Category: کراچی

قومی اسمبلی کے اجلاس میں پیپلز پارٹی کی رکن قومی اسمبلی سحر کامران سمیت دیگر ارکان نے کراچی جناح انٹرنیشنل ایئر پورٹ پر ناقص انتظامات اور بدانتظامی پر شدید احتجاج کیاہے

پیپلز پارٹی کی رہنما رکن قومی اسمبلی سحر کامران کا کہنا تھا کہ کراچی جناح انٹرنیشنل ایئرپورٹ پر اس وقت لوگوں کو شدید اذیت کا سامنا کرنا پڑرہا ہے، طویل اور لمبی قطاریں لوگوں کے وقت کے ضیاع اور مشکلات کی وجہ بن رہی ہیں، ایم کیو ایم کے رہنما امین الحق نے کہا کہ کراچی ایئر پورٹ خستہ حالی کا شکار ہو رہا ہے، امیگریشن سسٹم کو اپ گریڈ کیا جانا چاہیے، ایئر پورٹ پر عوام ذلیل ہو رہے ہیں۔پیپلز پارٹی کی رہنما شازیہ مری نے اجلاس میں کہا کہ کراچی ایئر پورٹ پر مسافروں کو شدید مشکلات کا سامنا ہے اور امیگریشن کلیئرنس اور آمد کے عمل کے دوران مسائل آ رہے ہیں،انہوں نے سول ایوی ایشن کی نااہلی کی وجہ سے پیدا ہونے والے مسائل کی نشاندہی کرتے ہوئے وفاقی حکومت سے جناح ایئر پورٹ کے نظام کو درست کرنے کا نوٹس لینے کا مطالبہ کیا،اختیار بیگ نے کہا کہ ایئر پورٹ پر دستاویزات رکھنے والوں کو بھی مشکلات کا سامنا ہے۔

ن لیگی رہنما طارق فضل چوہدری نے کہا کہ کراچی ایئر پورٹ معیشت کے لیے اہمیت کا حامل ہے اور ارکان کی تجاویز کو ایڈریس کیا جائے گا، ایئر پورٹس کو آؤٹ سورس کرنے کی ضرورت ہے، اسلام آباد ایئر پورٹ سے متعلق فیصلہ کیا جا رہا ہے، کل متعلقہ وفاقی وزیر اس مسئلے پر جواب دیں گے

پچھلے ماہ جنوری میں کراچی میں آتشزدگی کے 225 واقعات میں 83 افراد جاں بحق ہوئے ہیں

دستیاب معلومات کے مطابق کراچی میں آتشزدگی کے بڑھتے واقعات نے شہر میں حفاظتی انتظامات اور ہنگامی تیاری پر سنگین سوالات کھڑے کر دیے ہیں۔ صرف جنوری کے مہینے میں شہر بھر میں 225 آگ لگنے کے واقعات رپورٹ ہوئے، جبکہ فروری کے ابتدائی دنوں میں ہی 20 سے زائد حادثات سامنے آ چکے ہیں۔ 17 جنوری کو گل پلازہ میں لگنے والی ہولناک آگ، جس میں 79 قیمتی جانیں ضائع ہوئیں، آج بھی شہریوں کے لیے ایک دردناک یاد دہانی ہے۔ حکام کا کہنا ہے کہ اگر حفاظتی قوانین پر سختی سے عملدرآمد، عمارتوں کے باقاعدہ معائنے اور عوامی آگاہی کو ترجیح نہ دی گئی تو چھوٹے اور بڑے آتشزدگی کے واقعات شہریوں کی جان، مال اور روزگار کے لیے مسلسل خطرہ بنے رہیں گے۔

