Category: کراچی

‎امیر جماعت اسلامی حافظ نعیم الرحمان نے ملک میں بڑھتی ہوئی مہنگائی کے خلاف سخت ردعمل دیتے ہوئے اعلان کیا ہے کہ جماعت اسلامی عوامی احتجاج کرے گی جبکہ ہڑتال اور پہیہ جام ہڑتال کا آپشن بھی زیر غور ہے۔ انہوں نے حکومت پر شدید تنقید کرتے ہوئے کہا کہ عوام کو مہنگائی کے بوجھ تلے دبایا جا رہا ہے۔
‎اسلام آباد میں پریس کانفرنس کرتے ہوئے حافظ نعیم الرحمان نے کہا کہ پیٹرولیم مصنوعات کی قیمتوں میں مسلسل اضافہ مہنگائی کی سب سے بڑی وجہ بن چکا ہے۔ ان کا کہنا تھا کہ عالمی مارکیٹ میں تیل کی قیمت کے حساب سے پاکستان میں پیٹرول کی اصل قیمت تقریباً 271 روپے فی لیٹر بنتی ہے، مگر حکومت مختلف لیوی اور ٹیکسز کی مد میں 117 روپے وصول کر رہی ہے، جس کے بعد عوام کو مہنگا پیٹرول خریدنا پڑ رہا ہے۔
‎انہوں نے سوال اٹھایا کہ اگر خطے کے دیگر ممالک جیسے بھارت اور بنگلا دیش میں پیٹرولیم مصنوعات کی قیمتوں میں اتنا اضافہ نہیں ہوا تو پھر پاکستان میں ہی عوام پر اضافی بوجھ کیوں ڈالا جا رہا ہے۔ ان کا کہنا تھا کہ جنگی صورتحال یا عالمی بحران کا اثر صرف پاکستانی عوام پر ڈالنا ناانصافی ہے۔
‎حافظ نعیم الرحمان نے بجلی اور گیس کے بلوں میں شامل فکس چارجز کو بھی شدید تنقید کا نشانہ بنایا۔ انہوں نے کہا کہ گزشتہ تین برسوں میں عوام سے بجلی کے ٹیکسز کی مد میں 19 کھرب روپے وصول کیے گئے، جس نے عام آدمی کی زندگی کو شدید متاثر کیا ہے۔
‎انہوں نے آئی پی پیز معاہدوں پر بات کرتے ہوئے الزام لگایا کہ حکومت صرف چند آئی پی پیز کے ساتھ معاہدوں میں تبدیلی کر رہی ہے جبکہ باقی معاہدوں کو برقرار رکھنے کی کوشش کی جا رہی ہے۔ ان کا کہنا تھا کہ حکمران طبقہ اپنے مفادات کے لیے مہنگے معاہدوں کو طول دینا چاہتا ہے۔
‎امیر جماعت اسلامی نے اعلان کیا کہ 15 مئی کو اسلام آباد میں مہنگائی کے خلاف بڑا احتجاج کیا جائے گا۔ انہوں نے کہا کہ اگر حکومت نے عوام کو ریلیف نہ دیا تو ملک گیر ہڑتال اور پہیہ جام ہڑتال جیسے آپشنز بھی استعمال کیے جا سکتے ہیں۔

