Category: کراچی

بھارت کے خلاف معرکہ حق، آپریشن بنیان مرصوص کی کامیابی کا ایک سال مکمل ہونے پر کراچی میں نیوی ڈاکیارڈ میں تقریب کا انعقاد کیا گیا۔

تقریب میں وزیراعلیٰ سندھ مراد علی شاہ سمیت اعلیٰ حکومتی و عسکری شخصیات نے شرکت کی۔ اس موقع پر سید مراد علی شاہ نے یادگارِ شہدا پر پھول رکھے،تقریب سے خطاب کرتے ہوئے وزیراعلیٰ سندھ سید مراد علی شاہ نے کہا کہ بنیان مرصوص، معرکہ حق نے واضح پیغام دے دیا کہ ملک کے خلاف جارحیت کا بھرپور جواب دیا جائے گا، عوام اور ملک کی تمام سیاسی طاقتیں عسکری افواج کے ساتھ شانہ بشانہ ہیں، گزشتہ سال آج کے دن دنیا نے دیکھ لیا کہ پاکستان کی افواج کس قدر قابل ہیں، دنیا میں کوئی بھی طاقت پاکستانی افواج کا مقابلہ نہیں کرسکتی، بنیان مرصوص، معرکہ حق نے واضح پیغام دے دیا ہے،پاکستان کی خود مختاری ہمارے لیے سب سے پہلے ہے، عوام پاک افواج کے ساتھ کھڑے رہے اور ہمیشہ ساتھ کھڑے رہیں گے، بنیان مرصوص میں شہیدوں اور غازیوں کو سلامِ عقیدت پیش کرتے ہیں، بھارت نے میدان میں شکست کے بعد پروپیگنڈا کا سہارا لیا اور وہاں بھی منہ کی کھائی،پاکستانی پُرامن قوم ہے، اگر خود مختاری پر بات آئی تو بھرپور جواب ملے گا۔

سندھ ہائی کورٹ بار ایسوسی ایشن نے کراچی بار ایسوسی ایشن کے الیکشن میں مبینہ دھاندلی پر اظہارِ تشویش کیا ہے اور دھاندلی کے خلاف متفقہ قراردار منظور کر لی ہے

سندھ ہائی کورٹ بار ایسوسی ایشن کراچی کے خصوصی جنرل باڈی اجلاس میں کراچی بار ایسوسی ایشن کے سالانہ انتخابات میں مبینہ دھاندلی اور بے ضابطگیوں کے خلاف مذمتی قرارداد متفقہ طور پر منظور کرلی گئی ہے اورکئی اہم مطالبات سامنے رکھ دیے گئے۔ سندھ ہائی کورٹ بار ایسوسی ایشن کراچی کا خصوصی جنرل باڈی اجلاس صدر محمد حسیب جمالی کی زیر صدارت منعقد ہوا، جس میں کراچی بار کے الیکشن کے امیدوار اور وکلا کی بڑی تعداد نے شرکت کی۔سندھ ہائی کورٹ بار ایسوسی ایشن کی جانب سے 8 مئی 2026 کو منظور کی گئی قرارداد میں کراچی بار ایسوسی ایشن کے انتخابات میں مبینہ بے ضابطگیوں، دھاندلی اور کرپشن کی شدید مذمت کی گئی۔ قرارداد میں مؤقف اختیار کیا گیا کہ وکلا برادری کے جمہوری حق اور شفاف انتخابی عمل کو متاثر کیا گیا، جس پر شدید تشویش پائی جاتی ہے۔ مطالبہ کیا ہے کہ کراچی بار ایسوسی ایشن کی موجودہ ایڈمنسٹریٹو کمیٹی کو فوری طور پر برطرف کیا جائے اور سابق منتخب کمیٹی کو بحال کیا جائے تاکہ ادارے کا نظم و نسق شفاف انداز میں چلایا جا سکے۔ انتخابی دھاندلی اور مالی بے ضابطگیوں میں ملوث افراد کے خلاف فوری طور پر مقدمات درج کیے جائیں اور ذمہ داران کو قانون کے کٹہرے میں لایا جائے۔سندھ ہائی کورٹ بار ایسوسی ایشن کی جانب سے متفقہ طور پر منظور شدہ قرارداد میں آئندہ تمام سالانہ انتخابات کے لیے بائیو میٹرک ووٹنگ سسٹم نافذ کرنے کا بھی مطالبہ کیا گیا تاکہ انتخابی عمل کو شفاف اور قابل اعتماد بنایا جا سکے۔ اس کے ساتھ ساتھ 15 روز کے اندر نئے انتخابات کرانے پر زور دیا گیا ہے۔

سندھ ہائی کورٹ بار ایسوسی ایشن نے انتخابی دھاندلی کے الزامات کی تحقیقات کے لیے باضابطہ عدالتی انکوائری قائم کرنے، متعلقہ دفاتر کی سی سی ٹی وی فوٹیج فراہم کرنے اور وکلا کے خلاف جاری کیے گئے شوکاز نوٹس فوری طور پر واپس لینے کا بھی مطالبہ کیا ہے۔قرارداد میں کہا گیا کہ وکلا برادری آئین، قانون اور جمہوری اقدار کے تحفظ کے لیے ہر ممکن قانونی و جمہوری راستہ اختیار کرے گی۔