کراچی میں رواں سال کےپہلے ماہ آتشزدگی کے 225 واقعات ہوئے جس میں سب سے بڑا اور خوفناک واقعہ گل پلازہ میں پیش آیا۔محکمہ فائربریگیڈ کی رپورٹ کے مطابق آتشزدگی کے واقعات میں 2بچوں اور 8خواتین سمیت 83 افرادجاں بحق ہوئے جب کہ ان واقعات میں ایک بچے سمیت 24 افراد زخمی ہوئے۔ضلع وسطی میں آتشزدگی کے سب سے زیادہ 30 واقعات ہوئے اور ایک ماہ کے دوران صدر میں آگ لگنےکے 18 واقعات پیش آئے۔سہراب گوٹھ، گلستان مصطفی فائراسٹیشن کی حدود میں آتشزدگی کے 18 واقعات ہوئے جب کہ ناظم آباد 13، لیاری 9 اور سائٹ میں آتشزدگی کے 11 واقعات ہوئے۔کورنگی 9 اور لانڈھی میں آتشزدگی کے تین واقعات پیش آئے، اورنگی ٹاؤن 8، شاہ فیصل 8، منظور کالونی کی حدود میں 14واقعات پیش آئے، نیو کراچی فائر اسٹیشن کی حدود میں 13 واقعات ہوئے۔محکمہ فائر بریگیڈ نے شہریوں کو احتیاطی تدابیر اختیار کرنے اور آتشزدگی سے بچاؤ کے لیے حفاظتی اقدامات یقینی بنانے کی ہدایت کی ہے۔

‎شہر قائد کراچی میں پولیس نے بلدیہ ٹاؤن کے علاقے میں جعلی ادویات تیار کرنے والی فیکٹری پر چھاپہ مار کر 3 ملزمان کو گرفتار کر لیا اور بھاری مقدار میں جعلی ادویات برآمد کر لیں۔
‎پولیس کے مطابق فیکٹری کا مالک صدیق اور اس کا بیٹا زید فرار ہو گئے ہیں، جن کی تلاش جاری ہے۔ یہ دونوں طویل عرصے سے فیکٹری چلا کر جعلی ادویات تیار کر رہے تھے۔ خفیہ اطلاع پر کارروائی کرتے ہوئے چھاپہ مارا گیا۔
‎تمام گرفتار ملزمان کے خلاف مقدمہ درج کر کے قانونی کارروائی شروع کر دی گئی ہے۔ پولیس نے عوام کو خبردار کیا ہے کہ جعلی ادویات کے استعمال سے انسانی جانوں کو شدید خطرہ لاحق ہے۔

‎پاکستان سپر لیگ (پی ایس ایل) کی نئی فرنچائز حیدرآباد کنگزمین نے اپنی ٹیم کی آفیشل جرسی متعارف کروادی ہے۔ سوشل میڈیا پر ٹیم کے آفیشل پیج پر شیئر کی گئی جرسی سیاہ اور گولڈن رنگ کی ہے، جو ٹیم کے نئے برانڈنگ امیج کو اجاگر کرتی ہے۔
‎ٹیم نے ری ٹینشن کے دوران مہنگے کھلاڑیوں پر بھاری سرمایہ کاری کی ہے۔ صائم ایوب کو 12 کروڑ 60 لاکھ روپے میں ری ٹین کیا گیا، جو پی ایس ایل میں ری ٹین ہونے والے مہنگے ترین کھلاڑی بن گئے ہیں۔ صائم ایوب کو پشاور زلمی سے ریلیز ہونے کے بعد حیدرآباد نے اپنے اسکواڈ میں شامل کیا، اور ان کا معاوضہ بابر اعظم، شاہین آفریدی اور شاداب خان سے بھی زیادہ ہے۔
‎اس کے علاوہ، جارح مزاج بلے باز عثمان خان بھی حیدرآباد کی ری ٹین لسٹ میں شامل ہیں، جنہیں 4 کروڑ 62 لاکھ روپے میں ٹیم نے برقرار رکھا۔
‎ایمرجنگ کیٹیگری میں معاذ صداقت کو 3 کروڑ 50 لاکھ روپے میں اور گولڈ کیٹیگری میں عاکف جاوید کو 1 کروڑ 96 لاکھ روپے میں ری ٹین کیا گیا ہے۔
‎یہ ریٹینشنز اور نئی جرسی ٹیم کے ابتدائی برانڈنگ اور اسکواڈ کی تیاری میں اہم پیش رفت کے طور پر دیکھی جارہی ہے، جس سے پی ایس ایل 2026 میں حیدرآباد کنگزمین کی کارکردگی پر دلچسپی مزید بڑھ گئی ہے۔

