کراچی: اسٹیٹ بینک آف پاکستان کا کہنا ہے کہ ملکی زرمبادلہ کے ذخائر میں اضافہ ریکارڈ کیا گیا ہے۔
باغی ٹی وی: اسٹیٹ بینک کی رپورٹ کے مطابق ملکی زرمبادلہ کے ذخائر 21 دسمبر کو ختم ہفتے میں 78 کروڑ 70 لاکھ ڈالر کا اضافہ ہو گیا مرکزی بینک کے مطابق زرمبادلہ ذخائر 21 دسمبر کو ختم ہفتے تک 12 ارب 85 کروڑ ڈالر رہے اسٹیٹ بینک کے ذخائر میں 85 کروڑ 23 لاکھ ڈالر کا اضافہ ہوا ہےجس کے ساتھ ہی اسٹیٹ بینک کے زرمبادلہ ذخائر 7 ارب 75 کروڑ ڈالر رہے۔کمرشل بینکوں کے ذخائر 6.5 کروڑ ڈالر کم ہو کر 5 ارب 9 کروڑ ڈالر رہے۔
کراچی:مسلم لیگ (ن) کے صدر اور سابق وزیر اعظم شہباز شریف نے کہا ہے کہ 8فروری کے انتخابات کے لیے پوری طرح تیار ہیں، ہار جیت اللہ کے ہاتھ میں ہے، لاڈلے کے ذریعے ملک کی تباہی کی گئی اور اب دوبارہ ویسا ماحول بنانے کی کوشش کی جارہی ہے-
باغی ٹی وی : کراچی پہنچنے کے بعد نجی ہوٹل میں پارٹی عہدیداران اور شمولیت کرنے والوں سے گفتگو کرتے ہوئے شہباز شریف نے کہا کہ الیکشن کمیشن آف پاکستان نے بلے کے نشان کے حوالے سے حقیقت پر مبنی فیصلہ دیا، پشاور ہائیکورٹ نے اس پر حکم امتناع جاری کر کے الیکشن کمیشن کے اختیار پر حملہ کیا، اور یہ بات ہمارے ذہن میں رہنی چاہیے کہ پختونخوا میں ایسے امیدوار الیکشن لڑ رہے ہیں جن کا کسی نا کسی طریقے سے محترم جج سے عزیز داری اور رشتہ داری ہے۔
انہوں نے کہا کہ ترازو کو ایک لاڈلے کی جانب جھکایا جارہا ہے جبکہ ماضی میں نو مئی اور فوجی تنصیبات پر حملہ کرنے والے لاڈلے کو سپریم کورٹ میں ’گڈ ٹو سی یو‘ کہہ کر مخاطب کیا گیا ہمیں عدالتوں کے ان فیصلوں پر دلجمعی کے ساتھ بولنا چاہیے اور اس پر بھرپور طریقے سے آواز اٹھانی چاہیے۔
دریں اثنا شہباز شریف نے پارٹی میں شمولیت کرنے والوں کو مبارک باد دیتے ہوئے دعویٰ کیا کہ سندھ سے بڑی تعداد میں لوگوں اور سیاسی رہنماؤں نے ن لیگ پر اعتماد کیا ہے، میں تمام لوگوں کو شمولیت پر خوش آمدید کہتا ہوں ن لیگ ترقی اورخوشحالی کے سفر میں سب کو ساتھ لے کر چلے گی، بشیر میمن اور ان کی ٹیم کو تحسین پیش کرنا چاہتا ہوں، سندھ سے بڑی تعداد میں دوستوں نے ن لیگ میں شمولیت اختیار کی اور مسلم لیگ ن دوبارہ ایک اچھی اور طاقتور جماعت بننے جارہی ہے۔
انہوں نے کہا کہ 8فروری کے انتخابات کے لیے پوری طرح تیار ہیں، ہار جیت اللہ کے ہاتھ میں ہے، لاڈلے کے ذریعے ملک کی تباہی کی گئی اور اب دوبارہ ویسا ماحول بنانے کی کوشش کی جارہی ہے،یہ بات ہمارے ذہن میں رہنی چاہیے کہ پختونخوا میں ایسے امیدوار الیکشن لڑ رہے ہیں جن کا کسی نا کسی طریقے سے محترم جج سے عزیز داری اور رشتہ داری ہے، انصاف کا تقاضہ یہ تھا کہ جج اپنی عزیز داری کی بنا پر بینچ سے علیحدہ ہوتے اور ایسے جج کی تعیناتی ہوتی جن کی کسی امیدوار سے رشتے داری اور تعلق داری نہ ہوتی-
