڈی کبیر اور ساتھیوں کی گرفتاری کے لیے کوشاں ہیں، حکام کے مطابق اس پہلو کی بھی تفتیش کی جارہی ہے کہ اس دھماکے کے بعد ابتدائی طور پر اس کی ذمےداری کسی اور تنظیم نے قبول کی تھی تاہم ایسا کیوں کیا گیا اس کی تحقیقات جاری ہیں۔

وزیر اعلیٰ سندھ سید مراد علی شاہ نے کہا ہے کہ وفاق کو مجھ سے براہ راست بات کرنی چاہئے، گورنر کے ذریعے بات نہ کرے، نسلہ ٹاور کیلئے سپریم کورٹ کا فیصلہ واضح ، بلڈر رہائشیوں کو معاوضہ دے۔ وزیراعلیٰ سندھ سید مراد علی شاہ نے میڈیا سے بات چیت کرتے ہوئے کہا کہ کورونا ویکسین وفاقی حکومت خرید کر صوبوں کو دے رہی ہے

وزیراعظم نے این سی او سی اجلاس میں صوبوں کو ہدایت کی تھی کہ ویکسی نیشن کا عمل تیز کریں اور ہم آئندہ تین ماہ میں 10.8 ملین افراد کو ویکسین کرنا چاہتے ہیں ۔

ایک سوال کے جواب میں انھوں نے کہا کہ چیئرمین پیپلز پارٹی بلاول بھٹو زرداری نے کہا تھا کہ بنی گالہ تو ریگولرائزڈ ہوگیا لیکن گجر نالہ کے رہائشوں کے گھر مسمار کئے جاتے ہیں، نسلہ ٹاور کیلئے سپریم کورٹ کا واضح فیصلہ ہے، سپریم کورٹ نے بلڈر کو ہدایت کی ہے کہ وہ رہائشیوں کو معاوضہ دے۔

ایک اور سوال کے جواب میں کہاکہ سعودی عرب اگر ہمارے ہاں لگنے والی ویکسین کو قبول نہیں کرتا تو یہ ہماری خارجہ پالیسی کی ناکامی ہے

یو اے ای نے بھارتی ایئرلائنز کو اجازت دی ہے لیکن پاکستان کی پروازوں کو اجازت نہیں دی۔ انہوں نے کہا کہ ہم بجٹ28 جون کو پاس کریں گے اور مزدور کارڈ بھی نادرا کے ساتھ شروع ہو جائیں گے۔

ملک میں سونے کی قیمت میں آج پھر ایک بڑا اضافہ ہوا ۔
ملک میں ایک تولہ سونے کی قدر میں 800 روپے اضافہ ہوا ہے۔

سندھ صرافہ بازار جیولرز ایسوسی ایشن کے مطابق اس اضافے کے بعد ملک میں فی تولہ سونے کی قدر ایک لاکھ 10 ہزار 100 روپے ہوگئی ہے۔

اسی طرح دس گرام سونے کی قدر 685 روپے اضافے سے 94 ہزار 393 روپے ہے۔

ایسوسی ایشن کے مطابق عالمی صرافہ میں سونے کی فی اونس قدر 1785 ڈالر برقرار ہے۔

سندھ کی سرکاری جامعات کی کنٹرولنگ اتھارٹی وزیر اعلیٰ سندھ مراد علی شاہ نے انٹرویو کے بعد دوسرے نمبر پر آنے والے امیدوار ڈاکٹر امجد سراج میمن کو میرٹ نظر انداز کرتے ہوئے جناح سندھ میڈیکل یونیورسٹی کراچی کا وائس چانسلر مقرر کردیا۔

سیکریٹری محکمہ یونیورسٹیز اینڈ بورڈز قاضی شاہد پرویز نے ڈاکٹر سراج میمن کی تقرری کا نوٹیفکیشن بھی جاری کردیا ۔واضح رہے کہ ڈاکٹر امجد سراج میمن پیپلز پارٹی کے رہنما شرجیل میمن کے قریبی عزیز ہیں اور انٹرویو میں کم مارکس لے کر دوسرے نمبر پر آنے کے باوجود ان کی تعیناتی کی وجہ بھی ان کا سیاسی اور حکمراں طبقے سے قربت بتایا جارہا ہے ۔