‎پاکستان پیپلز پارٹی کے سیکرٹری جنرل محمد ہمایون خان نے تحریکِ انصاف کی جانب سے دی گئی شٹر ڈاؤن ہڑتال کی کال کو مکمل طور پر ناکام قرار دے دیا ہے۔
‎اپنے بیان میں ہمایون خان نے کہا کہ عوام نے انتشار، منفی سیاست اور زبردستی کی کالوں کو مسترد کر دیا ہے۔ ان کا کہنا تھا کہ کاروباری مراکز، بازار اور روزمرہ زندگی معمول کے مطابق جاری رہی، جو اس بات کا واضح ثبوت ہے کہ عوام اب ایسے ہتھکنڈوں کا حصہ بننے کو تیار نہیں۔
‎انہوں نے کہا کہ ملک کو احتجاج اور ہنگامہ آرائی نہیں بلکہ استحکام، معاشی بحالی اور عوامی فلاح کی ضرورت ہے۔ ہمایون خان کے مطابق پاکستان پیپلز پارٹی ہمیشہ عوامی مسائل کے حل کے لیے مثبت اور جمہوری کردار ادا کرتی رہے گی۔

سندھ کے سینئر وزیر شرجیل انعام میمن نے کہا ہے کہ جس نے بات کرنی ہے اسمبلی میں آئے، مسائل پاکستان کے ہر شہر میں ہیں، دو سیاسی جماعتیں ایسی ہے جن کی سیاست تنقید کرنے کی ہے، اگر یہ تنقید نہیں کریں گے تو ان کی سیاست کیسے چلے گی؟

سندھ اسمبلی میڈیا کارنر میں گفتگو کرتے ہوئے شرجیل میمن کا کہنا تھا کہ بھارت دہشت گردی میں ملوث ہے، وہ اپنی پراکسی کے ذریعے پاکستان میں حملے کرا رہا ہے، فیک اکاؤنٹ سے مذہبی انتشار کی مہم چلائی گئی، ساری بزدلانہ کارروائی بھارت کی طرف کی جا رہی ہیں، کوئی بھی دشمن ملک ایسی کارروائیاں کرے گا تو ہم اسے منہ توڑ جواب دینے کو تیار ہیں،اسلام آباد میں افسوسناک واقعہ پیش آیا، دہشت گردوں نے معصوم لوگوں پر حملہ کیا، جو دشمن ممالک سامنے آ کر لڑ نہیں سکتے وہ پراکسی کے ذریعے سازشیں کر رہے ہیں،افغان طالبان کی مدد اور بھارتی سرپرستی میں اسلام آباد میں کیا گیا خودکش حملہ اس بات کا ثبوت ہے کہ جنگوں میں ناکامی کے بعد یہ عناصر بزدلانہ کارروائیوں پر اتر آتے ہیں۔

شرجیل میمن کا مزید کہنا تھا کہ مسائل پاکستان کے ہر شہر میں ہیں، دو سیاسی جماعتیں ایسی ہے جن کی سیاست تنقید کرنے کی ہے، اگر یہ تنقید نہیں کریں گے تو ان کی سیاست کیسے چلے گی؟ اگر یہ مخالفت نہیں کریں گے تو سیاست کیا کریں گے؟ یہی مخالفت کہیں اور نظر نہیں آئے گی، باقی صوبوں میں واقعات ہوئے تو ایم کیو ایم اور جماعت اسلامی خاموش کیوں رہیں؟ ان کی سیاست کا دارومدار تنقید پر ہے، اتوار کو ہڑتال کی کال دی گئی، ویسے ہی بند ہوتا ہے، چند دن پہلے سندھ اسمبلی نے کامن ویلتھ کی میزبانی کی، ایک تاریخی پروگرام ہوا، پیغام گیا کہ پاکستان اور سندھ امن کا گہوارا ہیں، مائی کراچی بھی چند دن پہلے ہوا، ڈیفنس ایکسپو بھی کراچی میں ہوتی ہے، یہاں ایسے ایونٹ ہوتے رہتے ہیں، ورلڈ بینک کے وفد نے بھی سندھ حکومت کے اقدامات کی تعریف کی، دنیا کی تاریخ کا سب سے بڑا ہاؤسنگ پروجیکٹ سندھ حکومت بنا رہی ہے، سندھ حکومت نے ہر شہر اور منصوبے کو فوکس کر رکھا ہے، کوشش ہے کہ تمام منصوبے وقت پر مکمل کیے جائیں۔