واضح رہے کہ گزشتہ دنوں الیکشن کمیشن نے انٹراپارٹی الیکشن پارٹی آئین کے مطابق نہ کرانے پر پاکستان تحریک انصاف سے بلے کا انتخابی نشان واپس لے لیا تھا تاہم 26 دسمبر کو پشاور ہائیکورٹ نے پی ٹی آئی انٹرا پارٹی انتخابات کالعدم اور پارٹی نشان واپس لینے کے الیکشن کمیشن کے فیصلے پر حکم امتناع جاری کیا تھا تحریک انصاف کی درخواست پر پشاور ہائیکورٹ کے جسٹس کامران حیات میاں خیل نے سماعت کی تھی۔
کراچی:ادھر کاروباری ہفتے کے چوتھے روز پاکستانی روپےکے مقابلے میں امریکی ڈالر کی قدر میں کمی ہوئی-
باغی ٹی وی : اسٹیٹ بینک آف پاکستان کے مطابق آج انٹربینک میں ڈالر 27 پیسے سستا ہوا،کاروبار کے اختتام پر ایک امریکی ڈالر کا بھاؤ 281 روپے 93 پیسے ہے،رواں ہفتے انٹربینک میں ڈالر 60 پیسے جبکہ رواں مہینے 3 روپے 24 پیسے سستا ہوا ہے،جبکہ انٹربینک میں 2023 میں ڈالر 55 روپے 50 پیسے مہنگا ہوا ہے،جبکہ گزشتہ روز انٹر بینک میں ڈالر کی قیمت 282 روپے 20 پیسے ریکارڈ کی گئی تھی۔
دوسری جانب آج پاکستان اسٹاک ایکسچینج (پی ایس ایکس) میں آج بھی کاروبار میں تیزی کا سلسلہ جاری رہا،بینچ مارک کے ایس اے 100 انڈیکس 1800 پوائنٹس سے زائد اضافے کے بعد 62 ہزار کی حد دوبارہ بحال کرلی100 انڈیکس 1800 پوائنٹس اضافے سے 62600 پر پہنچ گیا جو گزشتہ روز 60 ہزار 863 پوائنٹس پر بند ہوا تھا-
کراچی: ملک بھر میں سونے کی قیمت میں مزید اضافہ ہوگیا۔
باغی ٹی وی: آل پاکستان جیمز اینڈ جیولرز ایسوسی ایشن کے مطابق سونے کی فی تولہ قیمت میں 2200 روپے کا اضافہ ہوا ہے جس کے بعد ملک میں فی تولہ سونے کا بھاؤ 2 لاکھ 22 ہزار 800 روپے ہوگیا ہے 10 گرام سونے کا بھاؤ 1886 روپے بڑھ کر ایک لاکھ91 ہزار 15 روپے ہے قیمتوں میں ردوبدل کے بعد 10 گرام 22 قیراط سونا ایک لاکھ 75 ہزار 97 روپے کا ہوگیا دوسری جانب عالمی بازار میں سونے کی قیمت 20 ڈالر اضافے سے 2085 ڈالر فی اونس ہے جبکہ گزشتہ روز بھی سونے کی فی تولہ قیمت میں ایک ہزار روپے کا اضافہ ہوا تھا۔
دوسری جانب عالمی مارکیٹ میں خام تیل کی قیمتیں گزشتہ روز 2 فیصد تک کم ہو گئیں غیر ملکی خبررساں ادارے کے مطابق گزشتہ روز برطانوی برینٹ کے سودے 1.8 فیصد کی کمی کیساتھ 79.65 ڈالر فی بیرل پر ہوئے،امریکی ویسٹ ٹیکساس انٹرمیڈیٹ کے سودے 1.9 فیصد کی کمی کیساتھ 74.11 ڈالر فی بیرل پر ہوئے۔
شہر قائد کراچی میں ڈیلیوری بوائے کے ساتھ ڈکیتی کی واردات ہوئی، پولیس نے تاحال مقدمہ درج نہیں کیا
