Category: کراچی

‎کراچی میں رمضان کے مہینے کے دوران شاہراہوں پر شدید ٹریفک کے دباؤ کی وجہ سے شہریوں کو مشکلات کا سامنا ہے۔
‎شہر میں سرکاری، نجی اور کاروباری اداروں میں بیک وقت چھٹی ہونے کے باعث اہم شاہراہیں رُکنے کا منظر پیش کر رہی ہیں۔ حکومت نے رمضان کے دوران دفاتر کے اوقات صبح 10 بجے سے شام 4 بجے تک مقرر کیے ہیں، جبکہ عام دنوں میں سرکاری دفاتر صبح 8 سے دوپہر 2 بجے اور نجی دفاتر صبح 9 سے 3 یا 4 بجے تک کھلے رہتے تھے۔
‎ٹریفک کے دباؤ میں اضافے کی ایک بڑی وجہ شہر میں جاری تعمیراتی کام بھی ہیں۔ ساتھ ہی سڑکوں کی ٹوٹ پھوٹ نے ٹریفک کی روانی متاثر کی ہے، جس سے شہریوں کی روزمرہ آمد و رفت دشوار ہو گئی ہے۔

ڈائریکٹر سول ڈیفنس نے گل پلازہ سانحے کی تحقیقات کرنے والے جوڈیشل کمیشن کے سوالنامےکے جوابات دینے سے معذرت کرلی۔

عبدالحمید جاگیرانی نے کہا کہ وہ اب ڈائریکٹر کے عہدے پر موجود نہیں ہیں، کمیشن نے ایڈیشنل کنٹرولر سول ڈیفنس فاطمہ میمن کو نوٹس جاری کردیا جس کے مطابق سابق ڈائریکٹر سول ڈیفنس نے بتایا ہے کہ ڈائریکٹر کا چارج اب ان کے پاس نہیں ہے،نوٹس میں کہا گیا ہے کہ بطور ڈائریکٹر عہدے پر نہ ہونے کے باعث وہ کمیشن کے سوالنامے کا جواب نہیں دے سکتے،نوٹس کے مطابق بطور ایڈیشنل کنٹرولر سول ڈیفینس ذاتی حیثیت میں 26 فروری کو کمیشن کے روبرو پیش ہوں

کمیشن اجلاس میں لوگوں کو ریسکیو کرنے والے شہری کے بیان میں ریسکیو اقدامات میں سنگین بے انتظامی کی نشاندہی کی گئی،کمیشن نے میونسپل کمشنر کے ایم سی، چیف فائر افسر اور ڈی جی ریسکیو 1122 کو خط لکھ دیاجس میں کہا گیا کہ شہریوں کو ریسکیو کرنے والے شہری دانش نے اپنے بیان میں سنگین نوعیت کے الزامات عائد کئے ہیں، ان الزامات پر اگر آپ جرح کرنا چاہتے ہیں تو کمیشن کو 27 فروری سے قبل آگاہ کریں،تاکہ جرح کے لئے سماعت مقرر کی جاسکے، اگر مقررہ وقت میں جواب نہیں دیا گیا تو جرح کا حق ختم کردیا جائے گا

سندھ کے سینئر صوبائی وزیر، وزیر اطلاعات شرجیل انعام میمن نے کہا ہے کہ سندھ وہ واحد صوبہ ہے جس کے ترقیاتی منصوبوں کا فائدہ صرف صوبے تک محدود نہیں بلکہ پورے ملک کو پہنچتا ہے۔ چاہے ہوا سے بجلی کی پیداوار ہو یا تھر کے کوئلے سے توانائی، سب کچھ نیشنل گرڈ میں شامل ہو کر پاکستان کو مضبوط بنا رہا ہے

پریس کانفرنس کرتے ہوئے شرجیل میمن کا کہنا تھا کہ آصف علی زرداری ہمارے بڑے ہیں وہ بریفنگ لیتے ہیں، ڈانٹ بھی سکتے ہیں، رمضان کا مہینہ ہے آصف زرداری کی میٹنگ کی خبر کا حقیقت سے تعلق نہیں، رمضان میں جس طرح چاٹ مصالحہ لگایا جاتا ہے ایسی ہی یہ خبر ہے، زرداری صاحب ہمارے بڑے ہیں ڈانٹ سکتے ہیں لیکن جس میٹنگ کی بات ہو رہی اس میں ایسا کچھ نہیں تھا، صدر آصف زرداری اور بلاول صاحب بریفننگ لیتے رہتے ہیں۔سندھ کابینہ کے عوامی مفاد میں کیے گئے فیصلے، سیپرا اصلاحات، تھر ریل کنیکٹیویٹی، ڈیجیٹل نظام اور ویمن ایگریکلچر ورکرز رولز 2026 صوبے میں شفافیت، معاشی ترقی اور خواتین کے حقوق کے تحفظ کی جانب اہم پیش رفت ہیں،ویمن ایگریکلچر ورکرز رولز 2026 خواتین کی بہتری اور مساوی مواقع کے لیے تیار کیے گئے ہیں،خواتین کے حقوق کا تحفظ حکومت سندھ کی اولین ترجیح ہے۔سندھ ایک تھا، ایک ہے اور ہمیشہ ایک ہی رہے گا۔ہماری شناخت اتحاد، بھائی چارہ اور مشترکہ ترقی میں ہے