یہ بھی خیال رہے کہ کمیٹی نے انٹرویو کے بعد جن تین امیدواروں کے ناموں کا پینل وزیر اعلیٰ سندھ کو بھجوایا تھا ان میں پہلے نمبر پر ڈاکٹر لبنی بیگ نے سب سے زیادہ 70 مارکس لیے تھے جبکہ دوسرے نمبر پر امجد سراج میمن نے 67 اور تیسرے نمبر پر خواجہ مصطفیٰ قادری نے انٹرویو میں 48 مارکس حاصل کیے ۔تاہم وزیر اعلیٰ سندھ مراد علی شاہ نے پہلے نمبر سے 3 مارکس کم لینے والے امیدوار کو وائس چانسلر مقرر کرنے کی منظوری دی ۔
نام ظاہر نہ کرنے کی شرط پر ایک ماہر تعلیم کا کہنا تھا کہ وزیر اعلیٰ سندھ کا فیصلہ ایسا ہی ہے جیسے کسی پوزیشن ہولڈر طالب علم کو چھوڑ کر دوسری پوزیشن لینے والے طالب علم کو گولڈ میڈل پہنا دیا جائے۔

کراچی کے مصروف ترین کاروباری علاقے صدر سے گزرنے والی زیب النساء اسٹریٹ پر واقع رہائشی ہوٹل میں آگ لگ گئی تاہم کوئی جانی نقصان نہیں ہوا۔

فائر بریگیڈ حکام کے مطابق زیب النساء اسٹریٹ پر واقع مذکورہ رہائشی ہوٹل میں شارٹ سرکٹ کے باعث آگ لگی۔

فائر بریگیڈ حکام نے یہ بھی بتایا ہے کہ فائر بریگیڈ کی ایک گاڑی نے موقع پر پہنچ کر آگ بجھا دی جس کے باعث کوئی جانی نقصان نہیں ہوا۔

پاکستان پیپلزپارٹی پارلیمنٹرینزکی مرکزی اطلاعات سیکرٹری ورکن قومی اسمبلی شازیہ مری نے سماجی رابطوں کی ویب سائٹ ٹویٹر پر صوبہ سندھ میں گیس بحران پر جاری کردہ ویڈیو پیغام میں کہا ہے کہ سندھ کے اندر گیس کا بحران شدت اختیار کر چکا ہے جو کہ وفاقی حکومت کا نہایت ہی افسوس ناک عمل ہے اور سندھ وہ صوبہ ہے جو پاکستان میں 60 سے 70 فیصد گیس پیدا کرتا ہے، آئین پاکستان کے آرٹیکل 158 کے مطابق جس صوبے سے گیس کی پیداوار ہوگی پہلے اس کی ضرورت کو پورا کیا جائے گا۔
شازیہ مری نے کہا کہ ایک عرصے سے صوبہ سندھ کے ساتھہ گیس بحران کی زیادتی کی جارہی ہے اور صوبہ سندھ کو اسکی ضرورت کے مطابق گیس فراہم نہیں کی جارہی ہے۔ انہوں نے مزید کہا کہ کراچی سمیت دیگر شہروں میں گیس کی قلت کا سامنا ہے اور گھریلو صارفین بھی پریشان ہے۔
مرکزی اطلاعات سیکریٹری پیپلزپارٹی نے کہا کہ اب تو حد یہ ہے کہ سوئی سدرن گیس نے صوبہ سندھ کے صنعتوں کو گیس فراہمی بھی بند کرنے کا فیصلہ کیا ہے، وفاقی حکومت کی یہ جو حرکت ہے وہ قابل افسوس اور قابل مذمت ہے۔
شازیہ مری نے مزید کہا کہ وفاقی حکومت یہ نہ سمجھے کہ سندھ کے ساتھ زیادتی کرنے سے فیڈریشن مضبوط ہوگی بلکہ اس سے وفاق کمزور ہوگا، لہذا ہم مطالبہ کرتے ہیں کہ آئین پاکستان کے آرٹیکل 158 کے مطابق صوبہ سندھ کو گیس فراہم کی جائے۔