واقعہ کراچی کے علاقے لیاقت آباد میں پیش آیا، ڈیلیوری بوائے بلال کے ساتھ لیاقت آباد کے علاقے میں ڈکیتی کی واردات ہوئی،چار دن قبل ڈاکوؤں نے گن پوائنٹ پر اسے روکا، اور موبائل فون، نقدی اور شناختی کارڈ چھین لیا، ڈیلیوری بوائے کے مطابق وہ واقعہ کے بعد مقدمہ درج کروانے تھانے گیا تا ہم پولیس نے مقدمہ درج نہیں کیا،
ڈیلیوری بوائے بلال کے مطابق پولیس نے کچی رپورٹ درج کی ، اس میں بھی صرف شناختی کارڈ کی گمشدگی کا لکھا ، ڈکیتی کا رپورٹ میں ذکر نہیں کیا،پولیس کا کہنا ہے کہ واقعہ چند دن قبل پیش آیا تھا، بلال سے رابطے میں ہیں ،اس کی درخواست پر مقدمہ درج کر لیا جائے گا،
کراچی کی مچھر کالونی کی سن لی گئی،سی پیک سے متعلق سست روی کا تاثر غلط ہے،خالد منصور
شہر قائد میں سی ٹی ڈی کی کاروائی، دو دہشت گرد گرفتار
چینی باشندوں کی جان لینے والوں کو پھانسی کے پھندے پر لٹکائیں گے،
کراچی یونیورسٹی میں ایک خاتون کا خودکش حملہ:کئی سوالات چھوڑگیا،
حیدر آباد میں چینی ڈاکٹر کو ٹارگٹ کرنے کی کوشش سی ٹی ڈی نے ناکام بنا دی
واضح رہے کہ شہر قائد کراچی میں جرائم بڑھ چکے ہیں، ڈکیتی، چوری، راہزنی کی وارداتوں میں اضافہ ہو چکا ہے،ایسا لگتاہے کہ جیسے کوئی جنگل کا قانون ہے۔ جس کا دل چاہتاہے اسلحے کے زورپر نہتے شہریوں سے مال اور جان چھین لیتاہے۔ قانون نافذ کرنے والے ادارے کے کانوں پر جوں تک نہیں رینگتی۔اب تو بزرگ خواتین بھی اس لوٹ مار کی عفریت سے محفوظ نہیں ۔ عزیزآباد بلاک 8 بزرگ خاتون سے لٹیرے بیگ چھین کر فرارہو گئے ہیں،شہر میں نشہ آور اشیا کا استعمال بہت زیادہ پھیل چکا ہے.
کراچی :سال نو کی آمد پر ہوائی فائرنگ اور دنگا کرنے والوں کیخلاف اقدام قتل کا مقدمہ درج کیا جائے گا۔
باغی ٹی وی:کراچی پولیس کے چیف خادم حسین رند نے سال نو کے موقع پر ہوائی فائرنگ سے متعلق ویڈیو بیان میں کہا کہ نیو ایئر کی خوشی پوری دنیا میں منائی جاتی ہے لیکن ہمارے یہاں اس رات کو ہوائی فائرنگ کی جاتی اور دنگے فساد ہوتے ہیں، جس میں لوگوں کی جانیں جاتیں اور کئی زخمی بھی ہوتے ہیں آنے والے نئے سال میں پولیس کی جانب سے خاص اقدامات کیے گئے ہیں ، شہری بلکل نئے سال کی خوشیاں منائیں لیکن کسی کے لیے تکلیف کا باعث نہ بنیں ، اگر کوئی ہوائی فائرنگ یا دنگا فساد کرتے ہوئے دیکھا گیا یا پکڑا گیا تو اس پر اقدام قتل کی دفعہ 324 کے تحت مقدمہ درج کیا جائے گا،نئے سال کی آمد کے موقع پر سادہ لباس پولیس اہلکاروں کو بھی تعینات اور ویڈیو ریکارڈ کی جائے گی۔
کراچی پولیس چیف نے عوام سے اپیل کی ہے کہ وہ ہوائی فائرنگ یا دنگا فساد دیکھیں تو ویڈیو بنا کر واٹس ایپ نمبر 03302699211 پر فوری شیئر کریں اطلاع دینے والےکا نام صیغہ راز میں رکھا جائیگا اسکےساتھ ساتھ حوصلہ افزائی اور انہیں نقد انعام سےبھی نواز جائے گا کراچی پولیس چیف نے خادم حسین رند نے سال نو کے موقع پر ہوائی فائرنگ کے واقعات کے تناظر میں تمام زونل ڈی آئی جیز کو ہوائی فائرنگ کے مرتکب افراد کے خلاف سخت قانونی کارروائی کی ہدایات جاری کر دی ہیں۔