‎کراچی میں منشیات اور غیر قانونی اسلحہ رکھنے کے مقدمے میں گرفتار خاتون ملزمہ انمول عرف پنکی کو عدالت میں پیش کیے جانے کے بعد ایک نیا تنازع سامنے آ گیا۔ پولیس حکام نے ملزمہ کو بغیر ہتھکڑی عدالت میں پیش کیے جانے پر سخت نوٹس لیتے ہوئے متعلقہ افسران کے خلاف کارروائی کا حکم دے دیا ہے۔
‎پولیس کے مطابق گارڈن پولیس نے کارروائی کرتے ہوئے ملزمہ انمول عرف پنکی کو گرفتار کیا تھا، جس کے قبضے سے کروڑوں روپے مالیت کی کوکین، مختلف کیمیکلز، نشہ آور اشیا اور ایک پستول برآمد کیا گیا۔ پولیس کا دعویٰ ہے کہ ملزمہ شہر میں منشیات کی سپلائی کے ایک بڑے نیٹ ورک کو چلا رہی تھی اور اس کے خلاف 10 مقدمات پہلے سے درج تھے جبکہ وہ کئی کیسز میں مطلوب بھی تھی۔
‎تفتیشی حکام کے مطابق ملزمہ جدید طریقوں سے منشیات کی سپلائی میں ملوث تھی۔ وہ آن لائن آرڈرز کے ذریعے مخصوص رائیڈرز کے ذریعے منشیات پہنچاتی تھی جبکہ خواتین رائیڈرز کا استعمال بھی کیا جاتا تھا تاکہ پولیس کو شک نہ ہو۔
‎ملزمہ کو عدالت میں پیش کیا گیا تو وہاں اسے بغیر ہتھکڑی لائے جانے پر شدید سوالات اٹھے۔ آئی جی سندھ جاوید عالم اوڈھو نے اس معاملے کا سخت نوٹس لیتے ہوئے ایڈیشنل آئی جی کراچی سے فوری رپورٹ طلب کر لی۔ انہوں نے واقعے میں غفلت یا قواعد کی خلاف ورزی کے مرتکب تفتیشی افسران اور اہلکاروں کو فوری معطل کرنے کی ہدایت بھی جاری کی۔
‎ترجمان سندھ پولیس کے مطابق معاملے کی شفاف تحقیقات کے لیے سینئر افسران پر مشتمل انکوائری کمیٹی قائم کر دی گئی ہے۔ آئی جی سندھ کا کہنا ہے کہ قانون اور ایس او پیز کی خلاف ورزی کسی صورت برداشت نہیں کی جائے گی اور ملوث اہلکاروں کے خلاف محکمانہ کارروائی عمل میں لائی جائے گی۔
‎کراچی پولیس چیف آزاد خان نے بھی واقعے کا نوٹس لیتے ہوئے واضح کیا کہ تمام پولیس افسران اور اہلکار قانون اور قواعد و ضوابط کے پابند ہیں۔ انہوں نے کہا کہ ملزمہ کو بغیر ہتھکڑی عدالت میں پیش کرنا ایک سنگین غفلت ہے جس کی مکمل تحقیقات کی جائیں گی۔

سندھ کے سینئر وزیر شرجیل انعام میمن نے معرکہ حق کا ایک سال مکمل ہونے پر قوم کو مبارکباد دی ہے۔

شرجیل میمن نے کہا کہ ایک سال قبل پاکستان نے بھارت کا سندور مٹا دیا تھا، معرکہ حق صرف ایک جنگ نہیں قوم کے اتحاد، حوصلے اور پاکستان سے محبت کی داستان ہے، قوم نے جس جرات، استقامت اور اتحاد کا مظاہرہ کیا، وہ تاریخ میں سنہری حروف سے لکھا جائے گا، معرکہ حق نے یہ ثابت کیا کہ دنیا کی کوئی طاقت پاکستان کی طرف میلی آنکھ سے نہیں دیکھ سکتی، پاک افواج کے جوانوں نے ہمیشہ اپنی جانوں کا نذرانہ پیش کرکے وطن عزیز کے دفاع کو ناقابلِ تسخیر بنایا، ہم اپنے شہداء اور غازیوں کی قربانیوں کو کبھی فراموش نہیں کریں گے، پاکستان کی سلامتی اور قومی وقار کے لئے پوری قوم سیسہ پلائی دیوار ہے، سندھ حکومت اور پاکستان پیپلز پارٹی ہمیشہ ملک کی سلامتی، جمہوریت اور قوم کی فلاح کے لیے کردار ادا کرتی رہی ہے، شہید بھٹو اور شہید بی بی کی ملکی دفاع اور فلاح کے لئے جدوجہد عوام کے لیے مشعلِ راہ ہے، ہمیں معرکۂ حق کے جذبے کو زندہ رکھتے ہوئے ملک میں امن، ترقی، برداشت اور بھائی چارے کو فروغ دینا ہوگا.