چیئرمین پیپلز پارٹی بلاول بھٹو نے پی ایس 92 (114)کراچی کے جنرل سیکریٹری مسعود الرحمن عباسی کی پارٹی کی بنیادی رکنیت اور پی ایس 92 کی جنرل سیکرٹری کے عہدے سے معطل کردیا ہے۔پیپلز پارٹی ایک عوامی اور جمہوری جماعت ہے پارٹی کے کارکن اور عہدیدار پارٹی کے نظم و ضبط کے پابند ہیں۔
تفصیلات کے مطابق چیئرمین پیپلز پارٹی بلاول بھٹو نے پارٹی نظم و ضبط کی خلاف ورزی اور غیر ذمہ داران طرز عمل پر پی ایس 92 (114) کے جنرل سیکرٹری مسعود الرحمان عباسی کی پارٹی کی بنیادی رکنیت اور پی ایس میں جنرل سیکرٹری کے عہدے سے انہیں معطل کردیا ہے۔ واضح رہے کہ مسعود الرحمان عباسی کو 3 روز قبل پارٹی کے نظم و ضبط اور ایک تقریب کے دوران غیر ذمہ داران طرز عمل پر شوکاز نوٹس جاری کیا گیا تھا، جس کے جواب میں مسعودالرحمان عباسی نے اپنی سنگین غلطی کو جذباتی ردعمل قرار دے کر اپنی غلطی تسلیم کی تھی۔
پیپلز پارٹی کراچی ڈویڑن کے صدر سعید غنی نے ان کے جواب کے بعد ان کی بنیادی رکنیت معطل کرتے ہوئے کہا کہ ایک سیاسی کارکن اور سٹی ایریا کے جنرل سیکرٹری کے عہدے پر تعینات ہوکر اس طرح کی غلطیاں پارٹی کے نظم و ضبط کے خلاف ہیں۔ انہوں نے کہا کہ پارٹی عہدیدار پر اس طرح کی جذباتی غلطیاں کرے تو وہ کس طرح پارٹی نظم و ضبط کو برقرار رکھ سکتا ہے۔
سعید غنی نے کہا کہ پیپلز پارٹی ایک عوامی اور جمہوری جماعت ہے پارٹی کے کارکن اور عہدیدار پارٹی کے نظم و ضبط کے پابند ہیں۔انہوں نے کہا ہے کہ پارٹی نے مسعود الرحمن عباسی کو ان کی سنگین غلطی اور غیر ذمہ دارانہ طرز عمل پر ان کی پارٹی کی بنیادی رکنیت اور پی ایس 92 کے جنرل سیکرٹری کے عہدے سے معطل کردیا ہے اور انہیں پارٹی کے کسی بھی اجلاس میں شرکت کے لئے نااہل قرار دے دیا ہے اور مسعود الرحمن عباسی آئندہ کسی بھی پارٹی اجلاس میں شرکت نہیں کرسکیں گے۔
یاد رہے کہ پی پی رہنما مسعود الرحمن عباسی نے ایک تقریر کے دوران چیف جسٹس آف پاکستان کے خلاف نازیبا الفاظ استعمال کئے جس پر چیف جسٹس نے از خود نوٹس لیا اور بعد ازاں سپریم کورٹ کے پانچ رکنی بنچ نے گزشتہ روز سماعت کی اور مسعود الرحمن عباسی سمیت دیگر فریقین کو نوٹسز جاری کیا ۔

پاکستان تحریک انصاف کے رہنماء و رکن سندھ اسمبلی ریاض حیدر نے کہا کہ محکمہ واٹر بورڈ کی جانب سے ضلع وسطی میں پانی کی منصفانہ تقسیم یقینی نہیں بنائی جارہی ضلع وسطی کے بعض علاقے چالیس سال سے پانی کیلئے محروم ہے ٹینکر مافیا نے پورے شہر کو جکڑ لیا ہے ٹینکر مافیا پیسہ کمانے اور پی پی کو کمیشن پہنچانے کیلئے پانی مہنگا فروخت کیا جاتا ہے واٹر بورڈ کی غفلت سے علاقہ مکین احتجاج کیلیے مجبور ہیں بحیثیت عوامی نمائندے علاقہ مکین کی جانب سے متعدد پانی کی فراہمی سے متعلق شکایات آتی ہیں عوام کی امیدیں پی ٹی آئی سے وابسطہ ہیں کراچی کے ووٹر کو سزا دی جارہی ہے پیپلرزپارٹی کے وزراء کی زبانوں پر کرپشن کی لذت کا قبضہ ہیاس لذت کا خمیازہ کراچی کے معصوم شہری اپنی پیاس سے ادا کررہے ہیں عمران خان سے پی پی کی نفرت قابلِ مذمت ہے انہوں نے اپنے بیان میں مزید کہا کہ پی پی کے مختص کردہ بجٹ میں سندھ کیشہری علاقوں کے ساتھ معتصبانہ روایہ نہیں رکھا گیا ہے سندھ حکومت اپوزیشن جماعتوں کو اسمبلی فلور پر بات کرنے نہیں دیتی اسمبلی میں پی ٹی ائی رہنماؤں کے مائک تقریر ختم ہونے سے پہلے بند کردیئے جاتے ہیں سندھ میں پی پی کی ڈکٹیٹرشب قائم ہے ضلع وسطی کے عوام کا پانی کا مسئلہ ترجیحی بنیادوں پر حل نہ کیا گیا تو مجبوراً عوام کے ہمراہ سڑکوں پر احتجاج کیلئے نکلیں گے۔