کراچی: روپے کے مقابلے میں امریکی ڈالر مزید سستا ہوگیا۔
باغی ٹی وی: اسٹیٹ بینک آف پاکستان کی جانب سے جاری اعداد و شمار کے مطابق آج بدھ کو کاروبار کے اختتام پرانٹربینک میں ڈالر کی قیمت میں مزید 17 پیسے کی کمی ریکارڈ کی گئی اسٹیٹ بینک آف پاکستان کے مطابق انٹربینک میں کاروبار کے اختتام پر ایک امریکی ڈالر 282 روپے 20 پیسے پر بند ہوا،آج صبح کاروبار کے آغاز پر انٹربینک میں روپے کے مقابلے میں ڈالر مزید 24 پیسے سستا ہو کر 282 روپے 13 پیسے پر ٹریڈ کر رہا تھا،جبکہ گزشتہ کاروباری روز اختتام پر ڈالر 282 روپے 37 پیسے پر بند ہوا تھا۔
دوسری جانب مقامی اور عالمی مارکیٹ میں سونے کی قیمت میں اضافہ ریکارڈ کیا گیا ہے آل پاکستان جیمز اینڈ جیولرز ایسوسی ایشن کے مطابق سونے کی فی تولہ قیمت میں یکدم ایک ہزار روپے کا اضافہ ہوا ہے جس کے بعد فی تولہ سونے کا بھاؤ 2 لاکھ 20 ہزار 600 روپے کا ہوگیا 10 گرام سونے کا بھاؤ 857 روپے بڑھ کر 1لاکھ 89 ہزار 129 روپے ہے، بین الاقوامی صرافہ مارکیٹ میں 13 ڈالر اضافے سے سونے کا بھاؤ2065 ڈالر فی اونس ہے۔
ادھر پاکستان اسٹاک ایکسچینج میں ریکارڈ گراوٹ کے بعد تیزی آگئی بدھ کو 100 انڈیکس 1692 پوائنٹس اضافے سے 60863 پر بند ہوا ہے، کاروباری دن میں 100انڈیکس 2251 پوائنٹس کے بینڈ میں رہا 100 انڈیکس کی بلند ترین سطح 61009 رہی، بازار میں 66 کروڑ 93 لاکھ شیئرز کا کاروبار ہوا شیئرز بازار کے کاروبار کی مالیت 16 ارب 11 کروڑ روپے رہی، مارکیٹ کیپٹلائزیشن 207 ارب روپے بڑھ کر 8816 ارب روپے ہے،جبکہ گزشتہ روز پاکستان اسٹاک ایکسچینج میں نئے کاروباری ہفتے کا منفی آغاز ہوا تھا کاروبار کے دوران پاکستان اسٹاک ایکسچینج میں شدید مندی کا رجحان رہا اور 100 انڈیکس ریکارڈ 2534 پوائنٹس کم ہوکر 59170 پر بند ہوا ہے۔
پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری کا کہنا ہے کہ پیپلزپارٹی واحد سیاسی جماعت ہے جو ملک کو بچاسکتی ہے، پیپلزپارٹی نے کافی کامیابیاں حاصل کی ہیں-
باغی ٹی وی: گڑھی خدابخش میں سابق وزیراعظم بینظیر بھٹو شہید کی 16ویں برسی پر جلسے سے خطاب میں کہا کہ آج ہم بینظیر بھٹو کی 16ویں برسی منارہے ہیں، پیپلزپارٹی کے جیالے دنیا کو پیغام دے رہے ہیں، 16 سال پہلے کچھ قوتوں نے بینظیربھٹو کو شہید کیا، وہ سمجھتے تھے کہ بینظیر کو شہید کرکے قوم کی آواز دبا دیں گے۔