شرجیل میمن کا مزید کہنا تھا کہ وفاقی وزرا اورگورنرہاؤس سےسندھ حکومت کیخلاف سازش ہورہی ہے،وفاقی حکومت پیپلز پارٹی سے ہر وقت تعاون مانگتی ہے اور خود سازش کر رہی ہے،میں پیپلز پارٹی کی قیادت کو کہتا ہوں کہ وہ وفاقی حکومت سے جواب طلبی کریں، وفاقی وزرا سندھ حکومت کے خلاف مسلسل ہرزہ سرائی کریں ،پروپیگنڈہ کریں تو یہ باعث تشویش ہے،فاروق ستار نے گل پلازہ کے باہر جھوٹ بولنا شروع کر دیے، سیاسی یتیم جتنے اب جمع ہوگئے ہیں ان کا کام ہی اب یہ ہے، کراچی کو ٹارگٹ کرکے سندھ حکومت پر تنقید کی جاتی ہے، ہم مانتے ہیں کراچی میں چیلنجز ہیں، کراچی میں بہت ساری جگہوں پر سڑکوں اور ٹریفک کے مسائل ہیں، کرا چی کی آبادی کا موازنہ شہروں سے نہیں ملکوں سے کرسکتے ہیں،کچھ لوگ کراچی کو ٹارگٹ کرتے ہیں، کراچی کے اپنے مسائل ہیں، یہاں ہزاروں کی تعداد میں روزانہ ملک بھرسےلوگ داخل ہوتے ہیں، صحت کی سہولت کے لیے ملک بھر سے لوگ کراچی آتے ہیں، یہاں کے اسپتالوں میں 50 فیصد لوگ باہر سے آتے ہیں، مریضوں پر لاکھوں روپے خرچ ہو رہے ہیں وہ رقم سندھ حکومت ادا کر رہی ہے۔

‎کراچی کے علاقے ڈیفنس کی خیابانِ اتحاد میں تیز رفتاری کے باعث ایک کار بے قابو ہو کر الٹ گئی، جس کے نتیجے میں ایک فوڈ ڈیلیوری رائیڈر جاں بحق ہوگیا۔
‎عینی شاہدین اور سی سی ٹی وی فوٹیج کے مطابق تیز رفتار گاڑی فٹ پاتھ پر چڑھتے ہوئے کئی قلابازیاں کھاتی ہوئی سڑک کنارے کھڑے ڈیلیوری رائیڈر سے جا ٹکرائی۔ حادثے کے بعد رائیڈر کو شدید زخمی حالت میں اسپتال منتقل کیا گیا، جہاں وہ دورانِ علاج دم توڑ گیا۔ متوفی کی شناخت فرحان کے نام سے ہوئی ہے۔
‎رپورٹس کے مطابق گاڑی چلانے والا حسن بھنگوار نامی شخص نکلا، جو اسسٹنٹ کمشنر کا بھتیجا بتایا جاتا ہے۔ گاڑی کے عقب میں حکومتِ سندھ کی سرکاری نمبر پلیٹ بھی لگی ہوئی تھی۔ ذرائع کا کہنا ہے کہ ساحل پولیس نے کئی گھنٹوں تک ملزم کی حراست سے متعلق تفصیلات ظاہر نہیں کیں۔
‎ایس ایس پی ساؤتھ کے مطابق متوفی کے اہلِ خانہ نے قانونی کارروائی سے انکار کردیا ہے۔ پولیس نے ضابطے کی کارروائی مکمل کرتے ہوئے پوسٹ مارٹم کرایا اور بعد ازاں میت ورثاء کے حوالے کردی۔ اہلِ خانہ میت کو تدفین کے لیے ٹھٹھہ لے گئے۔
‎پولیس حکام کا کہنا ہے کہ اگر ورثاء کی جانب سے درخواست دی گئی تو مقدمہ درج کیا جائے گا۔ ملزم حسن بھنگوار کو شخصی ضمانت پر رہا کردیا گیا ہے۔

‎فیڈرل انویسٹی گیشن ایجنسی (ایف آئی اے) امیگریشن نے جناح انٹرنیشنل ایئرپورٹ پر کارروائی کرتے ہوئے سعودی عرب سے بے دخل کی جانے والی ایک خاتون کو حراست میں لے لیا۔
‎ایف آئی اے حکام کے مطابق خاتون کا تعلق بہاولپور سے ہے اور اس نے اعتراف کیا کہ وہ دو ایجنٹوں کے ذریعے بیرون ملک گئی، جہاں سعودی عرب پہنچنے پر اسے منظم انسانی اسمگلنگ نیٹ ورک کے حوالے کیا گیا۔ تحقیقات میں بتایا گیا ہے کہ اس نیٹ ورک میں زینی (لاہور)، حسیب (اوکاڑہ) اور حاجی اللہ وسایا شامل ہیں، اور خاتون مبینہ طور پر غیر اخلاقی سرگرمیوں میں بھی ملوث رہی۔
‎دوسری جانب ایف آئی اے نے کراچی ایئرپورٹ پر کارروائی کرتے ہوئے جعلی دستاویزات کے ذریعے بیرون ملک جانے کی کوشش کرنے والے دو مسافروں کو بھی گرفتار کر لیا۔ حکام کے مطابق یہ مسافر پاکستانی پاسپورٹ پر کمبوڈیا جا رہے تھے، تاہم حلیہ اور کاغذات مشکوک ہونے پر انہیں حراست میں لے لیا گیا اور دونوں سے تفتیش جاری ہے۔

کراچی کے جناح انٹرنیشنل ایئرپورٹ پر ایف آئی اے امیگریشن نے کارروائی کرتے ہوئے دو مسافروں کو جعلی دستاویزات کے ساتھ بیرون ملک جانے کی کوشش ناکام بنا دی۔
ایف آئی اے حکام کے مطابق مشکوک دستاویزات کی جانچ کے بعد مسافروں کو پرواز سے آف لوڈ کیا گیا اور مزید تفتیش کے لیے حراست میں لے لیا گیا۔