امیر اہل سنت حضرت علامہ مولانا ابو بلال محمد الیاس عطار قادری رضوی ضیائی دامت برکاتہم العالیہ نے کہاہے کہ دعا تقدیرکو بدل دیتی ہے،آنے والی مصیبتیں ٹل جاتی ہیں،بعض لوگ نماز کے بعد دعا کا انتظار نہیں کرتے بلکہ جلدی نکل جاتے ہیں،بعض اوقات انسان پر آنے والی مصیبت دعا کی برکت سے ٹل جاتی ہیں اور اسے معلوم بھی نہیں ہوتا، عام طور پر جو مانگا وہ مل جائے اسے دعا کی قبولیت کہا جاتا ہے،جو مانگا وہ فوراً مل جائے تب کہا جاتا ہے کہ دعا قبول ہوگئی،ایسا بھی ہوتا ہے کہ دعا کی برکت سے بڑی مصیبت کو چھوٹی مصیبت میں بدل دیا جاتا ہے، بڑی بیماری چھوٹی بیماری میں بدل جاتی ہے،ہمیں اللہ پاک کی کی بارگاہ سے مانگتے رہنا چاہئے،جلد بازی سے کام نہ لیں جو مانگتے ہیں فوراً مل جائے ایسا نہ سوچیں،دعا عبادت ہے،اللہ پاک کی بارگاہ میں جتنا روئیں گے گڑگڑائیں گے یہ سب ثواب کا کام ہے ۔
ان خیالات اظہار انہوں نے عالمی مدنی مرکزفیضان مدینہ میں مدنی مذاکرے میں گفتگوکرتے ہوئے کیا۔ امیر اہل سنت نے رشتے کے حوالے سے گفتگو کرتے ہوئے کہا کہ رشتہ طے کرنے کے د وران لڑکے کی آمدنی اور لڑکی کی عمر پوچھی جاتی ہے، لڑکے کی آمدنی تو پوچھی جاتی ہے مگر اس بات کی تحقیق نہیں کی جاتی کہ لڑکا حلال کماتا ہے یا حرام،لڑکا اگرچہ سود لاتا ہویا حرام کی آمدنی ہو لوگوں کو اس کی فکر نہیں ہوتی ان کا مقصد صرف پیسہ ہوتا ہے،لڑکا یا لڑکی بے نمازی ہو تو لوگوں کو یہ عیب محسوس نہیں ہوتا،نہ ہی اس بارے میں پوچھا جاتا ہے،بعض ایسے افعال ہوتے ہیں جو معاشرے میں معیوب سمجھتے جاتے ہیں جن سے لوگ بچتے ہیں،اگر لڑکا شراب پیتا ہے یا جوا کھیلتا ہے تو اسے اپنی بیٹی نہیں دیں گے،یہ درست ہے مگر بے نمازی اور سود خور بھی اچھا آدمی نہیں ہے،افسوس لوگ سود خور کے گویا پاوںپکڑ کر اپنی بیٹی پیش کرتے ہیں جو اللہ کے نزدیک گناہ ہے لوگ اس بات کی طرف کم توجہ دیتے ہیں اس عیب کو زیادہ دیکھا جاتا ہے جو معاشرے میں برا سمجھا جاتا ہے۔
امیر اہل سنت نے جہیز سے متعلق گفتگوکرتے ہوئے کہا کہ جہیز ایسا ہوکہ لوگوں پر بوجھ نہ پڑے،جہیز کا انتظام کرتے کرتے لڑکیوں کی عمر نکل جاتی ہے،کئی مقامات پر باپ تو کہیں بیٹی جہیز نہ ہونے کی وجہ سے خودکشی کرلیتے ہیں،حالانکہ ایسا نہیں کرنا چاہئے یہ حرام ہے،ایسا نہ کریں حالات کا مقابلہ کریں،افسوس معاشرہ اس بات کی پرواہ نہیں کرتا کہ کوئی کل کا مرتا آج مرجائے بس رسم رواج کو آنچ نہ آئے،مالداروں کو کوئی مسئلہ نہیں ہوتا درمیانہ طبقہ جہیز کی وجہ سے دب رہا ہے اور غریب طبقہ تو کہیں کا نہیں رہتا۔اللہ کرے کہ کوئی ایسا مدنی انقلاب آجائے کہ شادیاں ںسستی ہوجائیں۔