بلاول بھٹو زرداری نے کہا کہ تمام صوبوں کی نمائندگی کرتی ہے، ہم الیکشن کو الیکشن اور مقابلہ سمجھتے ہیں ہم الیکشن سے ڈرنے والے نہیں، مقابلہ کرنے والے ہیں،ہم ان میں سے نہیں جو الیکشن کی تاریخ آگے بڑھاتے ہیں اور کاغذات نامزدگی چھین کر بھاگتے ہیں اس بار بھی ہم ڈٹ کے مقابلہ کریں گے اور جیتیں گے، قائدین کو دفن کیا، اس وقت بھی الیکشن لڑنے کے لیے تیار تھے، الیکشن کراؤ، دودھ کا دودھ پانی کا پانی ہوجائے گا، پاکستان کے عوام تیر پر مہر لگا کر منہ توڑ جواب دیں گے، آج بھی کچھ لوگ کسی کے کندھے پر بیٹھ کرسیاست کرنے کی کوشش کررہے ہیں، ہم وہ نہیں جو ڈیل کرتے ہیں وہ نہیں جو مخالفین کے کاغذات چھینتے ہیں۔
بلاول نے کہا کہ پیپلزپارٹی واحد سیاسی جماعت ہے جو ملک کو بچاسکتی ہے، پیپلزپارٹی نے کافی کامیابیاں حاصل کی ہیں، بینظیر بھٹو نے 30 سال جمہوریت کے لیے جدوجہد کی، ذوالفقارعلی بھٹو نے روٹی، کپڑا اور مکان کا نعرہ لگایا آصف زرداری نے بینظیر انکم سپورٹ پروگرام شروع کیا، آصف زرداری نے کہا کہ جمہوریت بہترین انتقام ہے، ایک ڈکٹیٹر کو نکال کر جمہوریت نے اپنا انتقام لیا۔
بلاول بھٹو نے کہا کہ آج پاکستان کے عوام تکلیف میں ہیں، وقت آگیا ہے کہ ایک بار پھر پیپلزپارٹی کی حکومت بنائیں، ملک میں غریبوں کا راج قائم کرنا ہوگا، صرف عوامی راج پاکستان کو مشکلات سے نکال سکتا ہے، غربت اور بے روزگاری تاریخی سطح پر پہنچ چکی ہے، ملکی مسائل کا حل قائد عوام کے منشور میں موجود ہے۔
بلاول بھٹو نے کہا کہ شہید بی بی نے کہا تھا کہ طاقت کا سرچشمہ عوام ہیں پرانےسیاستدان پرانی سیاست کرتی ہیں،یہ ماضی کی سیاسی جماعتیں،ماضی کےسیاست دان ہیں،مستقبل آپ کا ہے،پرانی سیاست کودفن کرکےالیکشن میں جائیں گے،16سال پہلےیہ سفرشروع کیاتھا، اس وقت میں 19سال کا تھا،آپ نےمجھےپیپلزپارٹی کا چیئرمین بنایا،ہرمشکل وقت میں ہم نے جمہوریت کیلئےجدوجہد کی-
بلاول بھٹو نے کہا کہ تمام سیاسی جماعتوں کوایک کرکےسلیکٹڈحکومت کامقابلہ کیا، جمہوریت کوبحال کرنے،دہشت گردی کےمقابلہ کیلئےمشترکاحکومت بنائی، 18ماہ ان کےساتھ حکومت کی،خارجہ سطح پرکام کرکے دکھایا،معیشت،دہشت گردی،جمہوریت میں اتحادیوں کی دلچسپی نہیں تھی، ہم نےفیصلہ کرلیاہےکہ ہمارا اور ان کا راستہ الگ ہے،پیپلزپارٹی اپنےبل بوتے پر تیر کے نشان پر لڑے گی،ہم کبھی کسی امتحان سے پیچھے نہیں بھاگے ہیں-
سابق وزیر خارجہ نے کہا کہ اس کامقابلہ کرنےکیلئےسنجیدگی کی ضرورت ہے،آپس کی لڑائی چھوڑ کوحقیقی مسائل پرتوجہ دینی ہوگی،پرانے سیاست دان آج بھی تقسیم اورنفرت کی سیاست کررہےہیں ایک جیل سےنکلنےکیلئےالیکشن لڑرہاہے،دوسراجیل سے بچنے کیلئے کوئی جیل جائےیا نہیں،عوام اپنےمسائل کاحل چاہئے،10نکات پرعملدرآمد کرلیں توتمام مسائل کا حل نکال سکتے ہیں،پیپلزپارٹی حکومت کی پہلی ترجیح تنخواہوں