کراچی کے علاقے گلشن معمار کے قریب افسوسناک حادثے میں 2 بچے پانی سے بھرے گڑھے میں ڈوب کر جاں بحق ہوگئے۔ ریسکیو ذرائع کے مطابق جاں بحق ہونے والے بچوں کی عمریں 10 اور 11 سال تھیں۔

رپورٹ کے مطابق دونوں بچے کھیلتے ہوئے گڑھے کے قریب پہنچے جہاں وہ پانی میں ڈوب گئے۔ اطلاع ملنے پر امدادی ٹیمیں موقع پر پہنچیں اور بچوں کی لاشیں نکال کر اسپتال منتقل کیں۔پولیس کا کہنا ہے کہ ضروری کارروائی کے بعد دونوں بچوں کی لاشیں ورثاء کے حوالے کردی گئی ہیں ،اہل علاقہ نے مطالبہ کیا ہے کہ کھلے اور پانی سے بھرے گڑھوں کو فوری طور پر بند کیا جائے تاکہ مستقبل میں ایسے افسوسناک واقعات سے بچا جا سکے۔

وزیر ٹرانسپورٹ سندھ شرجیل میمن نے کراچی کے لیے مزید ای وی اور ڈبل ڈیکر بسیں لانے کا اعلان کردیا۔

شرجیل میمن کی زیر صدارت محکمہ ٹرانسپورٹ و ماس ٹرانزٹ کا اجلاس ہوا جس میں سیکرٹری ٹرانسپورٹ اسد ضامن، منیجنگ ڈائریکٹر سندھ ماس ٹرانزٹ اتھارٹی سلیم اللہ اوڈھو سمیت دیگر متعلقہ حکام نے شرکت کی۔ اجلاس میں پیپلز بس سروس کے نئے روٹس، پنک ای وی اسکوٹیز کی تقسیم، ای وی ٹیکسی سروس اور ماس ٹرانزٹ کے جاری و مجوزہ منصوبوں پر تفصیلی تبادلہ خیال کیا گیا۔اس موقع پر شرجیل میمن نے کہا کہ حکومت سندھ خواتین کے لیے مزید ایک ہزار پنک ای وی اسکوٹیز خریدے گی جب کہ کراچی کیلئے نئی ای وی اور ڈبل ڈیکر بسیں لارہے ہیں، صوبے میں ماس ٹرانزٹ نظام کو مزید وسعت دینے کے لیے انٹر سٹی پیپلز بس سروس شروع کرنے کا فیصلہ کیا ہے جس کے تحت خیرپور تا روہڑی اور خیرپور تا رانی پور نئے روٹس آئندہ ہفتے شروع کیے جائیں گے، بہت جلد لاڑکانہ، دادو،سیہون، حیدرآباد اور سانگھڑ سمیت مختلف اضلاع میں انٹر سٹی بس سروس بھی شروع کرنے جا رہے ہیں۔

نیشنل سائبر کرائم انویسٹیگیشن ایجنسی (این سی سی آئی اے) کراچی نے ڈی ایچ اے فیز II ایکسٹینشن میں بڑی کارروائی کرتے ہوئے ایک منظم غیر قانونی کال سینٹر کا سراغ لگا لیا۔ کارروائی کے دوران 7 ملزمان کو گرفتار کر لیا گیا جبکہ بھاری مقدار میں ڈیجیٹل شواہد بھی قبضے میں لے لیے گئے۔

این سی سی آئی اے کے مطابق کال سینٹر میں کام کرنے والے ایجنٹس خود کو غیر ملکی بینکوں کے نمائندے ظاہر کرتے تھے اور اسپوفنگ ٹیکنالوجی کے ذریعے شہریوں کو دھوکا دیتے تھے۔ تحقیقات میں انکشاف ہوا کہ ملزمان بیرونِ ملک شہریوں کو نشانہ بنا کر ان سے سوشل سیکیورٹی نمبرز، فون نمبرز، تاریخِ پیدائش، والدہ کا نام اور بینک کارڈز کے سی وی وی کوڈز سمیت حساس مالی معلومات حاصل کرتے تھے۔حکام کا کہنا ہے کہ حاصل کردہ معلومات کو بعد ازاں غیر قانونی مالی فائدے کے لیے استعمال کیا جاتا تھا۔ چھاپے کے دوران 10 لیپ ٹاپس، 6 موبائل فونز اور ہزاروں غیر ملکی شہریوں کا بینکنگ ڈیٹا برآمد کیا گیا، جبکہ تمام ڈیجیٹل آلات اور شواہد موقع پر ہی ضبط کر لیے گئے۔

این سی سی آئی اے نے گرفتار ملزمان کے خلاف مقدمہ درج کر کے انہیں جسمانی ریمانڈ پر پولیس کے حوالے کر دیا ہے۔ مقدمہ ایف آئی آر نمبر 32/26 کے تحت درج کیا گیا ہے، جس میں پریوینشن آف الیکٹرانک کرائمز ایکٹ (PECA) کی دفعات 3، 4، 13، 14، 16 اور 26 جبکہ پاکستان پینل کوڈ (PPC) کی دفعات 34 اور 109 شامل کی گئی ہیں۔ادارے نے اس عزم کا اعادہ کیا ہے کہ سائبر کرائم اور آن لائن فراڈ میں ملوث عناصر کے خلاف کارروائیاں جاری رکھی جائیں گی تاکہ شہریوں اور مالیاتی اداروں کو دھوکا دہی سے محفوظ بنایا جا سکے۔