کو5سال میں دگناکرناہوگا،ہماری حکومت بنی تو غریبوں کے لیے 300 یونٹ تک بجلی مفت فراہم کریں گے، بر بچے کو تعلیم تک رسائی حاصل ہوگی،ہم غریب ترین طبقے کے لیے 300 یونٹ تک سولر سسٹم فراہم کریں گے، ہر ضلع میں گرین انرجی پارکس کھولیں گے، ہر ضلع کو کم قیمت پر بجلی پہنچائیں گے، ہمیں واپڈا اور کےالیکٹرک کی ضرورت نہیں ہوگی، تعلیم اور صحت سب کے لیے ذوالفقار علی بھٹو کا نظریہ تھا، پبلک پرائیویٹ پاٹنرشپ کے تحت صحت کا نظام بہتر بنائیں گے، ذوالفقار بھٹو نے روٹی، کپڑا اور مکان کے نعرے کو حقیقت بنایا تھا۔
ان کا کہنا تھا کہ سیلاب متاثرین کو 20 لاکھ گھر بناکر دیں گے، غریب ترین خواتین کو گھروں کے مالکانہ حقوق دیں گے، اپنی زمین، اپنا مکان کے نعرے کو حقیقت میں تبدیل کریں گے، مخالفین بینظیرانکم سپورٹ پروگرام کا مذاق اڑاتے تھے، آج دنیا مانتی ہے کہ بی آئی ایس پی انقلابی پروگرام ہے، وسیلہ روزگار، وسیلہ حق اور دیگر منصوبوں پرعملدرآمد کریں گے۔
کراچی : پاکستان تحریک انصاف(پی ٹی آئی) کے سابق رکن قومی اسمبلی کیپٹن (ر) جمیل احمد نے مسلم لیگ ن میں شمولیت اختیارکرلی۔
باغی ٹی وی: کراچی میں کیپٹن (ر) جمیل احمد نے ن لیگ کے رہنماؤں کے ساتھ پریس کانفرنس کی اور پارٹی میں شمولیت کا اعلان کیا کیپٹن ریٹائرڈ جمیل احمد پی ٹی آئی کے سابق رکن قومی اسمبلی تھےاس کے علاوہ چیئرمین فشر فوک فورم مہران علی شاہ، حبیب اللہ میمن اور دیگر نے بھی ن لیگ میں شمولیت کا اعلان کیا۔
اس موقع پر ن لیگی رہنما نہال ہاشمی کا کہنا تھاکہ سندھ پر 15 سال سے حکومت کرنے والوں نے ملیر کو تباہی کے سوا کچھ نہیں دیا یہاں کے لوگوں نے ہمیشہ پیپلز پارٹی کو منتخب کیا عوام کو بنیادی سہولیات سے محروم رکھا گیا، ہمیں سندھ کے عوام کی تقدیر بدلنے کے لیے آگے آنا ہے۔
کراچی: صدر موبائل مارکیٹ میں آتشزدگی ، ابتدائی معلومات کے مطابق 80 سے100 دکانیں اور ان میں کروڑوں روپے مالیت کا سامان جل گیا۔
باغی ٹی وی: رات گئے شاہ جہاں موبائل مارکیٹ کی ایک دکان میں آگ لگی آگ اتنی تیز تھی کہ فرسٹ اور سیکنڈ فلور کی دکانوں تک پہنچ گئی اطلاع ملتے ہی فائر بریگیڈ کی گاڑیاں پہنچیں اہلکاروں نے دکانوں کے تالے اور شٹر توڑ کر آگ بجھائی 5 گھنٹے کی جدوجہد کے بعد آگ پر قابو پالیا گیاآتشزدگی کے باعث 100 سے زائد دکانیں متاثر ہوئیں مارکیٹ کے گراونڈ فلور پر 8 سو سے زائد دکانیں موجود ہیں۔
فائر بریگیڈ حکام نے شبہہ ظاہر کیا کہ آگ شاٹ سرکٹ کے باعث لگی ہے، تاہم کولنگ کا عمل مکمل ہونے کے بعد واضح ہوگا کہ آگ کس وجہ سے لگی فائر بریگیڈ ہیڈکوارٹرز کی بجلی کئی گھنٹوں سے بند ہونے کے بعد فائر بریگیڈ ٹیم کو پانی کی سپلائی میں مشکلات کا سامنا کرنا پڑا۔